¿Khitinakarus amigosjam ajlltanjja?

1, 2. 1) ¿Cristianonakatakejj amigonak jikjjatañajj kunats chʼamäspa? 2) ¿Kuna kasta amigonaks Jeremiasajj ajllïna uk yatjjatañajj kunats wakisispa?

UTA jakʼankirinakasa, yateqañ utankir masinakasasa jan ukajj trabajir masinakasasa navidad amtañäni sas sistaspa ukhajj ¿kamachsnasa? Patronas kʼarisiyañ munistaspa jan ukajj jan walinaks lurayañ munistaspa, ukat kuntï Bibliarjamajj jan lurañasäki uk marka apnaqerinakajj lurayañ munistaspa ukhajj ¿kamachsnasa? Inas concienciasajj ukanak jan luraykchistaniti, ukhamatwa tʼaqhesiyata jan ukajj jiskʼachat uñjassna.

² Kunjamtï yatjjatkañänejja, Jeremiasajj walja kutiw ukham jan waltʼäwinakan uñjasirïna. Profetjam Diosatak irnaqkäna ukhajj khitinakampis chikachasïna uk yatjjatañasajj wali wakiskiriwa. Jupajj mä qhawqhanirojj uñtʼänwa ukat jupanakat yaqhepajj profetjam irnaqañjja jaytayañ munapjjäna, ukampis janipuniw ukanakarojj amigoparjam uñjkänti. Kunjamtï amuyktanjja khitinakatï profetjam irnaqaskakiñapatak yanaptʼapkäna ukat Diosat jan jitheqtas serviskakiñapatak chʼamañchapkäna ukanakaruw Jeremiasajj amigopjam ajllïna, kunjam amigonak ajlliñasasa ukwa jupat yateqasiraksna.

 3. ¿Kunsa Sedequiasajj Jeremías profetat istʼañ munäna, ukat Jeremiasajj kamachänsa?

³ Jerusalenajj janïr tʼunjatäkän ukhajja Sedequías reyejj walja kutiw Jeremiasarojj jisktʼasïna. ¿Kuna amtampis jisktʼasïna? Jutir qhepa maranakan kunjamänis apnaqäwipajj uka toqet suma yatiyäwinak istʼañ munasaw jisktʼasïna. Judá markarojj Jehová Diosaw uñisirinakapat qhespiyani ukham sas profetajj arsuspa uk istʼañ munäna. Reyin khithanakapajj akham sasaw sapjjäna: “Achiktʼasipjjsmawa, [Jehová] Tatituruy nanakjjata jisktʼam, Babiloniankiri Nabucodonosor reyiw, nanakaru nuwantasipkitu. Inampis Tatitojj mä milagro lurañ munaskaspa, ukhamat Nabucodonosor reyirojj aka cheqata sarayjjaspa” sasa (Jer. 21:2). Ukampis reyejj janiw Diosarojj istʼañ munkänti babilonionakampejj chʼajjwaskakïnwa. “Kunjamtï mä usut jaqejj doctoran ukar kutin kutin sari ukat kuna qolltï churki uk janirak umkiti ukamp sasiwa” sasaw Biblia toqet yatjjattʼat mä jaqejj säna. Ukat ¿Jeremiasajj kuns lurarakpachäna? Sedequiasamp sum apasiñatakejj kuna arunaktï reyejj istʼañ munkäna uka arunakwa yatiyaspäna; ukhamasti, ¿Jeremiasajj kunatsa uka yatiyäw jan mayjtʼaykpachäna, ukhamat jan waltʼäwinakan jan jikjjatasiñataki? Kunattejj Jerusalén markajj tʼunjatäniw sas yatiyañapatakejj Jehová Diosaw khitäna (Jeremías 32:1-5 liytʼasiñapawa).

 4. ¿Amigonak jikjjatañ toqet mä amtäwir puriñajj kunats chʼamäspa? Trabajot qhanañchtʼam.

