56 YATICHÄWI
Congregacionarojj mayachtʼatäñapatak yanaptʼam
Jilat kullakanakasamp chikäktan ukhajja, David reyjamarakiw akham sistanjja: “¡Kunapachatï jilat kullakanakajj mayachtʼata mä juntuk jakasipki ukhajja, wali sumapuniwa, wali munkañarakiwa!” sasa (Salmo 133:1). Ukham mayachtʼatäñajj janiw aleq ukhamatak utjkiti, taqeniw mayachtʼatäñatak chʼamachasiskakiñasa.
1. ¿Kunanakas Diosan markapan jukʼamp qhansti?
Jumatï yaqha markankir congregacionar sarasmajja, kuna artï ukan parlapki uk inas jan amuykchismati, ukampis familiaparjamaw katoqtʼapjjätam. ¿Kunatsa ukham sistanjja? Kawkirus sarkchïtajja, Jehová Diosan Testigonakapajj pachpa qellqatanakamp Bibliat yatjjatapjjatapwa uñjäta. Ukhamarusa maynit maynikam munasiñamp uñjasiñatakiw chʼamachasipjjta. Kawkjansay jakaskchiñänejja, taqeniw ‘Jehová Diosan sutipat artʼasiñsa’, jupar “mayachtʼat” adorañsa muntanjja (Sofonías 3:9, nota).
2. ¿Kunjamsa congregacionarojj mayachtʼatäñapatak jumajj yanaptʼasma?
“Chuymatpach maynit maynikam wal munasipjjam” (1 Pedro 1:22). Uka ewjjtʼarjamajja, janiw jilat kullakanakasan pantjasitanakap uñchʼukiñasäkiti, jan ukasti suma chuymanïpjjatap amuyañatakiw chʼamachasiñasa. Janiw jumjamäpki uka jilat kullakanakampikejj chikachasiñamäkiti, jan ukasti yaqha markankiri, kunayman costumbrenakani jilat kullakanakampis chikachasiñamarakiwa. Chuymamantï yaqhachasiñajj utjchejja, saphitpach jikʼsuñatakiw chʼamachasiñama (1 Pedro 2:17 liytʼäta).a
3. Mä jilatampi jan ukajj mä kullakampi jan waltʼayasisajja, ¿kunsa lurasma?
Mayachtʼatas jakaskstanjja, pantjasirïtas laykuw mayninakar chuym ustʼaysna, jupanakas jiwasar chuym ustʼayapjjarakistaspawa. Ukatwa Diosan Arupajj akham sistu: “Maynit maynikam [...] perdonasisipkakim. Jehová Diosajj taqe chuymaw perdonapjjtamjja, ukhamarak jumanakajj perdonasipjjam” sasa (Colosenses 3:13 liytʼäta). Jehová Diosarojj walja kutiw chuym ustʼaytanjja, ukhamäkchisa jupajj perdonistuwa. Ukatwa jilat kullakanakasar perdonañas muni. Jumatï maynir chuym ustʼaysta ukhajja, jumaw nayraqatajj jupamp sumankthapir sarañama (Mateo 5:23, 24 liytʼäta).b
JUKʼAMP YATJJATAÑÄNI
Congregacionan sumankañ utjañapatakisa, mayachtʼat jakasiñatakis kunjamsa jumajj yanaptʼasma ukwa jichhajj yatjjatañäni.
¿Kunanaksa maynimpi sumankthapiñatakejj lurañama?
4. Janiw yaqhachirïñamäkiti
Taqe jilat kullakanakasaruw munasiñamp uñjañ muntanjja, ukampis jan jiwasjamäpki ukanakar munasiñamp uñjañajj inas chʼamakïchispa. Ukhamajj ¿kunas yanaptʼistaspa? Hechos 10:34, 35 liytʼasajja aka toqetwa parltʼapjjäta:
Jehová Diosajj kunayman markankir jaqenakaruw jupan Testigopäpjjañapatak katoqe. ¿Kunjamsa uk yatisajj jan jumjamäpki ukanakarojj uñjañama?
¿Jakaskta ukanjja kuna toqenakatsa jaqenakajj yaqhachasiñ yatipjje? ¿Kunatsa jan yaqhachirïñatakejj chʼamachasiñama?
