Küpale Chaw Ngünechen ñi Ngünenien, ¿chem apümkangeay?

1, 2. 1) Ti weda wentru puwlu ñi layal ka ti müleyechi weda dungu Mapu mew, ¿chumngelu trürümfalngeafuy? (Inaduamnge ti adentun tüfachi pagina mu.) 2) Apümkangele ti müleyechi weda dungu, ¿chum duamküleayngün pu mülelu wenu mapu ka Mapu mu?

RAKIDUAMNGE tüfachi dungu mu: kiñe wentru rume wedake dungu femlu elngey ñi langümngeal. Feymu pu soltaw yeeyew chew ñi langümngeal. Ti weda wentru petu mongeley ka tremoley, welu puwi ñi layal.

² Ti müleyechi weda dungu tüfachi Mapu mew trürümfalngeafuy feyti wentru reke epe layalu. Biblia ta feypiley: “Tüfachi mapu ka kom wesake dungu ñi nieel apümngetuay” (1 Juan 2:17). Jewba elkünuy ñi apümngetual tati müleyechi weda dungu pichiñma mu, ka rüf femürpuay. Welu trürngelay chumngechi ñi jusgangen feychi weda wentru ka ti müleyechi weda dungu. Kiñeke che rakiduamafuyngün ti weda wentru ñi nor jusgangenon, feymu chaftudunguafuyngün ñi langümngenoal ti wentru. Welu Jewba welulkakelay ñi jusgaken mu, feymu nor dungu mu elkünuy tañi apümngetual ti müleyechi weda dungu (Deuteronomio 32:4). Pürüm puway ñi apümngetual ti müleyechi weda dungu tüfachi Mapu mew, feymu puwle, kom pu mülelu wenu mapu ka Mapu mu rakiduamayngün ñi norngen Jewba ñi femel. ¡Rume küme duamküleayngün!

 3. Chaw Ngünechen ñi Ngünenien, ¿chem meli dungu apümkayafi?

³ ¿Chem apümkangeay? Kom tati wedake dungu taiñ penieel fill antü tuntelewelay ñi apümkangeal. Tüfa tati “kümeke dungu [Chaw Ngünechen] ñi Ngünenien mu” (Matew 24:14, TNM). Tüfachi chillkatun mu inaduamaiñ meli dungu Chaw Ngünechen ñi Ngünenien ñi apümkayafiel: 1) tati wedake che, 2) fillke norngenochi trokiñche ñi adkünunieel pu che, 3) wedake dungu ka 4) pu che ñi weda felen. Ka inaduamaiñ chumngechi wedalkakeeiñmu, chem chumay Jewba ka chem dungu elkünuay.

 4. ¿Chumngechi wedalkakeeiñmu ti wedake che?

⁴ ¿Chumngechi wedalkakeeiñmu ti wedake che? Ti apostol Pablo feypi: “Epe puwkülele ñi afael ta antü müleay ta kuñiwünngechi dungu”, ka feypi pu wedake che “ñi amulen tañi doy wesalkalen” (2 Timotew 3:1-5, 13). ¿Ngüneduamkeymi ñi rupameken tüfa? Epe kom iñchiñ kutrankakeeiñmew ti wedake che. Ka kiñeke tüfa, ellkalayngün rume ñi weda femken. Kakelu kelluchekelu femfaluwkeyngün, welu weda piwkengeyngün. Ka femngechi weda femngenoliyiñ rume, weda duamelkeeiñmew ñi femken pu wedake che. Kutrankawkeiñ taiñ pefiel ñi weda femngeken pu pichikeche, füchakeche ka kakelu che ñi pepi chaftukenofiel ñi wedalkangewenoal. Tüfachi wedake che, kulliñ kam weküfü reke femkeyngün (Santiaw 3:15). Welu Biblia elukeeiñmew maneluwün, feymu ayüwküleiñ.

 5. 1) Famülke mu, Jewba ¿chem eluñmafi tati wedake che? 2) Pu pinolu küme elkünutuafiel ñi mongen, ¿chem femngeay?