⁴ Kunjamantï Jeremiasajj uñjaskäna niya ukhamanwa uñjasiraktanjja. Vecinonakasampisa, trabajir masinakasampisa, yateqer masinakasampisa parlapuntanwa. Ukampis jupanakajj Diosan arunakap janis istʼañ munapkchistu, jan ukajj Diosan kamachinakaparjam jan sarnaqapkchi ukhasa, ¿jupanakarojj suma amigosarjamat uñjañasäspa? Sedequías reyejj Diosan arunakap janis istʼkchïnjja, Jeremiasajj janiw jupat jiteqtkapunispänti kunattejj Sedequiasajj reyikiskänwa; ukampis Jeremiasajj janiw Sedequiasan pantjasit amuyunakaparjam sarnaqañapäkänti ni jupampis sum apasiñapajj wakiskapunïnti. Reyin munañaparjam kuns luraspäna ukhajja, reyejj walja regalonak churasapäna ukat yanaptʼarakisapänwa; ukampis Jeremiasajj janiw ukanakampis apayaskarakïnti ni jupan amigopañs munkarakïnti. ¿Kunatsa? Kuntï Jehová Diosajj siskäna ukjja phoqañapapunïnwa. ¿Kuns jupat yateqtanjja? Ajllisktan uka amigonakasajj Diosat jan jitheqtas serviñasatakit wiytistu uk amuytʼasiñasawa. Ukampis Diosar jan yupaychirinakampejj jikisipuntanwa, irnaqäwinsa, yateqañ utansa, vecinonakampisa, janiw taqenitpun jitheqtksnati (1 Cor. 5:9, 10). Ukhamasti, Diosar jan yupaychirinakamp sum apassna ukhajja Jehová Diosat jitheqtsnawa uk janipun armasipjjañäniti.

5, 6. ¿Kunjamatsa uñisirinakapajj Jeremiasar amuktʼayañ munapjjäna?

⁵ Janiw Sedequías reyikejj Jeremiasar jan walinakar wiytañ munkänti. Mä kutejja Pasur (Pasjur) sat sacerdotejj ukhamarakiw jawqʼjayatäyna, inas 39 kut jawqʼjapjjam sas sischïna (Jer. 20:2, NM; Deu. 25:3). Mä urojja, reyin wawanakapajj jawqʼjapjjarakïnwa ukatsti cadenanakamp ñachʼantasaw “carceltʼayapjjarakïna” ukat sótano manqharuw jistʼantapjjarakïna ukanwa walja urunak wali tʼaqhesit uñjasisajj jiwkächa sasaw wal llakispachäna (Jeremías 37:3, 15, 16 liytʼasiñapawa). Jeremiasajj carcelat mistjjäna uka qhepatjja, reyin yaqha wawanakapajj Sedequiasarojj Jeremiasar jiwayañapatakiw wiytapjjäna, jupaw soldadonakar jan nuwasipjjañapatak chʼam thayjtayaski sasaw kʼarintapjjäna, ukatwa ñeqʼeni manqha phuchʼur jiwañapatak jaqontapjjäna (Jer. 38:1-4). Jehová Diosan profetapajj ukham jiwañat qhespitaps yatkstanjja, khitinakatï jupar jan waltʼayapkäna uk uñjirinakajj janiw istʼañ munjjapjjänti, jupa contrakiw saytʼjjapjjäna.

