Visitanakar katoqtʼañampi oracionampi

Olivos Qollut inti jalsu toqenjja Betania markaw jikjjatasïna, ukajj Jerusalenat kimsa kilometronak sarañankänwa (Juan 11:18). Jesusajj uka markar sarasaw Martampin Mariampin utapar visittʼäna. Jupanakasa Lázaro jilapasa Jesusan amigonakapäpjjänwa, ukhamajj sum katoqtʼapjjäna.

Jupanakatakejj Mesiasar katoqtʼañajj wali kusiskañänwa. Ukatwa Martajj mä suma manqʼa Jesusatakejj phayäna. Martajj phayaskäna ukhajja, Mariajj Jesusan kayuwjapar qontʼasisaw yatichäwinakap istʼaskäna. Ukatwa Martajj Jesusar akham säna: “Tata, ¿janit jupar kamskätasa? Nayarukirakis jupajj lurañanak jaqtʼitojjä, yanaptʼanim sarapitaya” sasa (Lucas 10:40).

Mariar parlañat sipansa, Jesusajj Martaruw phayañat jan sint llakisiñapatak akham ewjjtʼäna: “Marta, Marta, jumajj walja lurañanakat llakisisktajja. Cheqas janiw waljapunejj munaskiti, mayas walikïskaspawa. Mariajj kunatï sumäki ukwa ajllisi, janirakiw ukajj jupat apaqatäkaniti” sasa (Lucas 10:41, 42). Ukham sasinjja, Jesusajj janiw walja manqʼanak phayañ layku tiempo aptʼasiñajj wakiskiti, jan ukasti fácil phaytʼañ manqʼa wakichtʼañakiw wakisi sasaw saskäna.

Martajj Jesusar sum katoqtʼañ laykuw ukanak luraskäna. Ukampis phayañat sinti llakisitapatjja, Diosan Yoqapan suma yatichäwinakapwa jan istʼkänti. “Mariajj kunatï sumäki ukwa ajllisi” sasaw Jesusajj säna, ukaw Mariar wal yanaptʼäna. Ukanak yatiñajj wal yanaptʼarakistu.

Yaqha horasanjja, Jesusajj yaqha suma yatichäwitwa parlarakïna. Mä discipulojj Jesusar akham sänwa: “Tata, oración lurañay yatichapjjeta, kunjamtï Juanajj arkirinakapar yatichkäna ukhama” sasa (Lucas 11:1). Jesusajj niya mä mara chikatani nayraw kunjamsa orañasa ukjja, Jesusan Qollun Yatichatapa sasin uñtʼatäki ukan yatichjjäna (Mateo 6:9-13). Ukampis inas uka discipulojj jan ukankkchïnti, ukatwa Jesusajj wakiskirïki ukanak mayamp arsüna. Ukatjja Jesusajj mä uñachtʼäwimpiw kunja wakiskirisa walja kuti mayisiñajj uk yatichäna.

Jupajj sänwa: “Jumanakat maynejj mä amigonïspa, jupan ukar chika aruma sarasajj akham sasma: ‘Amigo, kimsa tʼantʼay maytʼita, amigonakajat mayniw nayan ukar jayat jutatayna, jupar wajjtʼañatakejj janiw kunas utjkituti’ sasa. Jupajj uta manqhat akham sanirakispa: ‘Jan ik mächistati. Punkus suma llawintatäjjewa, wawanakajas nayamp chikaw ikiñankjjapjje. Janiw sartasin kuns churkirismati’ sasa. Nayasti jumanakarojj sapjjsmawa, amigopäkasas janiw jupajj sartasin kuns churkaniti, ukampis jan ajjsartʼas wal mayisitap laykojj sartaniwa, kunjjay munchi uksa churarakiniwa” sasa (Lucas 11:5-8).

Jesusajja, janiw Jehová Diosajj uka amigjam janis oracionanakas istʼañ munkaspa ukham sañ munkänti. Jan ukasti, jan istʼañ munir mä amigosa walja kuti mayisitajj istʼaspawa, uka amigot sipansa, alajjpachankir munasir Awkisajj taqe chuyma mayisitanakasarojj istʼistaniwa sañwa munäna. Jesusajj saskakïnwa: “Ukhamasti nayajj sapjjsmawa, mayisipkakim, churatäpjjätawa; thaqasipkakim, jikjjatapjjätawa; leqtʼasipkakim, llawiratäpjjätawa. Taqe khititï mayki ukajj katoqewa, taqe khititï thaqki ukajj jikjjatiwa, taqe khititï leqtʼki ukajj llawiratäniwa” sasa (Lucas 11:9, 10).

Jesusajj uk sum amuyapjjañapatakejj mä awkitwa parläna, akham sasa: “¿Khiti awkis jumanak taypitjja wawapan chawlla mayitajj mä asiru wayjjaruyaspa? Jan ukajj ¿khitis mä kʼawna mayitajj mä alacrán churaspa? Jumanakajj jucharar jaqëkasinsa, wawanakamar suma regalonak kunjam churañsa yatipjjtawa. Ukhamajj ¿janit alajjpachankir Awkejj mayipki ukanakarojj espíritu santo churkani?” sasa (Lucas 11:11-13). Alajjpachankir Awkisajj mayisitanakasjja wal istʼañ munistu, kunatï wakiski ukanakansa wal yanaptʼañ munarakistu, ukwa Jesusajj wali sum qhanañchäna.