“Janirakiw amuktʼirjamäktsa”

 1. ¿Kunatsa Jeremiasasa ukat Diosan mayni profetanakapas jan amuktʼapkänjja?

JEHOVÁ “Tatitun arunakapa istʼapjjam” sasinjja, 647 maranwa Jerusalén markan plazanakapana ukat callenakapan yatiyasiñajj qalltasïna. Ukat 40 maranaka qhepat uka markajj tʼunjatajjäna ukhasa Diosan profetapajj yatiyaskakïnwa (Jer. 2:4; 42:15). Judionakan arrepentisipjjañapataki ukat ewjjanakap istʼapjjañapatakiw Diosajj profetanak khitäna. Kunjamtï yatjjataniwayktanjja, Diosan profetanakapatjja Jeremiasajj wali uñtʼatänwa. Profetjam irnaqañapäkäna uka urojja, akham sasaw Diosajj säna: “Sarasinjja, kuntejj nayajj siskäma taqe ukanak sanim. Jan jupanakarojj ajjsaramti” sasa (Jer. 1:17). Jeremiasajj walja luräwinïnwa, ukat jañchi toqensa ukat chuymapan aynachtʼatakchïnsa, luräwip phoqañatakejj chʼamañchtʼataw jikjjatasïna. “¡Chuymajjas walpun putukiraki! ¡Janiw inaktʼirjamäkti, janirakiw amuktʼirjamäktsa!” sasaw jupajj säna (Jer. 4:19).

2, 3. 1) ¿Kunjamsa Jesusan arkirinakapajj Jeremiasat yateqasipjjäna? 2) ¿Kunatsa jiwasajj Jeremiasat yateqasiñasa?

² Kuntï Jeremiasajj profetjama lurkäna ukatjja Jehová Diosan servirinakapajj yateqasipjjaspäwa (Sant. 5:10). Amtañäni, 33 mara Pentecostés uru qhepatjja, Judío markankir autoridadanakajj Pedrompiru Juanampiruw katuntapjjäna ukat Diosan arunakap jan yatiyjjapjjamti sasaw sapjjäna. Uka paninisti akham sapjjänwa: “Janipuniw amuktʼapkiristti kuntï uñjapkta istʼapkarakta ukanakat arsuñjja” sasa (Hech. 4:19, 20). Autoridadanakajj sustjkañ arunakampi toqenoqasajj antutjjapjjänwa. ¿Yatiyasipkakpachänti? Jïsa, Diosan arunakap yatiyasipkakïnwa.

³ Pedrosa ukat Juanasa Jeremiasjam jan ajjsartʼas yatiyapjjatapjja Hechos 4:20 qellqatanwa amuytanjja. Jehová Diosan Qhanañchirinakapjamajja, ¿jupanakjamajjay aka qhepa urunakan jan amuktʼasa yatiyaskakiñataki amttanjja? Sapürutjam jan waltʼäwin jikjjatasisas kunjamanakatsa taqe chʼamampi suma yatiyäwinak Jeremiasjam yatiyaskaksna, ukanakwa jichhajj yatjjatañäni.

 4. ¿Kunjamapjjänsa Jerusalén markankir jaqenakajja?

⁴ Kuntï Diosajj arskäna ukjja Wawapaw phoqani ukat ukan apnaqäwipajj kunjamänisa uka aski yatiyäw jaqenakar yatiyañ muntanjja. Ukampis jichhürunakanjja Jeremiasan urunakapjamarakiwa. Judionakajj akham sapjjänwa: “Kuna arunaktejj jumajj Tatitu toqet apanipjjesta ukanakarojj janiw istʼapkäti” sasa (Jer. 29:19; 44:16). ¡Qhawqha kutik ukham arunak istʼkänjja! “Janiw yatiñ munkti” sasajja walja kutiw jiwasarojj sapjjarakistu. Ukham jan istʼañ munapjjatapatjja, jilat kullakanakajj janiw taqe chuyma yatiyir sarjjapjjaspati. ¿Jumarusa jan ukajj tamamankir yaqhep jilat kullakanakarusa ukham pasarakiti? Ukhamächi ukhajja, ¿kuns lursnajja?

 5. 1) Jaqenakajj janisay yäqapkchïnjja, ¿kunsa Jeremiasajj amuyäna? 2) ¿Kunatsa suma yatiyäwinaka jan istʼañ munirinakajj jan walin jikjjatasipjjani sasin sistanjja?

