Diosar jakʼachasipxam

Llampʼu chuymani ukat altʼat chuymaninakarux Jehová Diosax wal munasi

Números 12:1-15

TAQI kun muniri, atipañ miniri, jachʼa jachʼ tukuri: ukhamat uñtʼatäpxiw akapachan wali aytatäñ munirinakaxa. ¿Ukham jaqïñax Jehová Diosar jakʼachayistuti? Janiwa. Jupar luqtirinakax llampʼu chuymanïpxañapa, sumankañ munirïpxañapwa Jehová Diosax muni. Jichhax Números 12 jaljan kunjamsa qhanañchi uk uñjañäni. Egiptot israelitanakax misttanitapatxa janiw jayäkiti, jichhax Sinaí qullu thiya wasar pampankapxiwa, ukat aksarux kunas paspachäna uk amuytʼañäni.

Mariampi Aaronampixa, “Moisés [sullkap] contraw parlapxäna” (1 tʼaqa). Moisesan nayraqatapan janiw kuns parlapkänti jan ukasti jan ukankkäna ukhaw jupa contra parlapxäna, ukat inas israelitanakar Moisés tuqi quejasipxchïna, ukaw qillqatarjamax amuyasi. Inas Mariax ukham jan wal parlañ pʼiqtʼchïna, kunattix jupan sutipaw nayraqat aytasi. Chiqas Moisesax cus uksankir warmimp casarasitapatwa ukham chʼaxwapxäna. ¿Mariax celosatti ukham parlpachäna? ¿Warmiparukiw istʼapxani janiw nayar istʼxapxitaniti sasat amuypachäna?

Janiw ukakïkänti jan ukasti yaqha tuqinakampitänwa, kunattix Mariampi Aaronampix akham sasin parlapxäna: “Tatitu [Jehová] Diosasti janiw Moisesampiki parlkiti, jan ukasti jiwasampix parlarakiwa” sasa (2 tʼaqa). Ukanak uñjasax wali aytatäña ukat mayninakxar pʼiqtʼirïñ munapxatapaw amuyasi.

Ukampis jupa contra parlapkäna ukxa Moisesax pacienciampiw aguantäna. Bibliax akham siwa: “Moisesax wali llampʼu chuymani jaqïnwa” sasa (3 tʼaqa).a Ukhamaxa, Moisesax janiw kuns lurañapäkänti jan ukasti Jehová Diosaw uk sum uñjaskäna ukat Juparakiw askichxäna.

Moisés contra parlasaxa Jehová Dios contraw parlasipkäna. Chiqas Diosaw Moisesarux mayninakxar jilïrit uttʼayäna. Kunapachatï Mariaru ukat Aaronar juchañchkäna ukhax akham sänwa: “Jupampisti ajanuy ajanuwa parlapxtxa” sasa. Ukat akham jisktʼarakïna: “¿kunatarak jumanakasti jupxata jan wali arunak parlapxtasti?” sasa (8 tʼaqa). Moisesar jan respeto uñachtʼayapxatapatxa, jupanakax Diosan colerapwa uñjapxañapäna.

Inas Mariax Moisés contra parlañ qalltchïna, ukatwa Diosax lepra usump usuntayäna. Ukham uñjasaxa, Aaronax kullakap layku Diosar mayiñapatakiw Moisesar achiktʼasïna. ¿Amuytati? Khiti contratï parlapkäna ukan yanaptʼapwa jichhax mayipxarakïna. ¿Moisesax kamachänsa? Qillqatarjamaxa, Moisesax wali llampʼu chuymanïtapa ukat altʼat chuymanïtapaw uñjasi, kunattix kullakapan kʼumarachasiñapatakixa Jehová Diosarux taqi chuymampiw mayirapïna, Diosax istʼänwa ukat Mariax kʼumaraptxänwa, ukampis mä pʼinqaw uñjasïna, kunattix paqallqu urunakaw campamentot jaqunukutäna.

Aka sarnaqäwinxa, kunjam chuymani jaqinakarus Jehová Diosax munasi ukat kunanaksa uñisi ukanak yatxatawaytanxa. Jiwasatï Jehová Diosar jakʼachasiñ munstanxa: taqi kun munirïña, atipañ munirïña, jachʼa jachʼ tukuña taqi ukanak apanukuñasawa. Ak amtasipunim, khitinakatï llampʼu chuymanïpki ukat altʼat chuymanïpki ukanakaruw Jehová Diosax munasi. Ukat Jupax akham sarakiwa: “Llampʼu chuymaninakasti uraq qatuqapxani, jilarkir sumankañampiw kusisipxarakini” sasa (Salmo 37:11; Santiago 4:6).

[Qhanañchäwi]