⁵ ¿Chem chumay Jewba? Famülke mu, Jewba eluñmay pu wedake che ñi küme elkünutual tañi mongen (Isaías 55:7). Mapu mew müleyechi wedake dungu pürüm apümkangeay, welu tati wedake che petu kondenangelay. Fey pu pinolu küme elkünutuafiel ñi mongen ka kelluntukufilu ti müleyechi wedake dungu Mapu mew, ¿chem femngeay puwle ti fütra kutrankawün? Jewba apümkayafi engün Mapu mew. Biblia feypi: “Ka pichin antü mu, ti wedake che ngewetulayay engün; eymi puwkintuaymi chew ñi mülekefel, welu mülewetulayay engün üye mew” (Salmo 37:10). Famülke mu, fentren che ellkaniekey tañi weda femün, feymu fentren rupa chumngekelayngün (Job 21:7, 9). Welu Biblia feypieiñmew: “Ngelay chem no rume tañi dewmael ta Ngünechen ñi ellkaleael ta kisu mew. Itrokom dungu fente küme peniengey ta kisu mew, fey kisu mew am felelu taiñ nentudungupuael” (Ebrew 4:13). Feley, iney no rume ellkawlayafuy Jewba mew. Kidu adkintuniey ñi femmeken pu wedake che. Feymu rupale Armagedon, turpu ngewelayay wedake che (Salmo 37:12-15).

 6. Apümkangele pu wedake che, ¿iney montuay? Ka, ¿chumngelu küme dungu ta tüfa?

⁶ Apümkangele pu wedake che, ¿iney montuay? Jewba feypikünuy: “Tati ñomngelu ngen Mapu ngeay engün, ka rüf ayüwküleayngün ñi mülen fentren tüngün”, ka feypi: “Tati pu norngechi che lloway ti Mapu ñi ngen-ngeal engün, ka rumel müleayngün fey mu” (Salmo 37:11, 29). ¿Iney am tati pu “ñomngelu” ka pu “norngechi che”? Tüfachi pu che ñomngey küme piwke mu kimürpufilu am ta Jewba ka inaniekefilu ñi feypin, ka norngeyngün rume ayülu am ñi femal ti kümeke dungu Jewba ñi feypiel. Famülke mu, Mapu mew müley doy wedake che ta norngechi che mu. Welu ti we Mapu mew, müleay re norngechi che ñomngelu, fey engün kiñe küme mülewe elkünutuafingün ti Mapu.

 7. Fillke norngenochi trokiñche ñi adkünunieel pu che, ¿chumngechi wedalkakeeiñmu?

⁷ Fillke norngenochi trokiñche ñi adkünunieel pu che, ¿chumngechi wedalkakeeiñmu? Kiduke pu che femkey wedake dungu Mapu mew, welu doy wedake dungu femkey fillke trokiñche ñi adkünunieel pu che. Fillke religion ngünenkakefingün ta rume fentren che, kimeltukelayngün ti rüf dungu Chaw Ngünechen mu, ñi chumleal ti Mapu ka pu che küpalechi antü mew ka kimeltukey ñi manelfalngenon ti Biblia. Kafey wedake gobierno ngüchaltukukefingün weychan ka ñi awükangeal pu che tañi tuwün mew. Ka weda femfingün pu pofre ka pu pepi chaftukenofilu ñi wedalkangewenoal. Kafey pu ngünenielu ñi doy ülmen chengeal, doyümkefingün ta kiñeke che kam llüm llowkeyngün plata. Ka tati fütrake empresa ayülu ñi re wewal plata podümkefingün ti Mapu ka apümüñmakefingün ñi wülkeel. Ka ñi doy nierpual plata kiñe pichi trokiñche, dikümtukukefingün ti pu che. Feley tati, pu norngenochi trokiñche ñi duam mu rupamekey fentren wedake dungu Mapu mew.

 8. Biblia ñi feypin mu, ¿chumngeayngün pu norngenochi trokiñche?

⁸ ¿Chem chumay Jewba? Biblia mew, pu koylake religion trürümngey kiñe küri domo reke, ti Fütra Waria Babilonia pingelu. Feymu pu gobierno chaftufile pu koylake religion, fey konay ti fütra kutrankawün (Apokalipsi 17:1, 2, 16; 18:1-4). Fey kom tüfachi pu religion apümkangeay. Welu, ¿kakelu norngenochi trokiñche kay? Tüfa engün newen-ngelu ka turpu apümkangenoalu trokingeafuyngün, feymu ti Biblia trürümfi kiñe fütra wingkul kam kiñe wapi reke (papeltunge Apokalipsi 6:14). Welu kom pu gobierno ka trokiñche ñi kelluntukunofiel Chaw Ngünechen ñi Ngünenien apümkangeayngün epe afle ti fütra kutrankawün (Jeremías 25:31-33). Fey ngewelayay norngenochi trokiñche.

