¿Kunatï chiqäki uk yatiñ munasmati?

Wali wakiskir aka jisktʼanakatwa taqinis wal yatiñ muntanxa. Inas jumax akham jisktʼasirïsta:

• ¿Chiqapunit Diosax sum jakasiñas munpacha?

• ¿Nuwasïwinakasa tʼaqhisiñanakasa tukusxpachäniti?

• Jiwatatxa, ¿jakañax utjaskakpachati?

• ¿Jiwatanakatak mä suytʼäwix utjpachati?

• ¿Diosan istʼatäñatakix kunjamsa Jupat mayisiristxa?

• ¿Kunjamsa kusisit jakasiristxa?

¿Aka jisktʼanakar qhanañchañatakix kun lurañas wakisispa? Libronak maytʼapki uka utanakansa jan ukax libro aljañ utanakansa walipuniw uka tuqit parlir libronakax utji, ukampis may maya parlapxi. Yaqhipax aka urunakatakix waljamäkchisa, mä qhawqha tiempotxa pasatakïxiwa, ukatwa mayampi kutikipapxi jan ukax yaqha uñstayxapxi.

Ukampisa, uka jisktʼanakar sum qhanañchañatakix mä librow utji. Uka libroxa janipuniw kʼariskaspati. Jesucristox Diosar mayisisaxa akham sasaw uka librot säna: “Arunakamasti chiqawa” sasa (Juan 17:17). Jichhürunakanxa, uka Arunakapax Qullan Qillqatanakjam uñtʼatawa, mä arunxa Biblia satawa. Uka jisktʼanakarux kunjamsa Bibliax sum qhanañchi, ukwa jichhax uñjañäni.

KUNATSA UKHAM JISKTʼASTANXA: Jan wali tiemponakan jakastanxa, jan sinttʼasisaw jaqix yaqhanakar ina chʼusat tʼaqhisiyapxi. Diosaruw yupaychirïpxta sirinakasa, Diosan munañapat ukham tʼaqhistanxa sasaw yatichapxi.

UKA TUQIT KUNSA BIBLIAX YATICHI: Diosax janipuniw jan walinak lurkaspati. “¡Taqi chʼamani Diosax janiw kuna jan walsa lurkaspati, janirakiw kunatix jan chiqapäki uksa lurkaspati!” sasaw Job 34:10 qillqatax qhanañchi. Diosax jiwasatakix mä suma amtaniwa. Ukatwa Jesucristox Diosat mayisiñxa akham sas yatichäna: “Alaxpachankir nanakan Awkixa [...] Apnaqäwimax jutpan. Munañamax luraspan, alaxpachansa ukhamaraki aka Uraqinsa” sasa (Mateo 6:9, 10, Traducción del Nuevo Mundo). Diosax wal jiwasatxa llakisi, ukatwa amtanakapa phuqañatakixa wal irnaqaski (Juan 3:16).

Aka jiskʼa tʼaqanak uñxatarakisma: Génesis 1:26-28; Santiago 1:13 ukat 1 Pedro 5:6, 7.

KUNATSA UKHAM JISKTʼASTANXA: Uka chʼaxwäwinakanxa walpun jaqinakax jiwarasipki. Ukhamarakiw taqinirus tʼaqhisiyistu.

UKA TUQIT KUNSA BIBLIAX YATICHI: Sumankañaw jaqinakatakix utjxani sasaw Jehová Diosax qhanañchi. Aka Uraqi apnaqxani ukhaxa “janirakiw guerran nuwasiñatakis [yatichäwinakax utjxaniti]”. Jan ukasti “espadanakapxa qhulliñ aradoruw tukuyapxani” (Isaías 2:4). Janiw khitis ina chʼusat tʼaqhisiyata uñjasxaniti, Diosax taqi jan walinakwa tukjani. Bibliax akham siwa: “Diosax taqi jachanakapwa nayranakapatxa picharani, janirakiw jiwañas, jachañas utjkxaniti, warariñasa ni usuyasiñasa. Taqi kunanakatï nayrax utjkän [jichhürun tʼaqhisiñanaka ukat ina chusat tʼaqhisiñanakampi] ukanakax tukusxiwa” sasa (Apocalipsis 21:3, 4).

Aka jiskʼa tʼaqanak uñxatarakisma: Salmo 37:10, 11; 46:9; ukat Miqueas 4:1-4.

KUNATSA UKHAM JISKTʼASTANXA: Jiwatat jakañax utjaskakiw sasaw yupaychäwinakanxa yatichapxi. Jiwatanakax usuchjkistaspasa, jan walinaksa lurapkaspa ukham amuyapxi, ukat Diosas jupanakarux wiñayataki aqkir infiernon tʼaqhisiykaspa ukham yatichapxi.

UKA TUQIT KUNSA BIBLIAX YATICHI: Jiwxtan ukhaxa qʼal tukustanxa, janiw kunas jukʼamp utjxiti. “Jiwatanakax janiw kunsa yatipkiti” sasaw Eclesiastés 9:5 qillqatax qhanañchi. Jiwatanakax janiw kunsa yatipkiti, ni kuns amuyapkarakiti, janirakiw munasiñapas utjxiti, ukhamaxa janiw jakirinakarux usuchjapkaspati ni yanaptʼapkaspasa (Salmo 146:3, 4).

Aka jiskʼa tʼaqanak uñxatarakisma: Génesis 3:19 ukat Eclesiastés 9:6, 10.

KUNATSA UKHAM JISKTʼASTANXA: Janiw khitis jiwañ munktanti, jan ukasti familiasampi, munat masinakasampi wali kusisita jakasiñwa muntanxa.

