¿Kunatsa Jehová Diosajj wali khuyapayasiriwa sasin sistanjja? “Janiw khitin jiwañapsa jupajj munkiti” (2 Ped. 3:9). ¿Kunjamsa Diosajj jachʼa juchar purtʼasipkäna ukanakat khuyaptʼayasïna? David reyejj adulterio jucharuw purtʼasïna, jaqe masiparuw jiwayarakïna, ukanakajj wali jachʼa juchanakänwa, ukampis arrepentisitapat Jehová Diosajj khuyaptʼayasïnwa, perdonarakïnwa (2 Sam. 12:1-12). Manasés reyejj sinti jan walinakpunwa jakäwipan luräna. Uka reyejj sinti jan walinaksa lurkchïnjja, taqe chuyma arrepentisitapat Jehová Diosajj jupat khuyaptʼayasïnwa, perdonarakïnwa (2 Crón. 33:9-16). Khuyaptʼayasiñatak razonajj utjki ukhajja, Jehová Diosajj khuyaptʼayasipuniwa, ukwa uka pä sarnaqäwinakajj amtayistu. Jupajj Davidampir Manasesampir jaktayaniwa, kuna laykutejj jachʼa juchanak lurapjjatap amuyasipjjänwa, arrepentisipjjarakïnwa. w24.05 pág. 4 párr. 12

Egipto markan esclavot serviñat markapar salvkäna uka qhepatjja, Jehová Diosajj sacerdotenakaruw tabernaculon servipjjañapatak uttʼayäna. Uka sagrado carpan kuna yaqha lurañanakatï utjkäna ukanakamp phoqapjjañapatakiw levitanakar mayirakïna. Ukampis ¿tabernaculon servirinakampi jan ukajj uka jakʼan servirinakampikit suma uñjatäpjjäna? Janiwa, Jehová Diosajj taqeniruw mä igualak uñjäna. Campamenton taqeniw Jehová Diosan amigopäpjjaspäna. Ukatwa tabernáculo patjjan uñstkäna uka qenayampiru ninampir taqe markpach uñjapjjañapatakejj Jehová Diosajj encargasïna (Éx. 40:38). Ukhamajj kunapachatï qenayajj mä cheqat yaqha cheqar onjjtäna ukhajja, tabernaculot wali jayan jakirinakas uñjapjjaspänwa. Ukhamatwa utjirinakapa carpanakap apthapisajj markankirinakamp chik sarjjapjjaspäna (Núm. 9:15-23). Jichhürunakan ukhamarakiwa, kawkjansay jakstanjja, Jehová Diosajj munasistuwa, cuidistuwa, jarkʼaqarakistuwa. w24.06 pág. 4 párrs. 10-12

Davidajj jiwayañatak arknaqataw uñjasïna. Absalón yoqapaw reyïñat apaqañ munäna (2 Sam. 15:12, 13). Ukatwa Davidajj Jerusalenat jankʼak escapjjañapäna. Niy sarjjapjjäna ukhajja, Davidajj mä qhawqhanin Jerusalenan quedasipjjañapwa munäna, ukhamat Absalonan jan wali amtanakapat jupanakar yatiyañapataki. Ukatwa Sadoc waynampiru yaqha sacerdotenakampir Jerusalenar kuttʼayäna (2 Sam. 15:27-29). Jupanakajj wal amuyasipjjañapäna. Davidajja, Sadoc, Husái amigonakaparuw amtapan yanaptʼapjjañapatak mayïna (2 Sam. 15:32-37). Davidan instruccionanakaparjam lurasajja, Husái chachajj Absalonarus yanaptʼkaspa ukhamwa tuküna, kunjamsa Davidar atacaspa uksa jupar ewjjtʼarakïnwa, ukhamat Davidajj wakichtʼasiñatak tiemponïñapataki. Uka amtapjja, Husái chachajj Sadoc ukat Abiatar chachanakaruw awisäna (2 Sam. 17:8-16). Jupanakasti David chacharuw uka yatiyäwi apayapjjarakïna, ukhamatwa Davidan jakañ vidap salvapjjäna (2 Sam. 17:21, 22). w24.07 págs. 4, 5 párrs. 9, 10