⁶ Jeremiasan uñisirinakapajj janiw marka apnaqerinakakïkänti. Mä kutejja, marka masinakap kikpaw profecía arunak yatiyaskakïta ukhajj jiwayapjjämaw sasin ajjsarayapjjäna (Jer. 11:21). Ajjsarayatpachas Jehová Diosamp sum apasiñwa Jeremiasajj thaqhäna, janiw marka masinakapamp sum apasiñ thaqkänti. Ukat yaqhepanakajj jukʼamp jan walinakwa lurapjjäna. Kunapachatï Jeremiasajj maderat lurat mä yugo kunkapar uchasïna, ukat judionakarojj Babilonia markan reyiparuw istʼapjjañama, ukhamat jiwañat qhespipjjäta sasin ewjjtʼkäna ukhajja, Hananías sat kʼari profetajj Jeremiasan kunkapat uka yugo apaqasinjja, qʼal tʼunjäna. Jehová Diosajj akhams siskaspa ukham amuyäna: “Babiloniankiri reyin yugopjja tʼunjäwa” sasa. Hananiasajj uka pachpa maraw jiwjjäna, ukhamajja khitïnsa cheqpach profetajj uk sum amuytanjja (Jer. 28:1-11, 17). Profeciarjamaw Jerusalén markajj tʼunjatäjjäna uka qhepatjja, soldado pʼeqtʼirinakampi ukat Johanán chachampejj janiw Jehová Diosarojj istʼapkänti jupanakajj Judá markanak qheparapjjañapäna. Ukat Jeremiasarojj akham sapjjäna: ‘Kuntï jumajj parlkta ukajj kʼariwa. Jehová Diosasti janiw jumarojj sisktamti nanakaru jan Egiptor sarapjjamti sañamatakejja’ sasa. Ukham jan respetompiw uñjapjjäna ukat Jeremiasarus Baruc chacharus uka soldadonakajj Egipto markaruw apjjapjjäna (Jer. 42:1–43:7).

 7. ¿Jehová Diosat jan jitheqtas taqe chuyma yupaychatas kunjams uñachtʼaysna?

⁷ Jeremías profetajj uñisirinakapampi ukat Diosan arunakapajj janiw cheqäkiti sirinakampejj walja maraw jakawayäna. Kuns lurpachäna uk amuytʼapjjañäni. Jehová Diosarusa jan ukajj Aruparus jan respetapkäna ukanak taypinwa Jeremiasajj jakäna, jupajj uka jaqenakamp chikachasisapänwa, kunattejj taqe cheqanwa jakapjjäna. Jiwasanakajj ukhamarakiw sapüru uka kast jaqenakamp chikachasiraktanjja. Ukhamasti, Dios contras jan ukajj jiwas contras saytʼapki jan ukajj suma jaqjam tukupki ukanakarujja, ¿amigosäñapatakejj ajlliñäniti? ¿Diosan profeciapar jan yäqer jaqenakamp chikachasiñajj walïspati? Amuytʼañäni, Jeremiasatï jiwasäspänjja, ¿Biblian yatichäwinakapar jan yäqas sarnaqerinakampi jan ukajj jaqe masiparuk atinisipki ukanakampejj chikachasispänti? (2 Cró. 19:2.) Jaqe masipar atinisisajj kunarus purtʼasispa ukjja Jehová Diosajj Jeremiasarojj qhanwa yatiyäna (Jeremías 17:5, 6 liytʼasiñapawa). ¿Kunjams jiwasajj uk uñjtanjja?

 8. ¿Jakasta ukawjanjja kuna jan waltʼäwinakansa jilat kullakanakajj uñjasipjje?

⁸ Yaqhep jilat kullakanakajj negociop jiltayañatakejj akham amuyapjje: “Taqeniruw uñtʼayä ukat wal jutapjjañapatakejj regalonak kun churä” sasa. Ukampisa, ¿ukham lurasajja janit jan cheqaparjam luririnakampi, jan wali parlirinakampi jan ukajj machir jaqenakamp chikachasiñar purkaspa? Ukham jan wali jaqenakamp jan chikachasiñatakejja, yaqhep cristianonakajj qamiriptaña ukat yänak jikjjataña munañsa jaytjjapjjewa. Maysa toqetjja, inas yaqhep patronasa, irnaqer masinakasasa alasirinakar engañañajj walikïkaspas ukham amuyapjjchispa. Cheqpach cristianonakjamajja, Jehová Diosar jan uñtʼapki uka kasta jaqenakampejj janiw apayasiñasäkiti, ukhaman uñjasisajj kuntï lurañasäki uk amtañajj chʼamakïspawa. Jeremías profetajj Jehová Diosampejj wali sumwa apasïna, ukaw taqe kunat sipans wali askïnjja, luratapampejja qʼoma chuymanïtapwa uñachtʼayäna. ¡Ukham suma sarnaqäwipajja jiwasatakejj wali yateqaskañapuniwa!

