Mä cumpleañonwa Juanar jiwayapjjäna

Jesusan apostolonakapajj Galileanwa Diosan arunakap yatiyasipkäna. Ukampis ‘Jesusajj Diosan Corderopawa’ sasin siskäna uka Bautisir Juanajj janiw jupanakjam librëkänti, niya pä maraw carcelankjjäna.

Herodes Antipasajj Felipe jilapan Herodías esposapampiw casarasïna, ukatwa Juanajj juchañchäna. Herodes reyejj Herodías warmimpi casarasiñatakejj nayrïr warmipampejj divorciasïnwa. Diosajj Moisesar churkäna uka Leyirjamajj Herodesan ukham casarasitapajj janiw walïkänti, adulterio jucha lurañampi sasïnwa. Juanan ukham juchañchatapatjja Herodesajj carcelaruw Juanar llawintayäna, inas Herodiasan mayitaparjam ukham lurchïna.

Jaqenakajj Juanarojj ‘profetatwa uñtʼapjjäna’, ukhamajj Herodesajj janiw Juanar kunsa lurirjamäkänti (Mateo 14:5). Ukampis Herodías warmejj janiw Herodesjam pächaskänti, “walpun Juanar uñisïna”, kunjamatsa jiwayaspa ukwa thaqarakïna (Marcos 6:19). Ukhamajj niyaw munañapajj phoqasiñampïskäna.

Janïra 32 maran Pascuajj amtaskäna ukhaw Herodes reyejj cumpleañop amtañatak mä fiesta luräna. Uka fiestarojj wali munañani jilïrinaka, ejerciton comandantenakapa, Galileankir wali aytat jaqenakaw sarapjjäna. Fiestanjja Herodiasan Salomé phuchapaw invitadonak nayraqatan thoqtʼäna, uk uñjasasti ukankirinakajj wal kusisipjjäna. Salomeajj Herodiasana Felipe nayrïr chachapan phuchapänwa.

Herodesajj ukhamarakiw esposapan phuchapar thoqtʼir uñjasajj wal kusisïna, ukatwa akham säna: “Kunjjay jumajj munsta, uk mayiskakita, nayajj churämawa” sasa. Juramentomp saskakïnwa: “Kuns mayiskakita, nayajj churämawa, aka markajatsa chikatpach churirisma” sasa. Janïr kun maykasajja Salomeajj mamapar jisktʼiriw saräna, “¿kun mayiñajas wakisispa?” sasa (Marcos 6:22-24).

Herodías warmejj ukpun suyaskäna, jankʼakiw akham sarakïna: “Bautisir Juanan pʼeqep mayim” sasa. Salomeajj Herodesan ukar jankʼak kuttʼanisajj akham sasaw säna: “Bautisir Juanan pʼeqep mä bandejar anchhitpach churita” sasa (Marcos 6:24, 25).

Uk istʼasasti Herodesajj walpun llaktʼasïna. Ukampis Salomear juramentompi arskäna ukjja, invitadonakajj istʼapjjänwa, ukatwa jan phenqʼachatäñatakejj mayitaparjam phoqañ amtäna, jan juchani jaqer jiwayañwa amtäna. Herodesajj mä guardiaruw carcelar khitäna, Juanan pʼeqep apaqaniñapataki. Guardiajj jankʼakiw Bautisir Juanan pʼeqep mä bandejar apanïna, ukatjja Salomearuw churäna. Salomeasti mamaparuw churjjarakïna.

Ukanak yatisasti, Juanan discipulonakapajj jutasinwa cuerpop apasjjapjjäna, mä sepulturaruw imtʼanjjapjjarakïna. Ukatjja Jesusaruw uk yatiyapjjäna.

Qhepatjja Herodes Antipasajj kunjamsa Jesusajj jaqenakar qolläna, demonionaksa alissüna uk istʼasajj wal ajjsarayasïna. Taqe uka milagronak lurirejj Bautisir Juanäpachawa, jupaw jiwatanak taypit jaktanpacha sasaw amuyäna (Lucas 9:7). Ukatwa Herodesajj Jesusar wal uñjañ munäna. Ukampis janiw Jesusan arunakap istʼañ munkänti, jan ukasti Jesusajj Bautisir Juanäpachänti janicha ukwa yatiñ munäna.