Jesusat yateqasisajj taqe chuym predicapjjañäni

 1. ¿Kunansa Jehová Diosan Testigonakapampi cristianöpjjtwa sirinakampejj jan igualäpki?

JEHOVÁ DIOSAN Testigonakapajja, cristianöpjjtwa sirinakat sipans taqe chuym predicañ munataswa uñachtʼaytanjja (Tito 2:14). Ukhamäkchisa, inas yaqhepatakejj taqe chuym predicañajj chʼamakïchispa. Wal chʼamachasir mä anciano jilatjamaw akham saraksna: “Awisajj janiw predicañatak ganasanïkti” sasa.

 2. ¿Kunatsa awisajj taqe chuym predicañajj chʼamakïspa?

² Inas predicañat sipans Jehová Diosar yaqha toqenakat serviñ munstan, kuna laykutejj construccionana, Salonan mantenimiento lurañana, labores de socorro ukan yanaptʼasasa, jan ukajj jilat kullakanakar chʼamañchtʼasas wal kusistanjja, kuna laykutejj kunjamsa ukanakajj mayninakar yanaptʼi uk jankʼakiw uñjtanjja. Jilat kullakanakamp trabajisajj sumakiw jikjjatastanjja, munasiñaw utjaraki, chʼamachasitasats wal yuspärapjjestu, wali valoranit uñjapjjaraki. Janiw ukakïkiti, inas pachpa territorion walja maranak predicaskstan, mä qhawqhanik istʼapjjarakchistu, yamas yaqhepajj janiw kuns yatiñ munapkaspati. Ukhamarus akapachan tukusiñap jakʼachasisinkipanjja, inas jukʼamp uñisit uñjaschiñäni, uk sum yattanjja (Mat. 10:22). ¿Kunas taqe chuym predicaskakiñatak yanaptʼistani?

 3. ¿Kunsa Lucas 13:6-9 textojj Jesusat yatichistu?

³ Taqe chuym predicañatakejj Jesusat yatjjatañaw yanaptʼistani. Jesusajj aka oraqenkkäna ukhajj janiw predicacionan aynachtʼkänti, antisas jukʼamp predicañatakiw chʼamachasïna (Lucas 13:6-9 liytʼäta). Jesusajj jupa pachpat parlañatakejj mä higos qoqan chachatwa parläna. Uka chachajj kimsa maras uka higos qoqap uñjchïnjja, janiw kunapachas achoqkänti. Uka chachjamarakiw Jesusajj judionakar kimsa maranak predicäna, ukampis jukʼanikiw discipulopar tukupjjäna. Kunjamtï higos qoqani chachajj achoqañapkam suyaskakïnjja, ukhamarakiw Jesusajj jan qarjtas predicaskakïna, jaqenakan suma yatiyäwinakar creyipjjañapatakis wal chʼamachasirakïna.

 4. ¿Kuna pusi toqetsa yatjjataskañäni?

⁴ Aka yatichäwinjja, kunjamsa Jesusajj jiwañapatak sojjta phajjsinak faltkipan taqe chuym predicäna ukwa yatjjataskañäni (Biblia de estudion Lucas 10:1 liytʼasajja, “Después de estas cosas” siski ukwa notapan liytʼäta). Jesusat yateqasiñatakejj aka pusi toqetwa yatjjataskañäni: 1) Jesusatakejj Jehová Diosan munañap lurañaw nayrankäna, 2) profecianakat amuytʼasajj ukarjamaw luräna, 3) Jehová Diosaw yanaptʼitani sasaw confiyäna, 4) janiw aynachtʼkänti, yaqhepajj istʼapjjaniwa sasaw confiyäna.