⁵ Judá markankir jaqenakajj janisay yatiñ munapchïnjja kunsa Jeremiasajj luräna uk jichhajj yatjjatañäni. Profetjam irnaqañ qalltkäna ukhajja, colerasiñ urup purinkani uka urojja kunjamänisa ukwa Diosajj amuytʼayäna (Jeremías 4:23-26 liytʼasiñapawa). Uka profetajja, kuntï yatiykäna ukarjamarutï jaqenakajj istʼapjjasapäna ukat ukarjam sarnaqapjjasapäna ukhajja qhespipjjasapänwa uk sum amuyäna. Niya ukhamanarakwa uta jakʼankirinakasa yaqha jaqenakas jikjjatasipjje. Aka jan wali pachar Diosajj taripkani uka ‘urut’ parlkasajja, akham sasaw Jesusajj säna: “Uka urusti ukhamwa jutani taqe oraqpachan jakirinakjjaru. Jumanakajj jankʼakïpjjamaya, ukhamarak orapjjam, taqe horasana ukhamat taqe akanak paskani ukat jaltapjjañamataki, ukhamarak Jaqen Yoqap nayraqatan uñstapjjañamatakisa” sasa (Luc. 21:34-36). Khitinakatï suma yatiyäwinaka jan istʼapki ukanakajj jan walin uñjasipjjani, ukwa uka arunakat amuytanjja.

 6. ¿Kunatsa jan istʼañ munapki ukanakarusa ukat yaqha jaqenakarus yatiyir saraskakiñasa?

⁶ Maysa toqetjja, khitinakatï nayra sarnaqäwipa jaytapjjani ukat Biblian yatichäwiparjam sarnaqapkani ukanakajj walja bendicionanak katoqapjjani. Akapachamp chika jan tʼunjatäñatakisa ukat machaq oraqer mantañatakisa Diosajj mä thakjamsa jistʼarkaspa ukhamawa. Kunjamtï Jeremiasajj profecía arunak yatiykäna niya ukhamanwa jikjjatastanjja. Judá markan jakirinakajja, kuna tʼunjäwitï jakʼachasisinkäna ukatjja qhespipjjaspänwa (Jeremías 26:2, 3 liytʼasiñapawa). Ukatwa Jeremiasajj walja maranaka Diosar ‘istʼapjjañapataki ukat jan wali luräwinakapa’ jaytapjjañapataki yatiyaskakïnjja. Yatiyatapatjja qhawqhaniy arrepentisisa jan wali luräwip jaytapjjchïna ukjja janiw yatktanti, ukampis yaqhepanakajj ukham lurapjjänwa, jichhürunjja waljanejj ukhamwa lurapjjaraki. Khitinakatï Diosan arunakapa nayrajj jan istʼañ munapkäna jupanakar yatiyir saraskaktawa, ukatwa istʼjjapjjestu, ukjja sapa kutiw uñjtanjja (“Jan yäqasirinakajj istʼjjapjjaspawa” siski uka recuadro uñjjattʼäta, ukajja 246 janan jikjjatasi). ¿Uk yatiñajj qhespiyäwi arunak yatiyir saraskakiñasatak janit yanaptʼkistu?

 7. Kuntï Jeremiasajj yatiykäna ukjja, ¿kunjamsa enemigonakapajj tukjañ amtapjjäna?

⁷ Jeremías profetatjja akanakwa amuytanjja, Jehová Diosan arunakapa yatiykäna ukhajja enemigonakapajj tukjañatakiw amtampjjäna. Kuntï profetajj siskäna ukajj janiw cheqäkiti sasaw kʼari profetanakajj jaqenak taypin sapjjäna (Jer. 14:13-16). Kunapachatï Jerusalén markan callenakapan sarnaqkäna ukhajja, jaqenakajj jan wali arunakampiw jupar arnaqjjapjjäna ukat larusipjjäna (Jer. 15:10). Yaqhep uñisirinakapasti jan walit uñjayañatakiw arustʼasipjjäna (Jer. 18:18). Ukat yaqhepanakasti jupa contra parlañwa qalltapjjäna ukhamat Diosan arunakap yatichkäna uka Judionakar jitheqtayañataki (Lam. 3:61, 62). ¿Jeremías profetajj qarjtpachänti? Janiwa, yatiyaskakïnwa. ¿Kunjams uk lurpachäna?

 8. Enemigonakapajj tukjañataki chʼamachasipkäna ukhajja, ¿kunjamsa Jeremiasajj ukanakar saykatäna?

⁸ Jeremiasajj Jehová Diosar atinisisaw enemigonakapar saykatäna. Profetjam irnaqañ qalltkäna ukhajja, jumampiskäwa ukat jarkʼaqarakïmawa sasaw Diosajj säna (Jeremías 1:18, 19 liytʼasiñapawa). Jeremiasajj uka arunakarojj atinisïnwa ukat Diosajj ukhampunwa phoqäna. Enemigonakapasa ukat jupar tukjañ munirinakas jukʼamp jiljjatkäna ukhajja, jukʼampiw Diosar confiasiñapasa, jan ajjsartʼañapasa jiljjattarakïna. Kunjamsa ukanakajj yanaptʼäna ukanak jichhajj uñjañäni.

