Ageo

2 Paqallqöri phajjsit 21 urunak saraqjjäna ukhajja, Ageo+ profetajj aka arunakwa Jehová Diosat katoqäna: 2 “Mirä amp suma, Sealtiel chachan Judá markan gobernadorapäki+ uka Zorobabel+ yoqaparusa, Jehozadac+ chachan Josué+ jachʼa jilïr sacerdote yoqaparusa, markankir jaqenakarusa akham sasin jisktʼam: 3 ‘¿Nayrajj aka utajj* kunjam jachʼañchatänsa uk khitis jumanakat uñjäna?+ ¿Aka utajj kunjamakis jichhajj jumanakatakejja? Aka utajj janis kunäkaspa ukham uñjatawa, ¿janit uk amuyapkta?’+ sasa.

4 ”Jehová Diosajj akham siwa: ‘Zorobabel, jichhajj chʼamani saytʼasim, Jehozadac chachan Josué yoqapa, jachʼa jilïr sacerdote, jumajj chʼamani saytʼasirakim’ sasa.

”Jehová Diosajj akham saskakiwa: ‘Aka oraqen jakir taqe jaqenaka, chʼamani saytʼasipjjam,+ trabajipjjarakim’.

”‘Kuna laykutejj nayaw jumanakampïskta,+ siw ejercitonakan Jehová Diosapajja. 5 Egipto markat mistunipkayäta ukhajj kuntï nayajj sapkayäsma uk amtasipjjam,+ nayaw jumanakarojj irpasipksma.*+ Jan ajjsarapjjamti’”.+

6 “Kuna laykutejj ejercitonakan Jehová Diosapajj akham siwa: ‘Akat mä jukʼa tiempotjja, wasitampiw nayajj alajjpachanaksa, oraqsa, lamar qotsa, markanaksa thaljäjja’+ sasa.

7 ”‘Taqe markanakaruw nayajj thaljäjja, taqe markanakan kunanakatï wali valoranïki* ukanakajja aka utaruw mantapjjani,+ aka utjja jachʼañchäwimpiw phoqtʼayarakëjja’+ siw ejercitonakan Jehová Diosapajja.

8 ”‘Qollqejj nayankiwa, qorisa nayankarakiwa’ siw ejercitonakan Jehová Diosapajja.

9 ”‘Jutïrinjja aka utajj nayra utat sipansa jukʼamp jachʼañchatäniwa’+ siw ejercitonakan Jehová Diosapajja.

”‘Aka cheqanjja sumankañwa nayajj utjayäjja’+ siw ejercitonakan Jehová Diosapajja”.

10 Kunapachatï Darío reyejj pä mara apnaqaskäna, llätunkir phajjsit 24 urunak saraqjjarakïna ukhajja, Ageo+ profetajj aka arunakwa Jehová Diosat katoqäna: 11 “Ejercitonakan Jehová Diosapajj akham siwa: ‘Mirä amp suma, sacerdotenakarojj akham sasin leyi toqet jisktʼam:+ 12 “Mä jaqetï isipar sagrado aycha* apani, uka isejj tʼantʼaru, manqʼaru, vinoru, aceiteru, jan ukajj yaqha manqʼañanakar purini ukhajja, ¿kunarutï uka isejj purkani ukajj sagradorut tukuni?” sasa’”.

Sacerdotenakajj “¡janiwa!” sasaw sapjjarakïna.

13 Ageo chachasti akham sasaw jisktʼarakïna: “Mä jaqetï jiwat cuerpo* llamktʼatapat qʼañut uñjatächi, ukat ukanak llamktʼarakchi ukhajja, ¿kunarutï jupajj llamktʼkani ukajj qʼañurut tukuni?”+ sasa.

Sacerdotenakajj “qʼañuruw tukuni” sasaw sapjjarakïna.

14 Ageo profetajj akham saskakïnwa: “Jehová Diosajj akham siwa: ‘Naya nayraqatanjja aka jaqenakasa aka markas ukham qʼañuwa, taqe kunanaktï amparanakapamp lurapki ukajj ukham qʼañurakiwa. Taqe kunanaktï sacrificiot loqtapki ukanakajj qʼañurakiwa’ sasa.

15 ”‘Ukampis jichhajj mirä amp suma, akat uksarojj aka toqet sum amuytʼasipjjam: Jehová Diosan templopan janïr mä qalajj yaqha qala patjjar uchaskäna+ ukhajja, 16 ¿kunas pasänjja? Kunapachatï maynejj grano montonat 20 costalanak grano aptir saräna ukhajja, 10 costalanakakiw granojj utjäna. Kunapachatï maynejj uvas chʼirwañ lugarat 50 wakullanak vino aptir saräna ukhajja, 20 wakullanakakiw vinojj utjäna.+ 17 Taqe kunanaktï jumanakajj amparanakamampi lurapkta ukanakarojja nayajj castigayätwa. Nakhantir juntʼu thayampi, plantanakar jiwarayir usumpi,+ chhijchhimpwa nayajj apayaniyäta, ukampis jumanakat janiw maynis nayan ukar kuttʼankänti’ siw Jehová Diosajja.

18 ”‘Mirä amp suma, kunatï jichhürut uksarojj paskani uka toqet sum amuytʼasipjjam, llätunkir phajjsit 24 urunak saraqjjani ukat uksaru, mä arunjja kuna uruntï Jehová Diosan templopan cimientonakapajj uchaskäna ukat uksaru.+ Jumanakajj aka toqet sum amuytʼasipjjam: 19 ¿manqʼañanak imañ utanjja* jathanakajj utjaskiti?+ Uvasa, higosa, granadasa, olivosa... janïraw achoqapkiti, ¿janich ukhamäki? Jichhat uksarojj nayajj bendisipjjämawa’”.+

20 Llätunkir phajjsit 24 urunak saraqjjäna+ ukhajja, Ageo profetajj mayampiw Jehová Diosan arunakap katoqäna. Diosajj akham sänwa: 21 “Judá markan gobernadorapäki uka Zorobabel chacharojj akham sañamawa: ‘Alajjpachanaksa oraqsa nayajj thaljäwa.+ 22 Reyinakan tronopjja tukjäwa, markanakan reyinakapan chʼamapsa tukjarakïwa.+ Carronakarusa carronak apnaqerinakarusa tukjäwa. Taqpach caballonakaw jiwarapjjani, caballot saririnakas taqpachaniw jilanakapan espadapamp jiwayatäpjjani’+ sasa”.

23 “Ejercitonakan Jehová Diosapajj akham siwa: ‘Sealtiel+ chachan Zorobabel+ yoqapa, nayan servirija, uka urunjja jumaruw nayajj jawsäma’ siw Jehová Diosajja, ‘sellañatak mä anilloruw tukuyäma, kuna laykutejj jumaruw nayajj ajllissma’ siw ejercitonakan Jehová Diosapajja”.