JEHOVÁ DIOSAN MUNAÑAP LURAÑATAKIW CHʼAMACHASÏNA

 5. Jesusatakejj Diosan munañap lurañaw nayrankäna, ¿kunjamsa uk uñachtʼayäna?

⁵ Diosajj kun lurañapsa munäna uk sum Jesusajj yatïna, ukatwa “Diosan Reinopat suma yatiyäwinak” taqe chuym predicäna (Luc. 4:43). Ukaw Jesusatak nayrankäna. Jiwañapatak mä qhawqha phajjsinak faltkäna ukhasa, “Jesusajj markat marka sarasaw jaqenakar yatichäna, jiskʼa markanakar mantasas yaticharakïnwa” (Luc. 13:22). Jupjam predicapjjañapatakejj jukʼamp discipulonakaruw wakichtʼarakïna (Luc. 10:1).

 6. ¿Kuna lurañanakampis predicacionar yanaptʼaraktanjja? (Fotonak uñjjattʼarakïta).

⁶ Jichhürunakan Jehová Diosampi Jesusampejja, suma yatiyäwinak predicañajj jakäwisan nayrankaspa ukwa munapjje (Mat. 24:14; 28:19, 20). Taqe kunanaktï Jehová Diosatak lurktan ukanakajja, predicacionaruw yanaptʼi. Sañäni, predicktan uka jaqenakan Jehová Diosar adorapjjañapatakejja, Salonanakwa lurtanjja, ukat kunanakatï Betelansa yaqha ukham lugaranakans luraski ukanakajja, predicacionaruw yanaptʼaraki. Mä jan waltʼäwejj utjki ukhajja, kunanaktï necesitapki ukanakampiw jilat kullakanakar yanaptʼasi, ukhamat tantachäwirusa predicacionarus wasitat kuttʼapjjañapataki. Jehová Diosatakejj predicañasaw jukʼamp importantejja, uk amtañaw jukʼamp predicañ munañatak yanaptʼistani. Hungría markankir János sat jilatajj akham siwa: “Jehová Diosarojj kunayman toqets sirvkchiñänejja, janiw predicación lantejj ukanakak lurksnati. Predicacionaw nayrankañapa” sasa.

 7. ¿Kunatsa Jehová Diosajj predicaskakiñas muni? (1 Timoteo 2:3, 4).

⁷ Kunjamtï Jehová Diosajj jaqenakar uñjki ukham uñjañajja, taqe chuym predicañatakiw yanaptʼistani. Jupajj suma yatiyäwinak jukʼamp jaqenak istʼapjjaspa yateqapjjarakispa ukwa muni (1 Timoteo 2:3, 4 liytʼäta). Niyakejjay suma yatiyäwinakajj jaqenakar salvchispajja, jukʼamp sum yatiyañasatakiw Jehová Diosajj yanaptʼañ munistu. Jaqenakar munasisa Jesusan discipulopar tukuyapjjañäni sat folletonjja, Jesusan discipulopar tukuyañatakisa Bibliat yatichañatakis kunjamsa jaqenakar yatiyañ qalltsna ukatak yanaptʼanakaw utji. Janis jichhajj Bibliat yateqapkchinejja, janïr jachʼa tʼaqesiñ tiempo tukuskipanwa yateqapjjaspa. Ukhamajj kuntï jichhajj jupanakar siskañäni ukajja, jutïrin Bibliat yateqapjjañapatakiw yanaptʼaspa, ukatwa predicaskakiñasajj wakisipuni.

PROFECIANAK SUM AMUYTʼÄNA

 8. ¿Kunjamsa profecianakat yatiñajj Jesusar yanaptʼäna?

⁸ Jesusajj kunjamsa yaqhep profecianakajj phoqasiñapäna uk sum yatïna, ukatwa kimsa mara chikatani Diosan arunakap yatiyañapätap yatirakïna (Dan. 9:26, 27). Profecianakarjamajj kunjamsa, ukat kunapachas jiwañapäna uks yatirakïnwa (Luc. 18:31-34). Niyakejjay profecianakat sum yatchïnjja, Jesusajj janiw ina chʼusar tiemp aptʼaskänti, ukhamatwa Diosan churat lurañapamp taqe chuym phoqäna.

 9. ¿Kun lurañatakis Biblian profecianakapajj yanaptʼistu?