 9. ¿Taqenimpi uñtʼatäñ munañajj kuna jan walinakarus purtʼayistaspa?

⁹ Jeremías profetajj kuntï amtkäna ukat taqe chuyma lurkäna ukanakatjja jaqenakajj larusipjjänwa, janiw askit uñjapkänti (Jer. 18:18). Ukampis jupajj ukhamans jikjjataskchïnjja nayraqatar sartaskakiñatakiw amtäna, janiw jupanakjam lurkänti (Jer. 8:5, 6). Awisajj jan wali jaqenakamp chikachasiñat sipansa ‘sapakiw sarnaqerïna’, jan wali lurañar wiytirinakampejj janiw chikachasirïkänti (Jeremías 9:4, 5 ukat 15:17 liytʼasiñapawa). ¿Jiwasajj ukhamarakti lurtanjja? Jeremiasan tiemponjamarakiw Diosat jitheqtirinakajj jichhürunakan wal jiljjataski. Jehová Diosan yupaychirinakapajja nayra tiempot jichhakamasa khitinakampis chikachasipjjani ukjja wali amuyumpiw ajllisipjje. Ukhamajja, ¿Jeremías profetajj janipunit khitimpis chikachasirïkpachäna? Janiw uk sañ munkiti, kunattejj jan waltʼäwin uñjaskäna ukhajj yaqhepajj jupar arjjatapjjänwa ukat yanaptʼapjjarakïnwa. ¿Khitinakas yanaptʼapjjäna? Uka toqet yatjjatañajj wal jiwasar yanaptʼistani.

10, 11. 1) ¿Kunas Jeremiasarojj suma amigonak ajlliñatakejj yanaptʼäna? 2) ¿Khitinakänsa Jeremiasan amigonakapajja, ukat kuns jupanakat jisktʼassna?

¹⁰ ¿Jeremiasajj khitinakampis chikachasiñapäna? Jehová Diosan arsutaparjamajja, Jeremiasajj kʼarinakaru, ñanqha qhoru jaqenakaru, uñisirinakaru, wachoq juch luririnakaru ukat cheqpach Diosar yupaychañat sipansa kʼari diosanakaruki yupaychapki uka kasta jaqenakarojja, walja kutiw juchañchäna. Ukat “jan wali sarnaqäwinakamjja apanukupjjam, luräwinakamsa ukhamaraki sarnaqäwinakamsa askichasipjjarakim” sasaw markapankir jaqenakarojj Jeremiasajj ewjjtʼäna (Jer. 18:11). Jerusalén marka tʼunjatäkäna uka qhepatsa Jeremiasajj Jehová Diosan ‘munasiñapatsa, khuyapayasiñapatsa’ ukat ‘cheqapätapatsa’ jachʼañchaskakïnwa (Lam. 3:22-24). Jehová Diosar jan jitheqtas yupaychapkäna ukanakakiw Jeremiasan amigopjamaspäna (Jeremías 17:7 liytʼasiñapawa).

¹¹ Jeremías, profetajj khitinakarus amigopjam ajllisïna ukjja yatjjtanwa. Amigonakapat yaqhepajj akham satäpjjänwa: Ébed-mélec, Baruc, Seraías (Seraya) ukat Safán chachan wawanakapampi jupanakajja jan kun suyasaw yanaptʼapjjäna. Inas akham jupanakat jisktʼassna: “¿Kunjam chachanakänsa? ¿Jeremiasampejj kunjams apasipjjäna? ¿Kuna toqensa suma amigopäpjjäna? ¿Diosat jan jitheqtas serviñapatakejj kunjams yanaptʼapjjäna?” sasa. Sapa jisktʼanakat yatjjatkasajja, jiwasan jakäwisat amuytʼapjjarakiñäni.

