Jehová Diosaw “chuyma pʼakintatanakarojj qolli”

 1. ¿Kunjamsa Jehová Diosajj servirinakapar uñji?

JEHOVÁ DIOSAJJ kunanakas pasaskistu taqe ukanak sum uñjaski. Kunapachas kusisitätan, kunapachas llakitätan uks uñjarakiwa (Sal. 37:18). Wali llakitäkasas jupar serviskakiñatak chʼamachastan ukhajja, jupajj wal jiwasat kusisi. Janiw ukakïkiti ukat sipansa jiwasar yanaptʼañsa chuymachtʼañsa wal munaraki.

 2. ¿Kunjamsa Jehová Diosajj chuyma usuchjatanakar yanaptʼi, ukat kunsa jupamp yanaptʼayasiñatakejj lursna?

² Salmo 147:3 textonjja, Jehová Diosaw chuyma pʼakintatanakan ‘usuchjatanakaps chʼoqtʼi’ sasaw qhanañchi. Uka textojj kunjamsa Jehová Diosajj wali llakitäpki ukanakarojj munasiñamp uñji ukwa qhanañchi. ¿Kunsa Jehová Diosamp yanaptʼayasiñatakejj lursna? Ak amuytʼañäni, maynitï mä heridanïchi ukhajja, mä suma doctoraruw saraspa. Ukampis qollasiñatakejj usuchjatäki ukajj kunjamtï doctorajj siski ukarjam phoqañatakiw chʼamachasiñapa. Aka yatichäwinjja, chuyma usuchjatäpki ukanakarojj kun lurapjjañapatakis Jehová Diosajj Arupan ewjjtʼi, kunjamsa munasiñamp churat ewjjtʼanakaparjam lursna ukwa yatjjataskañäni.

JEHOVÁ DIOSATAKEJJ WALI VALORANÏTANWA

 3. ¿Kunatsa yaqhepanakajj janis kuna valoranïpkaspa ukham amuyasipjje?

³ Janiw akapachan munasiñajj utj-jjeti. Walja jaqenakaw mayninakarojj jan sum uñjapkiti, janis kuna valoranïpkaspa ukhamwa uñjapjjaraki. Helena kullakajj akham siwa: “Familiajan janiw munasiñajj utjkänti. Tatajajj nuwasirïnwa, janiw kunatakis servipktati sasajj sapüruw sapjjarakirïtu” sasa. Inas jumarojj ukham toqepjjarakirïstam, inas sapa kut jiskʼachapjjerïstam jan ukajj janis khitis munaskiristam ukham amuyayapjjerïstam. Ukhamächi ukhajj inas kunjamsa maynejj cheqpachapun jumat llakisispa uk amuyañajj chʼamakïchi.

 4. ¿Kunsa Jehová Diosajj Salmo 34:18 texton qhanañchistu?

⁴ Inas yaqhepanakajj jan sum uñjapkstamti, ukampis Jehová Diosajj wal munastamjja, wali valoranit uñjaraktamjja. Jupajj “khitinakatï chuyma pʼakintatäpki ukanakan jakʼapankiwa” (Salmo 34:18 liytʼäta). Jumatï ‘sinti desanimatäkasmas’ ukham amuyassta ukhajja, amtapunim: Jehová Diosajj kunja suma chuymanïtasa uk uñjasaw jupar serviñamatak irpantamjja (Juan 6:44). Niyakejjay jumar wal munasstamjja, yanaptʼapunïtamwa.

 5. ¿Kunjamsa Jesusajj jiskʼachatäpkäna ukanakarojj uñjäna, ukat kunsa ukat yateqsna?

