¿Falintukefimi ti mongen Chaw Ngünechen reke?

1, 2. a) ¿Chem falin yewün elueiñmew Chaw Ngünechen? b)Fachantü, ¿chumngelu fente falin-ngey taiñ rakiduamal chumngechi inayafiel Biblia tañi kümeke ngülam?

TAIÑ Chaw Ngünechen elueiñmew kiñe falin yewün: ti mongen taiñ adümuwküleal, femngechi taiñ inayentuñmayafiel ñi chumngen (Génesis 1:27). Taiñ eluetew, iñchiñ pepi kimürpukeiñ chumngechi taiñ kellukeetew Biblia tañi kümeke ngülam. Inaniefiliyiñ, fey doy küme amulerpuay taiñ weniyefiel ta Jewba, doy piwkeyerpuafiyiñ ka kimnieaiñ ñi “ngüneduamafiel [...] chem dungu ñi kümen kam ñi kümenon” (Ebrew 5:14).

² Fachantü müna falin-ngey taiñ ngüneduamal chumngechi inayal Biblia tañi kümeke ngülam. Mapu mew müleyechi dungu adümfalngelay, feymu kiñe ley no rume pepi ngünenielay kom tati dungu ñi rupameken. Inaduamaiñ tati medicina, doyelchi may pünengele ti mollfüñ fillke dungu ñi kümelkatual tati pu che. Iñchiñ küpa inaniefiyiñ Jewba tañi werkün dungu, feymu müna duamtunieiñ taiñ kimal tüfachi dungu. Fey, ñi tüngküleal taiñ rakiduam, ka taiñ rumel müleal Chaw Ngünechen ñi piwkeyechen mew, ¿chumngechi küme dulliaiñ tüfachi dungu mu? Müley taiñ küme kimnieafiel Biblia tañi ngülam nüwkülelu ti mollfüñ dungu mu (Proverbios 2:6-11). Inaduamaiñ kiñeke ngülam.

3, 4. Tati Biblia mew, ¿chew pengelngey wüne mu ñi rume yamfalngen ti mollfüñ? Ka, ¿chem epu ngülam nüwküley tüfa?

³ Jewba feypi ñi nüwkülen tati mongen mollfüñ engu, ka feypi ñi rume yamfalngen. Tati wünen rupa Jewba ñi feypikünuel tüfachi dungu, pichin mu rupalu ñi langümfiel Kain tañi peñi Abel. Chaw Ngünechen feypifi ta Kain: ‘Tami peñi ñi mollfüñ, tami wütrulel ta mapu mew, wirarkülen ngillatunieenew tami kutrankayaetew’ (Génesis 4:10). Rume kutrankawün-ngey ñi müntuñmangeel ta Abel ñi mongen. Jewba ñi adkiñ mew, Abel ñi mongen mülefuy tañi mollfüñ mu (Ebrew 12:24).

⁴ Dew rupalu tati fütra mangiñ ko Noe tañi antü mu, Chaw Ngünechen eluñmay tañi ingeal ti ilo kulliñ, welu ka feypi: “Welu iñmalayafimun ñi ilo tati entumollfüñnoelchi kulliñ, feyti mollfüñ am ta mongen. [...] Ka chem wentru rume langümchele, ka feley ñi layael” (Génesis 9:4-6). Tuwlu am iñchiñ Noe mu, müley taiñ inanieal tüfachi werkün dungu. Tüfachi dungu küme kimeltueiñmew feychi dungu Jewba ñi küpa pengelelfiel ta Kain: tati mollfüñ adentuley kom tati müleyelu Mapu mew ñi mongen. Ka küme pengelkey Jewba, Eluniefilu am ti mongen, feymu kastigayafi tati pu langümchekelu ka kom tati pu yamnienofilu ti mongen ka ti mollfüñ (1 Timotew 6:13).

