Jisktʼäwinaka

◼ ¿Kunjam isisiñäspasa Jehová Diosar yupaychañatak uttʼayat utanakar sarañatakixa?

Tantachasiñ Utanakasa, Jachʼa Tantachäwinakatak Tantachasiñ Utanakasa, Betel utanakasa ukat sucursalanakasa, Uraqpachanxa Jehová Diosar yupaychañataki uttʼayat utanakjam uñtʼatawa. Supayan apnaqat aka ñanqha pachan utanakapat sipansa Diosar yupaychañatak utanakaxa qʼuma, suma askichtʼata, yäpar lurtʼata ukhamäpxiwa. Ukatpï khitinakatix Diosar yupaychañataki uttʼayat utanakar visittʼiri sarapki ukanakaxa Jehová Diosan munañap phuqirinakjam uñtʼatäpxiwa.

Cristianonakaxa ‘taqiniruw uñachtʼayañ munapxtan Diosan servirinakäpxatasa’, ukhamasti Diosan luqtiripjamaw isisiñasa ukat kʼachachtʼasiñasa (2 Cor. 6:3, 4). Ukatxa sarnaqäwisampix respeto uñachtʼayañasaraki. Kunjamtï Jehová Diosan mä Qhanañchiripax isiskaspa ukat kʼachachtʼaskarakispa ukhamwa taqi chiqana lurañasa ukat jukʼampïñapawa kunapachatï khä Nueva York markan Jehová Diosan Qhanañchirinakapar aka uraqpachan uñjañataki uttʼayat utanakaru jan ukax Uraqpachan sucursalanakas utjki uka chiqanakar visittʼañatakixa.

Organizados para hacer la voluntad de Jehová sat libroxa, yatiyir sarktan ukhasa, tantachäwinakar sarktan ukhasa, qʼuma, kunatï isisiñäki ukat suma kʼachachtʼata ukham sarañasaw sasin yatiyaskaraki, ukatxa (139 jananxa, 1 tʼaqanxa) saskarakiwa: “Betel arux ‘Diosan Utapa’ sañwa muni. Ukat Diosar yupaychañatakixa kunjam isthaptʼatatix Tantachasiñ Utanakaru sarktanxa, ukhamaw Betel utanakar sarañasa” sasa. Ukhamarjamaruw Diosan Apnaqäwipat mä yatiyirix lurañapa. Ukham lurasawa respetatapsa munasitapsa uñachtʼayarakini (Sal. 29:2).

‘Diosar katuyata’ jaqinakjamaw isisiñasa (1 Tim. 2:10). Kunjams isistan kunjams kʼachachastan ukaw jaqinakarux yanaptʼaspa Jehová Diosar yupaychapxañapataki. Ukampisa, llakiskañawa, kunattix yaqhip jilat kullakanakaxa mayj isimpiw jan ukax janis Diosan luqtiripäkaspa ukham isthapitaw Jehová Diosar yupaychañatak uka uttʼayat utanakarux sarapxi. Janipuniw mä cristianox kunapachas ukham isthapiskaspati. Chiqpachansa, cristianonakjamaxa isisiñ tuqitsa ukat ‘taqi kunansa Diosar jachʼañchañataki’ lurañ muntanxa, ukhamatwa Diosan markapax akapachankir jaqinakat sipansa sumätap yatisini (Rom. 12:2; 1 Cor. 10:31).

Ukhamasti, Jehová Diosan Qhanañchirinakapar aka Uraqpachan uñjañatak uttʼayat utanakaru jan ukax sucursalanakaru visittʼañ amtstan ukhaxa, jan ukax yaqha chiqanakaru pasiytʼir sarasin visittʼañ munstan ukhasa, sapa mayniw akham jisktʼasiñasa: “¿Uka yupaychañ Utanakar visittʼañatakix qʼuma ukat suma askirjam isthaptʼatätti? ¿Nayar uñjasax Jehová Diosat sumti parlapxi? ¿Isijas kʼachachtʼasitajas mayninakar mayjtʼayaspati?” sasa. Ukhamasti, taqi chiqana ukat taqi luräwisana isisitasampi kʼachachtʼasitasampi “Qhispiyir Diosan yatichäwipax sumätapa” uñachtʼayapxañäni (Tito 2:10).