⁵ Jehová Diosajj kunjam chuymanisa uk amuyañatakejja, Jesusan sarnaqäwipatwa yatjjatsna. Jesusajj aka oraqenkkäna ukhajja, jiskʼachatäpkäna ukanakarojj munasiñampiw uñjäna (Mat. 9:9-12). Jan wali usumpi tʼaqesir mä warmejja, qollatäjjañatakejj patjja isipatwa Jesusar llamktʼäna, jupasti Diosar confiyatapat chuymachtʼänwa, chʼamañchtʼarakïnwa (Mar. 5:25-34). Cheqas Jesusajj Awkipjam suma chuymanipuniwa (Juan 14:9). Ukhamajj Jehová Diosajj wali valoranitwa uñjtamjja, kunja suma chuymanïtasa, qhawqsa jupar confiyta, munasirakta uks uñjarakiwa.

 6. Janis kuna valoranïksna ukham amuyasstan ukhajj ¿kunsa lursna?

⁶ Janis kuna valoranïkasma ukham amuyassta ukhajj ¿kunsa lurasma? Jehová Diosajj qhawqha valoranitsa uñjtam uka toqet parlir versiculonak Biblian liytʼam, ukat lupʼirakim (Sal. 94:19).b Inas mä amtam jan phoqkstati jan ukajj inas mayninakjam jan lurañ pueditamat desanimasiraksta, jan mayninakamp igualayasimti, qhawqtï lurirjamäkta ukak luram, Jehová Diosajj janiw qhawqtï lurirjamäkta ukat jukʼamp lurañam suykiti (Sal. 103:13, 14). Maynitï parlatapampisa jan ukajj luratapampis sintpun jan waltʼaystam ukhajja, jan ukat juchañchasimti, janiw ukajj juchamäkiti. Amtapunim Jehová Diosaw jan wal luririnakarojj juchañchi, tʼaqesiyatäpki ukanakarojj yanaptʼarakiwa (1 Ped. 3:12). Wawäkäna ukhajj Sandra kullakarojj wal tʼaqesiyapjjäna, jupajj akham siwa: “Jilapartejj kunjamtï Jehová Diosajj uñjkitu ukham naya pachpa uñjasiñatakiw jupar yanaptʼa mayta” sasa.

 7. Kuna jan walinakantï uñjasiwayktan ukajj ¿kunjamsa Jehová Diosar serviñan yanaptʼistaspa?

⁷ Jehová Diosajj juma toqew mayninakar yanaptʼaspa, janipun ukat payachasimti. Juparojj predicasaw yanaptʼtajja, ukajj mä privilegiorakiwa (1 Cor. 3:9). Pachpa jakäwiman kunayman jan walinakan uñjasiñajja, mayninakajj tʼaqesisipki ukhajj kunjamas jikjjatasipjje uk amuyañatakiw yanaptʼpachätamjja. Jupanakarojj wal yanaptʼarakisma. Párrafo 3 ukan parlaniwayktan uka Helen kullakajja, yanap katoqasajj mayninakar yanaptʼañatakejj wakichtʼatäjjarakiwa. Jupajj akham siwa: “Janis kunatakis sirvkirista ukhamwa amuyasiyäta, ukampis Jehová Diosajj wali munatätajwa amuyayitu, naya toqew mayninakar yanaptʼaraki” sasa. Helen kullakajj wali kusisitaw precursora regularat serviski.

JEHOVÁ DIOSAJJ PERDONJJESTUWA

 8. ¿Kunsa Jehová Diosajj Isaías 1:18 texton qhanañchistu?

⁸ Jehová Diosan yaqhep servirinakapajj janïr bautisasipki ukhasa jan ukajj bautisasjjapjje uka qhepatsa, jucha lurapjjatap amtasisajj chuym leqʼesisipkakiwa. Ukampis Jehová Diosajj jiwasar wal munasitap laykuw juchampit jiwañampit kutsuyañatak Yoqapar khitanïna. Ukhamajj uka regal katoqasiñaswa jupajj muni. Akham sarakistuwa: “Jutapjjam, kuna asuntonaksa jiwaskam askichañäni” sasa.c Uk lurtan ukhajja, Jehová Diosajj taqpach juchanakaswa perdonjjestu (Isaías 1:18 liytʼäta). Wali munasiri Jehová Dios Awkisajj taqpach juchanakasat armasjjewa, wal ukat yuspäraraktanjja, ukhamäkchisa suma luratanakasat janipuniw armaskiti (Sal. 103:9, 12; Heb. 6:10).

