¿Jeremiasjam qhespirakiñäniti?

1, 2. ¿Kunatsa sapa maynita ukat familpachat llakisiñasäspa?

KHITIRUS servipjjäta sasin Josué chachajj israelitanakar siskäna ukhajja, jupajj akham sänwa: “Nayampi taqe familiajjampejja Diosaruw servipjjä” sasa (Jos. 24:15). Josué chachajja jan jitheqtas Jehová Diosar serviñwa amtäna ukat familiajas ukhamarakïniwa sasaw atinisïna. Uka qhepatjja, Jerusalén markan tʼunjäwipajj jakʼachasisinkäna ukhajja, Sedequías reyirojj akham sasaw Jeremiasajj säna Babiloniankir soldadonakaru katuyasjjäta ukhajja “jumasa, familiamasa janiw jiwarayata uñjasipkätati” sasa (Jer. 38:17). Uka reyejja janiw suma amtar purkänti, ukatwa warminakaparusa wawanakaparus jan walir aptʼäna ukat jupas ukhamanarakwa uñjasïna. Jupan uñjkataw wawanakaparu ukat warminakapar jiwayapjjäna, ukat juparusti juykhuptayasaw Babilonia markar presionerjam apapjjäna (Jer. 38:18-23; 39:6, 7).

² Kunjamtï uka pä chachanakat uñjawayktanjja, familia peqtʼirimpit ukat familiapampit parli. Ukhamajj qhanawa jaqenakajj kuntï lurki ukjja, Jehová Dios nayraqatanwa uñachtʼayapjjani, jila parte israelitanakajj jaqechasipjjänwa ukat familianïpjjarakïnwa. Familiapaw jupanakatakejj wali wakiskirïnjja, ukat jiwasatakis ukham wakiskirirakiwa. Biblia liyisasa, tantachäwinakan jaqechasïwit yatjjatkasasa, kunjamsa wawarojj uywañäspa ukat familia taypin respetomp uñjasiñat yatichaski ukhajj ukwa amuytanjja (1 Cor. 7:36-39; 1 Tim. 5:8).

3, 4. ¿Kunansa Jeremiasajj mayninakat mayjäna ukat ukajj kunjamsa yanaptʼäna?

³ Jerusalén markajj tukjatäkäna ukhajj waljaniw qhespipjjäna, Jeremiasajj uka taypinkarakïnwa, jupan jakäwipajj janiw mayninakanjamäkänti (Jer. 21:9; 40:1-4). Juparojja, janiw jaqechasïtati ukat janirakiw wawanakanïñamäkisa sasaw Diosajj satayna ukat kuntï judionakajj lurapjjerïkäna ukanakjja janirakiw lurañapäkänti (Jeremías 16:1-4 liytʼasiñapawa).

⁴ Jeremías profetan urunakapansa ukat markapansa, taqeniw jaqechasipjjerïna ukat wawanïpjjerïna. Judionakas ukhamäpjjarakïnwa, ukhamatwa tribupatsa ukat familiapatsa oraq katoqapjjerïna (Deu. 7:14).a ¿Kunatsa Jeremiasajj jan jupanakjamäñ amtkpachänjja? Janiw jiwatan utaparus ukat kʼuchirtʼäwirusa sarätati sasaw Diosajj säna, kunattejja Diosan urupajj wali jakʼankänwa. Jiwirin familiaparojj janiw chuymachtʼañapäkänti ni jaqechasïwin jachʼa manqʼäwirus sarañapäkänti. Jiwatanak uruyañasa ukat jaqechasïwi fiestanak lurañasa niyaw tukusiñampiskäna (Jer. 7:33; 16:5-9). Jeremiasajj sarnaqäwipampi ukat arunakapampiw jakʼachasisinkäna uka taripäwi urojj kunja jan walïnisa uk uñachtʼayäna. Uka tʼaqhesiñ urojj tiempoparuw purinïna. ¿Kunjamakis jaqe masipar manqʼantasasa ukat munat familiarapar jiwarat uñjasas jikjjatasipjjpachäna? (Jeremías 14:16 liytʼasiñapawa; Lam. 2:20.) Ukhamajja, Jeremiasan sapakïtapajja wali askïnwa. Uka 18 phajjsinak muyuntat jikjjatasipkäna ukhajj familianinakajj wals tʼaqhesipkchïnjja, Jeremiasan janiw khitit jachañapas utjkänti kunattejj janiw warminïkänti ni wawanïkänsa.

