Milagronak uñjkasas Nazaretan janiw creyipkänti

Jesusajja Decapolisat kuttʼanisajj wila apa usuni mä warmiruw qolläna, Jairon phuchaparusa jaktayarakïnwa, lurañajj utjaskakïnwa. Jairon utapat mistjjäna ukhajja, pä juykhunakaw jupar arkapjjäna, akham arnaqasisa: “Davidan Yoqapa, nanakat khuyaptʼayasipjjeta” sasa (Mateo 9:27).

Uka jaqenakajj “Davidan Yoqapa” sasajja, Jesusajj Davidan familiapat jutir reyïtapsa Mesiasätapsa creyipjjänwa. Amuyatajj janis uka jaqenakar istʼkaspa ukhamwa Jesusajj tuküna, inas yanaptʼa mayisipkakiniti janicha, uk yatiñatak ukham lurchïna. Uka juykhunakajj Jesusar yanaptʼa mayisipkakïnwa. Mä utar mantäna ukhajja, uka jaqenakajj mantapjjarakïnwa. Ukanwa Jesusajj akham sas jisktʼäna: “¿Qollitaniw sasin Diosar confiyapjjtati?” sasa. Jupanakasti sapjjarakïnwa: “Jïs Tata” sasa. Ukatsti akham sasaw nayranakapat llamktʼäna: “Kunjamtï confiyapktajja ukhamarjam luraspan” sasa (Mateo 9:28, 29).

¡Uka jaqenakan nayranakapajj uñj-jjänwa! Jesusajj kunjamtï qollat jaqenakarojj sirïkänjja ukhamarakiw uka jaqenakar ewjjtʼäna: “Akjja janiw khitis yatiñapäkiti” sasa. Jupanakajj walikëjjapjjatapat wal kusisipjjäna, taqe uksa toqenakanwa Jesusat parlapjjarakïna.

Juykhupkäna uka jaqenakajj sarjjapjjäna ukhajja, Jesusan ukarojj mä amut chacharuw irpanipjjäna, uka jaqesti demonion mantatänwa. Jesusajj uka jaqet uka demonior alisskäna ukhajja, amut jaqejj parljjarakïnwa. Uk uñjasasti jaqenakajj wal musparapjjäna, sapjjarakïnwa: “Janipuniw Israel markan ukhamajj uñjasirïkiti” sasa. Fariseonakajj Jesusan milagronakap uñjapjjarakïnwa, ukampis kuna chʼamampis milagronak luri uka toqet akham sasaw sapjjäna: “Demonionakar apnaqki ukan yanaptʼapampiw demonionakar alissu” sasa (Mateo 9:33, 34).

Uka qhepatsti Jesusajj discipulonakapampiw Nazaret markapar sarjjäna. Mä mara nayrajja, Nazaretankir sinagoganwa jaqenakar yatichäna. Ukanjja kuntï qalltan yatichkäna uk istʼasajj wal kusisipjjäna, ukampis kuntï tukuyarojj siskäna uk istʼasajj wal colerasipjjäna, jiwayañwa munapjjarakïna. Jichhajja Jesusajj mayampiw markapankir jaqenakar yanaptʼañ munäna.

Sábado uruw Jesusajj sinagogan yatichir saräna. Yatichäwip istʼasajj wal musparapjjäna, sapjjarakïnwa: “¿Kunjamatsa aka jaqejj wali yatiñanïpacha? ¿Khitis uka milagronak lurañatakejj jupar chʼam churpacha? ¿Janit aka jaqejj carpinteron yoqapäki? ¿Janit mamapajj María satäki, janirakit jilanakapas Santiago, José, Simón, Judas satäpki? ¿Janit kullakanakapas jiwasamp chik jakapki? Ukhamajj ¿kunjamatsa yatiñanïpacha, milagronak lurañatakis chʼamanïpacha?” sasa (Mateo 13:54-56).

Jaqenakajja, Jesusarojj mä vecinoparjamakiw uñjapjjäna. ‘Juparojj wawatpachwa uñtʼtanjja, kunjamatsa jupajj Mesiasäspa’ sasaw sapjjarakïna. Jesusajj wali yatiñanïkchïnsa walja milagronaksa lurkchïnjja, janiw Mesiasätap creyipkänti. Jesusar uñtʼapjjatapatwa, vecinonakapasa familiaranakapas jupar jan creyipkänti, ukatwa Jesusajj jupanakar akham säna: “Mä profetarojj taqe cheqanwa respetapjje, ukampis janiw pachpa markapansa ni utapansa respetapkiti” sasa (Mateo 13:57).

Jupanakan Diosar jan confiyapjjatapat Jesusajj wal musparäna. Ukhamasti uka cheqan “mä qhawqha usutanakarukiw amparampi loqjjatasin qolläna” (Marcos 6:5, 6).