 9. Kuntï nayrajj lurkayätan ukat sipans ¿kunatsa kuntï lurasktan kuntï jutïrin lurkañäni ukanakat piensañasa?

⁹ Inas kuntï nayrajj lurkayäta ukat wal llakissta, ukampis kunsa jichhajj luraskta kunsa jutïrin lurarakïta uka toqenakat amuytʼañatak chʼamachasim. Apóstol Pablot amuytʼañäni, nayrajj kunjamsa cristianonakar jan sinttʼasis arknaqäna ukat wal arrepentisïna, ukampis Jehová Diosajj jupar perdonjjänwa, jupajj uk sum yatirakïna (1 Tim. 1:12-15). Ukatwa kuna jan walinaktï nayrajj lurkäna ukanakat jan piensjjänti, janirakiw wali respetat fariseötapats amtasjjänti (Filip. 3:4-8, 13-15). Antisas Pablojj taqe chuymaw predicäna, kuntï jutïrin lurkani ukwa amtarakïna. Pabljamarakiw kuntï nayrajj lurkayäta uk jan cambykasmati. Ukampis jichhajj Jehová Diosaruw jachʼañchasma, kuntï jutïritak arsuwayki uka suma promesanakapats lupʼirakismawa.

10. Jiwasatï yaqhanakar jan waltʼaystan ukhajj ¿kunsa lursna?

¹⁰ Inas nayra tiempon yaqhanakar jan waltʼayatamat llakissta. ¿Kunsa lurasma? Taqe chuymaw perdón mayiñama, uka jan waltʼäwi askichañatakejj kun lurañay wakischini ukwa lurañama (2 Cor. 7:11). Jehová Diosaruw jupanakar yanaptʼañapatakejj oracionan mayirapiñama. Diosaw jupar servisipkakiñamatakisa sumak jikjjatasipjjañamatakis yanaptʼapjjätam.

11. ¿Kunsa Jonás profetat yateqsna? (Dibujo uñjjattʼarakïta).

¹¹ Nayra tiempon pantjasitanakamat yateqañamawa, kuntï Jehová Diosajj lurañam munki uk lurañatakiw chʼamachasiñama. Jonás profetat amuytʼarakim. Jehová Diosan arsutaparjam Nínive markar viajiñat sipansa, maysa toqeruw jupajj sarjjäna. Jehová Diosajj Jonasar cheqañchänwa, jupasti uka pantjasitapat yateqarakïnwa (Jon. 1:1-4, 15-17; 2:7-10). Jehová Diosajj janiw Jonasarojj profetäñat apaqkänti. Jan ukasti wasitatwa Nínive markar khitäna, jichha kutinjja Jonasajj jankʼakiw Jehová Diosar istʼäna. Jupajj uka nayrajj pantjaskchïnsa wasitat mä machaq asignación katoqañatakejj janiw pantjasitapamp aynachtʼkänti (Jon. 3:1-3).

