Jisktʼäwinaka

◼ Diosan yaqhip Qhanañchirinakapawa jupanakpach Bibliat jukʼampi yatxatañataki tantachasipxatayna ukax ‘amuyasiri chiqapa uywatatakixaʼ, ¿walikïskpachati? (Mat. 24:45, 47.)

Janiwa, janiw walïkiti. Ukampis yaqhip jilat kullakanakax Bibliat jupanakpach aruskipapxañapatakiw tantachasipxatayna. Yaqhipanakax nayra hebreo, griego arunak yatxatañaruw uchasipxatayna, ukhamat Traducción del Nuevo Mundo sat Bibliax wali luratäskiti janich uk yatxatañataki; yaqhipanakax ciencia tuqitwa yatxatapxarakitayna Diosan Arupan siski uka arunakax ukhamäskapunit janich uk yatiñataki. Yaqhanakaxa, Internetan mä chiqa uñstayapxatayna ukhamat yaqhanakampi parlakipapxañapataki, ukat yatxatatanakap yaqhanakar yatiyañatakiwa tantachäwinak utjayapxatayna ukatxa yatxatatanakapwa qillqapxarakitayna, ukhamat tantachäwinakasan ukat libronakasan katuqktan ukar jukʼampi yapxatañataki.

Uraqpachanwa, Jehová Diosan markapax jiskʼa tantachäwinakansa jachʼa tantachäwinakansa ukat qillqatanak tuqnamsa walja yatichäwinakwa katuqasipki ukhamaraki walja chʼamañchäw katuqasipkaraki. Diosan markapax “mä sapa amtañani, mä chuymanikiraki” sarnaqapxañapatakixa Jehová Diosax qullan ajayupampi ukhamaraki Arupampiw kunatix wakiski ukanak churaski, ukhamat ‘iyawsäwi tuqit suma uttʼatäpxañapataki’ (1 Cor. 1:10; Col. 2:6, 7). Chiqansa, jichhürunakan ukham Jehová Diosan yanaptʼatapatxa wal yuspärtanxa. Ukhamasti, ‘amuyasiri chiqapa uywatan’ jan luratäki uka qillqatanakax janipuniw liyiñatakix akchʼas walïkiti, ukhamaraki kuna tantachäwinakatï Internetansa yaqha chiqanakansa luraski ukax janirakikiw walïkiti (Mat. 24:45-47).

Diosan Apnaqäwip layku maynin wal chʼamachasitapax walikïskiwa. Ukampis kuntix Jesusax aka Uraqin tamap tuqnam luräski ukxa janiw khiti jaqisa chʼamaktʼayañapäkiti. Cristiano tiemponxa, apóstol Pablox jan inamay parläwinakar tiempo aptʼasipxamti sänwa: kuna familiatsa juti uk yatxatañasa “inamaya chʼaxwañanakarukiw api, ukatsti Diosax kuna iwxanaktix iyawsäwi layku phuqhañasataki churkistu ukarux janiw yanapkistuti” sasa (1 Tim. 1:3-7). “Jan wali jisktʼanaka, nayra arunaka, chʼaxwanaka, ukhamarak Moisesan leyipxata” chʼaxwañanaksa cristianonakax apanukupxañapawa, janiw ukanakar mitisipxañapäkiti. “Ukanakax inamayawa, jan kunatak askirakiwa” (Tito 3:9).

Khitinakatix Bibliat jukʼampi sum yatxatañ munapkchi ukanakaxa Perspicacia para comprender las Escrituras ukat “Toda Escritura es inspirada de Dios y provechosa” sat libronakat yatxatapxañapawa, ukhamaraki yaqha qillqatanakasasa utjarakiwa; Daniel, Isaías ukat Apocalipsis sat profecía libronakat yatxatañatakisa qillqatanakax utjarakistuwa. Uka qillqatanakanwa yatxatañatakisa lupʼiñatakisa walja yanaptʼanakax utjistu, ukhamatwa ‘jumanakax Diosan munañap amuytʼapxäta, ukhamarak taqi casta yatiñanaksa ajay tuqin amuytʼañanaksa jikxatapxäta. Ukhamatwa, Jehová Tatitunkirjam sarnaqapxäta, ukhamarak kunatix jupatakix askïki ukanak lurapxäta, uka suma luräwinakamax mä suma cosechjama utjañapataki, Diosarus jukʼampi sumrak uñtʼapxañamataki’ (Col. 1:9, 10).