 5. ¿Jeremías 16:5-9 qellqatan siski uka arunakjja, jichha tiempo cristianonakajj phoqapjjarakispati?

⁵ ¿Jeremías 16:5-9 qellqatan siski uka arunakajj jichha tiempo cristianonakatakiti? Janiwa, kunattejja ‘tʼaqhesitanakar chuymachapjjam’ ukat “kusispjjarakim khitinakatejj kusisitäki ukanakampejja” sasaw ewjjtʼistu (2 Cor. 1:4; Rom. 12:15). Jesús pachpaw mä jaqechasïwir saratayna ukat uka fiestajj sum apasiñapatakiw yanaptʼarakitayna. Ukampisa, aka jan wali pachatakejj jan waltʼäwiw jutaski, ukat cristianonakjamajj inas jarkʼata ukat llakinakan uñjaschiñäni. Kunatsa aguantañasa ukat Diosat jan jitheqtas yupaychañas wali wakiskiri ukwa Jesusajj ewjjtʼawayäna, nayrïr patak maranakan jilat kullakanakasajj ukhamwa Judea markat mistjjapjjäna. Ukatwa, sapaki qheparañatakisa, jaqechasiñatakisa jan ukajj wawanakanïñatakisa wali sum amuytʼasiñasa (Mateo 24:17, 18 liytʼasiñapawa).

 6. ¿Kuntï Diosajj Jeremiasar siskäna uka arunakat amuytʼasajj khitinakas askinak jikjjatapjjaspa?

⁶ ¿Janiw jaqechasïtati ni wawanïñamäkisa sasin Jehová Diosajj Jeremiasar siskäna uka arunakajj kunatsa wali wakiskirejja? Jichhürunakanjja, ukhamarakiw Diosar taqe chuyma yupaychirinakajj utji, yaqhepanakajj janiw jaqechasipkiti jan ukajj jaqechatäpjjchi ukhas janiw wawanïpkiti. ¿Kunsa Jeremiasat yateqasipjjaspa? Ukat ¿wawanïpki uka jaqechatanakas kunatsa profetajj jakkäna ukarjam sarnaqapjjaspa?

 7. Jeremiasajj jan wawanïkäna uka toqet amuytʼañajj ¿kunatsa wali wakiskiri?

⁷ Amtañäni, Jeremiasajj janiw wawanïñapäkänti. ¿Cristianonakarojj Jesusajj ukhamarakt sispachäna? Arkirinakaparojja, janiw wawanïpjjatati sasin janiw siskänti; ukhamäkchïnsa, Jerusalén markatak jan wali urunakajj 66 ukat 70 maranak purinkani ukhajj “kunja llakkañänisa” usur warminakatakisa jan ukajj ñuñuskir jiskʼa wawaninakatakisa sasaw säna. Jupanakatakejj ukham urunakan jakañajj wali chʼamäsapänwa (Mat. 24:19). Jiwasanakajj ukhamarakiw wali jachʼa tʼaqhesïwir jakʼachasisktanjja, ukatwa jaqechasitanakajj wawanïpjjaniti janich uk sum amuytʼasipjjañapa. ¿Aka jan wali urunakanjj sapürutjam jan walinakar saykatañajj jukʼampi chʼamakejjejjaya? Jaqechasitanakajj akham sasaw sapjje, Diosan thakiparjam wawanakar uywañajj chʼamawa sasa. Ukampisa, jaqechasitäpki ukanakajj wawanïpjjaniti janicha uk jupanakas amtapjjañapäkchejja, Jeremiasan sarnaqäwipat yatjjatañajj wali askïspawa. Ukat ¿Diosajj janiw jaqechasïtati sasin Jeremiasar siskäna ukasti?

 8. ¿Diosatakjam sarnaqañatakejj janiw jaqechatäñapunejj wakiskiti sasin kunatsa sissna?