JEHOVÁ DIOSAJJ ESPÍRITU SANTOPAMPIW CHUYMACHTʼISTU

12. Sinti jan walinakan uñjasktan ukhajj ¿kunjamsa Jehová Diosajj sumankañ churistu? (Filipenses 4:6, 7).

¹² Sinti jan walinakan uñjasktan ukhajja, Jehová Diosajj espíritu santopampiw chuymachtʼistu. Ron jilatampit Carol kullakampit parltʼañäni. Llakkañapuniwa, yoqapajj jupa pachpaw jiwayasïna. Jupanakajj akham sapjjewa: “Kunayman jan walinakans uñjasipkchiyätjja, yoqajan jiwayasitapajj sinti jan walipunïnwa. Arumanakajj janiw ikiñs puedipkayätti, ukatwa orasipjjayäta, ukaw kuntï Filipenses 4:6, 7 (liytʼäta) texton siski ukham sumak jikjjatasiñatak yanaptʼapjjetäna” sasa. Jumatï sinti jan walin uñjasisin wali llakitästa ukhajja, Jehová Diosar chuymatpach arstʼasim, jupampejj qhawqha kutisa, jukʼa tiempos walja tiempos parltʼasikismawa (Sal. 86:3; 88:1). Jehová Diosarojj kutin kutin espíritu santop mayisiskakim. Jupajj oracionam istʼapuniniwa (Luc. 11:9-13).

13. ¿Kunjamsa espíritu santojj Jehová Diosar jan jitheqtas serviskakiñatak yanaptʼistaspa? (Efesios 3:16).

¹³ Mä wali chʼama yantʼan uñjasisajj janis chʼamanïkasma ¿ukhamti amuyasta? Espíritu santow Jehová Diosar jan jitheqtas serviskakiñatak yanaptʼiristam (Efesios 3:16 liytʼäta). Flora kullakat amuytʼañäni. Kullakajj esposopampiw misionerat serviskäna, ukhamaruw esposopajj yaqha warmimp sarjjäna, divorciasjjapjjarakïnwa. Kullakajj akham siwa: “Nayar ukham traicionatapat wali llakitapunïyätwa, ukakiw uruy arumas pʼeqejankaskäna. Aguantaskakiñatakejj Jehová Diosaruw oracionan espíritu santop mayisiyäta. Jehová Diosajj chuymachtʼitänwa, qalltan janis ukhamäniw sañjamäkchïnjja, yanaptʼapampejj aguantaskakiyätwa” sasa. Kullakajj kunjamsa Jehová Diosajj jupar jukʼamp confiyañatak yanaptʼäna uk sum amuyäna. Jutïrin kunas pasaskpan, jupaw yanaptʼitani sasajj janiw payachaskiti. Kullakajj akham sarakiwa: “Kunjamtï Salmo 119:32 texton siskejj ukhampunwa Jehová Diosajj yanaptʼitäna, ukan akham siwa: ‘Mandamientonakaman thakipjja taqe chuymaw arkäjja, kuna laykutejj jumaw chuymaj jistʼartajja’ sasa”.

14. ¿Kunjamsa Jehová Diosan espíritu santopamp yanaptʼayassna?

¹⁴ Jehová Diosan espíritu santop mayisisajj ¿kunsa lurasma? Kunanakatï espíritu santomp irpayasiñatak yanaptʼkiristam ukanakwa lurañama. Tantachäwinakaruw sarañama, predikiris sarañamarakiwa. Jehová Diosan amuyunakap amuyañatakejj sapüruw Bibliat liytʼañama (Filip. 4:8, 9). Bibliat liytʼkasajj khitinakatï yantʼanakan uñjasipkäna ukanakan sutinakap qellqtʼasim, ukat kunjamsa Jehová Diosajj jupanakar aguantañ yanaptʼäna uk amuytʼarakim. Párrafo 6 ukan parlaniwayktan uka Sandra kullakajja, kunayman jan walinakampiw tʼaqesïna. Jupajj akham sarakiwa: “José waynan sarnaqäwipajj walpun chʼamañchtʼitu. Jupajj kunayman yantʼanakan uñjasïna, janirakiw cheqaparjamas uñjatäkänti, ukhamäkchïnsa Jehová Diosamp sum apasitapajj pachpakïskänwa” sasa (Gén. 39:21-23).

JEHOVÁ DIOSAJJ JILAT KULLAKANAKAMPIW CHUYMACHTʼISTU

15. ¿Khitinakas chuymachtʼapjjestaspa, ukat kunjamanakats yanaptʼapjjestaspa? (Foto uñjjattʼarakïta).