12. 1) Kuntï 78 janan uñjktan ukajja ¿Jeremiasampi ukat Baruc chachampejj kunans niya kikpakïpjjäna? 2) ¿Khitïnsa Seraías sat chachajja ukat kuns jupat yattanjja?

¹² Amuyatajja, Nerías chachan Baruc yoqapaw Jeremías profetan suma amigopänjja. Jupar wal atinisitapatwa kuntï Jehová Diosajj siskäna uka arunak mä rollor qellqayäna ukat markachirinak nayraqatapanwa liytʼayäna ukjjarusti Judá markankir reyin wawanakap nayraqatanwa liytʼayarakïna (Jer. 36:4-8, 14, 15). Baruc chachajj Jeremiasjam iyawsäwinirakïnwa ukat kuntï Diosajj arskäna ukajj phoqasipuniniwa sasaw taqe chuym atinisirakïna. Ukat Judá markajj 18 qhepa maranakan jan waltʼäwin jikjjataskäna ukhajja, kunjamtï Jeremiasajj jikjjataskäna ukhamanarakwa Baruc chachajj jikjjatasïna, ukat panpachaniw kuna luräwtï Jehová Diosat katoqapkäna uk phoqapjjäna. Ukatsti panpachanirakiw jan waltʼäwin uñjasipjjäna, uñisirinakapatsa imantasipjjäna ukat Jehová Diosamp chʼamañchtʼatas uñjasipjjarakïna. Biblianjja ‘qellqerit’ uñtʼatäki uka Baruc chachajja, Judá markankir wali suma qellqerit uñtʼatäpki uka familiat jutatätapaw yatisiraki. Seraías sat jilapajja uka markankir jilïr apnaqerin wali uñtʼat yanapiripänwa. Baruc chachjamarakiw Seraías sat chachajj Jehová Diosan profecía arunakap yatiyañapatak Jeremías profetar yanaptʼäna (Jer. 36:32; 51:59-64). Ukat Nerías chachan pä wawanakapajja, taqe chuymaw Jeremías profetar jan waltʼäwi urunak utjkäna ukhajj yanaptʼapjjäna, ukaw Jeremiasarojj profetjam irnaqaskakiñapatakejj wal chʼamañchpachäna. Jehová Diosat jan jitheqtas yupaychasipki uka jilat kullakanakamp maynit maynikam yanaptʼasisaw chʼama ukat chuymachtʼäwi jikjjataraktanjja.

13. Kunjamtï aka janan uñjktanjja, ¿Ébed-mélec chachajj Jeremiasan suma amigopätap kunjams uñachtʼayäna?

¹³ Jeremiasan yaqha arjjatiripajj Ébed-mélec satänwa. Kunapachatï reyin wawanakapajj wali colerat mä manqha phuchʼur jiwañapataki jaqontapkäna ukhajja yaqha markat jutir chachaw jan ajjsartʼas jupar arjjatäna: Ébed-mélec chachajj Etiopía markatänwa ukat reyin yanapiripänwa. Jupajj taqen nayraqatapanwa, Jeremiasar uka ñeqʼe manqha phuchʼut apsuñatakejj Sedequías reyir mayïna, jupajja Benjaminan punkupa siski uka cheqan qontʼatäskänwa. Ukatsti Ébed-mélec chachajj inas jan apsuyañ munapkchitaspati sasin amuyasa ukat Jeremías profetar uka phuchʼut apsuñatakiw 30 jaqenakamp sarpachäna (Jer. 38:7-13). Jeremiasampi Ébed-mélec chachampejj kunja sumak apasipkäna uk janiw yatktanti, ukampisa panpachaniw Jehová Diosamp sum apasipjjäna, ukatwa suma amigopjjänwa sasin sistanjja. Ébed-mélec chachajj Jeremiasarojj Diosan profetaparjamaw uñjäna, ukatwa uñisirinakapan luratanakapjja jan walit uñjäna ukat kunatï cheqapäki uk lurañatakejj irnaqäwip niyaw aptʼasïna. Ukhamasti jupajj suma jaqënwa ukatwa Jehová Diosajj akham säna: “Nayaw jumarojj imarakïma [Jerusalén markajj tʼunjatäkani uka urojja] [...] nayaru iyawsatam layku” sasa (Jeremías 39:15-18 liytʼasiñapawa). ¡Ukajj Diosan wali askit uñjatätapwa uñachtʼayi! ¿Janit ukham amigonak jikjjatañ munksna?

