1 Crónicas

29 David reyejj taqpach congregacionarojj akham sänwa: “Diosajj ajlliski uka Salomón yoqajajj waynitüskiwa,+ janirakiw experiencianïkiti,*+ lurañanakajj waljawa, kuna laykutejj uka templojj janiw jaqetakïkiti jan ukasti Jehová Diosatakiwa.+ 2 Kunanakatï Diosajan utap lurañatakejj wakiski ukanak wakichañatakejj nayajj walpun chʼamachasta, ukatwa qorimpi, qollqempi, cobrempi, hierrompi,+ maderanakamp+ churta, ónice* qalanaksa, mezclamp uchaskani uka suma qalanaksa, adornañatak uchaskani uka kunayman colorani jiskʼa qalanaksa, kunayman suma qalanaksa, walja alabastro* qalanaksa churaraktwa. 3 Diosan utapar wal munasitaj laykojja, kunanaktï sagrado utatak wakichkta taqe ukanakat sipansa, Diosajan utapatakejj+ pachpa qorijampi qollqejampwa churaskta,+ 4 Ofir+ lugarat apanit 3.000 qori talentonakampi,* cuartonakan perqanakapar* uchañatak 7.000 talento qʼomachat metal qollqenakampi churarakta, 5 ukanakampiw kunanakatï qorit luratäñapäki, qollqet luratäñapäki ukhamarak taqe kunanaktï artesanonakajj lurapjjañapäki ukanakajj lurasini. Jichhasti ¿khitis jichhürojj Jehová Diosar mä regalo churañ munaraki?”+ sasa.

6 Ukatwa familianakan principenakapasa, Israelan tribunakapan principenakapasa, 1.000 chachanakampiru 100 chachanakampir pʼeqtʼirinakasa,+ reyin lurañanakap uñjirinakas+ voluntadapat jutapjjäna. 7 Ukatjja cheqpach Diosan utapatakejj akanakwa jupanakajj churapjjäna: 5.000 qori talentonaka, 10.000 dárico* qollqenaka, 10.000 talento metal qollqenaka, 18.000 cobre talentonaka, 100.000 hierro talentonaka. 8 Khitinakatï suma qalanak apanipkäna ukanakajja, Jehová Diosan utapan kawkjantï wali valoraninakajj imaski uka cheqatakiw churapjjäna, Jehiel+ sat guersonita+ chachaw uka cheqat encargatäna. 9 Voluntadapat ofrendanak churasajj markpachaw wal kusisïna, kuna laykutejj phoqat chuymampiw Jehová Diosarojj uka ofrendanak churapjjäna,+ David reyis wal kusisirakïna.

10 Ukatjja Davidajj taqe congregación nayraqatanwa Jehová Diosar jachʼañchäna. Davidajj akham sänwa: “Jehová Dios Tata, nanakan Israel tatajan Diosapa, wiñayans wiñayapatak* jachʼañchatämaya. 11 Jehová Dios Tata, taqe kunanakatï alajjpachansa aka oraqens utjki ukanakajj jumankiwa,+ ukatwa jumajj jachʼätajja,+ chʼamanïtasa,+ sutimas wali sumawa, kʼajkir qhanätawa,+ musparkañarakïtawa. Jehová Dios Tata, jumankiw reinojja.*+ Jumaw taqe kunjjar mä pʼeqtʼirjamajj jachʼañchatätajja. 12 Kunanakatï wali valoranïki ukanakasa jachʼañchatäñasa jumankiwa,+ jumarakiw taqe kunjjar apnaqtajja,+ wali chʼamanirakïtawa,+ juman amparamaw maynirojj jachʼar tukuyaspa,+ taqenirus chʼam churarakispa.+ 13 Jichhasti nanakan Diosaja, nanakajj jumaruw yuspärapjjsma, wali suma sutimsa jachʼañchapjjaraktwa.