9, 10. Jeremiasajj jan walinakan jikjjataskäna ukanakatjja, ¿kawkïris chʼamañchtʼat jikjjatasiñatak yanaptʼistaspa?

⁹ Mä urojja, jan istʼasiri sacerdotenakasa ukat profetanakas Judá marka apnaqerinakar katuyañatakiw Jeremiasar apapjjäna, ukhamat jiwayatäñapataki. ¿Jan wal lurañ amtapkäna ukarojj ajjsarpachänti? Janiwa. Jan waltʼayañ munapkäna ukanakarojj saykatänwa ukat jupanakan jiwayatäñatsa qhespirakïnwa (Jeremías 26:11-16 liytʼasiñapawa; Luc. 21:12-15).

¹⁰ Yaqha jan waltʼäw uñjarakiñäni. Profetan sustjaskañ arunakap istʼasajja, templon irnaqer Pasur (Pasjur) sat sutini chachaw cepo satäkis ukar katuntayäna. Ukham chhojjriñchjat uñjasisajja, janiw parljjaniti sas amuyasaw qheparmanthejj khitanukjjäna. Ukampis Jeremiasajj jan walin uñjasisajj usuchjatas jikjjataskchïnjja, qhana arunakampiw Diosan taripäwip uka chachar yatiyäna. ¡Chhojjriñchjat uñjasisas janiw amuktʼkänti! (Jer. 20:1-6.) ¿Kunatsa? Jupajj akham sänwa: “Tata, jumajj nayampïsktawa, jan atipjkaya guerran nuwasir jaqjama; nayar arknaqerinakasti liwisipjjaniwa, janiw atipjañatak chʼamanïpkaniti” sasa (Jer. 20:11). Jeremiasajj janipuniw uka jan istʼasir jaqenakarojj ajjsartkänti. Jehová Diosaruw taqe chuyma atinisïna, jiwasajj jupjamarakiw atinissna.

11, 12. 1) Jeremiasajj Hananiasamp jikisir sarkäna ukhajja, ¿kunjamsa amuytʼasirïtap uñachtʼayäna? 2) Jan waltʼäwin jikjjatasis ‘llampʼu chuyma’ uñachtʼayasajja, ¿kuna askinaksa jikjjatsna?

¹¹ Amtapuniñäni, Jeremiasajj janiw jan amuytʼasirïkänti, enemigonakap nayraqatanjja wali amuyumpiw kuns lurirïna ukat kuna ratus sarjjañapa uksa yatirakïnwa. Ukwa Hananías kʼari profetamp jikiskäna ukatjja amuysna. Kunapachatï Diosan profecía arunakapajj janiw cheqäkiti sasin uka kʼari profetajj jaqenak nayraqatan siskäna ukhajja, Jeremiasajj cheqañchänwa ukat cheqpach profetajj kunjamasa uksa qhanañcharakïnwa. Jeremiasajj kunkaparuw maderat lurat mä yugo apäna, ukhamatwa kunjamsa babilonionakajj esclavor uñtat judionakar katuntapjjani uk amuytʼayañataki. Hananiasajj wali colerataw uka yugo aparasajj jiskʼa jiskʼa pʼakjäna. ¡Kunampik uka jan wali chachajj lurkäna! Ukat ¿Jeremiasajj kunsa lurpachäna? “Sarjjänwa”. Jïsa, uka cheqatjja jitheqtawayjjänwa. Uka qhepatsti, Hananiasar yatiyañapatakiw Diosajj kuttʼayatayna, Babilonia markaruw judionakar Diosajj katuyani ukat Hananiasajj jiwayatäniwa sasaw yatiyäna (Jer. 28:1-17).

¹² Yatiyktan ukhajja, janiw ajjsarañasäkiti ukat sum amuytʼasirïñasarakiwa, ukwa uka qellqatatjja yateqtanjja. Maynitï Biblian yatichäwipa jan istʼañ munkani, colerani ukat sutichjistaspa ukhajja, sumatakwa uka cheqat yaqha utar sarjjañasäspa. Janiw khitimpis amanut chʼajjwañ munktanti. Ukat jiwasatï ‘llampʼu chuyma’ uñachtʼayañänejja, mayan kutʼkañäni ukhajj inas uka jaqejj istʼjjchistaspa (2 Timoteo 2:23-25 liytʼasiñapawa; Pro. 17:14).

