Jan juchar purtʼasiñatakejj wal amuyasim

1, 2. 1) ¿Kamsasas Jesusajj discipulonakapar säna? 2) ¿Kunatsa Jesusan discipulonakapajj juchar purtʼasipjjäna? (Dibujonak uñjjattʼarakïta).

“CHUYMAJJ qhawqsa lurañ munaskiwa, ukampis jañchejj janiw chʼamanïkiti” (Mat. 26:41b). Uka arunakampejja, jaqenakajj juchararätasa pantjasirïtaswa Jesusajj uñachtʼayaskäna, ukampis ukham sasajj jiwas pachpar jan sint confiyasiñatakiw ewjjtʼarakistu. Uka arunak janïr arskäna uka mä qhawqha horanak nayrajja, discipulonakapajj janipuniw jaytanukupkämati sasaw Jesusar sapjjäna (Mat. 26:35). Cheqas kunatï walïki ukwa jupanakajj lurañ munapjjäna, ukampis niyak mä jan walin uñjasisajj kunatï walïki uk lurañajj janiw faciläkaspati, uk jupanakajj janiw amuyasipkänti. Ukatwa Jesusajj jupanakar akham säna: “Amuyasipjjapunim, oracionsa jan jaytas lurasipkakim, ukhamat jan juchar puriñataki” sasa (Mat. 26:41a).

² Jesusar katuntapkäna ukhajj ¿kunsa discipulonakapajj lurapjjäna? Jan uñnaqapjjatap laykojj jucharuw purtʼasipjjäna. Mä akatjamat jan walin uñjasisajja, janipuniw jaytanukupkämati sapkchïna ukhas sapak Jesusar jaytapjjäna (Mat. 26:56).

 3. 1) Jehová Diosat jan jitheqtañ munkstan ukhajj ¿kunatsa jiwas pachpar jan confiyasiñasäki? 2) ¿Kuna toqenakatsa aka yatichäwin yatjjataskañäni?

³ Jiwasajj ukhamarakiw jiwas pachpar jan confiyasiñasäkiti. Cheqas janipuniw kunasa ni khitis Jehová Diosat jitheqtaykitaniti sasin taqeniw amttanjja. Ukampis pantjasir jaqëtanwa, ukatwa mä kuna jan wali lurañarus purtʼassna (Rom. 5:12; 7:21-23). Mä akatjamatwa mä jan wal lurañan uñjassna, uk lurañ wal munjjaraksna. Ukampis jiwasatï Jehová Diosatsa Jesusatsa jan jitheqtañ munkstanjja, Jesusan ewjjtʼaparojj istʼañasawa, amuyasiñasarakiwa. Ukatakiw aka yatichäwejj yanaptʼistani. Nayraqatjja, kunanakansa wal amuyasiñasa uka toqetwa yatjjataskañäni. Ukjjarusti, kunjamatsa juchar jan purtʼasksna uka toqetwa yatjjataskañäni. Tukuyarusti, janipun ikjañatakejj kunsa lursna uka toqetwa yatjjataskarakiñäni.

¿KUNANAKANSA WAL AMUYASIÑASA?

4, 5. ¿Kunatsa jan jachʼa juchanakäki ukanakat amuyasiñasaraki?

⁴ Yaqhep juchanakajj janiw jachʼa juchat uñjatäpkiti, ukampis ukanakajj janiw Jehová Diosamp sum apasiykistaspati, jachʼa juchanakaruw purtʼasiyarakistaspa.

