Jeremías

36 Josías chachan Jehoiaquim+ sat yoqapajj Judá markan pusi maranak reyit apnaqaskäna ukhaw Jehová Diosajj Jeremiasar akham säna: 2 “Mä rollo katusajja, kunanaktï Josiasan urunakapan nayrïr urut jichhürkamajj+ Israel marka contrasa, Judá marka contrasa,+ taqe markanak contras+ sisksma uka arunakwa ukar qellqantäta. 3 Inas Judá markankirinakajj kuna jan waltʼäwinaktï nayajj jupanakjjar apaniñ amtaskta taqe ukanak istʼasajj jan wali thakinakap apanukupjjchispa, ukhamatwa nayajj jupanakan pantjasitapsa juchapsa perdonjjerista”+ sasa.

4 Ukatsti Jeremiasajj Nerías chachan Baruc+ yoqapar jawsasajja, kuntï Jehová Diosajj siskäna taqe uka arunakwa Baruc chacharojj qellqantañapatak dictäna. Baruc chachasti mä rolloruw uka arunak qellqantäna.+ 5 Ukatjja Jeremiasajj akham sasaw Baruc chacharojj säna: “Nayajj Jehová Diosan utapar mantañatakejj jarkʼatätwa. 6 Ukhamajj jumaw mantasajj Jehová Diosan arunakap rollor qellqayksma uka arunak jachʼat liytʼañama. Jehová Diosan utapar mantasaw markan istʼkatajj mä ayunañ urun liytʼañama, ukhamatwa markanakapat jutapki taqe uka Judá markankirinakatak liytʼarapïta. 7 Inas jupanakan ruwtʼasitanakapajj Jehová Diosan ukar purchispa, jaqenakat sapa maynejj jan wali thakinakap apanukupjjarakchispa, Jehová Diosajj aka marka contra arski uka colerasiñapasa wali colerasiñapasa wali jachʼawa” sasa.

8 Nerías chachan Baruc yoqapajj taqe kuntï Jeremías profetajj siskäna ukanakwa luräna. Jupajj rollon qellqatäkäna uka Jehová Diosan arunakapwa Jehová Diosan utapan jachʼat liytʼäna.+

9 Kunapachatï Josías chachan Jehoiaquim+ sat yoqapajj Judá markan phesqa maranak reyit apnaqaskäna, ukhaw Jerusalenankir taqe jaqenakasa khitinakatï Judá oraqen markanakapat Jerusalén markar puripkäna taqe ukanakas llätunkïri phajjsin Jehová Dios nayraqatan ayuno lurañ qalltapjjäna.+ 10 Ukatsti Baruc chachajj rollotwa Jeremiasan arunakap Jehová Diosan utapan jachʼat liytʼäna. Jupajj taqpach markan istʼkataw Safán+ sat copianak luriri* chachan Guemarías+ yoqapan cuartopan* liytʼäna, uka cuartojj alto lugarankir pationkänwa, Jehová Diosan utapar mantañ machaq punkuna.+

11 Kunapachatï Safán chachan allchhipäki Guemarías chachan yoqapäkaraki uka Micaya chachajj rollonkir Jehová Diosan taqe arunakap istʼäna ukhajja, 12 reyin utaparuw* saraqäna, secretarion utaparu.* Ukansti taqpach principenakaw* qontʼatäsipkäna: Elisamá+ sat secretariompi, Semaya chachan Delayá yoqapampi, Acbor+ chachan Elnatán+ yoqapampi, Safán chachan Guemarías yoqapampi, Hananías chachan Sedequías yoqapampi ukhamarak taqpach mayni principenakampi. 13 Baruc chachajj taqpach markan istʼkat rollot liytʼäna uka arunakatjja, Micayajj kuntï istʼkäna taqe uka arunakwa jupanakar säna.

14 Ukatsti taqpach principenakajj Jehudí chacharuw Baruc chachan ukar khitapjjäna, Jehudí chachajj Netanías chachan yoqapänwa, jupajj Selemías chachan yoqapänwa, jupajj Cusí chachan yoqapänwa, akham saniñapataki: “Jumajj jutam, markan istʼkat liytʼkta uka rollo apanim” sasa. Nerías chachan Baruc yoqapasti, rollo katusajj jupanakan ukaruw saräna. 15 Jupanakajj akham sasaw jupar sapjjäna: “Mirä amp suma, qontʼasim, nanakatakejj jachʼat liytʼarapipjjeta” sasa. Ukatwa Baruc chachajj jupanakatak liytʼarapïna.