 5. Tati Ley elungelu ta Moyse, ¿chumngechi pengeli ñi rume yamfalngen ti mollfüñ ka ñi rume falin-ngen?

⁵ Tati Ley elungelu ta Moyse, pengeli ti mongen ñi mülen mollfüñ mew, ka ñi rume yamfalngen ti mollfüñ. Levítico 17:10, 11 mu, Jewba feypi: “Chem wentru rume [...] ifile chem mollfüñ rume, iñche famentuafiñ feyti che, ka apümkayafiñ tañi trokiñche mew. Tati pu mongelelu am ñi mongen müley tati mollfüñ mew, ka eymün ngealu iñche ta elkünufiñ ti mollfüñ tati llangüll mew tamün liftuñmangeal tamün kulpan mu, tati mongen mülelu am ta mollfüñ mu, tüfa liftukey ti kulpan” (inaduamnge ti wichulechi dungu “Tati mollfüñ liftuñmakeeiñmew taiñ kulpan”).a

 6. Petu ñi ingenon kiñe ilongeelchi kulliñ, ¿chumngelu fente falin-ngey ñi wütrulngeal ti mollfüñ mapu mew? (Inaduamnge ti wichulechi dungu “Yamnieñmayafiyiñ tati pu kulliñ ñi mongen” mülelu.)

⁶ Tati mollfüñ chalintukungenofule ti llangüll mew, mülefuy ñi wütruafiel mapu mew, femngechi wiñolelngetuafuy reke tati mongen ta Chaw Ngünechen, tati rüf Ngen-ngelu (Deuteronomio 12:16; Ezequiel 18:4). Ka müley taiñ rakiduamal: tati pu israelche mülefuy ñi wütruafiel kom ti mollfüñ, welu duamfalngelafuy ñi kütrüafiel reke ti kulliñ ñi mülewenoal kiñe pichin no rume ti mollfüñ ilo mu. Tati kulliñ ñi langümfiel mülefuy ñi pürüm entumollfüñngeal, fey wüla ingeafuy ti ilo, femngechi tañi rakiduam tüngküleafuy pengelkelu am ñi yamniefiel tati Wülkelu ti mongen.

 7. David, ¿chumngechi pengeli ñi yamniefiel ti mollfüñ?

⁷ David küme kimürpuy tati pu ngülam nüwkülelu Jewba ñi wülkeelchi ley ñi ingenoal ti mollfüñ, feymu Chaw Ngünechen feypi “tüfachi wentru ta ayüduamafiñ” (Hecho 13:22). Kiñe rupa, müna wüywülefuy. Fey küla tañi pu weychafe, kewalen konpuyngün tati pu filisteo weychafe mu ñi entumeal ko kiñe rüngan ko mew, ñi yelelafiel ta David. ¿Chumi David? Kidu ta feypi: “¿Pütokoñmayafun tüfachi pu wentru ñi mollfüñ, wültukulu engün reke ñi mongen ñi amun mu?”. David trokifi ti ko tüfachi pu weychafe ñi mongen reke. Feymu, müna wüywüfulu rume, “wütrulelfi ta Jewba” (2 Samuel 23:15-17).

8, 9. Elkünungelu ti kristiano trawünche wünen siglo mew, Jewba ¿petu rakiduamniefuy ñi rume yamfalngen ti mongen ka mollfüñ? ¿Chumngelu femngechi feypiafuymi?

⁸ Rupalu 2.400 tripantu Noe ñi llowel ti werkün dungu ñi ingenoal mollfüñ, ka 1.500 tripantu rupalu ñi elkünungeel Moyse ñi Ley, tati Kiñewkülechi Ngünenielu tati pu kristiano mew, Jewba ñi duam mew wirintukuyngün: “Chaw Ngünechen tañi newen taiñ ngüyuletew, iñchiñ kümelu trokifiyiñ taiñ werkünoafiel tamün femal kakelu küdawngechi dungu, welu may tamün femal tüfachi duamfalchi dungu müten: ngünewkülemün tamün inoael ti ilo kulliñ ti langümelngeel tati pu dewmaelchi adentun ngealu, ka ngünewkülemün mollfüñ dungu mew, ka entumollfüñngenoelchi kulliñ no rume ñi ingenoael, ka fillke pekan kudumuwün eluñmakenolu Ngünechen ñi ley” (Hecho 15:28, 29, TNM).

⁹ Feley, feychi antü mu tati Kiñewkülechi Ngünenielu küme kimniefuy ñi rume yamfalngen ti mollfüñ, ka tuchi weda pünefilu, fey fütra kulpay, tati pu poyekefilu reke ti adentun kam tati pu femkelu fillke pekan kudumuwün. Iñchiñ ka feyentukeiñ tüfachi dungu. Feymu taiñ küme dullial chumngechi taiñ püneafiel ti mollfüñ, küme ngüneduamafiyiñ Biblia tañi werkün dungu, femngechi taiñ ayüwülafiel ta Jewba.