⁵ Taqeniw mä jachʼa juchar purtʼassna, taqenirakiw mä kunan mejorañatakis chʼamachasiñasa. Ukampis kunatï maynirojj mä juchar purtʼasiykaspa ukajj janiw maynirojj juchar purtʼasiykaspati. Inas yaqhepanakajj mä jachʼa juchar jan purtʼasiñatak chʼamachasisipkchi, ukanakat mayajj qʼañu jucha lurañäspawa. Yaqhepanakajj yaqha kasta qʼañu juchanakar jan purtʼasiñatakiw chʼamachasisipkarakispa, inas jan masturbasiñataki, jan ukajj pornografía jan uñchʼukiñatak chʼamachasisipkchi. Inas yaqhepanakajj akanakan chʼamachasisipkarakchi: jan sinti colerirïñataki, jan jachʼa jachʼa tukurïñataki, jan jaqer ajjsarañataki. Ukatwa Santiagojj akham sispachäna: “Sapa mayniw munañapampi apayasisa munañapampi katuntayasisajj yantʼat uñjasi” sasa (Sant. 1:14).

 6. ¿Kun reconosiñasas wakisi?

⁶ ¿Kunanakansa jumajj mejorañama? Janis kunans chʼamachasiñasajj wakiskaspa ukham amuyañasa, janiw juchar purtʼaskäti sasin amuyañas janipuniw walïkiti (1 Juan 1:8). Juchar jan purtʼasiñatakejja, ‘Diosar adorañan suma saytʼatäpki’ ukanakas amuyasipjjañaparakiwa sasaw apóstol Pablojj säna (Gál. 6:1). Ukhamajj kunjamätans uk jiwas pachpaw sum amuykiptʼasiñasa, kunanakans chʼamachasiñasa uks reconosiñasarakiwa (2 Cor. 13:5).

 7. ¿Kuna toqenakansa jukʼamp cuidasiñasa? Mä uñachtʼäwimp uk qhanañchtʼam.

⁷ Kunanakans mejorañasa uk amuyasisajj ¿kunsa lurañasa? Uka toqenakat mejorañatakiw chʼamachasiñasa. Ak amuytʼañäni: Bibliajj qellqaskäna uka tiemponakan jachʼa murallanakani mä markarojj ¿kawkja cheqanakatsa atacasispäna? Jilpachajj punkunakatwa atacasispäna. Ukhamajj uka cheqanakaw jukʼamp sum jarkʼaqasiñapäna. Jiwasampejj ukhamarakiwa, kunanakans mejorañasa uka toqenakanwa jukʼamp cuidasiñasa (1 Cor. 9:27).

¿KUNJAMSA JARKʼAQASSNA?

8, 9. Proverbios capítulo 7 ukan parlki uka waynajj ¿kunsa jachʼa juchar jan purtʼasiñatakejj lurañapäna? (Proverbios 7:8, 9, 13, 14, 21).

⁸ ¿Kunsa juchanakar jan purtʼasiñatakejj lursna? Kunsa Proverbios capítulo 7 ukat yateqassna uk jichhajj uñjañäni. Ukanjja, kunjamsa mä waynajj qʼañu juchan sarnaqer mä warmimpejj qʼañu juch luräna uka toqetwa parli. Proverbios 7:22 ukanjja, kunjamsa uka waynajj uka warmin qhepap saräna ukwa qhanañchi. Ukat nayra versiculonakarjamajja, uka waynajj jukʼat jukʼatwa juchar purtʼasïna.

⁹ ¿Kunjamatsa uka waynajj juchar purtʼasïna? Nayraqatajj arum toqeruw ‘uka warmin callep jakʼnam pasäna’, uka warmin utap toqeruw sararakïna (Proverbios 7:8, 9 liytʼäta). Ukatsti uka warmir uñjasajj janiw uka lugarat sarkänti. Antisas jampʼattʼayasikïnwa, sumankañ sacrificionak loqtatapatwa uka warmejj parlarakïna, inas suma jaqet uñjayasiñatak uka toqet parlchïna (Proverbios 7:13, 14, 21 liytʼäta). Janitï uka waynajj ukanak lurkaspänjja, janiw jucharojj purtʼaskaspänti.

