Diosan amigonakapar khuyapayasiñampi respetomp uñjañatakiw chʼamachasiñasa (Rom. 12:10). ¿Kunjamsa uk lursna? Salmo 15:4 textorjamajja, Jehová Diosan carpapankirejj “promesa luratapjja phoqewa, uka promesa phoqañatakejj jan walins uñjaskchejja phoqapuniwa”. Jiwasatï arsutas jan phoqksna ukhajja, mayninakaruw chuym usuchjsna (Mat. 5:37). Jehová Diosajj carpapankirinakajj ak phoqapjjaspa ukwa muni: casado chacha warminakajj kuntï casarasisajj arsupkäna uk phoqapjjaspa, awk taykanakajj kuntï wawanakapar arsupki uka promesanakap phoqañatak chʼamachasipjjaspa ukwa muni. Niyakejjay Diosampir jaqe masisampir munasstanjja, arsutas phoqañatakejj chʼamachasiñasapuniwa. Maysa toqetjja, katoqtʼasirïsa wajjtʼasirïsaw Diosan amigonakapar respetatas uñachtʼaysna (Rom. 12:13). Jilat kullakanakasamp kusistʼañatak tantachtʼasktan ukhajja, jupanakampis Jehová Diosampis jukʼamp sum apastanjja. Ukhamarus katoqtʼasirïsajja, Jehová Diosat yateqasitaswa uñachtʼayasktanjja. w24.06 pág. 12 párrs. 15, 16

Jehová Diosajj kunatï cheqäki uk humilde chuymaninakarukiw yatiyi (Mat. 11:25). Biblian cheqa yatichäwinakap yateqkayätan ukhajj humilde chuymaniyätanwa, mayninakampis yanaptʼayasirakiyätanwa (Hech. 8:30, 31). Ukhamäkchisa, jachʼa jachʼa jan tukuñatakiw wal amuyasiñasa. Amuyunakasajj Biblian wiñay yatichäwinakapampi Jehová Diosan markapan instruccionanakapampejj igualakïkaspas ukhamwa jachʼa jachʼa tukuñajj amuyayistaspa. Ukatwa humilde chuymanïskakiñatakejj ak amtañasajj wakisi: Jehová Diosat sipans wali jiskʼakïtanwa (Sal. 8:3, 4). Ukhamajj humilde chuymanïñatakisa, jupamp yatichayasiñatakis Jehová Diosaruw orasiñasa. Amuyunakasat sipansa, Arup toqe markap toqe yatichkistu uka amuyunak nayrankañapatakiw jupajj yanaptʼistani. Biblia liytʼkasajja, qhawqsa Jehová Diosajj humilde chuymaninakarojj munasi ukwa amuytʼañasa. Jachʼa jachʼa tukuñarusa wali wal tukuñarus qhawqsa uñisi uks amuytʼañasarakiwa. Mä jachʼa responsabilidad katoqkañäni jan ukajj uk katoqatas mayninakajj amuyapjjani ukhaw humilde chuymanïñasajj jukʼamp wakisini. w24.07 pág. 10 párrs. 8, 9

1919 marat aksaruw Jesusajj mä qhawqha ajllitanak toqejj predicación organiztʼaski, discipulonakaparus Biblian yatichäwinakap churaskaraki (Luc. 12:42). Kuntï jupanakajj lurasipki ukajj Jehová Diosan bendisiskatapwa uñachtʼayi (Is. 65:13, 14). Janitï organiztʼatäksnajja, kuna luräwtï Jesusajj churkistu uk janiw phoqañ puedksnati (Mat. 28:19, 20). Ak amuytʼañäni, predicañatak territoriotï jan organiztʼatäkaspajja, sapa mayniw kawkjantï predicañ munki ukan predicaspa. Inas kutin kutin pachpa lugaranakan prediksna, ukampis yaqha cheqanakan janiw ni mä kutis predicaskaspati. ¿Suma organiztʼatäñajj kunjamanakats yanaptʼarakistu? Jesusajj aka oraqenkkäna ukhajj wali sumwa discipulonakapar organiztʼäna, jichha tiempon niya uka pachparakwa Diosan markapar organiztʼi. w24.04 págs. 8, 9 párrs. 2-4