16 Taqe uka arunak istʼasasti, jupanakajj wali sustukiw jupanakkam uñkatasipjjäna, Baruc chacharojj akham sapjjarakïnwa: “Taqe uka arunak reyir yatiyañajj wakisipuniwa” sasa. 17 Ukatsti jupanakajj akham sasaw Baruc chachar jisktʼapjjäna: “Mirä amp suma, sapjjetaya. ¿Jeremiasat taqe uka arunak qellqaytam?” sasa. 18 Uk satasti Baruc chachajj akham sasaw jupanakar säna: “Ukhamäskapuniwa, pachpa lakapampiw jupajj taqe uka arunak situ, nayasti tintampiw uka arunak aka rollor qellqantarakta” sasa. 19 Principenakajj akham sasaw Baruc chachar sapjjäna: “Jumasa Jeremiasasa, sarapjjam, imantasinipjjam, kawkinkapjjtas uk janirak khitis yatpanti”+ sasa.

20 Ukatsti jupanakajj reyin ukaruw sarapjjäna, reyejj pationkaskarakïnwa. Elisamá sat secretarion utapar* uka rollo imasasti, jupanakajj kuntï istʼapkäna uk taqpach reyir yatiyapjjäna.

21 Reyejj Jehudí+ chacharuw rollo aptaniñapatak mayïna. Jehudí chachajj Elisamá sat secretarion utapatwa* rollo aptanïna, ukatsti reyin istʼkata ukhamarak reyi ladon saytʼatäsipkäna uka principenakan istʼkataw liyiñ qalltäna. 22 Niyakejjay llätunkïri phajjsïchïnjja,* reyejj juyphipacha utan qontʼatäskänwa, jupa nayraqatansti juntʼurtʼasiñatak mä nina aqaskiriw utjarakïna. 23 Kunapachatï Jehudí chachajj kimsa jan ukajj pusi partenak liytʼañ tukuyäna ukhajja, reyejj liytʼkäna uka cheq secretarion cuchillopampi khuchoqasaw ninajj aqaskäna ukar liwjjatäna, ukhamatwa taqpach rollojj ninankjjäna. 24 Janiw reyisa ni istʼapkäna taqe uka servirinakapas taqe uka arunak istʼasajj ajjsarapkänti, ni isinakapsa chʼiyanoqasipkänti. 25 Elnatán+ chachasa, Delayá+ chachasa, Guemarías+ chachas uka rollo jan phichantañapatakiw reyirojj wal ruwtʼapjjäna, ukampis reyejj janiw jupanakar istʼkänti. 26 Reyejj antisaw reyin Jerahmeel sat yoqaparusa,* Azriel chachan Seraya yoqaparusa, Abdeel chachan Selemías yoqaparusa, Baruc secretariompiru Jeremías profetampir katuntapjjañapatakiw ordenäna, ukampis Jehová Diosaw jupanakarojj imantaskäna.+

27 Kunapachatï reyejj Jeremiasan mayitaparjam Baruc chachan qellqatäkäna uka arunakani rollo phichantäna uka qhepatjja, Jehová Diosajj wasitat Jeremiasar parläna,+ akham sasa: 28 “Yaqha rollo katusajja, Judá markan Jehoiaquim reyipajj phichantki uka nayrïr rollon kuna arunakatï qellqatäkäna uka pachpa arunak uka rollor qellqantam.+ 29 Judá markan Jehoiaquim reyip contrajj ak sañamarakiwa: ‘Jehová Diosajj akham siwa: “Jumajj akham sasaw aka rollo phichanttajja: ‘¿Kunatsa jumajj “Babilonia markan reyipaw jutasin aka marka tʼunthapini, jan jaqeni jan animalanakani jaytarakini” sasin ukar qellqta?’+ sasa. 30 Ukhamasti Judá markan Jehoiaquim reyip contrajj akham sistwa naya Jehová Diosajja: ‘Janiw jupat jutir wawanakat khitis Davidan tronopan qontʼaskaniti,+ jupan jiwat cuerpopajj lupi juntʼun jaqosiskani, lojjontaskir aruman jaqosiskarakini.+ 31 Jupanakan pantjasitapatjja, juparusa, jupat jutir wawanakaparusa, servirinakaparus cuenta mayëjja. Ukatsti jupanakjjarusa, Jerusalén markan jakirinakjjarusa, Judá markankirinakjjarusa, nayar jan istʼañ munapjjatap laykojj+ kuna jan waltʼäwtï jupanak contra apaniñ arskayäta uka jan waltʼäwi apanëjja’+ sasa”’”.

32 Ukatsti Jeremiasajj yaqha rollo katusajj Nerías chachan yoqapäkäna secretariökarakïna uka Baruc chacharuw churäna,+ jupasti kuntï Jeremiasajj siskäna ukarjamaw uka rollor qellqantarakïna. Jupajj Judá markan Jehoiaquim reyipajj ninampi phichantkäna uka rollonkir taqe arunakwa qellqäna.+ Uka rollorojj uka arunakar uñtasit jukʼamp yaqha arunakampiw yaptʼasirakïna.