13. ¿Kunatsa Diosajj “jan khitirus ajjsaramti” sasin Jeremiasar säna, ukat kunatsa uka toqet amuytʼañasa?

¹³ Jerusalén markajj 607 maran janïr tʼunjatäkäna ukhajja, jan walinakaw uka markan utjäna, Diosar taqe chuyma servirinakas jan walinwa jikjjatasipjjarakïna. Ukatwa Diosajj Jeremiasar akham säna: “Jan khitirus ajjsaramti” sasa (Jer. 1:8; Lam. 3:57). Uka pachpa arunakamp yaqhanakar chʼamañchtʼañapatakiw khitarakïna (Jeremías 46:27 liytʼasiñapawa). ¿Kunsa ukat yateqtanjja? Aka jan wali qhepa urunakanjja awisajj ajjsarayasnawa. ¿Ukhamanakan jikjjataskasajj “jan khitirus ajjsaramti” sasin Jehová Diosajj siski uk istʼañäniti? Jeremiasarojj kunjamanakatsa jan wali urunakan Diosajj yanaptʼatayna ukwa aka yatichäwinakan yateqaniwaytanjja. Kunjamansa jikjjatasïna ukat kunsa yatichistu ukanak jichhajj amuytʼarakiñäni.

14, 15. 1) ¿Kuna jan walinsa Jeremiasajj jikjjatasïna? 2) Jarkʼaqämawa sasin siskäna ukjja, ¿kunjamsa Jehová Diosajj phoqäna?

¹⁴ Jerusalén markar caldeonakajj muyuntapkäna ukhajja, manqʼañanakajj janiw utjjänti ukat markpachaw jan manqʼan uñjasipjjäna (Jer. 37:21, NM). Jeremiasajj uka markan katuntataw jikjjatasïna, ukanwa jiwaspäna. Judá markan reyin yanapirinakapaw Jeremiasarojj ñeqʼerar mä manqha phuchʼur jaqontapjjatayna, Sedequías ajjsarir reyiw ukham lurapjjañapatak satayna. Chhaqantkasajja, akanpï jiwäjja sasaw profetajj amuypachäna. Jiwasatï jupäsänjja, ¿janit sustjaskasänjja? (Jer. 38:4-6.)

¹⁵ Jeremiasajj jiwasjam jiwir jaqëkchïnsa, Jehová Diosajj janiw jaytjkitaniti sasaw atinisïna (Jeremías 15:20, 21 liytʼasiñapawa). ¿Jehová Diosajj atinisitapat yanaptʼänti? Jïsa. Diosan chʼamañchtʼataw Ébed-mélec chachajj reyin yanapirinakapar jan istʼasa Jeremiasar qhespiyäna. Reyin arsutaparjamaw uka ñeqʼerar phuchʼut apsüna ukat jiwañats qhespiyarakïna (Jer. 38:7-13).

16. ¿Kuna jan walinakatsa Jehová Diosajj taqe chuyma sevirinakapar qhespiyäna?

¹⁶ Phuchʼut mistjjäna ukhasa, Jeremiasajj jan walin jikjjatasiskakïnwa. Kunapachatï Ébed-mélec chachajj jarkʼaqañatak reyin ukar sarkän ukhajja, akham sänwa: “Ukanwa manqʼatjama jiwaskaraki, tʼantʼasti janirakiw markanjja utjkjjeti” sasa (Jer. 38:9). Jerusalén markan janipuniw manqʼajj utjkänti ukatwa jaqe masinakapar manqʼañ qalltapjjäna, ukampis wasitatwa Jehová Diosajj uka profetar qhespiyäna. Ukat Diosajj jarkʼaqarakïtamwa sasaw Jeremiasajj Ébed-mélec chachar säna (Jer. 39:16-18). “Nayaw jumampi chiktʼataskä jumar imañatak” sasin Jehová Diosajj siskäna uka arunakjja Jeremiasajj janiw armaskänti (Jer. 1:8). Diosajj uka pä chachar uñjkäna ukhajja, janiw jupanakajj maqʼatsa ni enemigonakapan jiwayatas uñjasipjjañapäkänti. Ukat tʼunjatañapäkäna uka markatsa qhespipjjänwa. ¿Kuna aski yatichäwsa uka sarnaqäwit yateqsna? Jehová Diosajj jarkʼaqämaw sasaw säna ukat phoqarakïnwa (Jer. 40:1-4).