10. Iñchiñ, pu Dungukelu Iney Ngen Jewba, ¿eluwkeiñ taiñ tukulelngeal taiñ kuerpu mew mollfüñ kam kiñe tañi meli trokiñ ñi wüdamngeel?

¹⁰ Iñchiñ, pu Dungukelu Iney Ngen Jewba, inanieiñ Chaw Ngünechen tañi werküelchi dungu, “ngünewkülemün mollfüñ dungu mew” feypilelu. Feymu, wülkelaiñ taiñ mollfüñ kakelu che ñi tukulelngeal kuerpu mu, ka iñchiñ eluwkelaiñ taiñ tukulelngeal mollfüñ, ka eluwkelaiñ taiñ entungeelchi mollfüñ ñi ngülümniengeal taiñ tukulelngeal ka antü mu. Kafey, tati mollfüñ wüdamngey meli trokiñ mu: globulos rojos, globulos blancos, plaquetas ka plasma pingelu. Iñchiñ ka femngechi llowkelaiñ taiñ tukulelngeal kiñe no rume tüfachi meli trokiñ.

11. ¿Chem dungu mu ñi pünengeel ti mollfüñ, kiduke pu kristiano müley ñi dullial ñi femal?

¹¹ Famülke mu, globulos rojos, globulos blancos, plaquetas ka plasma mu entungekey kangelu doy pichike trokiñ ñi pünengeal lawentun mu. ¿“Mollfüñ” trokiafuiñ tüfachi pichike trokiñ? ¿Llowafuiñ taiñ tukulelngeal? Kiduke pu kristiano müley ñi dullial chem tañi femal. Kafey müley kakelu lawentun pünekefilu kidu taiñ mollfüñ, fey tüfa kiñeke: ti hemodialisis, hemodilucion ka recuperacion de sangre pingelu. Kiduke pu kristiano müley ñi dullial tañi llowal kam llownoal tüfachi lawentun, welu ngülümngenole müten ñi mollfüñ (inaduamnge ti Doy Kimngeam pingechi dungu, “Pichike trokiñ nentungelu mollfüñ mew ka fillke lawentun pünekefilu taiñ mollfüñ”).

12. Feychi dungu mu kiduke pu kristiano ñi dullial tañi rakiduam mew, ¿tunte müley taiñ falintuafiel taiñ dulliel, ka chem kelluaeiñmu taiñ küme dullial?

¹² Jewba, ¿tunte falintuniefi kiduke pu kristiano tañi dulliel? Müna falintuniefi llemay, kidu müna duamtuniey chem taiñ rakiduamkülen ka chumngelu taiñ dulliel kiñe dungu. Biblia feypi: “Eymi feypilmi: ‘Welu iñchiñ kimlafuiñ tüfachi dungu’, tati ngüneduamkelu ti piwke, ¿rüf ngüneduampelayafuy? Feley llemay, tami lelinieetew kimürpuay tati, ka kullituafi kiduke ti pu che ñi femkeel” (Proverbios 24:12). Feymu, petu taiñ dullinon kiñe lawentun dungu, ¿chumafuiñ? Wüne, müley taiñ ngillatuafiel ta Chaw Jewba ka küme ngüneduamal feychi lawentun dungu, feymu taiñ rakiduam ñi inanieel Biblia tañi ngülam ngüyulaeiñmu taiñ dullial (Romanu 14:2, 22, 23). Ngelay taiñ dikümtukungeal taiñ inanieal kangelu che ñi rakiduamkülen, ka ngelay taiñ ramtuafiel kakelu pu peñi kam lamngen chem ñi chumafel. Tukulpayaiñ, “kiñeke kisuke ta iñchiñ feley taiñ nentudunguael Ngünechen mew” (Romanu 14:12; inaduamnge ti wichulechi dungu “¿Yamfalngelu trokifiñ ti mollfüñ?”).b