14 ”Ukampis nayasa markajasa, ¿khitïpjjaraktsti voluntadanakajat aka ofrendanak jumar churañatakisti? Taqe kunas jumatwa juti, kuntï amparamat katoqapkta uka pachpakwa jumar churapjjsma. 15 Juma nayraqatanjja, nanakajj yaqha markat jutiri forastero jaqenakakïpjjtwa, nayra awkinakajas ukhamakïpjjarakïnwa.+ Aka oraqenjja, nanakan vidanakajajj mä chʼiwir uñtatakiwa,+ janirakiw wiñay akankapkäti. 16 Jehová Dios Tata, nanakan Diosaja, juman santo sutim jachʼañchañatak mä uta lurañatakejja, kunanaktï wakichapkta ukanakajj juman amparamatwa juti, taqe ukanakajj jumankarakiwa. 17 Nayan Diosaja, nayajj yattwa, jumajj chuymanak sum uñakiptajja,+ taqpach chuymäki* ukatakejj wal kusistajja.+ Taqe akanaksti nayajj taqe chuymaw voluntadajat churta, akankaskir markamar voluntadapat ofrendanak churir uñjasajj wal kusisirakta. 18 Jehová Dios Tata, Abrahán, Isaac, Israel sat nayra awkinakajan Diosapa, aka amuyunak markaman chuymapan wiñayatak utjayakimaya, jumar taqe chuyma servipjjañapatakis yanaptʼarakim.+ 19 Juman mandamientonakamsa,+ amtayäwinakamsa, leyinakamsa phoqat chuymampi+ phoqañapatakiy Salomón yoqajarojj yanaptʼam, taqe akanak lurañapatakisa templo lurañapatakis yanaptʼarakim, nayaw uka templo lurasiñapatak wakichta”+ sasa.

20 Ukatjja Davidajj akham sasaw taqpach congregacionar säna: “Jichhajj jumanakan Jehová Diosamar jachʼañchapjjam” sasa. Taqpach congregacionajj nayra awkinakapan Jehová Diosaparuw jachʼañchapjjäna, Jehová Dios nayraqatansa reyi nayraqatansa qonqortʼasisajj oraqer puriñkamaw altʼasipjjarakïna. 21 Jupanakasti Jehová Diosarojj sacrificionak loqtapjjäna, Jehová Diosarojj nakhantayat ofrendanak+ qhepürkamaw loqtasipkakïna, 1.000 torillonakampi, 1.000 orqo ovejanakampi, 1.000 corderonakampi, vino ofrendanakapampi+ loqtapjjäna. Jupanakajj taqe Israel markpachatakejj sacrificionak waljpun loqtapjjäna.+ 22 Uka urunjja jupanakajj wali kusisitaw Jehová Dios nayraqatan manqʼapjjäna, umapjjäna.+ Ukatjja Davidan Salomón yoqaparojj mä kutimpiw reyit uttʼayapjjäna, Jehová Dios nayraqatanwa juparojj mä pʼeqtʼirit uttʼayapjjäna,*+ Sadoc chacharojj sacerdotet uttʼayapjjarakïna.+ 23 Ukatsti Salomonajj David tatap lantiw Jehová Diosan tronopan+ reyit qontʼasïna, luratanakapajj sumarupuniw saräna, taqe israelitanakaw juparojj istʼapjjarakïna. 24 Taqe principenakasa,+ guerran nuwasir chʼamani chachanakasa,+ David reyin taqe yoqanakapas+ Salomón reyiruw katuyasipjjäna. 25 Jehová Diosasti taqe Israel markan uñjkataw Salomón reyirojj wali importante jaqer tukuyäna, mayni reyinakat sipansa wali jachʼañchat reyïnwa, janirakiw jupa nayrajj wali jachʼañchat reyejj Israel markan utjkänti.+

26 Jesé chachan David yoqapajj taqe Israel markaruw reyit apnaqäna. 27 Jupajj 40 maranakaw Israel markar reyit apnaqäna. Hebrón markanjja 7 maranaka,+ Jerusalén markansti 33 maranakaraki.+ 28 Davidajj walja maranak sum jakasisaw jiwjjäna,+ walja maranak jakasasa, wali qamirïsasa, jachʼañchatäsas contentokiw jiwjjäna. Jupa lantejj Salomón yoqapaw reyëjjäna.+ 29 David reyin taqe sarnaqäwinakapajja, qalltat tukuykamajj Samuel sat visionanak amuytʼirin registronakapan qellqatawa, Natán+ profetampin Gad+ sat visionanak uñjirimpin registronakapan qellqatarakiwa. 30 Reyit apnaqkäna ukhajj kunanakas pasäna taqe ukanakasa, wali chʼamampi luratanakapasa, kunanakatï juparusa, Israel markarusa, uka jakʼankir taqe yaqha reinonakarus* paskäna ukanakasa uka registronakan qellqatarakiwa.