UKA TUQIT KUNSA BIBLIAX YATICHI: Taqi jiwirinakatxa niya taqpachaw jaktanipxani. Jesusax akham arsüna: “Taqi jiwatanakasti [...] jaktanipxaniwa” sasa (Juan 5:28, 29). Diosan amtaparjamaxa, jiwatat jaktanirinakax mä suma Uraqin jakasiñatakiw jaktanipxani (Isaías 26:19). Taqi istʼasir jaqinakaw kʼumara ukat wiñayataki jakasipxani, uka tuqitwa parlaskäna. Bibliax sarakiwa: “Aski jaqinakax uraq katuqapxani, wiñayatakiw ukan jakapxarakini” sasa (Salmo 37:29).

Aka jiskʼa tʼaqanak uñxatarakisma: Job 14:14, 15; Lucas 7:11-17 ukat Hechos 24:15.

KUNATSA UKHAM JISKTʼASTANXA: Yupaychäwinakar saririnakax niya taqiniw Diosat mayisipxi. Ukampisa, Diosax janis jupanakar jaysankaspa ukham umuyasipxi.

UKA TUQIT KUNSA BIBLIAX YATICHI: Diosar mayisiñ tuqitxa Jesusax akham sasaw yatichäna: “Oración lurasinxa” jan kutin kutinix “inamaya arunakxa arsumti” sasa (Mateo 6:7). Diosampi istʼayasiñatakix munañaparjamaw mayisiñasa. Ukatakixa, kunas Diosan munañapaxa uk yatiñaw wakisi, ukhamatakwa munañaparjamax mayisiñäni. 1 Juan 5:14 qillqatax akham sasaw qhanañchi: “Kuntix Diosarux mayiñäni munañaparjama ukxa jupax istʼistuwa” sasa.

Aka jiskʼa tʼaqanak uñxatarakisma: Salmo 65:2; Juan 14:6 ukat 1 Juan 3:22.

KUNATSA UKHAM JISKTʼASTANXA: Qullqinïña, wali mintatäña ukat suma uñtanïña, ukanakampis kusisita jakassna ukham umuyapxi. Ukatwa ukanak wal thaqhapxi, ukampis janiw kusisiñ jikxatapkiti.

UKA TUQIT KUNSA BIBLIAX YATICHI: Kusisita jakasiñatakix kunas munasi uka tuqitxa, Jesusax akham sänwa: “Kusisiñanïpxiw khitinakatix ajay tuqin aynachtʼatäpxatap amuyasipxi ukanakaxa” sasa (Mateo 5:3). Kusisita jakasiñatakixa, kunatix jiwasataki wali askïki uk jikxatañasawa, ukasti Diosata, ukat amtanakapampita kunatï chiqäki uk yatiñ munañanwa jikxataraksnaxa. Uka yatichäwinakax Bibliankiwa. Ukanak yatiñax kunatï askïki, jan askïki uk sum amuytʼañatakiw yanapistu, ukatsti kusisiyarakistuwa. Amtanakasansa, luräwinakasansa Biblian yatichäwinakaparjampun lurañänixa jukʼampi sum jakasiñatakiw yanaptʼistani (Lucas 11:28).

Aka jiskʼa tʼaqanak uñxatarakisma: Proverbios 3:5, 6, 13-18 ukat 1 Timoteo 6:9, 10.

Uka jisktʼanakatxa kunsa Bibliax yatichi uka tuqitxa mä jukʼakwa yatxatawaytanxa. ¿Jukʼampi yatxatañ munasmati? “Ajay tuqin aynachtʼatäpxatap amuyasipxi” ukanak taypinkatam amuyassta ukhaxa, jukʼampwa yatxatätaxa. Inas akham jisktʼasirakirïsta: “Niyakixay Diosax sapa maynit amtaschixa, ¿kunatsa jan walinaksa tʼaqhisiñanaksa jichhakam utjayaskakpacha? ¿Kunjamatsa familiajampix sum jakasiristxa?” sasa. Uka jisktʼanakarusa yaqhanakarusa Bibliaw chuymar purtʼkiri wali sum qhanañchistu.

Ukampisa, Biblia liyiñatakix janiw chʼamachasipkiti. Janis tukuyañjamäkaspa ukat wali chʼamäkaspas ukham amuyapxi. ¿Jumax Bibliat jukʼampi yatxatañataki yatichayasiñ munasmati? Jehová Diosan Qhanañchirinakapaw pä tuqit yanaptʼapxiristamxa.

Mayaxa, ¿Kunsa Bibliax chiqpachapuni yatichi? satawa, ukampiw yanaptʼapxi, ukasti jan tiemponi jaqinakar yatichañataki wakichtʼatawa, suma qhana, chuymar purtʼkiri jisktʼanakampi qhanañchañataki wakiyatarakiwa. Payïr yanaptʼäwisti akarakiwa, Bibliat inakiw utaman yatichayasisma. Uta jakʼamankiri mä wakichtʼata wali munasiri Diosan Qhanañchiripaw utamansa jan ukax yaqha chiqansa inaki yatiqañ yanaptʼiristamxa, ukhamat Bibliat sum yatxatañamataki. Uraqpachänxa waranq waranqa jaqinakaw Bibliat wali sum yatxatasipki. Ukatxa, waljanirakiw akham sapxi: “¡Akapï chiqaxa!” sasa.

Janiw kawkinsa ukham suma yatichäwinakax utjkaspati. Biblian chiqa yatichäwinakapaxa watinakatsa, payachasiñanakatsa ukat axsarañanakatsa qhispiyarakistuwa. Ukatxa mä suytʼäwi churistu, ukanak yatisax mä aski amtaniw sum jakastanxa. Jesusax akham sänwa: “Uñtʼapxarakïtawa kunatix chiqäki ukxa, uka chiqa kankañasti qhispiyat sarnaqasiñ churapxarakïtam” sasa (Juan 8:32).