10. Proverbios libron parlki uka waynjamajj ¿kunarus maynejj jichha tiempon purtʼasirakispa?

¹⁰ Jehová Diosan mä serviripajj niya ukhaman uñjasirakispawa. Inas mä jachʼa juchar purtʼaschispa ukat mä akatjamatsa uka juchar purtʼaskaspa ukhamwa amuyasirakispa. Akham sarakispawa: “Kunjamatpun aka juchar purtʼasjjsta, janiw yatkti” sasa. Ukampis kunanaktï uka nayrajj lurkäna ukanak amthapispa ukhajja, inas jukʼat jukʼat uka juchar purtʼasitap amuychispa. Inas khitimpitï jan chikachasiñapäkäna ukamp chikachaschïna, jan walïkäna ukanakamp kusistʼchïna, internetan jan cristianonakatakjamäki uka lugaranakar mantchïna jan ukajj jan mä cristianotakjamäki uka lugaranakar sarchïna. Inas janirak orasjjchïnti, Diosan Arups jan liytʼjjchïnti, tantachäwinakarus jan sarjjchïnti, ni predicacionarus sarjjchïnti. Inas Proverbios libron parlki uka waynjamajj mä akatjamat juchar jan purtʼaskchïnti.

11. Juchar jan purtʼasiñ munkstan ukhajj ¿kunsa lurañasa?

¹¹ ¿Kunsa ukat yateqsna? Janiw juchar jan purtʼasiñak munañasäkiti, jan ukasti kunanakas juchar purtʼasiyistaspa ukanak jan lurañatakiw chʼamachasiñasaraki. Ukwa Salomonajj uka waynampit qʼañu juchan sarnaqer warmimpit parlkäna uka qhepat qhanañchäna. Uka warmit parlkasajj akham sänwa: “Janirak thakinakapansa jumajj chhaqanukumti” sasa (Prov. 7:25). Akham sasaw ewjjtʼarakïna: “Uka warmirojj jan jakʼachasimti, utapar mantañ lugararus jan jakʼachasimti” sasa (Prov. 5:3, 8). Ukhamajj jiwasatï juchar jan purtʼasiñ munkstanjja, kunanakatï juchar purtʼasiykistaspa taqe ukanakat jitheqtañasawa.a Ukatakejj aka toqet amuyasiñaw wakisirakispa, yaqhep luräwinakajj janiw cristianonakatakejj jan walit uñjatäkaspati, ukampis ukanak lurañatï jiwasar juchar purtʼasiyirjamächi ukhajj janiw ukanak lurañasäkiti (Mat. 5:29, 30).

12. ¿Kuna amtarus Job chachajj purïna, ukat ukajj kunatakis yanaptʼäna? (Job 31:1).

¹² Kunanakatï juchar purtʼasiykistaspa ukanak jan lurañatakejja, Job chachat yateqasiñasawa. Yaqha warminakar jan wali amtanakamp jan uñchʼukiñatakejja, jupajj mä amtaruw purïna, akham sänwa: “Nayajj mä pacto nayranakajamp lurta” sasa (Job 31:1 liytʼäta). Nayranakapamp mä pacto luratapajja, adulterio juchar jan purtʼasiñapatakiw yanaptʼäna. Jiwasajj ukhamarakiw mä amtar pursna, ukhamat juchar jan purtʼasiñatakejj jan kuns lurañataki.

13. ¿Kunatsa kuna toqetsa piensasktan ukat amuyasiñasa? (Fotonak uñjjattʼarakïta).

¹³ Kuna toqets piensasktan uka toqets amuyasiñasarakiwa (Éx. 20:17). Yaqhepanakajj jan walinak piensañajj walikïskaspasa, lurañakis jan walïkaspa ukhamwa amuyapjje. Ukampis janiw ukhamäkiti. Sapa kut jan walinakat piensañajja, ukanak lurañaruw apistaspa, mä arunjja jiwas pachpas mä juchar purtʼasiñ thaqksna ukhamäspawa, uk jan lurañatak chʼamachasiñaw wakisjjarakispa. Cheqansa awisajj mä akatjamatwa jan wali amuyunakajj pʼeqesar jutaspa, ukhaman uñjasisajj ¿kunsa lurañasa? Jankʼakiw pʼeqesat uk apsuñasa, kunatï walïki ukanakwa lupʼiñasaraki, ukhamatwa jan wali amuyunakajj jan jiljjattkaniti, janirakiw ukanak wal lurañ munañarus apkistaniti, ni jachʼa jucharus purtʼaskañäniti (Filip. 4:8; Col. 3:2; Sant. 1:13-15).

