1 Crónicas

23 Kunapachatï Davidajj wali awkëjjäna, niya jiwañampëjjarakïna ukhajja, Salomón yoqaparuw Israel markan reyipat uttʼayjjäna.+ 2 Ukapachaw jupajj Israelan taqe principenakaparusa, sacerdotenakarusa,+ levitanakarus+ tantachtʼäna. 3 Taqe levitanakaruw 30 maranit alayar jakthapipjjäna.+ Taqpachanejj 38.000 ukhanïpjjänwa. 4 Uka levitanakatjja 24.000 ukhaniw Jehová Diosan utap lurasiñapatak uñjapjjäna, pʼeqtʼirinakampi juezanakampejj 6.000 ukhanïpjjänwa,+ 5 porteronakasti 4.000 ukhaniraki,+ Jehová Diosar instrumentonakamp alabirinakajj 4.000 ukhanïpjjänwa. Davidajj “Diosar alabañanatakiw ukanak lurta” sasaw säna.+

6 Ukatjja Davidajj Leví chachan yoqanakaparojj grup grupo servipjjañapatakiw organiztʼäna.*+ Leví chachan yoqanakapajj Guersón, Cohat, Merarí+ ukanakänwa. 7 Guersón chachan yoqanakapajj Ladán, Simeí ukanakänwa. 8 Ladán chachan kimsa yoqakanakapajj Jehiel, Zetam, Joel+ ukanakänwa. Jehiel chachajj familia pʼeqtʼirïnwa. 9 Simeí chachan kimsa yoqanakapajj Selomot, Haziel, Harán ukanakänwa. Jupanakaw Ladán chachan nayra awkinakapan familianakap pʼeqtʼirinakäpjjäna. 10 Simeí chachan yoqanakapajj Jáhat, Ziná,* Jeús, Berías ukanakänwa. Uka pusiniw Simeí chachan yoqanakapänjja. 11 Jáhat chachaw familia pʼeqtʼirïnjja, ukjjarusti Zizá chacharakïnwa. Ukampis Jeús chachampi Berías chachampejj janiw walja yoqall wawanakanïpkänti, ukatwa jupanakajj mä sapa lurañaniki ukhamarak mä sapa familiakïpkaspas ukham jakhutäpjjäna.

12 Cohat chachan pusi yoqanakapajj Amram, Izhar,+ Hebrón, Uziel+ ukanakänwa. 13 Amram chachan yoqanakapajj Aarón,+ Moisés+ ukanakänwa. Ukampis Aarón chachasa yoqanakapasa jaya tiempotak ajllitäpjjänwa,+ ukhamat Santísimo sat lugaran servipjjañapataki, Jehová Dios nayraqatan sacrificionak loqtapjjañapataki, jupar servipjjañapataki ukhamarak wiñayatak sutipjjar bendicionanak arsupjjañapataki.+ 14 Cheqpach Diosan Moisés serviripan yoqanakapajja, levitanakan tribup taypin jakhutäpjjarakïnwa. 15 Moisés chachan yoqanakapajj Guersom,+ Eliezer+ ukanakänwa. 16 Guersom chachan yoqanakapatjja Sebuel+ chachaw familia pʼeqtʼirïnjja. 17 Eliezer chachat jutirinakatjja,* Rehabías+ chachaw pʼeqtʼirïnjja. Eliezer chachajj janiw yaqha yoqall wawanakanïkänti, ukampis Rehabías chachan yoqall wawanakapajj waljanïnwa. 18 Izhar+ chachan yoqanakapatjja, Selomit+ chachaw familia pʼeqtʼirïnjja. 19 Hebrón chachan yoqanakapajj akanakänwa: Jerías, jupaw familia pʼeqtʼirïnjja; payïristi Amarías; kimsïristi Jahaziel; pusïristi Jecameam.+ 20 Uziel+ chachan yoqanakapajj akanakänwa: Miqueas, jupajj familia pʼeqtʼirïnwa; ukjjarusti Isías chacharakïnwa.

21 Merarí chachan yoqanakapajj Mahlí chachampi Musí+ chachampïnwa. Mahlí chachan yoqanakapajj Eleazar, Quis ukanakänwa. 22 Ukatjja Eleazar chachajj jiwjjänwa, jupajj janiw yoqanakanïkänti, phuchanakanikïnwa. Ukhamatwa uka phuchanakapajj Quis chachan yoqanakapampi casarasjjapjjäna, jupanakasti primonakapäpjjänwa.* 23 Musí chachan kimsa yoqanakapajj Mahlí, Éder, Jeremot ukanakänwa.

24 Leví chachan yoqanakapajj ukanakänwa, jupanakajj familianakaparjama, nayra awkinakapan familianakap pʼeqtʼirinakaparjam registratäpjjänwa. Levitanakajj 20 maranit alayaruw jakhutäpjjäna, sutinakapas listar uchatarakïnwa, ukhamat Jehová Diosan utapan serviñataki. 25 Davidan akham satap layku: “Israelan Jehová Diosapajj markaparuw samarañ churi,+ jupajj wiñayatakiw Jerusalén markan jakarakini.+ 26 Ukhamarus levitanakajj janiw tabernáculo apjjapjjaniti, ni kunanakatï ukan serviñatak apnaqaski ukanaks apjjapjjaniti”+ sasa. 27 Davidan qhepa ewjjanakaparjamajja, levitanakajj 20 maranit alayaruw jakthapitäpjjäna. 28 Levitanakajj Jehová Diosan utapan serviñanwa Aarón+ chachan yoqanakapar yanaptʼapjjäna, jupanakaw pationakansa,+ comedoranakansa, taqe kunatï sagradöki ukanak qʼomachañansa, kuna trabajotï cheqpach Diosan utapan serviñatakejj wakiskäna ukanakansa yanaptʼapjjarakïna. 29 Jupanakaw Diosar loqtat tʼantʼanak+ lurañansa, grano ofrenda loqtañatak suma jakʼu wakichañansa, jan levadurani sillpʼa tʼantʼanak+ lurañansa, latan qhatiyaski uka tʼantʼanak lurañansa, mezclat masanak+ wakichañansa yanaptʼapjjäna. Jupanakarakiw qhawqhasa qhawqchʼasa ukanak mediñan yanaptʼapjjäna. 30 Jupanakajj sapa alwaw+ Jehová Diosar jachʼañchañatakisa yuspärañatakis ukan saytʼatäpjjañapäna, jaypʼunakas ukhamaraki.+ 31 Jupanakasti sábado+ urun Jehová Diosar sapa kuti nakhantayat sacrificionak loqtapkäna ukhasa, machaq phajjsinakansa,*+ fiesta tiemponakansa+ yanaptʼapjjarakïnwa, ukanaksti sapa kutiw Jehová Dios nayraqatan leyin qellqatäkäna ukarjam lurapjjäna. 32 Jupanakajj kuna lurañanakatï Diosamp jikisiñ carpansa sagrado lugaransa utjkäna ukanak phoqasaw servipjjarakïna. Jehová Diosan utapanjja Aarón chachan yoqanakapäkäna uka jilanakaparus yanaptʼapjjarakïnwa.