 9. ¿Chumngelu maneluwafuiñ ñi küme adkünungeal ti Mapu?

⁹ Apümkangele pu norngenochi trokiñche, ¿chem elkünungeay? Rupale Armagedon, ¿chumngechi adkünungeay ti dungu Mapu mew? Biblia feypi: “Ñi mületuael ta we dewmatuelchi wenu mapu ka we mapu Ngünechen tañi tukulpakünuel, tüfey mew ta kom kümeke nor dungu mületuay” (2 Pedro 3:13). Tati kuyfi wenu mapu adentuley pu norngenochi gobierno, ka ti kuyfi Mapu, pu che ñi ngünenieel engün. Feymu apümkangele engün, elkünungeay ta “we dewmatuelchi wenu mapu”, tüfa kiñe we gobierno, Chaw Ngünechen ñi Ngünenien, koneltulelu Jesukristo ka pu 144.000 ñi trür ngünenieal engün. Ka elkünungeay ti “we mapu”, tüfa tati pu che ñi ngünenieaetew Chaw Ngünechen ñi Ngünenien. Jesus ka pu 144.000 inayentuafingün ta Jewba, “kisu am ayükenolu ti welulkalechi dungu”, feymu küme adkünuafingün pu che (1 Korintio 14:33). Kafey kümeke wentru longkoleay Mapu mew, tüfa inanieayngün ñi feypietew Jesus ka pu 144.000 (Salmo 45:16). Apümkangele pu norngenochi trokiñche, kom rüf küme feleaiñ. Müleay kiñe adkünuelchi trokiñche müten, kiñewkülelu ka rumel norngelu.

10. 1) Tami mülen mu, ¿chem wedake dungu femkey pu che? 2) Tüfachi wedake dungu, ¿chumngechi wedalkakeeymu ta eymi ka tami pu che?

¹⁰ ¿Chumngechi wedalkakeeiñmew ti wedake dungu? Famülke mew, fentren che femkey pekan kudumuwün, norngelayngün ka rume kewatufengeyngün. Kafey ti adngelluwün dungu mu, Chaw Ngünechen ñi ayükenoel doy ayükefi ta che, ka illamkangekey Jewba ñi elkünuel chem ñi kümen ka ñi kümenon (Isaías 5:20). Doyelchi may pu chaw müley ñi kuñiwtukuafiel tañi pu pichikeche. Pu che yamkelafi Jewba ñi ngülam, feymu kom pu poyekefilu ta Jewba müley taiñ kuñiwtukuafiel taiñ weniyefiel ta kidu.

11. Jewba ñi apümkafiel ta Sodoma ka Gomora, ¿chem kimeltueiñmu?

¹¹ ¿Chem chumay Jewba? Rakiduamnge ñi femün Jewba, ngüneduamfilu ti wedake dungu ñi femken pu che Sodoma ka Gomora waria mu (papeltunge 2 Pedro 2:6-8). Lot ñi lof mapu mu, pu che rume wedake dungu femkefuy, welu Lot nor chengefuy, feymu kidu ka tañi pu che rume kutrankawkefuyngün. Jewba apümkafi kom feychi lof mapu ñi mülewenoal wedake dungu. Femngechi pengeli chem ñi femngeal pu wedake che. Feychi antü mu, Jewba apümkafi pu che femkelu pekan kudumuwün, ka femngechi femay apümkafile ti müleyechi wedake dungu tüfachi Mapu mew.

12. Apümkangele ti wedake dungu, ¿chem küpa femaymi?

¹² Apümkangele ti wedake dungu, ¿chem elkünungeay? Ti we Mapu mew fentren ayüfalchi küdaw nieaiñ. Kiñe küme mülewe elkünutuafiyiñ ti Mapu ka dewmayaiñ ruka ñi müleal iñchiñ ka taiñ pu che. Kafey llowafiyiñ pu wiñomongetualu ka kimeltuafiyiñ Jewba mew ka ñi femel taiñ kümelkayaetew (Isaías 65:21, 22; Hecho 24:15). Nieaiñ fentren kümeke küdaw taiñ ayüwülaetew ka taiñ püramyeafiel ta Chaw Jewba.