14. Juchar jan purtʼasiñatakejj ¿kunas yanaptʼarakistaspa?

¹⁴ Jehová Diosan leyinakapajj jiwasan askisatakipuniwa, janiw ukat ni mä akchʼas payachasiñasäkiti, ukaw juchar jan purtʼasiñatakejj yanaptʼarakistaspa. Awisajja, Jehová Diosajj kunjam amuyañassa muni, kunjam lurañassa muni uk amuyañajj chʼamakïspawa, ukampis ukham lurañatak chʼamachastan ukhajj cheqpach kusisiñwa jikjjattanjja.

15. ¿Kunatï walïki uk lurañ yateqañajj kunjams yanaptʼistu?

¹⁵ Kunatï walïki ukanak lurañatakiw chʼamachasiñasa, kunatï jan walïki ukanak uñisiña, kunatï walïki ukanak munasiñwa yateqañasa (Amós 5:15). Ukhamtï lurañänejja, kunatï walïki ukanakwa lurañäni, juchar purtʼasiykistaspa ukanak janiw lurkañäniti. Janiw ukakïkiti, mä akatjamat juchar purtʼasiñatak yantʼat uñjasiñäni ukarojj atipjarakiñäniwa.

16. Kunanakatï Jehová Diosar jukʼamp munasiñatak yanaptʼkistu ukanak lurañajj ¿kunjamsa yanaptʼistu? (Fotonak uñjjattʼarakïta).

¹⁶ ¿Kunatï walïki ukanak lurañ munañatakejj kunanaksa lursna? Kunanakatï Jehová Diosar jukʼamp munasiñatak yanaptʼkistaspa ukanakwa lurañasa. Tantachäwinakasa jan ukajj predicacionas Jehová Diosar kusisiyañatakiw yanaptʼistu, janirakiw jan walinak lurañarus purtʼasktanti (Mat. 28:19, 20; Heb. 10:24, 25). Diosan Arupat liytʼañasa, yatjjatañasa, liytʼktan ukat lupʼiñasa, kunatï walïki ukar munasiñataki, jan walïki ukar uñisiñatakiw yanaptʼistu (Jos. 1:8; Sal. 1:2, 3; 119:97, 101). Kuntï Jesusajj discipulonakapar ewjjtʼkäna uk amtañasarakiwa, jupajj akham sänwa: “Oracionsa jan jaytas lurasipkakim, ukhamat jan juchar puriñataki” sasa (Mat. 26:41). Alajjpachankir Awkisar orasiñatak tiempo apstʼastan ukhajja, jupan yanaptʼapwa katoqtanjja, jupar kusisiyañatakis wal chʼamachastanjja (Sant. 4:8).

JANIPUN IKJAPJJAÑÄNITI

17. ¿Kunarus Pedrojj kutin kutin atipjañapäna?

¹⁷ Kunanaktï jan lurañatak wal chʼamachasktan ukanak inas mä qhawqhanak apanukchiñäni, ukampis yaqhepanak janiw qʼal apanukuñ puedkañäniti. Ukaw apóstol Pedrompejj pasäna, jupajj jaqenakar ajjsarañampiw apayasïna. Kims kutiw Jesusar jan uñtʼir tuküna (Mat. 26:69-75). Mä qhawqha tiempotjja, Sanedrín nayraqatanwa jan ajjsartʼas Diosat parläna. Amuyatajj janis jaqer ajjsarjjaspa ukham amuyañjamäspänwa (Hech. 5:27-29). Ukampis mä qhawqha maranak qhepatjja, “circuncidatanakar ajjsarasaw” jan judiöpkäna uka cristianonakampejj mä qhawqha tiempojj jan manqʼjjänti (Gál. 2:11, 12). Ukhamajj wasitat chʼamachasiñapaw wakisïna. Jaqer ajjsarañap chhaqayänti janicha ukajj janiw yatiskiti.