13. Biblia tañi ngülam ka tañi ley dungu, ¿chem pengelkey Jewba mew? Feypinge kiñe pengelün dungu.

¹³ Biblia tañi ngülam ka tañi ley dungu pengelkey Jewba ñi nieel fütra kimün tañi wülkeel ley dungu, ka ñi piwkeyechefengen, kiñe Chaw reke, müna duamtuniefilu tañi pu che ñi kümelkaleal (Salmo 19:7-11). Tati pu tukulelngelu mollfüñ, newe küme tripalayafuy ñi tremotual, welu iñchiñ montuluwafuiñ feychi dungu mu inafiliyiñ Jewba ñi werküelchi dungu feypilelu taiñ “ngünewal [...] mollfüñ dungu mew”, tüfachi werkün dungu Jewba feypilafuy rume lawentun dungu mu (Hecho 15:20, TNM). Feymu, famülke mew fentren lawentuchefe pepikawkülelu feypikeyngün ñi doyümfalngen ñi pünengenoal mollfüñ ñi küme operayal. Ñi feypingeel mu tüfachi dungu, kom pu rüf kristiano ngen doy maneluwkeiñ Jewba mu fentren kimün ñi nieel ka ñi piwkeyechefengen, kiñe Chaw reke. Biblia feypi: “Doy alüpüralelu am ti kallfü wenu tati Mapu mew, ka femngechi iñche tañi rüpü doy alüpüraley tamün rüpü mew, ka iñche ñi rakiduam doy alüpüraley tamün rakiduam mew” (Isaías 55:9; Juan 14:21, 23).

14, 15. a) ¿Chem werkün dungu pengeli Chaw Ngünechen ñi duamtuniefiel tañi pu che? b)¿Chumngechi inayafuiñ tati ngülam nüwkülelu tüfachi werkün dungu taiñ kuñiwtukuwküleal?

¹⁴ Kuyfi Israel mapu mu, Jewba fillke werkün dungu mew pengelkefuy ñi duamtuniefiel tañi pu che ñi kümelkaleal. Kiñe pengelün dungu, feypifi tati pu israelche ñi femal kiñe malal wente tañi ruka mew. Tati pu che fill dungu femkefuy wente ñi ruka mu, feymu dewmalelngekefuy kiñe malal tati pu che ñi trananagpanoal (Deuteronomio 22:8; 1 Samuel 9:25, 26; Nehemías 8:16; Hecho 10:9). Kafey feypifi ñi küme llüwatunieafiel tati pu wapo toro (Éxodo 21:28, 29). Tati pu femkenolu tüfachi werkün dungu, pengelkefuyngün pichin no rume ñi falintufiel kakelu pu che ñi kümelkaleal, kafey kulpakonafuy ñi lan mu kiñe che.

¹⁵ ¿Chumngechi inayafuiñ tati ngülam nüwkülelu tüfachi werkün dungu mu? Rakiduamafuymi chumngechi tami küme elkünuafiel ka amulnieafiel tami auto, tami küme elkünutuafiel tami ruka ka chew tami küdawken, chumngechi tami kuñiwtukual tati pu kulliñ tami ruka mew mülelu, ka chem adngelluwün dungu tami dulliel. Kiñeke trokiñ mapu mew, fentren wechekeche lakeyngün ñi rupan mu kiñe allfün dungu ñi kuñiwtukunofiel ñi mongen engün. Feymu, kom tati pu wechekeche ayülu ñi rumel müleal Chaw Ngünechen ñi piwkeyechen mew, müley ñi rume falintunieafiel tañi mongen, ka adngelluwkelayngün kuñiwün-ngechi dungu mu. Ka rakiduamkelay “ñi wechengen mu, chem no rume allfül-layaenew”. Feymu, konkenolu am kuñiwün-ngechi dungu mu, doy ayüwün-ngechi mongen yenieyngün (Eclesiastés 11:9, 10).

16. ¿Chem ngülam ñi pengelkeel ti Biblia kelluafeiñmu taiñ kimal ñi kümen kam ñi kümenon angkanentupüñeñal? (Ka inaduamnge ti kimal dungu.)