⁹ Bibliankir profecianakat yatiñajj taqe chuym predicañatakiw yanaptʼistaspa. Akapachan tukusiñapatakejj mä jukʼa tiempokiw faltjje. Jaqenakajj qhepa urunakan kunjam chuymanïpjjanisa, kunanakas pasani uk Bibliajj profecianakanwa qhanañchistu. Biblian mä profeciaparjamajja, ‘tukuy tiempon’ rey del sur ukampi rey del norte ukampiw chʼajjwapjjañapäna, mä arunjja Reino Unido ukat Estados Unidos markanakajj Rusia ukat uka markar yanapir markanakampiw chʼajjwapjjañapäna, ukaw jichha tiempon phoqasiskaraki (Dan. 11:40). Daniel 2:43-45 textonkir profeciarjamajja, Reino Unido ukat Estados Unidos mayachtʼat potencia mundialajj jachʼa estatuan kayunakapätapwa yattanjja. Uka profeciat yatjjatañajja, akat mä jukʼar Diosan Reinopajj taqpach gobiernonakaruw tukjani sasin confiyañatakiw yanaptʼistu. Taqpach uka profecianakat yatiñajja, kuna tiempons jakasktan uk amuyañatakiw yanaptʼistu, ukatwa jankʼak predicañ muntanjja.

10. ¿Kunjamsa profecianakajj taqe chuym predicaskakiñatak yanaptʼistaspa?

¹⁰ Bibliankir profecianakajj mä kusiskañ yatiyäw yatiyañatakiw yanaptʼarakistu. República Dominicana markankir Carrie sat mä kullakajj akham siwa: “Kuna sumanaktï Jehová Diosajj jutïrin lurañatak arsuwayki ukanakat amuytʼasajja, mayninakar uk yatiyañ wakisitapwa amuyarakta. Jaqenakajj kuna jan walinakansa uñjasipjje uk uñjasajja, Jehová Diosajj janiw promesanakap nayatakik arskänti, jupanakajj yatipjjañaparakiwa sasaw amuyta” sasa. Profecianakarjamajj Jehová Diosaw predicañatakejj yanaptʼaskistu, uk yatiñaw predicaskakiñatakejj chʼamañchtʼarakistu. Hungría markankir Leila kullakajj akham siwa: “Jehová Diosajj khitirus cambiañapatak yanaptʼakispawa, ukwa Isaías 11:6-9 textojj yatichitu, ukaw jan istʼañ munirjamäpki ukanakar predicaskakiñatak chʼamañchtʼarakitu” sasa. Zambia markankir Christopher jilatajj akham sarakiwa: “Kunjamtï Marcos 13:10 texton siskejja, suma yatiyäwinakajj aka oraqpachanwa predicasiski, nayatakejj uka profecian phoqasiñapatak yanaptʼañajj mä jachʼa privilegiowa” sasa. ¿Jumarojj kawkïr profecianakas predicaskakiñatak yanaptʼtamjja?

JEHOVÁ DIOSAW YANAPTʼITANI SASAW CONFIYÄNA

11. Taqe chuym predicaskakiñatakejj ¿kunatsa Jesusajj Jehová Diosar confiyañapäna? (Lucas 12:49, 53).

¹¹ Jesusajj Jehová Diosaw taqe chuym predicaskakiñatak yanaptʼitani sasaw confiyäna. Jupajj respetompis predickchïnjja, ak sum yatïna: Reinot parlir suma yatiyäwinak istʼasajj yaqhepajj colerapjjañapänwa, ukaruw saykatapjjañaparakïna (Lucas 12:49, 53 liytʼäta). Ukhamarus religión pʼeqtʼirinakajj predicatapat Jesusar wal uñisipjjäna, ukatwa walja kut jiwayañ munapjjäna (Juan 8:59; 10:31, 39). Ukhamäkchïnsa, Jehová Diosan yanaptʼapar confiyatapat Jesusajj predicaskakïnwa. Jupajj akham sänwa: “Janiw nayajj sapäkti, jan ukasti khitankitu uka alajjpachankir Awkiw nayampïski” sasa (Juan 8:16). Ukat akham sarakïnwa: “Jupajj janiw sapak jaytanukkituti. Kunanakatï jupar kusisiyki ukpunwa nayajj lurta” sasa (Juan 8:29).