18. Mä kunan mejorañasajj janis wakisjjaspa ukham amuysna ukhajj ¿kunas pasaspa?

¹⁸ Jiwasajj ukhamanwa uñjasiraksna, inas mä kunan mejorañasajj janis wakisjjaspa ukham amuysna, ukampis wasitatwa ukan mejorañasajj wakisispa. Mä jilatajj akham siwa: “Tunka maranakaw pornografía jan uñchʼukjjayätti, uka jan wal apanukjjeristsa ukham amuyasiyäta, ukampis ukanak uñchʼukiñ munañajj chuymajan utjaskakïnwa, mä salvaje animalar uñtataw nayar wasitat atacañatak suyjjatitäna” sasa. ¡Uka jan walir atipjañatakejj jilatajj chʼamachasiskakïnwa! Uka juchar jan purtʼasiñatakejj sapüruw chʼamachasiñapäna, aka jan wali pachan jakañapkamaw chʼamachasiñaparakïna, ukwa jupajj amuyasïna. Esposapasa ancianonakas pornografiat jitheqtañapatakiw wal yanaptʼapjje.

19. ¿Mä juchar jan purtʼasiñatakejj kunsa lursna?

¹⁹ Mä kunan mejorañatak chʼamachaskasas ¿kunsa juchar jan purtʼasiñatakejj lursna? Jesusan ewjjtʼaparuw istʼañasa, jupajj “uñnaqasipkakim” sasaw säna. Taqe kunas walikëjjaspas ukham amuysta ukhajja, kunanakas juchar purtʼasiyiristam ukanakat amuyasiskakiñamawa (1 Cor. 10:12). Kunanakatï jan walinak jan lurañatak yanaptʼktam ukanak luraskakim. Proverbios 28:14 textojj akham siwa: “Khititï wali amuyumpipun sarnaqki ukajja kusisitawa” sasa (2 Ped. 3:14).

¿KUNJAMSA WALI AMUYUMP SARNAQASKAKIÑAJJ YANAPTʼISTU?

20, 21. 1) ¿Kunjamsa wali amuyump sarnaqaskakiñajj yanaptʼistu? 2) Jiwasatï chʼamachasiñäni ukhajj ¿kunsa Jehová Diosajj lurani? (2 Corintios 4:7).

²⁰ Juchar jan purtʼasiñatak wali amuyump sarnaqañajja, jiwasan askisatakiwa. “Juchanakan mä qhawqha tiempo kusisiñat sipansa”, Jehová Diosan leyinakapar istʼañaw jukʼamp kusisiñ churistu (Heb. 11:25; Sal. 19:8). Kuna laykutejj jupan munañap lurañatak luratätanwa (Gén. 1:27). Jehová Diosatakjam sum sarnaqktan ukhajja, suma conciencianïtanwa, wiñayatakiw jakarakiñäni (1 Tim. 6:12; 2 Tim. 1:3; Jud. 20, 21).

²¹ Cheqansa “jañchejj janiw chʼamanïkiti”, ukampis janiw aynachtʼañasäkiti, Jehová Diosaw yanaptʼistani (2 Corintios 4:7 liytʼäta). Ukat kunjamsa Diosajj jaqen chʼamapat jilankki uka chʼam churistu ukwa amuyañasa. Ukampis chʼamasarjamaw juchar jan purtʼasiñatak sapür chʼamachasiñasa. Jiwasatï ukham chʼamachasiñänejja, oracionanakan mayisktan ukarjamaw jupajj chʼam churarakistani, janiw ukat payachasiñasäkiti (1 Cor. 10:13). Jehová Diosan yanaptʼapampejja, wali amuyumpiw sarnaqañäni, janiw jucharus purtʼaskañäniti.