¹⁵ Tʼaqesisktan ukhajj jilat kullakanakasajj ‘wal chuymachtʼapjjestaspa’ (Col. 4:11). Jehová Diosajj qhawqsa munasistu ukwa jupanakajj uñachtʼayapjjestaspa. Jilat kullakanakasajj jiwasar munasiñamp istʼasaw chuymachtʼapjjestaspa, jan ukajj jiwasamp chikäsakiw yanaptʼapjjestaspa. Mä chuymachtʼir textompiw yanaptʼapjjestaspa jan ukajj jiwasamp chikaw orapjjaspa (Rom. 15:4).d Awisajj mä jilatasa jan ukajj mä kullakasa, kunsa Jehová Diosajj mä toqet amuyi ukwa amtayapjjestaspa, ukaw aguantaskakiñatakejj yanaptʼarakistaspa. Yaqha toqenakats yanaptʼapjjarakistaspawa, inas kuna manqʼs apanirapipjjchistaspa.

16. ¿Kunsa mayninakamp yanaptʼayasiñatakejj lurañasa?

¹⁶ Awisajj yanaptʼayasiñatakejj mayninakaruw yanaptʼa mayiñasa. Jilat kullakanakajj wal munasipjjtam, yanaptʼañwa munapjjaraktamjja (Prov. 17:17). Inas jupanakajj kunjamas chuymaman jikjjatasta jan ukajj kunsa necesitta uk jan yatipkchiti (Prov. 14:10). Jumatï wali llakitästa ukhajja, experiencian amigonakamampiw parltʼasisma. Kunsa juma laykojj lurapjjaspa uk sañamajj wakisirakiwa. Confiykta uka ancianompi jan ukajj pä ancianompiw parltʼasma. Yaqhep kullakanakarojj experiencian mä kullakamp parltʼañaw yanaptʼaraki.

17. ¿Kunanakas chʼamañchtʼatäñasatakejj jarkʼistaspa, ukampis kunsa lursna?

¹⁷ Janiw jaya tiempojj sapakïñamäkiti. Awisajj wali llakitäsajj janiw khitimpïñs munkasmati. Awisasti jilat kullakanakajj kunjamapunis chuymaman jikjjatasta uk janiw sum amuyapkaspati jan ukajj parlañans pantjasipjjarakispawa (Sant. 3:2). Ukampis jan jilat kullakanakat jitheqtamti, Jehová Diosajj jupanakampiw yanaptʼaskiristam. Llaki usuni Gavin sat mä anciano jilatajj akham siwa: “Jilapartejj janiw amigonakajampïñ munkti” sasa. Ukhamäkchis jupajj mayninakampïñatakiw chʼamachasi, ukaw sumak jikjjatasiñatak yanaptʼaraki. Amy kullakajj akham sarakiwa: “Kunayman jan walinakan uñjasitaj laykojj mayninakar confiyañajj chʼamakiwa. Ukampis Jehová Diosat yateqasisajja, jilat kullakanakajar munasiñsa confiyañsa yateqaskaraktwa. Uk luratajajj Jehová Diosar wal kusisiyi, nayarus ukhamaraki” sasa.

JEHOVÁ DIOSAN PROMESANAKAPAW CHUYMACHTʼISTU

18. ¿Kunas jutïrin pasani, ukat kunsa jichhajj lursna?

¹⁸ Jehová Diosajj niyaw kunatï llakisiykistu cuerposarus jan waltʼayki ukanak chhaqtayani (Apoc. 21:3, 4). Kunanakatï chuym usuykistäna ukanakat janiw machaq mundon ‘amtasjjañäniti’ (Is. 65:17). Kunjamtï yatjjataniwayktanjja, Jehová Diosajj jichha tiempons ‘chuyma usuchjatanak chʼoqtʼarakiwa’. Jehová Diosajj kunayman toqetwa chuymachtʼistu yanaptʼarakistu. Ukhamajj ¡yanaptʼap katoqasiñamawa! Janipun akat payachasimti: Jehová Diosajj wal munastamjja (1 Ped. 5:7).