⁸ Jeremiasarojj janiw jaqechasïtati sasin siskäna ukhajja, Diosajj janiw taqe yupaychirinakaparojj mä kamachjam churkänti. Jaqechasiñajj askiwa. Jehová Diosaw jaqechasiñ uttʼayi ukhamat aka Oraqe phoqantañataki ukat kusisit jakasipjjañapataki (Pro. 5:18). Nayratpacha jichhakamajja, Diosan servirinakapat yaqhepajj janiw jaqechasipkänti. Jeremiasajj jakkäna uka tiemponjja, Diosan markap taypinjj eunukunakasa, viuda warminakasa jan ukajj viudo chachanakas utjarakpachänwa.b Ukhamasti, janiw jupa sapakejj jan warminïkänti. Ukatjja kunatsa sapakïñapäna ukjja yatirakïnwa, ukhamarakiw jichhürunakan jupjam servirinakajj utjapjje.

 9. ¿Diosan amuytʼayat kawkïr ewjjtʼsa jaqechasiñ toqet amtañasapuni?

⁹ Walja jilat kullakanakaw jaqechasipjje, yaqhepasti sapakiw qheparapjjaraki. Jesusajj janiw jaqechaskänti, ukat yaqhep arkirinakapajj amuyupansa ukat chuymapansa “ukham tuku[pjjarakini]” mä arunjja, sapakïñwa amtapjjani sasaw säna. Yaqhepanakarusti jupjam sarnaqapjjañapatakiw chʼamañchtʼäna (Mateo 19:11, 12 liytʼasiñapawa). Ukhamasti, jilat kullakanakan Diosar yupaychañatak jan jaqechasiñ amtapjjatapatjja janiw sawkasiñasäkiti, jan ukasti sapakïsipkatapatjja chʼamañchtʼañasawa. Yaqhepanakasti kunjamanjjay jikjjatasipjjchi ukarjamaw mä qhawqha tiempojj soltero qheparapjje. Inas Diosar taqe chuyma yupaychir mä cristiano jan jikjjatapkchiti jan ukajj “iyawsirik iyawsirïpajja” sasin Diosajj ewjjtʼistu uka arunakarjamaw phoqañ amtapjje, ukham amtapjjatapajja jiwasatakejj kusiskañawa (1 Cor. 7:39). Cheqansa, yaqhepajj viudo jan ukajj viudapjjewa, ukatwa sapakïpjje.c Ukampisa Jehová Diosasa ukat Jesusas jupanakamp chikäskiwa, uk janipuniw armapjjañapäkiti (Jer. 22:3; 1 Corintios 7:8, 9 liytʼasiñapawa).

10, 11. 1) ¿Kunas Jeremiasarojj sapakïkän ukhajj kusisit jikjjatasiñapatak yanaptʼäna? 2) Solterokasins kusisitäpjjaspawa ukjja, ¿kunjamsa jilat kullakanakan experiencianakapajj uñachtʼayi?

¹⁰ Uka arunak amuyasaw Jeremías profetajj sapakïkasajj Diosan yanapap thaqhäna. ¿Kunjamatsa? Amtañäni jupajja Jehová Diosan Arup liytʼapunirïnwa, ukaw profetjam irnaqañatakejj yanaptʼäna ukat chʼamañchtʼarakïna. Ukatsti, jan jaqechasitapat jiskʼachapkaspa ukanakamp jan chikachasiñatakiw chʼamachasïna; ukham jaqenakamp sarnaqañat sipansa ‘sapakiw sarnaqäna’ (Jeremías 15:17 liytʼasiñapawa).