2 Corintios 6:11-13 liytʼasajja aka toqetwa parltʼapjjäta:
¿Kunsa jilat kullakanakar jukʼamp munasiñatakejj lurasma?
5. Taqe chuym perdonañataki ukhamarak taqenimp sumankañatak chʼamachasim
Janiw Jehová Diosarojj kunat perdonañas wakiskiti, ukampis jupajj taqe chuymaw jiwasar perdonistu. Salmo 86:5 liytʼasajja aka toqetwa parltʼapjjäta:
¿Kunsa uka textojj Diosan perdonirïtapat yatichistu?
¿Kunatsa Diosarojj perdonirïtapat jumajj yuspärta?
¿Kunjamanakan uñjasisas mayninakampi sum apasiñajj chʼamäspa?
Jilat kullakanakasampi mayachtʼatäñ munstan ukhajja, ¿kunsa Jehová Diosat yateqasiñatakejj lurañasa? Proverbios 19:11 liytʼasajja aka toqetwa parltʼapjjäta:
Maynitï colerayirjam kuns lurani, jan ukajj chuym ustʼayätam ukhajja, ¿kunsa jupampi sumankaskakiñatakejj lurasma?
Awisajj jiwasaw mayninakarojj chuym ustʼaytanjja, ukhaman uñjasisajj ¿kunsa lurañasa? VIDEO uñtasajja aka toqetwa parltʼapjjäta:
Videon uñtktan uka kullakajja, ¿kunsa sumankthapiñatakejj luräna?
6. Jilat kullakanakajj kuna sumanaktï lurapki uk uñjañatak chʼamachasim
Jilat kullakanakasar jukʼamp uñtʼjjtan ukhajja, janiw suma luratanakapak uñjktanti jan ukasti pantjasitanakapsa uñjaraktanwa. ¿Kunsa suma chuymanïpjjatap amuyañatakejj lursna? VIDEO uñtasajja aka toqetwa parltʼapjjäta:
Jilat kullakanakasan suma luratanakap uñjañatakejja, ¿kunas yanaptʼiristam?
Jehová Diosajj suma chuymanïtaswa uñji. 2 Crónicas 16:9a liytʼasajja aka toqetwa parltʼapjjäta:
Jehová Diosajj janiw pantjasitanakam uñchʼukkiti, ¿uk yatiñajj kunjamakis jumatakejja?
Mä suma diamantejj janiw perfectopunïkiti, ukhampachas wali valoraniwa. Jilat kullakanakasampejj niya ukhamarakiwa, janis perfectöpkchejja taqeniw Jehová Diosatakejj wali valoranïpjje.
YAQHEPANAKAJJ AKHAM SAPJJEWA: “Maynir perdonañatakejja, jupaw nayraqat perdón mayisir jutañapa” sasa.
¿Kunatsa taqe chuym perdonañatakejj jankʼakïñasa?
¿KUNSA YATEQAWAYTAN?
Jumatï jilat kullakanakar perdonäta, taqenirus munasiñamp uñjarakïta ukhajja, congregacionarojj mayachtʼatäñapatakiw yanaptʼäta.
Amtañataki
¿Kunsa jumajj jan yaqhachirïñatakejj lurasma?
¿Kunsa maynimpi jan waltʼayasisajj lurasma?
¿Kunjamtï Jehová Diosajj perdonkistu ukhamarakti mayninakar perdonañ munasma? ¿Kunatsa ukham amuyta?
JUKʼAMP YATJJATAÑAMATAKI
Kunatsa mayninakarojj jan yaqhachañasäki uk yatiñatakejja, Jesusan mä uñachtʼäwipat yatjjatam.
Mä kun lurasas janis juchanïksna ukhamsa amuyaskstanjja, ¿perdón mayisiñasäspati?
“Disculparse, un medio eficaz para hacer las paces” (La Atalaya, 1 de noviembre de 2002)
Yaqhepanakajj kunjamsa taqenir mä igualak uñjañ yateqapjjäna uk videon uñtam.
Congregacionan sumankañ utjaskakiñapatakejja, kunjamsa mayninakampi jan waltʼayastan ukhajj askichsna uka toqet yatjjatam.
¿Kunas mayninakamp sum apasiñatak yanaptʼistaspa? (Yatiyañataki mayo 2016)