¹⁶ Chaw Ngünechen rume falintuniefi tati pu we püñeñ ñi mongen, petu ñi choyüngenon kütu. Tati Ley elungelu Moyse, pengeli chem ñi chumngeal kiñe che ñi allfülfiel kiñe domo niepüñeñkülelu. Tati domo kam tañi püñeñ lafule, fey tati che kulpay ñi langümfiel mu, fey mülefuy tañi kullitual reke “kidu ñi mongen mu”. Biblia feypi: “Epu wentru kewatumekele ka tuntukufile engu kiñe domo niepüñeñkülelu, ka fey allfün mew angkanentule ñi püñeñ, welu ti domo ka ñi püñeñ lanole engu, feyti wentru müley ñi kullitual tüfachi allfün mew. Welu lale ti domo kam ñi püñeñ, fey ti wentru müley tañi kullitual kidu ñi mongen mu” (Éxodo 21:22, 23).c Famülke mu rume fentren pu domo ñi kidu ngünewün mu, angkanentupüñeñkeyngün, femngechi ñi küdawtunoal ñi tremümafiel ka kiñe pichiche ñi reñma mu kam nienoal kiñe püñeñ no rume. Fentren tüfachi pu domo femngechi femkeyngün yenielu am kiñe podngechi mongen, ka ayünieyngün ñi amuleal tüfachi weda mongen mu. Jewba peniefilu am kom tüfachi dungu, müna weñangkünagkey.

17. ¿Chumngechi yafültukuafuiñ kiñe domo angkanentupüñeñlu petu ñi kimnofiel Biblia tañi rüf dungu?

¹⁷ Welu, kiñe domo angkanentupüñeñlu petu ñi kimnofiel Biblia tañi rüf dungu, ¿chumafuy? ¿Rakiduamafuy “Chaw Ngünechen turpu kutranpiwkeyelayaenew”? Femlay llemay. Kom tati pu rüf wiñorakiduamtulu ñi piwke mu, maneluwküleafuy Jewba mu ñi wiñoduamtuaetew, tañi Fotüm ñi wütruelchi mollfüñ mew (Salmo 103:8-14; Efesio 1:7). Jesus kütu feypi: ‘Iñche küpalan tati pu küme piwkekawün-ngelu mew, welu may tati pu kulpafe mew, fey ñi wiñorakiduamtuael engün’ (Luka 5:32).

18. Tati Biblia, ¿chumngechi pengeli chem dungu mew ñi langümngeel fentren che?

¹⁸ Jewba feypikeeiñmew taiñ wedalkanoafiel kakelu pu che. Welu feyka müten no. Ka feypikeeiñmew taiñ turpu üdechekenoal, fentren che langümngelu am ñi üdengeel mu. Feymu tati apostol Juan ngüfetueiñmew: “Kom tati üdekelu tañi peñi kam lamngen fey ta kiñe langümchefe reke feley” (1 Juan 3:15). Tati üdechekelu weda duamniefi kiñe che, ka “pewmangen may layay” pikey engün. Tati nielu üdewün, re weda ngünen mew feypiafuy “Chaw Ngünechen müley ñi kastigayafiel wedake dungu femlu am” (Levítico 19:16; Deuteronomio 19:18-21; Matew 5:22). Feymu müna falin-ngey taiñ entual ti piwke mew ti wedake rakiduam taiñ nieel (Santiaw 1:14, 15; 4:1-3).

19. Tati inanielu ñi mongen Biblia tañi falin ngülam mu, ¿chem kimeltuafeyew Salmo 11:5 ka Filipense 4:8, 9?

¹⁹ Kafey, falintufiliyiñ ti mongen Chaw Ngünechen reke ka ayüliyiñ taiñ rumel müleal kidu ñi piwkeyechen mew, müley taiñ kiñe pülekünual chem dungu rume nüwkülelu ti kewan dungu mu. Salmo 11:5 feypiley: Jewba “üdeniefi kom tati piwkeyefilu ti kewan dungu”. Tüfachi dungu ñi feypiel Biblia pengelkeeiñmew chem ñi rakiduamkülen Jewba, welu ka kimeltueiñmew kiñe falin ngülam ñi ngüyulaetew taiñ mongen: kiñeke adngelluwün dungu yeafeiñmew taiñ ayüwmafiel ti kewan dungu, feymu rüf piwkeyefiliyiñ ta Chaw Ngünechen llowlayafiyiñ tüfachi wedake adngelluwün. Ka femngechi Biblia ta feypiley Jewba fey tati “küme tüngün wülkechi Ngünechen”, feymu kom iñchiñ tati pu poyekefilu ta Jewba müley taiñ nieal taiñ longko mu ka piwke mu re kümeke rakiduam, kom tutelu ñi ayüngeal, kom kümeke ka püramyefalchi dungu ka kom tati dungu kellukelu ñi tüngküleal (papeltunge Filipense 4:8, 9).