¹¹ Walja soltero jilat kullakanakaw Jeremiasat yateqasis sarnaqasipki, jupanakajj kunayman maranïpjjewa, ukat experiencianakapat parltʼapkistu ukhajj Diosar taqe chuyma serviñajj wali askïtapwa amuytanjja. Amuytʼañataki, chino arut tantachäwinak apapki uka tamankir mä kullakajja siwa: “Precursorjam irnaqtʼañaw jakäwijan yanaptʼitu. Solterjamajj jan tiemponiw irnaqtjja ukaw sapärstʼatjam jan amuyasiñatakejj wal yanaptʼitu. Ukat cheqa yatichäwinak yatiyatajajj jaqenakar yanaptʼatap amuyasajja wali kusisitaw jikjjatasirakta” sasa. Ukat 38 marani mä precursor kullakajja akham sarakiwa: “Kunjamanjjay jikjjatasisksta ukanakat kuna askinaktï lurkta uk amuyañaw kusisit sarnaqañatakejj yanaptʼasi” sasa. Ukatsti Europa toqet aynachankir mä solter kullakajja, akham sasaw sarakïna: “Jakäwijajj janis kunjamtï munkayäta ukhamäkchejja, kusisitakïsktwa ukat kusisitakiskäwa” sasa.

12, 13. 1) ¿Kunjamsa jaqechasiñ toqeta ukat solterjam qheparañ toqet amuytʼsna? 2) ¿Kunsa Pablon ewjjtʼapasa ukat jakäwipasa amuytʼayistu?

¹² ¿Janirakis kunjamtï amuykayäta ukhamäkitejja sasat Jeremiasajj amuypachäna? Inas ukham amuychïna. Ukampis khitinakatï jaqechasipki ukat wawanïpki ukanakajj ukhamarakwa amuyapjje. España markan precursorjam irnaqtʼir mä kullakajja akham siwa: “Jaqechasitanakat yaqhepajja kusisitaw jakapjje ukat yaqhepasti janiw ukhamäpkiti. Ukanak uñjasaw sistjja kusisitäñatakejj janiw jaqechatäñajapunejj wakiskiti” sasa. Jeremiasan sarnaqäwipat yatjjatasajja solterjam sarnaqañajj wali askïtapa ukat kusisitaw sarnaqapjjarakispa ukwa amuytanjja, kunjamtï mayninakajj sarnaqapki ukhama. Apóstol Pablon sarnaqäwipasa ukat arunakapas ukajj cheqätap uñachtʼayaraki, jupajj akham sänwa: “Solteronakampiru ijmanakampirojj saraktwa, askïspawa jan casarasisaki nayjam sarnaqapjjañapa[jja]” sasa (1 Cor. 7:8). Amuyatajja, inas Pablojj viudochïna; ukhamäkchis janisa, misionerjam yupachkäna ukhajj solteroskänwa (1 Cor. 9:5). Ukatwa jupajj taqe chuymaw misionerjam yupaychpachäna sasajj amuysna. Jïsa, “taqe chuyma Tatitur servisin[jja]” walja askinakwa jikjjatäna (1 Cor. 7:35).

¹³ Pablojj Diosan amuytʼayatäsinjja akham sasaw qellqäna: “Casadonakatakejj chʼamawa sarnaqañajja” sasa. Ukatjja akham sarakïnwa: “Maynitejj [...] chuymapanjja amtchi [...] jan casarasisaki jakañsa, ukas walikïskarakiwa. Parlatapampitï casarasejja, walik luraskejja, jan casaraski ukapachasti jukʼamp askwa lurarakejja” sasa (1 Cor. 7:28, 37, 38). Uka arunakjja Jeremiasajj janipuniw liytʼawaykiti, ukampis kuntï lurkäna ukajja, solterokasajj Diosatak sumwa irnaqtʼapjjaspa, ukwa jakäwipajj uñachtʼayistu. Ukatsti sapakïsajj kusisita ukat Diosan markapajj sum jikjjatasiñapatakiw yanaptʼaspa. Sedequías reyejj casaratäkchïnsa profetan arunakap jan istʼasaw jiwañar purtʼasiwayi, ukampisa Jeremiasajj janis jaqechasitäkchïnjja, Jehová Diosar istʼasaw qhespirakïna.

