¿Wali yatjjatatäñasa wali qollqenïñasa jutïrin sum jakasiñatakejj yanaptʼistaspati?

Waljanejj akhamwa amuyapjje: ‘Khitinakatï wali yatjjatatäpki walja qollqenïpki ukanakajja, jutïrin sumaw jakasipjjani’ sasa. Khitinakatï universidadanakar sarapki ukanakajja, trabajonsa familiansa jakapki uka cheqansa suma jaqëpjjaniwa sasaw amuyapjjaraki. Universidadar sarasajj suma pagat trabajo jikjjatapjjaspa, walja qollqenïsajj kusisitaw jakasipjjaspa sasaw yaqhepajj sapjjaraki.

China markan jakasiri Zhang Chen sat chachajj akham siwa: “Janitï universidadar sarasin mä título apsuskä ukhajja, pobrew jakasiskakëjja, ukampis suma pagat trabajonïsajja kusisitaw jakasëjja sasaw amuyayäta” sasa.

Jutïrin sum jakasiñatakejja, waljanejj wali uñtʼata universidadanakan estudiañwa munapjje. Ukatakejj yaqha markanakar viajiñwa amtapjjaraki. Ukhamwa waljanejj lurapjjäna, ukampis COVID-19 usu utjatapatjja ukham lurañajj jukʼamp chʼamajjänwa. Organización para la Cooperación y el Desarrollo Económicos ukajja, akham sasaw 2012 maran mä yatiyäwipan säna: “Yaqha markanakar yatjjatir sariri jaqenakatjja, chikatatsa jukʼampiw Asia toqenkir jaqenakäpjje” sasa.

Walja awk taykanakajja, wawanakaparojj yaqha markanakankir universidadanakaruw khitapjje. Taiwán markankiri Qixiang sat chachajj akham siwa: “Awk taykajajj janiw walja qollqenïpkänti. Ukhamäkchïnsa pusi wawanakaparojj Estados Unidos markan yatjjatapjjañapatakiw khitapjjäna” sasa. Ukanak pagañatakejja, familiapasa yaqha familianakasa, walja manunakanwa uñjasipjjäna.

Universidadanakan yatjjatañajj jakäwisan yanaptʼistaspawa, ukampis janiw kunjamtï yateqerinakajj suyapki ukhampun yanaptʼaskiti. Amuytʼañataki, yatjjatañatak wal chʼamachasisasa walja manunakan uñjasisasa, janiw waljanejj munapki uka trabajo jikjjatapkiti. Rachel Mui sat warmejja, Singapur markankiri Business Times ukatakejj akham sasaw yatiyäna: “Universidadat misturinakajja, sapa kutiw trabajo jikjjatañ jan puedipkiti” sasa. Taiwán markan jakasiri Jianjie sat chachajja, walja titulonakaniwa, jupajj akham siwa: “Waljanejj janiw kuntï yateqawayapki uk lurasajj trabajipkiti, yaqha trabajonakakwa katoqasipjje” sasa.

Yaqhepajj kuntï estudiawayapki ukanwa trabajipjje, ukampis janiw kunjamtï suyapkäna ukham jakapkiti. Tailandia markankiri Niran sat chachajja, Europankir mä universidadaruw saräna. Markapar kuttʼjjasajj kuntï yateqkäna ukanwa trabajïna. Jupajj akham siwa: “Suma pagata mä trabajo jikjjatayäta, uk munapuniyätwa. Ukampis walja qollqe ganañatakejja, jukʼampwa chʼamachasiñajäna walja horanakwa trabajiñajarakïna. Qhepatjja, trabajkayäta uka empresajj waljaniruw khitanukjjäna, nayas uka taypinkarakiyätwa. Mä trabajojj jan wiñayatakïtapwa amuyayäta” sasa.

Qamirïpki jan ukajj sumjam jakasipki ukanakajja, familiapan problemanïpjjarakiwa, usuntapjje, jan ukajj qollqepatjam wal llakisipjje. Japón markankiri Katsutoshi sat chachajj akham siwa: “Walja qollqenïkchiyätsa janiw kusisitäkayätti. Mayninakajj nayat wal envidiasipjjäna janirakiw sum uñjapkitänti” sasa. Vietnam markankiri Lam sat warmejj akham siwa: “Waljaniw walja qollqe ganañatakejj chʼamachasipjje, ukas sum jakasiñatakejj yanaptʼkaspa ukhamwa amuyapjje, ukampis jukʼampiw llakisipjje usuntapjjaraki” sasa.

Franklin chachjamarakiw waljanejj ak amuyapjje: wali yatjjatatäñasa wali qollqenïñasa janiw jakäwin yanaptʼaskapuniti. Walja cosasanak jikjjatañat sipansa, yaqhepanakajj jutïrin sum jakasiñatakejja, suma jaqëñataki mayninakar yanaptʼañatakiw chʼamachasipjje. ¿Ukati jutïrin sum jakasiñatakejj yanaptʼistaspa? Akjjar jutki uka yatichäwinwa uk jisktʼarojj qhanañchasini.