14. ¿Safán familiapatjja kuns yattanjja ukat kunjamsa Jeremiasamp apasipjjäna?

¹⁴ Safán sat chachan kimsa wawanakapa ukat mä allchhipajja Jeremiasan amigonakapäpjjarakïnwa, jupanakajj wali aytat familiat jutirïpjjänwa. Safán chachajj Josías reyin secretariopanwa. Kunapachatï Jeremiasar uñisirinakapajj jiwayañ munapkäna ukhajja, “Safán jaqena Ahicam sat yoqaparakiw Jeremiasat arjjatasisa parlarakïna; uka parlatapasti janiw Jeremiasarojj katuntaykänti janirakiw jaqenakas katuntapkänti jiwayañatakejja” (Jer. 26:24). Ahicam chachan mä jilapajj Gemarías (Guemarías) satänwa, jupan wawapasti Micaya satarakïnwa. Jupasti, Baruc chachajj Diosan taripäwi arunakap markatak liytʼir istʼasajja, jankʼakiw awkiparu ukat awkipamp chikasipkäna uka reyin wawanakapar (jilïrinakaru) yatiyäna. Jupanakajj Joacim (Jehoiaquim) reyir ajjsarasajja, Jeremiasampir Baruc chachampirojj imantasipjjam sasaw sapjjäna. Ukat reyejj Diosan yatiyäwinakap jan istʼañ munkäna ukhajja, Gemarías chachajj khitinakatï uka rollo jan nakhantayamti sas achiktʼapkäna ukanakamp chikarakiw achiktʼarakïna (Jer. 36:9-25). Jeremiasajja, Babilonia markar apatäpkäna uka judionakar profecía qellqat cartjja, Safán chachan Elasá sat yoqaparuw apayäna (Jer. 29:1-3). Safán chachan kimsa yoqanakapampi ukat mä allchhipampiw Diosan profetaparojj yanaptʼapjjäna. Ukham uñjasajja, ¡Jeremiasajj kunjak jupanakar munaskäna! Jupanakampejj janiw mä kasta manqʼa manqʼasirïpjjatapata, umasirïpjjatap laykukisa jan ukajj kusistʼäw toqet mä amtanikïpjjatapatsa suma amigopkänti. Jan ukasti, amigopjjañapatakejj mayaw jupanakarojj jukʼamp yanaptʼäna, ¿kunänsa?

15. ¿Kuna kast amigonak ajlliñsa Jeremiasat yateqsna?

¹⁵ Uka tiempon utjir suma jaqenakarus jan wali jaqenakarus kunjamtï Jeremiasajj uñjkäna ukajj jiwasatakejj yateqaskañapuniwa. Ukat reyisa, reyin wawanakapasa, kʼari profetanakasa ukat soldadonakan pʼeqtʼirinakapas profecía arunak mayjtʼayañap mayipkchïnsa, janipuniw mayjtʼaykänti. Jupajj janipuniw jupanakamp sum apasiñ laykukejj kuntï lurañapäkän uk mayjtʼaykänti ni jupanakarus thaqkarakïnti. Jehová Diosajj qalltatpachaw suma amigopäna. Diosat jan jitheqtas yupaychatapat kuna jan waltʼäwinakantï jikjjatasiñapäkäna ukanakar saykatañatakis wakichtʼatänwa (Lamentaciones 3:52-59 liytʼasiñapawa). Kunjamtï uñjawayktanjja Jehová Diosar yupaychañjja janiw jupa sapak amtkänti, jan ukasti, yaqhanakas jupjam amtapjjarakïnwa.