20, 21. Pu kristiano, ¿koneltukeyngün am tati politiko dungu mu ka negosiakelu ñi ngünenieel Weküfü? ¿Chumngelu?

²⁰ Chaw Ngünechen ñi adkiñ mew, tati pu che ñi ngünenieetew Weküfü kulpakoni ñi lan mu fentren che. Biblia feypi tati pu ngünenielu, kiñe wapo weda kulliñ reke feley, ka langümfi rume fentren che, tati pu poyekefilu ta Jewba kütu (Daniel 8:3, 4, 20-22; Apokalipsi 13:1, 2, 7, 8). Tati pu fütrake negosiakelu ka pu adümuwkelu ciencia kiñewingün tati pu ngünenielu engün ñi dewmayafiel rume wedake arma, fey ñi wewal rume fentren plata. Feyngey tati, “kom tüfachi chüf mapu ñi ngünenieetew tati weküfü ñi pepiluwün” (1 Juan 5:19).

²¹ Welu Jesus tañi pu inanieetew kulpakonkelayngün ñi lan mu kakelu pu che, kidu engün am koneltukenolu tüfachi Mapu tuwün pu che mew, ka reyükonkelayngün politiko dungu mew, ka weychan mu (Juan 15:19; 17:16).d Kafey, kayñetungele engün rume, inayentuniefingün ta Kristo ka pofolkawkelayngün, welu may piwkeyefingün tañi pu kayñe ka ngillatunieñmafingün kütu (Matew 5:44; Romanu 12:17-21).

22. Pu kristiano, ¿koneltukeyngün am tati pu religion tüfachi Mapu mu? ¿Chumngelu?

²² Welu, doyelchi may, pu rüfngechi kristiano reyükonkelaiñ tati koylake religion Mapu mew mülelu, ‘tati Fütra Babilonia’ pingelu, tüfa am doy kulpakonlu fentren che ñi lan mu. Biblia feypi kidu ñi wütrulel “tati pu pelon wentru tañi mollfüñ ka tati pu koneltuleyelu Ngünechen tañi pu trokiñche mew, ka femngechi itrokom mapu mew langümelchi pu che”. Feymu Chaw Ngünechen ngüfetunieeiñmu: “Tripamün ta tüfachi waria mew, eymün ta iñche ñi trokiñchengelu” (Apokalipsi 17:6; 18:2, 4, 24).

23. Tati pu tripalu ti Fütra Babilonia mu, ¿chem müley ñi femal?

²³ Tati pu tripalu ti Fütra Babilonia mew müley ñi wirintukulewenoal ñi üy feychi religion mu. Welu feyka müten no. Ka müley tañi üdeafiel ti wedake dungu ñi llowkeel tati koylake religion ka tati wedake dungu eluwkelu pu che ñi dewmayal, fey tüfa kiñeke, femal fillke pekan kudumuwün eluñmakenolu Ngünechen ñi ley, koneltual politiko dungu mew ka nieal fentren chemkün fente ñi diñmawün mu. Biblia feypi: “Awem, eymün tati pu piwkeyeniefilu ta Jewba, üdeafimün tati wedake dungu. Kidu ta kuñiwtukunieñmafi ñi mongen tañi pu püntütripakenoetew; montulkefi engün tati pu wedake che mew” (Salmo 97:10; Apokalipsi 18:7, 9, 11-17). ¡Rume fentren che langümngey ti wedake dungu mu ñi femün tati koylake religion!

24. ¿Chumngelu Jewba fürenekeeiñmew ñi wiñorakiduamtuel taiñ kulpan mew ñi lan mu kakelu pu che?

²⁴ Petu taiñ Dungukelu Iney Ngen Jewba ngenon, kom iñchiñ kiñeke dungu mew kellukonkefuiñ Weküfü ñi ngünenieelchi pu che, feymu kidu engün am kulpalu ñi lan mu fentren che, iñchiñ ka koneltulekefuiñ reke kidu engün ñi kulpan mu. Welu, küme elkünutuiñ taiñ mongen, mupiltuleiñ Jesus ñi lan mu, ka wültukuiñ taiñ mongen ta Chaw Ngünechen mu. Feymew llemay, Chaw Ngünechen fürenekeeiñmew ka ingkakeeiñmew fillke dungu taiñ katrütunoaetew ñi weniyeafiel (Hecho 3:19). Kuyfi, petu ñi wirintukungeel ti Biblia, mülefuy kiñeke waria chew ñi ellkawam kiñeke che, tüfachi waria tukulpalelkeeiñmu chumngechi taiñ ingkañpeetew Jewba famülke mew (Números 35:11-15; Deuteronomio 21:1-9).