14. Pablojj Aquilamapi Priscilamp sum apasipkäna ukatjja, ¿kunsa yateqassna?

¹⁴ Kunjamtï yateqawayktanjja, Jeremiasan urunakapanjja walja chacha warminakaw jaqechasipjjäna ukat wawanakanipjjäna. Pablon urunakapanjja ukhamäpjjarakïnwa. Ukhamajja, wawanakani cristianonakajja janiw yaqha markanakar Diosan arunakap yatiyir sarirjamäpkänti, kunjamtï Pablojj lurkäna ukhama, ukampis kawkhantï jakapkäna ukanjja walja lurañanakaw utjäna, solteropki ukanakarus yanaptʼapjjañapänwa. Amtañäni kunapachatï Pablojj Corinto markar purkäna ukhajja Aquilampi Priscilampiw utapar katoqtʼapjjäna ukat pachpa irnaqäwinwa irnaqtʼapjjäna. Ukampis janiw ukakïkänti, jupanakampi suma amigonakjam apasipjjatapajja Pablorojj wal yanaptʼpachäna. Manqtʼasipjjatapsa ukat chʼamañchtʼasipjjatapsa sum amuysnajja. ¿Jeremiasajj ukham amigonakanirakïnti? Jupajj Diosar serviñatakis jan jaqechaskchïnjja, janiw sapärstʼat jaqet uñtʼatäkänti. Diosar taqe chuyma servir familianakampejj sumwa apaspachäna, Baruc ukat Ébed-mélec chachanakampis Jeremiasajj sum apaspachäna (Rom. 16:3; Hechos 18:1-3 liytʼasiñapawa).

15. ¿Diosar yupaychir familianakajj kunjamsa solter wayn tawaqonakar yanaptʼapjjaspa?

¹⁵ Jichhürunakanjja walja solteronakajj ukhamarakiwa, Aquilat yateqasisa yanaptʼasir familianakampejj wali sum apasipjje. ¿Familiasajj ukhamarakti jan jaqechatäpki ukanakamp wali sum apasipjje? Mä kullakajj akham siwa: “Akapachankirinakampejj janiw sarnaqjjti ukat janirakiw sarnaqañ munjjti. Ukampis sum uñjatäñsa ukat munasiñ chuymamp uñjatäñsa wal munaskta. Solteronakarojj Bibliat jukʼamp yatichäwinaka ukat chʼama churistaspa ukatakiw Jehová Diosar mayista. Nänakajj janiw armtʼatäñ munapti, ukat yaqhepanakajj jaqechasiñsa janiw amtapkarakti. Ukampisa, awisajj sapakïpkiristsa ukhamwa amuyasipjjta. Cheqansa Jehová Diosaruw jakʼachassna, ukat jaqe masisampi munasita amuyasiñatakejja, ¿janit Diosar loqtir jilat kullakanakasar jakʼachasksna?” sasa. Walja solteronakajja uka jisktʼarojja taqe chuymaw “jïsa” sapjjaspa, kunattejja Diosan markapanjj taqenimpiw sum apasipjje. Ukampis janiw mitanakapampikejj sum apasipkiti, jan ukasti, taqe jilat kullakanakampiw sum apasipjje. Niyakejjay taqenimpis parltʼasipjjakchejja, jilïrinakasa ukat waynanakasa wali sumwa jupanakampejj apasipjje.

16. ¿Kunjamanakatsa tamasankir solter jilat kullakanakasarojj yanaptʼsna?

¹⁶ ¿Kunjamsa solter wayn tawaqonakarojj yanaptʼsna? Familjam kunanaktï lurktan ukaruw jawstʼsna, sañäni, Familiana Diosar Yupaychañataki Aruma sat wakichäwi familian apktan ukaruw jawstʼsna. Mä soltero waynaru jan ukajj tawaqoru manqʼtʼasiñatak jawstʼañajja mä yanapäspaw jupatakejja. ¿Janit jupamp Jehová Diosan arunakap yatiyir mistuñatak amtksna? Jan ukajja, ¿janit jiwasamp chika Tantachasiñ Utan irnaqtʼañataki jan ukajj jiwasamp chika alir sarañapatakis jawstʼksna? Yaqhep familianakajja, viudopki uka jilat kullakaru jan ukajj soltero jilat kullakaruw jupanakamp chika jachʼa tantachäwinakar sarapjjañapataki, jan ukajj vacacionatjam sarapjjañapatakis jawstʼapjje. Ukham sum apasipjjatapajja taqenitakis suma yanaptʼawa.

