Roma markaruw Pablor apapjjäna

Pablon predicañataki kimsïr viajepajj Jerusalenan tukuyäna. Ukanwa katuntasajj carcelar llawintapjjäna. Mä arumajja, Jesusajj mä visionanwa Pablor akham säna: ‘Romaruw saräta, ukanwa predicarakïta’ sasa. Qhepatjja, Pablorojj Cesarea markaruw Jerusalenat apapjjäna. Ukanjja pä maraw carcelankäna. Tribunalanjja Festo sat gobernadorar akham sänwa: ‘Nayajj Cesaran juzgatäñwa munta, Roma markana’ sasa. Festo gobernadorajj sarakïnwa: ‘Niyakejjay Cesarampi juzgatäñ munstajja, Cesaran ukaruw apayäma’ sasa. Ukatwa Roma markar sarir mä barcot apapjjäna. Pablorojj pä jilatanakaw compañapjjäna: Lucasampi Aristarcompi.

Qotankjjapjjäna ukhajj jallumpi thayampi jawqʼsutaw walja urunak uñjasipjjäna. ‘Akanwa jiwañäni’ sasaw jaqenakajj sapjjäna. Ukampis Pablojj sänwa: ‘Tatanaka, mä angelaw samkan akham situ: “Jan ajjsaramti. Romarojj purïtawa, jumamp saririnakas jakasipkarakiniwa” sasa. Ukhamajj ¡jan ajjsarapjjamti! Janiw jiwarkañäniti’ sasa.

Qotanjja 14 urunakaw ukham tʼaqesipjjäna, ukhamaruw mä isla uñjapjjäna. Uka islajj Malta satänwa. Barcojj chʼallaruw achuntäna, ukaruw oladajj jiskʼa jiskʼa tukjäna. Ukampis barconkapkäna uka 276 jaqenakajj salvasipjjänwa. Yaqhepajj nadasaw mistupjjäna, yaqhepasti barcot jiltʼkäna uka tablanakat katuntasisaw mistupjjarakïna. Malta islankir jaqenakajj jupanakar wal khuyaptʼayapjjäna, nina phichkatasaw taqeniru juntʼuchtʼapjjarakïna.

Kimsa phajjsitwa yaqha barcot Pablorojj Roma markar apjjapjjäna. Pablojj purïna ukhajj jilat kullakanakaw katoqerejj mistunipjjäna. Jupanakar uñjasajj wali chʼamañchtʼataw Pablojj uñjasïna, Diosarus wal yuspäräna. Pablojj preso katuntatäkchïnsa, mä alquilat utan jakañapatakiw permiso churapjjäna, ukanjja mä soldadow uñjäna. Pä maraw ukankäna. Walja jaqenakaw visitir sarapjjäna, Pablosti Diosan Reinopata Jesusjjata predicäna. Ukankkasaw Asia Menor, Judea toqenkir congregacionanakar cartanak qellqäna. Jehová Diosajj ukhamaw Pablo taypejj yaqha markanakaru suma yatiyäwinak puriyäna.