12. Arknaqatpach predicasipkakiñapatakejj ¿kunjamsa Jesusajj discipulonakapar wakichtʼäna?

¹² Jehová Diosan yanaptʼapar confiyapjjañapatakiw Jesusajj discipulonakapar yanaptʼäna. Niyakejjay arknaqat uñjasipjjañapätap yatchïnjja, Jehová Diosaw uka horasan yanaptʼapjjätam sasaw jupanakar walja kut säna (Mat. 10:18-20; Luc. 12:11, 12). Wali amuyump predicapjjañapwa mayirakïna (Mat. 10:16; Luc. 10:3). Jaqenakatï suma yatiyäwinak jan istʼañ munapkani ukhajja, janiw jupanakar istʼapjjañapatak obligapjjätati sasaw jupanakar säna (Luc. 10:10, 11). Arknaqapkätam ukhajj escapjjapjjam sasaw sarakïna (Mat. 10:23). Jesusajj Jehová Diosaruw confiyäna, taqe chuymaw predicarakïna, ukampis janiw uka laykojj aleqat jan walinakan uñjaskänti (Juan 11:53, 54).

13. ¿Kunatsa Jehová Diosaw yanaptʼitani sasin jan payachasiñamäki?

¹³ Jichhürun ukhamarakiw jarkʼañ munapjjestu, ukatwa taqe chuym predicaskakiñatakejj Jehová Diosan yanaptʼap muntanjja (Apoc. 12:17). ¿Kunatsa Jehová Diosaw sapa maynir yanaptʼistani sasin taqe chuym confiysna? Ukatakejj Jesusan oracionapat amuytʼañasawa, ukajj Juan capítulo 17 ukankiwa. Jesusajj Awkiparuw apostolonakapar cuidañapatak mayïna, Jehová Diosasti mayisitaparojj istʼarakïnwa. Apostolonakajj arknaqatäpkchïnsa, kunjamsa Jehová Diosajj jupanakar taqe chuym predicasipkakiñapatak yanaptʼäna ukwa Hechos librojj qhanañchistu. Jesusajj apostolonakan yatiyäwinakap istʼapkäna ukanakar cuidañapatakiw Jehová Diosar oracionan mayïna. Uksti sapa mayni jiwasatakiw mayiskarakïna. Ukhamajj janiw payachasiñasäkiti, Jehová Diosajj Jesusan oracionaparjam luraskakiniwa, apostolonakarjamaw yanaptʼarakistani (Juan 17:11, 15, 20).

14. ¿Kunatsa jiwasajj taqe chuymaw predicaskakiñäni sasin sissna? (Foto uñjjattʼarakïta).

¹⁴ Akapachan tukusiñapkamajj inas taqe chuym predicañajj jukʼamp chʼamächini, ukampis Jesusan arsutaparjamajj yanaptʼirinïtanwa (Luc. 21:12-15). Jesusampit discipulonakapampit yateqasisajja, janiw jaqenakamp jiskhisktanti, ni istʼapjjañapatakis obligktanti. Predicañajj jarkʼatäki uka lugaranakanjja, jilat kullakanakajj jupanakar confiyasiñat sipans Jehová Diosar confiyasajj suma yatiyäwinak yatiyasipkakiwa. Kunjamtï nayrïr patak maranakan Jehová Diosajj suma yatiyäwinak ‘phoqatpach yatiyapjjañapatak’ servirinakapar chʼam churkänjja, ukhamarakiw jichhürunakan wakiski ukapachkam predicañatak chʼam churistu (2 Tim. 4:17). Ukhamajj janipun payachasiñäniti, Jehová Diosarutï confiyañänejja, taqe chuym predicaskakiñäniwa.