25. ¿Chem dungu mülekefulu Israel mu tukulpalelkeeiñmu Jewba ñi elkünuel taiñ montulngeal?

²⁵ ¿Chumal elkünungey feychi waria? Kiñe israelche langümfule kiñe che tuntukufiel mu, fey lefmawafuy feychi waria mu ñi montuluwal. Akufule kiñe tüfachi waria, ramtukangeafuy chumngechi ñi rupan tüfachi dungu, fey elungeafuy ñi müleal feychi waria mew lale wüla ti longkolelu chi saserdote, fey wüla chew rume amuafuy. Femngechi Jewba pengeli ñi rume kutranpiwkeyechen ka ñi rume falintuniefiel tati pu che ñi mongen. Kafey, famülke mu Jewba elkünuy taiñ montulngeal, tüfachi pu waria reke. ¿Chumngechi? Kom iñchiñ kimnon mu, inaniekelafuiñ Jewba ñi werkün dungu ñi rume yamfalngen ti mongen ka ti mollfüñ, feymu mülefuy taiñ layal, welu Jewba llowlu am Kristo ñi lan, kidu ta montulkeeiñmew taiñ lanoal. Feymu, ¿chumngechi pengelafuiñ taiñ falintuniefiel Jewba ñi elkünuel taiñ montulngeal? Mangelafuiñ tati pu che ñi llowal Chaw Ngünechen ñi elkünuelchi montuluwün, doyelchi may, fülkülepalu am tati “rume fütra kutrankawün” (Matew 24:21; 2 Korintio 6:1, 2).

26, 27. ¿Chem mew am tati pelon wentru Esekiel reke femkeiñ?

²⁶ Famülke mu, iñchiñ Chaw Ngünechen tañi pu che ngen, tati pelon wentru Esekiel reke feleiñ, Chaw Jewba elkünufi tüfachi wentru ñi llüwatuleal, fey ñi amuldungual Chaw Ngünechen ñi ngüfetuel. Feymu ta feypifi: “Allkütulmi iñche ñi feypielchi dungu, müley tami ngüfetulelafiel engün”. Esekiel küme femürpunofule tañi elfalkünungeelchi küdaw, fey kulpayafuy ñi lan mu kom feychi che Chaw Ngünechen ramtukadungufile ta Jerusalen (Ezequiel 33:7-9). Welu Esekiel femürpuy ñi feypingeel, feymu kulpalay kom feychi che ñi lan mu.

²⁷ Pichilewey ñi apümkangeal Weküfü ñi ngünenieelchi dungu. Feymu pu Dungukelu Iney Ngen Jewba kiñe falin küdaw trokifiyiñ taiñ amuldungual ñi akual ti antü Chaw Ngünechen ñi apümkayafiel tañi pu kayñe ka taiñ amuldungual ñi Ngünenien. Müley taiñ femal tüfa (Isaías 61:2; Matew 24:14). ¿Eluwküleymi tami koneltual tüfachi küdaw mu montulchekelu? Femngechi femkefuy ti apostol Pablo, feymu ta feypi: ‘Iñche kulpalelan kiñe che mew no rume. Kom kimeleluwiyiñ Ngünechen ñi adkünuelchi dungu, chem dungu rume ta ellkaleluwlayiñ’ (Hecho 20:26, 27). ¡Inayentufali Pablo ñi femün mu!

28. Taiñ rumel müleal Chaw Ngünechen ñi piwkeyechen mew, ¿chem müley taiñ femal?

²⁸ Feley, taiñ rumel müleal Chaw Ngünechen ñi piwkeyechen mew, müley taiñ falintuafiel ti mongen ka ti mollfüñ Chaw Jewba reke. Welu feyka müten no, chumngechi inaduamafiyiñ ti küpachi chillkatun mu, müley taiñ lif chengeal kidu ñi adkiñ mew.