13. Ñi femün mu Adan, Eva ka Weküfü, ¿chem rupamekeiñ?

¹³ Ti weda felen ñi mülen Mapu mew, ¿chumngechi wedalkakeeiñmew? Famülke mew müley wedake dungu ka norngenochi trokiñche, feymu müley weda felen. Kom kutrankawkeiñ mülen mu weychan, filla, üdewün, kutran ka lan. Kom tüfachi dungu müley Adan, Eva ka Weküfü tañi kayñetufiel mu ta Jewba, feymu kom kutrankawkeiñ.

14. Ti weda felen ñi mülen, ¿chem chumay Jewba?

¹⁴ ¿Chem chumay Jewba? Tüfa kiñeke dungu. Apümafi ti weychan. Biblia feypi: “Küpamün, ka adkintunieafimün Jewba ñi femmeken, afmatufalchi dungu ñi femkeel Mapu mew. Apümkaniefi ti weychan itrokom Mapu mu. Watrokafi ti arku ka teyfükafi pu wayki; kütral mu lupümyefi weychan kareta” (Salmo 46:8, 9). Ngewelayay kutran (Isaías 33:24). Lawelayay pu che (Isaías 25:8). Ka apümafi ti filla (Salmo 72:12-16). Jewba apümafi itrokom taiñ kutrankakeetew. Eluñmalayafi rume taiñ weda femaetew Weküfü ka tañi wedake püllü (Efesio 2:2).

15. Rupale Armagedon, ¿chem ngewelayay?

¹⁵ Rakiduamnge ñi chumleal ti Mapu mülewenole weychan, kutran ka lan no rume. Ngewelayay weychafe, tralka, pital, lawentuchefe ka eltun no rume. Mülelayay wedake che, feymu duamtulayaiñ soltaw kam alarma, fey duamfalngewelayay chi malal kam sechuwe. Kom taiñ afküduamelkeetew ngewelayay.

16, 17. 1) Ngewenole wedake dungu, ¿chum duamküleayngün pu mongetripalu? Feypinge kiñe pengelün dungu. 2) Apümkangele ti weda müleyechi dungu Mapu mew, ¿chem müley taiñ femal ñi montutripayal?

¹⁶ Ngewenole weda felen, ¿chum duamküleaiñ? Küdawngeafuy taiñ rakiduamal tüfa. Fentren tripantu femngechi feleiñ, feymu ngüneduamlayafuiñ chi tunte taiñ weda duamelkeetew. Rakiduamnge tüfa: kiñe che niele ñi ruka inaltu kiñe karetera mu chew ñi miyawken fentren auto, rupachi tripantu weda duamel-layafeyew pu auto ñi rümrümken. Ka femngechi, kiñe che ñi ruka püllelele chew ñi elngekem ti pod, fey wimtuleafuy ka weda duamel-layafeyew ti weda nümün. Welu rümrümwenofule pu auto kam weda nümüwenofule, fey rume küme duamküleafuy chi ti che. Ka femngechi duamküleaiñ Chaw Jewba apümkafile ti weda dungu.

¹⁷ Feymu apümkangele ti weda felen, ¿chem elkünungetuay? Salmo 37:11 feypi: “Rüf ayüwküleayngün ñi mülen fentren tüngün”. Femngechi ayükey Jewba taiñ feleal, tüfa rume yafülduamkeeiñmew. Tüfachi wedake antü afküduamelkeeiñmu, feymu eluwküleaiñ ñi püntütripanoal Jewba mu ka tañi trokiñche. Rume falin-ngey taiñ nieelchi maneluwün, feymu rakiduamtukunieafiyiñ, rüf mupiltunieafiyiñ, ka nütramkalelafiyiñ pu che (1 Timotew 4:15, 16; 1 Pedro 3:15). Femngechi femliyiñ, montutripayaiñ apümkangele ti weda müleyechi dungu Mapu mew, ka rumel mu ayüwküleaiñ.