JANIW AYNACHTʼKÄNTI

15. Jesusajj waljaniw suma yatiyäwinak istʼapjjani sasin confiyatap ¿kunjamatsa yattanjja?

¹⁵ Jesusajj janiw aynachtʼkänti, suma yatiyäwinak istʼirinakajj utjaniwa sasaw confiyäna, ukham amuyañaw taqe chuym predicaskakiñatak yanaptʼäna. Niya mä mara predikjjäna ukhajja, waljaniw suma yatiyäwinak istʼañ munapjjäna, apthapiñatak poqorat yapunakäpkaspas ukham jupanakar uñjarakïna (Juan 4:35). Ukat niya mä mara qhepatjja, discipulonakaparojj akham sarakïnwa: “Cosecha apthapiñajj waljawa” sasa (Mat. 9:37, 38). Qheparojj akham sarakïnwa: “Cosecha apthapiñajj waljawa, [...] khititï cosecha apthapiyaski ukarojj trabajirinak cosechapar khitaniñapatak mayipjjam” sasa (Luc. 10:2). Jesusajj walja jaqenakaw suma yatiyäwinak istʼapjjani sasaw confiyäna, ukatwa istʼapjjäna ukhajj wal kusisïna (Luc. 10:21).

16. Predicacionajj jan inamayätap uñachtʼayañatakejj ¿kuna uñachtʼäwinakats Jesusajj parläna? (Lucas 13:18-21; foto uñjjattʼarakïta).

¹⁶ Jesusajj kuntï discipulonakapajj predicapkäna ukajj jan inamayätapwa jupanakar yatichäna, ukaw jupanakar taqe chuym predicaskakiñatak yanaptʼäna. Jesusajj pä uñachtʼäwinakatwa parläna (Lucas 13:18-21 liytʼäta). Mä toqetjja, Reinot parlir suma yatiyäwejj kunjamtï mä mostaza jathajj mä jachʼa qoqar tukuñkam jilski ukamp sasiwa sasaw säna. Ukham sasinjja, walja jaqenakaw suma yatiyäwinak istʼapjjani, janirakiw istʼapjjañapatakejj kunas jarkʼkaniti sañwa munaskäna. Maysa toqetjja, Reinot parlir suma yatiyäwinakajj levaduramp sasiwa sasaw sarakïna. Ukham sasinjja, suma yatiyäwinakajj oraqpachanwa predicasini, qalltan janis qhan amuyañjamäkchinejja, walja cambionakwa jaqenakajj lurapjjani sañwa munaskäna. Kunjamsa predicapjjatapajj waljanir yanaptʼani uk amuyapjjañapatakejja, uka uñachtʼäwinakampiw Jesusajj discipulonakapar yanaptʼäna.

17. Predicatasajj janiw inamayäkaniti sañatakejj ¿kuna razonanakas utjistu?

¹⁷ Suma yatiyäwinak predicañajj kunjamsa waljanir oraqpachan yanaptʼaski uk uñjañajja, taqe chuym predicaskakiñatakiw yanaptʼistu. Sapa marajja, walja millón jaqenakaw Jesusan jiwatap amtapjje, jiwasampis Bibliat yateqapjjaraki. Waranq waranqaniw jiwasamp chik predicañ qalltapjje, bautisasipjjaraki. Qhawqhanimpis suma yatiyäwinak istʼapjjani uk janiw yatktanti. Ukampis akwa yattanjja, Jehová Diosajj walja jaqenakaruw jachʼa tʼaqesiñ tiempon salvasipjjañapatak tantachthapiski (Apoc. 7:9, 14). Niyakejjay Jehová Diosajj cosecha apthapiyaskchejja, walja jaqenakampiw suma yatiyäwinak istʼapjjani sasaw suyaski. Ukhamajj predicaskakiñatakejj walja razonanakaw utjistu.

18. ¿Jaqenakajj jiwasat kun amuyapjjañapsa muntanjja?

¹⁸ Jesusan cheqpach discipulonakapajj taqe chuymaw predicapjje. Jaqenakajj apostolonakar jan ajjsarasa taqe chuym predikir uñjasajja, “Jesusamp chik sarnaqerïpjjatapwa amuyapjjarakïna” (Hech. 4:13). Jaqenakajj jiwasar predikir uñjasajj Jesusjam taqe chuym predicatas amuyapjjaspa ukwa munaraktanjja.