17-19. 1) ¿Kunatsa chuymankipstata jan ukajj usuntat awk taykar uñjañatak wakichtʼkasajj sum amuytʼañajj wakisi? 2) ¿Kunjamtï Jesusajj taykapar uñjkäna ukat kunsa yateqsna?

¹⁷ Maysa toqetjja, khitinakatï sapakïsipki ukanakaruw chuymankipstat awk taykapar uñjañajj waktʼi. Jesusan urunakapanjja, wali aytata yaqhep judionakajja, awk taykapar jan uñjañ laykojj kuns sapjjakirïnwa. Awk taykamaruw uñjapjjañama sasin Diosajj kamach churkäna uk phoqañat sipansa, kuna lurañanaktï jupanak pachpajj religión taypin uttʼayapkatayna ukanakakwa nayraqat lurapjjäna (Mar. 7:9-13). Diosar yupaychir familia taypinjja janiw ukhamäñapäkiti (1 Tim. 5:3-8).

¹⁸ Ukampis ¿mä awk taykatï Diosar yupaychir walja wawanakanïchi ukhajj kunjamäñapasa? ¿Jan jaqechatäki ukapunit awk taykapar uñjañapäspa? Japón markankir mä kullakajj akham siwa: “Jaqechasiñ muniristwa ukampis awk taykajar uñjañajätwa. Awk taykar uñjasajj kuna jan waltʼäwinakansa maynejj jikjjatasi ukat chuyman kunja llaktʼatas solteronakjamajj jikjjatasipjjtjja uk Jehová Diosan uñjaskatapjja janiw pächaskti” sasa. Juparojj ¿jaqechat jilanakapa ukat kullakanakapat awk taykapar uñjam sasin jan jisktʼas sapjjpacha? Ukhamanakan jikjjatasisajja, Jeremiasat amtapjjañäni jupan jilanakapajja janiw cheqaparjam uñjapkänti (Jeremías 12:6 liytʼasiñapawa).

¹⁹ Jehová Diosajja, solteronakarojj uñjaskiwa ukat jan waltʼäwinakan jikjjatasipki ukhas jupanakat khuyaptʼayasirakiwa (Sal. 103:11-14). Ukhamäkchisa, chuymankipstata jan ukajj usuntat awk taykajja, janiw solteron awk taykapakïkiti jan ukasti taqe wawanakapankiwa. Yaqhepanakajj inas jaqechatäjjapjjchi ukat familianëjjapjjarakchi, ukhamäpkchisa janiw awk taykapat jayarstʼapjjañapäkiti, cristianonakjamajj awkiparus taykaparus yanap munapki ukhajja yanaptʼapjjañapapuniwa. Jesusat amuytʼapjjañäni, lawar chʼakkatatäkasin janïr jiwkasajja, kuna lurañatï jupar waktʼkän uk amuyänwa ukatwa taykapat jan armaskänti (Juan 19:25-27). Awkipstata jan ukajj usuntat awk taykarojj kunjamsa uñjasispa uka toqet qhanañchir kamachinakjja Bibliajj janiw churkiti; janirakiw khitinakatï janïr jaqechatäki ukanakaw jukʼamp awk taykapar uñjapjjañapa mayninakat sipansa sasin qhanañchkiti. Uka kasta amtar puriñatakejja, familiankirinakajj sum amuytʼasisaw mä suma amtar puripjjañapa ukat janiw mayniruk jaqtʼapjjañapäkiti. Jesusajj qhepakamaw taykaparojj uñjawayäna, uk yateqasipjjañapawa.

20. ¿Taman mä wawaki mayachtʼat sarnaqer uñjasajj kunjamsa jikjjatasta?

²⁰ Diosan markapan mä wawakïpjjaniwa ukat taqenirakiw sum apasipjjani sasaw Jeremiasajj Diosan amuytʼayatäsajj qhanañchäna (Jer. 31:34). Tamasanjja taqenimpiw wali sum apasjjtanjja ukat janïr jaqechatäpki uka jilat kullakanakampisa ukhamarakiw apastanjja. Jïsa jupanakampejja maynit maynikamaw chʼamañchtʼasiñ muntanjja ukat kunjamsa Diosar yupaychasipki uksa uñjañ munaraktanwa.