16, 17. 1) ¿Kunjamsa mä suma amigojj yanaptʼistaspa? 2) Kawkhansay jakaskchiñäni, ¿kawkinsa suma amigonak jikjjatsna?

¹⁶ Ébed-mélec chachajj suma amigopänwa, kunattejj Jehová Diosaruw iyawsäna ukat atinisirakïna. Jan ajjsartʼirïtapata ukat kuntï amtkän uk phoqatapatwa Jeremiasarojj jiwañat qhespiyäna. Baruc chachajja jan khitin sataw Jeremías profetampejj irnaqäna ukat Jehová Diosan profecía arunakap yatiyañsa yanaparakïnwa. Jichhürunakanjja ukhamarakiw tamasankir jilat kullakanakajj suma amigonakasarakïspa, yanaptʼarakistaspa kunjamtï Jeremiasar yanaptʼapkäna ukhama. Pä tunka marani Cameron sat mä precursor regular kullakajja, Kara sat yaqha precursor regular kullakan yanaptʼatapat walpun yuspäräna. Jupajj akham siwa: “Kara sat kullakajj suma sarnaqäwipampi ukat suma arunakapampiw Jehová Diosar jakäwijan nayrar uchañatak yanaptʼawayitu” sasa. Jayans qamkchïnjja amigapajj kunjamäskisa uk yatiñatakisa ukat jupanak pura chʼamañchtʼasiñatakisa, Kara sat kullakajj telefonotwa jawsirïna jan ukajj qellqatanak toqew parltʼasipjjerïna. Cameron sat kullakajj akham siwa: “Familiajajj kunjamäskis uk amigajajj sum yatïna. Kunjamsa kullakajajj Diosan markap jaytawayasin jitheqtawayjje ukat wali llakit jikjjataskayäta uksa sum yatirakïna. Ukhaman jikjjataskayät ukhajj janipuniw jaytkitänti. Jan yanaptʼkitaspäna, chuymachtʼkitaspäna ukhajja nayat kunakïkasapäna. Yanaptʼapajj wali askipunïnwa” sasa.

¹⁷ Diosan markapanjja, taqe kasta amigonakwa jikjjatsna. Uka jilat kullakanakasajja, jiwasjamarakiw Diosar iyawsapjje, kamachinakaparjam sarnaqapjje, Diosar munasipjje ukat jiwasjam suytʼäwinïpjjarakiwa. Jiwasjamarakiw yantʼanakan uñjasipjji. Jupanakampiw yatiyir sarsna ukat jan waltʼäwinakan jikjjatasksna ukhas chuymachtʼistaspawa jan ukajj jiwasas chuymachtʼaraksnawa. Jehová Diosar taqe chuym yupaychatasatjja, kusisipjjaniwa ukat wiñayaw suma amigopjjarakiñäni (Pro. 17:17; 18:24; 27:9).

18. ¿Amigonak ajlliñ toqetjja, kunsa Jeremiasat yateqsna?

¹⁸ Kuna kast amigonaktï Jeremiasajj ajllkäna ukjja qhanwa amuytanjja. Biblian yatichäwinakaparjam jan sarnaqapki uka kast amigonak ajllsna ukat Diosan arunakaparjam sarnaqañ munaraksna ukhajja, jan waltʼañaruw pursna, uk janipun armasipjjañäniti. Jeremías tiemponsa ukat jichha tiemponsa, Biblian ewjjtʼanakaparjam sarnaqañajj wali askipuniwa. Jeremiasajja, tiempopan jakapkäna uka jaqenakjamäñjja janipuniw munkänti, kunattejj Jehová Diosan yanaptʼapampiw profetjam sum phoqañ munäna. ¿Jiwasajj janit ukhamäñ munkaraksna? Jupajja, Diosar yupaychapkäna ukat profetjam phoqañatak yanaptʼapkäna ukanakaruw amigopjam ajllisïna. Jehová Diosar jan jitheqtas yupaychirinakajja Jeremiasat yateqasisaw wali amuyumpi amigonakap ajllisipjjañapa (Pro. 13:20; 22:17).