Jeremías

33 Kunapachatï Jeremiasajj Guardianakan Patiopan+ katuntatäskäna, ukhaw Jeremiasajj Jehová Diosan arunakap payïri kutin katoqäna, akham sasa: 2 “Khititï oraq lurki uka Jehová Diosajj akham siwa, Jehová Diosaw oraq lurasajj sum uttʼayaraki, sutipajj Jehová satawa: 3 ‘Nayar jawsita, nayasti jaysarakïmawa, ukatsti kunatï jachʼäki jan amuytʼañjamäkaraki ukanakwa nayajj jumar säma, ukanaksti janiw jumajj yatkayätati’+ sasa”.

4 “Naya Israelan Diosapäkta uka Jehová Diosajj akham sistwa, atacañatak laqʼa montonanak lurasitapata ukhamarak espada kawsa allthapita aka markan utanakapatsa, Judá markan reyinakapan utanakapatsa,+ 5 caldeonak contra nuwasir jutapki uka chachanakatsa, jan wali luratanakapamp aka markat armtʼasiyapkitäna ukhamarak nayan wali colerasitaj layku jiwaraykayäta uka chachanakan jiwat cuerponakapamp phoqantat utanakatsa, 6 akham sistwa: ‘Nayaw juparojj qolläjja, kʼumaraptayarakëjja.+ Nayaw jupanakar qollasajj sumankañsa kunatï cheqäki uksa walj churäjja.+ 7 Judá markat Israel markat yaqha markan preso katuntatäpki ukanakarojj kuttʼayanïwa,+ wasitat jupanakarojj qalltanjam bendisirakëjja.+ 8 Naya contra juchanak lurapki taqe uka pantjasitanakapat qʼomachäwa,+ naya contra lurapki taqe uka juchanakapsa pantjasitanakapsa perdonäwa.+ 9 Aka markan sutip istʼasajj wal kusisëjja, kuna sumanaktï nayajj markajar churkä uk istʼasajj aka oraqenkir taqe markanakaw nayar alabapjjetani jachʼañchapjjetani, suma markat uñjatarakïniwa.+ Kuna sumanaktï nayajj jupar churkä ukanakatsa sumankañatsa+ markanakajj ajjsarayasipjjaniwa khatatipjjarakiniwa’+ sasa”.

10 “Jehová Diosajj akham siwa: ‘Aka lugarajj chʼusakiwa, janiw jaqenakanïkiti, janirakiw uywanakas utjkiti. Judá oraqen markanakapasa Jerusalén markan callenakapas chʼusakiwa, janiw jaqenakanïkiti, janiw khiti jakiris ukan utjkiti ni uywanakas utjkarakiti sasin sapkta uka markanjja, wasitat istʼasini 11 wali kusisiñat arnaqasiñanakasa, kusisiñat arnaqasitanakasa,+ casarasir waynan arupasa, casarasir tawaqon arupasa. Akham sirinakan arunakapa: “¡Ejercitonakan Jehová Diosapar yuspärapjjam, Jehová Diosajj suma Diosawa,+ munasirïtapas jan jaytjasirïtapas wiñayatakiwa!”+ sasa’.

”‘Jupanakajj yuspärañatak ofrendanakwa Jehová Diosan utapar apapjjani,+ kuna laykutejj nayaw yaqha markan katuntatäpki ukanakarojj oraqer mayamp qalltanjam kuttʼayanëjja’, siw Jehová Diosajja”.

12 “Ejercitonakan Jehová Diosapajj akham siwa: ‘Jan jaqenakani jan uywanakani aka chʼusa lugaransa, taqe markanakapansa, wasitat pastonakajj jiltani, ukhamat awatirinakajj ovejanakapar ukan samartʼayapjjañapataki’.+

13 ”‘Qollunak toqenkir markanakansa, pampa oraqenkir markanakansa, aynach toqenkir* markanakansa, Benjamín oraqensa, Jerusalén marka jakʼanakansa,+ Judá oraqen markanakapansa,+ wasitat awatirinakajj ovejanakap jaktʼapjjani’, siw Jehová Diosajja”.

14 “‘Urunakajj jakʼachasisinkiwa’, siw Jehová Diosajja, ‘ukapachaw nayajj Israel markatsa Judá markatsa suma promesa arskta uk phoqäjja.+ 15 Uka urunakansa uka tiemponsa nayajj Davidan familiapat jutiri cheqaparjam uñjiri mä wawa uñstayäjja,*+ jupaw cheqaparjama ukhamarak leyinakarjam oraqen uñjani.+ 16 Uka urunakansti Judá markajj salvatäniwa,+ Jerusalén markasti jan ajjsarasaw jakarakini.+ Aka sutinëjjarakiniwa: cheqaparjam uñjañajj Jehová Diosatwa juti’+ sasa”.

17 “Jehová Diosajj akham siwa: ‘Tronon qontʼasiñatakejj Davidat jutiri mä wawajj Israelan utjapuniniwa,+ 18 levita sacerdotenak taypinjja naya nayraqatan serviñatakejj mä chachajj utjapuniniwa, ukhamat nakhantayat ofrendanakampi, nakhantayat grano ofrendanakampi, sacrificionakamp loqtañapataki’ sasa”.

19 Jehová Diosajj wasitat Jeremiasar akham säna: 20 “Naya Jehová Diosajj akham sistwa: ‘Jumanakatï arumampi urumpi lurkta uka pactoj pʼakintapjjasma, ukhamat urusa arumasa jan tiempopar puriniñapataki,+ 21 ukhakiw David servirijampi lurkta uka pactojj pʼakintasispa,+ ukhamat jupan yoqapajj jan mä reyjam tronopan qontʼat apnaqañapataki.+ Ukhakirakiw nayar serviri levita sacerdotenakamp lurkta uka pactojj pʼakintasispa.+ 22 Kunjamtï alajjpachankir ejercitonakajj jan jaktʼañjamäki, lamar qotankir chʼallanakasa jan jaktʼañjamäkejja, ukhamarakiw nayajj David servirijan wawanakaparusa nayar servipkitu uka levitanakarus waljaptayäjja’ sasa”.

23 Jehová Diosajj wasitat Jeremiasarojj akham säna: 24 “¿Kuntï aka jaqenakajj sapki uk janit amuykta? ‘Ajlliski uka pä familiarojj Jehová Diosajj jaytjjaniwa’ sasaw jupanakajj sapjje. Pachpa markajarus janiw respetompi uñjapkiti, janirakiw mä markarjamas uñj-jjapjjeti.

25 ”Naya Jehová Diosajj akham sistwa: ‘Kunjamtï nayajj urumpis arumampis mä pacto lurkta,+ alajjpachatakis oraqetakis leyinak uttʼayktjja,+ 26 nayajj janipuniw Jacobun wawanakaparusa ni David servirijan wawanakaparus jaytkäti. Nayasti Abrahanata, Isaacata, Jacobuta jutirinakar apnaqapjjañapatakejj Davidat jutirinak taypit apnaqerinak ajlliskakïwa. Nayasti jupanakat katuntatäpki ukanakarojj kuttʼayanjjäwa,+ jupanakat sinttʼasirakïwa’+ sasa”.