Jesusajj sábado urunwa qolläna

Fariseonakajj wal Jesusar uñisipjjäna, preso katuntañ munapjjarakïna. ‘Sábado urojj samarañ uruwa, janiw uka urojj usutanakar qollasiñapäkiti’ sapjjänwa. Mä kutejja Jesusajj sábado urunwa mä juykhu jaqer mä callen limosna mayiskir uñjäna. Jesusajj akham sasaw discipulonakapar säna: ‘Kunjamsa Diosan chʼamapajj aka jaqer yanaptʼani uk uñjapjjam’ sasa. Jesusajj thusampi ñeqʼechtʼasaw uka jaqen nayranakapat uchtʼäna, ukat akham sarakïnwa: “Siloam estanquer sarasin jareqasinim” sasa. Uka nasïwitpach juykhu jaqejj jareqasïna ukhajj uñj-jjänwa.

Jaqenakajj wal musparapjjäna, akham sapjjarakïnwa: ‘¿Janit jupajj qontʼasisin limosna mayisir jaqëki, jan ukajj yaqhäskicha?’ sasa. Jupasti akham sänwa: ‘Juykhu nasir jaqëskapuntwa’ sasa. Jaqenakajj akham sasaw jisktʼapjjäna: ‘Ukhamajj ¿kunjamarak uñj-jjtasti?’ sasa. Kunatï paskäna ukwa jupajj qhanañchäna. Ukatsti jaqenakajj fariseonakan ukaruw irpapjjäna.

Qollat jaqejj fariseonakar akham sänwa: ‘Ñeqʼempiw Jesusajj nayranakajat uchtʼitu, ukatjja jareqasinim sarakituwa. Ukham lurasaw uñj-jjta’ sasa. Fariseonakajj akham sapjjänwa: ‘Jesusatï sábado urun qollchejja, janiw Diosan chʼamapampi qollkpachati’ sasa. Yaqhepajj akham sapjjarakïnwa: ‘Chʼamapajj Diosat jan jutkchejja, janiw usutanakar qollkaspati’ sasa.

Fariseonakajj uka jaqen tatap mamapar jawsasajj akham jisktʼapjjäna: ‘¿Kunjamatsa yoqamajj uñj-jje?’ sasa. ‘Jesusar creyirinakarojj sinagogat jaqsuñäniwa’ sasaw fariseonakajj sapjjäna. Uk ajjsarasaw tatap mamapajj akham sapjjäna: ‘Kunjamatsa uñj-jjpacha uk janiw yatipkti, jupar jisktʼapjjam’ sasa. Fariseonakajj qollat jaqer jisktʼasipkakïnwa, ukatwa jupajj akham säna: ‘Taqpachwa sisjjapjjsma, ¿kunatsa jisktʼasipkakista?’ sasa. Fariseonakajj wal colerasipjjäna, uka lugaratsa jaqonukupjjänwa.

Uka qhepatjja Jesusajj uka jaqer uñjiriw saräna, akham sasaw jisktʼarakïna: ‘¿Mesiasar jumajj confiytati?’ sasa. Uka jaqesti sarakïnwa: ‘Khitis Mesiasajj uk yatirista ukhajj confiyiristwa’ sasa. Jesusajj sänwa: ‘Nayaw Mesiasätjja’ sasa. ¿Amuytati? Jesusajj munasiñampiw uka jaqer uñjäna. Janiw nayrapaki qollkänti, jan ukasti Mesiasar creyiñapatakiw yanaptʼarakïna.