Isaías

7 Acaz+ chachajj Judá markan reyipäkäna uka urunakanjja, Siria markan Rezín sat reyipampi Israel markan Pécah+ sat reyipampiw Jerusalén contra guerran nuwasiñatak makatapjjäna, Pécah chachajj Remalías chachan yoqapänwa, ukampis janiw jupajj uka marka katuntkänti.*+ Acaz chachajja Jotán chachan yoqapänwa, Jotán chachajj Uzías chachan yoqaparakïnwa. 2 Davidan utapankirinakarojj akham sasaw yatiyasïna: “Siria markajj Efrainampiw guerran nuwasiñatak mayachtʼasi” sasa.

Acaz chachan chuymapasa markapankir jaqenakan chuymanakapasa ajjsarañatwa khatatipjjäna, kunjamtï montenkir* qoqanakajj* thayamp khatatipki ukhama.

3 Ukatjja Jehová Diosajj akham sasaw Isaiasarojj säna: “Mirä amp suma, Sear-Jasub* yoqamampejj Acaz chachamp jikisir sarapjjam,+ patjja toqenkir uma estanquen canalapajj tukuyki uka jakʼana,+ isi tʼajjsurin oraqepar sarki uka thakina. 4 Juparojj akham sañamawa: ‘Amuyasim, tranquilokïma. Aqaskir aka pä jiskʼa lawanakar jan ajjsaramti, janirak desanimasimti, Siria markan Rezín sat reyin wal colerasitapatsa Remalías+ chachan yoqapan wal colerasitapatsa jan ajjsaramti. 5 Siria markampi, Efrainampi, Remalías chachan yoqapampejj jumar jan waltʼayañatakiw amtapjje, jupanakajj akham sapjjewa: 6 “Judá marka contra makatapjjañäni, qʼal tʼunjañäni,* katuntarakiñäni,* uka markan reyipäñapatakejj Tabeel chachan yoqapar uttʼayarakiñäni”+ sasa.

 7 ”’Taqe Kunjjar Munañani Jehová Dios Tatitojj akham siwa:

10 Jehová Diosajj akham sasaw Acaz chacharojj saskakïna: 11 “Jehová Diosamarojj mä señal mayim,+ uka señalajj Sepultura* wali manqhankpasa jan ukajj alajjpachan wali altonkpasa mayiskakim” sasa. 12 Ukampis Acaz chachajj akham sänwa: “Janiw nayajj kunsa maykäti, janirakiw Jehová Diosarojj yantʼkäti” sasa.

13 Ukatjja Isaías chachajj akham sänwa: “Davidan utapankirinaka, mirä amp suma, istʼapjjam. ¿Jaqenakan pacienciap yantʼañajj janit jumanakatakejj bastäki? ¿Diosan pacienciap yantʼapjjarakïtati?+ 14 Jehová Dios pachpaw jumanakarojj mä señal churapjjätam. Mä tawaqow usuriptani, jupasti mä yoqall wawa ususirakini,+ Emmanuel* sasaw sutiyarakini.+ 15 Kunapachatï uka wawajj kunatï jan walïki uk rechazañ yatjjani, kunatï walïki uk ajlliñ yatjjarakini ukhajja, mantequillampi miskʼimpwa manqʼasini. 16 Uka wawajj janïraw kunatï jan walïki uk rechazañ yatkaniti, janirakiw kunatï walïki uk ajlliñ yatkaniti, ukhaw jumajj ajjsarkta uka pä reyinakan oraqepajj qʼala apanukut uñjasini.+ 17 Acaz rey, Jehová Diosajj juma contrasa, markam contrasa, awkiman utapankirinak contrasa mä jan waltʼañ tiempo apanini, Efrainajj Judá markat jaljtkäna ukhat aksarojj janipuniw ukhamajj paskiti,+ Diosajj Asiria markan reyiparuw khitanini.+

18 ”Uka urunjja Jehová Diosajj Egipto markankki uka wali jaya Nilo jawiran canalanakankir chhichhillankhanakaruw khuytʼani, Asiria oraqenkir abejanakaruw khuytʼarakini, 19 taqe jupanakaw jutapjjani, manqha vallenakana, qarqa* qʼawanakana, taqe chʼapinakana, kawkjantï animalanakajj uma umtʼapki taqe uka lugaranakanwa jupanakajj utjantasipjjani.

20 ”Uka urunjja Éufrates jawira toqet alquilat navajampiwa, mä arunjja Asiria markan reyip taypiw+ Jehová Diosajj pʼeqe ñikʼutsa kayu tʼarwsa afeitani, uka navajajja sunksa apaqarakiniwa.

21 ”Uka urunjja mä chachaw uywanak taypitjja mä ternerampi pä ovejanakamp jakayaskakini. 22 Niyakejjay walja lechejj utjchinejja, jupajj mantequillwa manqʼani, kuna laykutejj taqe khitinakatï uka oraqen jiltʼapkani ukanakajja mantequillampi miskʼimpwa manqʼapjjani.

23 ”Uka urunjja kawkjanakantï 1.000 uvas alinakajj 1.000 siclo* qollqe metal valoranïkäna uka cheqanakanjja chʼapinakampi jan wali qoranakampikiw utj-jjani. 24 Uka lugararojja chachanakajj flechtʼañ arconakampi flechanakampiw sarapjjani, kuna laykutejj markpachaw chʼapinakampi jan wali qoranakampi phoqantatäni. 25 Chʼapinakaru jan wali qoranakaru ajjsaratam laykojja nayrajj azadonampi qʼomachaskäna uka qollunakarojj janiw jakʼachaskätati. Uka qollunakajj toronakan pasto manqʼañ lugararuw tukjjani, ovejanakan taksut oraqeruw tukjjarakini”.