Yatirinakaw Jesusar visittʼapjjäna

Mä qhawqha jaqenakaw inti jalsu toqet jutapjjäna, jupanakajj warawaranak uñchʼukisin yatirinakäpjjänwa. Warawaranak uñchʼukisajj kunjamänisa jaqenakan jakäwipajj uk yatipjjeristwa sasaw sapjjäna (Isaías 47:13). Jupanakajj utapankkasaw mä “warawara” uñjapjjäna, uka warawara uñjasajj wali jayaw arkapjjäna. Uka warawarajja, janiw nayraqatajj Belenar irpkänti, jan ukasti Jerusalenaruw irpäna.

Uka jaqenakajj Jerusalenar purisajja, akham sasaw jisktʼapjjäna: “¿Kawkinkisa judionakan reyipäkani uka wawajja? Inti jalsu toqenkkasaw jupan warawarap uñjapjjta, ukatwa nayraqatapar altʼasiri jutapjjta” sasa (Mateo 2:1, 2).

Uk istʼasasti rey Herodesajj walpun colerasïna, ukatwa jilïr sacerdotenakampiru judionakan religionap pʼeqtʼirinakampiru jawsayasajj ‘¿kawkinsa Cristojj nasiñapa?’ sasin jisktʼäna. Jupanakasti, ‘Belenanwa’ nasiñapa sasaw Qellqatanakarjam sapjjäna (Mateo 2:5; Miqueas 5:2). Qhepatsti, Herodesajj jamasatwa puripkäna uka yatirinakar jawsayäna, jupanakarojj akham sänwa: “Uka wawar sum thaqtir sarapjjam, jupar katj-jjasajj yatiyapjjetätawa, ukhamat nayraqatapar altʼasiri sarañajataki” sasa (Mateo 2:8). Herodesajj jiwayañatakiw Jesusar thaqaskäna.

Yatirinakajj sarjjapjjäna uka qhepatjja, inti jalsu toqenkkasin uñjapkäna uka “warawarajj” jupanak nayraqataw saräna. Amuyatajja, janiw aleq warawarakïkänti, jan ukasti jupanakar irpañatakïnwa. Uka jaqenakajja, kawkjarutï warawarajj saytʼkäna ukakamaw arkapjjäna, warawarasti kawkjankkäntï Joseasa, Mariasa, wawasa uka patjjaruw saytʼäna.

Yatirinakajj utar mantapjjäna ukhajja, wawajj María mamapampïskänwa, uk uñjasasti killptʼasisaw (qonqortʼasisaw) nayraqatapar altʼasipjjäna. Ukatjja regalonakap apsusaw churapjjäna: qori, janqʼo incienso, mirra ukanaka. Qhepatjja, Herodesan ukaru kuttʼañampëjjapjjäna ukhajja, Diosajj jan kuttʼapjjañapatakiw yatirinakar mä samkan yatiyäna, ukatwa markaparojj yaqha thaknam sarjjapjjäna.

¿Khitis uka yatirinakarojj “warawaramp” irpaskäna? Amtañäni, uka “warawarajj” janiw Belenaru cheqak irpkänti, jan ukasti nayraqatajj Jerusalenaruw uka jaqenakar irpäna, ukanwa jupanakajj Herodes reyimpejj jikisipjjäna. Herodes reyisti Jesusar jiwayañwa amtäna. Yatirinakatï Jesusajj kawkinkaskis uk yatiyapjjasapäna ukhajja, Herodesajj Jesusar jiwayaspänwa. Ukampis Diosaw uka jaqenakarojj Jesusajj kawkinkaskisa uk Herodesar jan yatiyapjjañapatakejj jarktʼäna. Cheqansa Supayaw Jesusarojj jiwayañ munaskäna. Uka amtap phoqañatakiw Supayajj yatirinakarojj “warawaramp” irpaskäna.