17. ¿Jehová Diosajj markapar jarkʼaqaniwa siski uka arunakar kunatsa atinisiñasäspa?

¹⁷ Jesusajj akapachan tukusïwipat arskäna ukajj phoqasipuniniwa. Ukapachajj “unañchanakaw utjani intina, phajjsina, warawaranakana; oraqensti markanakajj mayjtʼatäpjjaniwa, ukhamarakiw sustjasipjjani [...]. Jaqejj ajjsarañatwa thayjtani kunatejj oraqen [...] paskani ukat yatisina” (Luc. 21:25, 26). Kunjamanakatsa uka unañchäwinakajj phoqasini ukat kunjamas jaqenakajj sustjjasipjjani uk uñjañatakiw suyañasäspa. Kunas kunäskpan Diosajj qhespiyañatak chʼamanïtapatsa ukat uk lurañ munatapatsa janipuniw pächasiñasäkiti. Maysa toqetsti, khitinakatï Diosatakjam jan sarnaqapki ukanakajja jan walinakanwa jikjjatasipjjani (Jeremías 8:20 ukat 14:9 liytʼasiñapawa). Jan kun kamachtʼirjama chʼamak juri phuchʼu manqhan jikjjatasksna ukhamsa amuyaskchiñänejja, Diosajj qhespiyistaspawa. Kuntï Diosajj Ébed-mélec chachar siskäna uka arunakajj markapatakejj jichhürunakan wali wakiskirirakiwa, akham sänwa: “Nayaw jumarojj jiwayatäñat qhespiyäma. Jumajj jaltawayjjätawa, janirakiw jiwayata uñjaskätati, nayaru iyawsatam layku. Naya Tatituw ukjja arsta” sasa (Jer. 39:18).

18. 1) ¿Kuna arunakas Jeremiasan jakäwip mayjtʼayäna? 2) Jeremías 1:7 qellqatajja, ¿jumatakejj kamsañs muni?

¹⁸ “Kawkirutejj nayajj khitkäma ukaruw jumajj saräta. Kuntejj nayajj siskäma ukwa parlarakïta.” (Jer. 1:7.) Diosan uka arunakapa istʼasaw Jeremiasan jakäwipajj wiñayatak mayjtʼawayi. Ukhat aksaruw Jehová “Tatitun arunakapa” nayraqat qhanañchäna, Jeremías libronjja uka aruw walja kuti uñsti. Qhepa jaljanjja, Jerusalén markajj yaqha markan katuntataw uñjasïna ukat Judá mark qhepa apnaqer Sedequiasajj jaya markar apata uñjasïna ukanakwa profetajj qhanañchi. Judá markajj Jehová Diosar istʼapjjañapatakejja, Jeremiasajj yatiyaskakïnwa, ukhamatwa yatiyäwipajj taqenin amuykayäna.

19, 20. 1) ¿Kunatsa Jeremiasan yatiyäwipajj wali yateqaskayajja? 2) ¿Kun lurasas kusisit jikjjatasna? 3) ¿Jeremías ukat Lamentaciones libronakat yatjjatañajj jumar yanaptʼawaytamti?

¹⁹ Jeremiasan luratapampi ukat Jehová Diosan Qhanañchirinakapajj lurapki ukanakampejja, niya kikpakïtapjja waljwa uñjtanjja. Jupjamarakiw jiwasajj taripäwi tiempopan Diosar yupaychtanjja. Yaqha luräwinak lurañatakejj tiempsa chʼamsa apsuskstanjja, suma yatiyäwi yatiyir sarañaw taqe kunat sipans jiwasatakejj wali wakiskirejja. Ukham lurasajja, Diosan sutipwa jachʼañchtanjja ukat Jupa sapakiw taqe kunjjar Munañanejja sasaw taqe chuyma iyawstanjja (Lamentaciones 5:19 liytʼasiñapawa). Ukhamarusa, khitis cheqpach Diosajja ukat jakäwi katoqañatakejj kunsa lurañasa ukanak yatichasaw jaqe masisar munasiñ uñachtʼaytanjja (Jer. 25:3-6).

²⁰ Jehová Diosajj kuna luräwti churkäna uka toqetjja, akham sasaw Jeremiasajj säna: “Arunakamaw chuymajjarojj kusisiyarakïnjja, nayasti jumankarakstjjaya, taqe chʼamani Dios Tatitu” sasa (Jer. 15:16). Taqe khitinakatï Diosan arunakapa taqe chuyma yatiyapki ukanakajj ukham kusisiñwa jikjjatapjjarakispa. Ukhamasti, kunatsa Jeremiasjamajj Diosan arunakap yatiyaskakiñasa uk sum amuyawaytanjja.