Chuym ustʼayapkistu ukanakar perdonañatak dispuestokïsna ukwa Jehová Diosajj muni (Sal. 86:5; Luc. 17:4; Efes. 4:32). Maynin kun arsutapatsa jan ukajj kun luratapatsa, wali chuyma ustʼataw jikjjatassna, mä munat amigöspa jan ukajj mä familiaräspa ukhaw jukʼamp chuym ustʼayassna (Sal. 55:12-14). Awisajja chuym ustʼayapkistu ukajj mä cuchillomp jununtatäñamp sasispawa (Prov. 12:18). Janis chuyma ustʼatäksna ukham tukuñajja, uka cuchillomp jununtatäsajj pachparukis jaytksna ukhamäspawa. Ukampis ukham tukuñajj janiw sum jikjjatasiñatak yanaptʼkistaniti. Maynejj chuym ustʼaykistu ukhajja, qalltan inas colerassna. Bibliarjamajj maynejj colerasispawa, ukampis coleramp jan atipayasiñatakiw ewjjtʼistu (Sal. 4:4; Efes. 4:26). Kuna laykutejj coleratäñajj jan walinakaruw apistaspa (Sant. 1:20). Amtapunim: mä kunat colerañajj utjaspawa, ukampis coleratäskakiñajj jiwasatäjjewa. w25.02 pág. 15 párrs. 4-6

‘Maynejj janitï Dios nayraqatan qamirïkchejja’, walja utjirinïtapajj inamayakiwa sasaw Jesusajj mä uñachtʼäwimp qhanañchäna (Luc. 12:16-21). Kunas qharürojj jakäwisamp pasani uk janiw yatktanti (Prov. 23:4, 5; Sant. 4:13-15). Ukatwa Jesusajj jupan discipulopäñ munapki ukanakajja, taqpach utjirinakap apanukuñatakejj dispuestokïpjjañapawa sasin säna (Luc. 14:33). Nayrïr patak maranakanjja, Judeankir cristianonakajj uk lurañatakejj chuymatpachwa amtapjjäna (Heb. 10:34). Jichhürunakanjja, walja jilat kullakanakaw politicar jan apoyapjjatapat trabajopsa jan ukajj utjirinakaps aptʼasiwayapjje (Apoc. 13:16, 17). Jupanakajj taqe chuymaw Jehová Diosan aka promesapar confiyapjje: “Nayajj janipuniw jaytanukkämati, janipuniw apanukkämasa” sasa (Heb. 13:5). Kunanakampis jilïrëjjasajj jakasiñäni ukanakañïñatakiw chʼamachastanjja, ukat kuntï jan suyktan ukatï pasanejja, Jehová Diosaruw confiyañasa. w25.03 págs. 29, 30 párrs. 13, 14

Jehová Diosajj jupar serviñan jiltañasatakejj janiw sapak jaytkistuti. Congregacionan suma awatirinaka suma yatichirinakwa churistu, jupanakaw ‘jilïr jaqëjjañasataki, qhawqchʼäkitejj Cristojj ukar puriñkam jiltañasatak’ yanaptʼapjjestu (Efes. 4:11-13). Diosajj espíritu santo churarakistu, ukajj kunjamtï “Cristojj amuyki” ukham amuyañatakiw yanaptʼistu (1 Cor. 2:14-16). Ukat pusi Evangelionakwa qellqayawayi, ukanakajj kunanaksa Jesusajj aka oraqenkkasajj luräna uk sum yatiñatakiw yanaptʼistu. Jiwasatï Jesusjam amuyaña, parlaña, lurañ yateqañäni ukhajja, Diosar serviñan suma saytʼat cristianöñäniwa. Ukampis Diosar serviñan suma saytʼatäñatakejj janiw ‘Cristjjat qallta yatichäwinakak’ yatiñasäkiti, jan ukasti jukʼamp yatichäwinakwa yatiñasa. w24.04 págs. 4, 5 párrs. 11, 12