‘Jehová Diosasti amtäwinakapjja phoqewa’

 1. ¿Jerusalén markajj tʼunjatäkäna ukhajj kunsa Jeremiasajj Diosan profecianakapat säna?

JERUSALÉN markajj tʼunjatawa. Babilonionakan soldadonakapaw ninampi nakhantayapjjäna, jeqʼesa (jewqʼesa) alajjpachkamaw makatäna. Jan waltʼäwin jikjjatasipkäna ukanakan arnaqasitanakapasa, Jeremías profetan jiñchupanjja istʼasiskakïnwa. Kunjamsa jikjjatasipjjañapäna uk janïräkipanwa Jeremiasajj yatïna, ukat ukajj Diosan arsutaparjamaw phoqasïna. Wali llaktʼataw akham säna: “[Jehová] Tatitusti amtäwinakampejja phoqhewa” sasa. ¡Wali llakkañapunïnwa! (Lamentaciones 2:17 liytʼasiñapawa.)

 2. ¿Nayra maranakan arsuskäna uka profecianakatjja kawkïrsa Jeremiasajj phoqasir uñjäna?

² Kuna profecianaktï Diosajj markapar churkatayna ukan phoqasitapwa Jeremías profetajj uñjäna, ukanakat yaqhepajj walja maranak nayraw qhanañchasitayna. Amtañäni, Diosar istʼasajj kunjamansa jikjjatasipjjañapäna ukat bendición katoqapjjaspati janicha uk Moisés profetajj sumwa walja maranak nayrajj qhanañchatayna. Jehová Diosajj markaparojj walja bendicionanakwa churañ munäna, ukampis janitï istʼapkaspänjja jan waltʼäwinakanwa jikjjatasipjjaspäna. Khitinakatï Diosar jan istʼapkani ukat Jupa contra saytʼasipkani ukanakajja “pachpa yoqalla, ukhamaraki imilla wawanakapwa manqʼa[ntasipjjani]” sasaw Moisesajj yatiyäna ukat qhepatsti Jeremiasajj uka pachpa arunakwa sarakïna (Deu. 30:19, 20; Jer. 19:9; Lev. 26:29). “¿Ukham jan walinak luraspati?” sasaw yaqhepajj jisktʼasipjje. Ukatsti babilonionakajj tʼunjañatak muyuntapkäna ukhajja manqʼañajj qʼalaw pistʼjjäna, ukhamanwa jikjjatasipjjäna. “Suma munasiri taykanakasti, pachpa amparanakapampiw wawanakapjja phayasipjje, [...] markajjan tʼunjatätapa uñjasinjja” sasaw Jeremiasajj qhanañchäna (Lam. 4:10). ¡Kunja jan walinak jikjjatasipkäna!

 3. ¿Kunatakis Diosajj markapar profetanak khitäna?

³ Kunjamtï yatktanjja, Diosajj janiw Jeremiasarus ni yaqha profetanakarus markan jan waltʼäwinakap yatiyañapatak khitkänti. Jan ukasti jupanakajj juchanakapat arrepentisisa askinak lurapjjañapwa Diosajj munäna. Esdras chachajj akham sänwa: “Nayra awkinakapan Tatit Diosapasti, niya ukkhat niya ukkhatwa ewjja arunaka apayanïna khitanakap toqe, Tatitojj markapatsa, jakkäna uka lugaratsa khuyapayasitap layku” sasa (2 Cró. 36:15; Jeremías 26:3, 12, 13 liytʼasiñapawa).

 4. ¿Kunjamsa Jeremiasajj profecianak yatiykasajj jikjjatasïna?

⁴ Ukhamarus, Jeremiasajj Jehová Diosjamaw markapat wal khuyaptʼayasïna, ukjja Jerusalén markajj janïr tʼunjatäkän ukhajj kuntï arsuwaykäna uka arunakapatwa amuyasi. Jerusalén markan tʼunjäwipajj niyaw jakʼachasisinkäna, ukaw juparojj walpun llakisiyäna, ukampis istʼasipjjaspäna ukhajj janiw tʼunjatapkaspänti. Kunjamsa Diosan arunakap yatiykasajj jikjjatasïna uk amuytʼañäni. Jupajj akham sänwa: “¡Usutuw ukat qʼewinaqtta! ¡Chuymajjas walpun putukiraki! ¡Janiw inaktʼirjamäkti, janirakiw amuktʼirjamäktsa! Mä trompetan phustʼasitapwa istʼta, guerran arnaqasiñanakampi kuna” sasa (Jer. 4:19). Uka jan waltʼäwin jakʼachasinitapatjja, janipuniw amuktʼañjamäkpachänti.

 5. ¿Kunatsa Jeremiasajj jan pächasisa yatiyäna?

⁵ ¿Kuna profecianaktï qhanañchkäna ukajj phoqasipuniniw sasin kunatsa Jeremiasajj sispachäna? (Jer. 1:17; 7:30; 9:22.) Jeremiasajj Diosar iyawsiri, Qollan Qellqatanak yatjjatir chachänwa ukat kuna profecianaktï Jehová Diosajj arski ukan phoqasitapsa sum yatirakïna. Ukat profecianakan phoqasitapaw Diosajj uka profecianak arsuñatak chʼamänitap uñachtʼayi, janis jaqetakejj phoqasirjamäkchi ukhasa. Ukanakat mayajja, Egipto markat israelitanakar tʼaqhesïwit qhespiykäna ukawa. Jeremiasajj Éxodo libron qellqatäki ukjja sum uñtʼäna ukat Josué chachan arunakapsa yatirakïnwa, jupajj akham sasaw israelitanakar satayna: “Muntwa jumanakan amtasiñanakama taqe chuymanakamampi, ukhamaraki taqe jakañanakamampiraki. Diosasti taqe suma arunakapwa jumanakampi phoqhe, kunjämtï jupajj arsüna ukhama. Janiw kuna arunakapas jan phoqhasisajj pasawaykiti” sasa (Jos. 23:14).

6, 7. 1) ¿Kunatsa Jeremiasan profecianakapat yatjjatañasäspa? 2) ¿Kuna yatiyäwti yatiyktan ukar jukʼampi atinisiñasatakejj kunas yanaptʼistaspa?

⁶ Jeremiasan profecianakaparojja, ¿kunatsa jiwasajj istʼañasaraki? Nayraqatjja, kuntï Jehová Diosajj siskäna uka arunakaparuw profetajj atinisïna. Ukatsti, Diosajj profecianak Jeremías toqe arskäna ukan phoqasiskatapjja, jichhürunakanwa uñjasiski, yaqhepasti jutïrin phoqasirakini. Ukjjarusti, taqe chʼamampi profetjama irnaqatapasa ukat Diosan sutipjjar walja yatiyäwinak yatiyatapaw suma serviriparjam uñtʼayäna. Yatjjattʼat mä jaqejja akham sasaw säna: “Taqe profetanakatjja, Jeremiasajj wali uñtʼatawa” sasa. Kunapachatï, Diosajj markapamp sum apasipkäna ukat yanaptʼañ munkäna ukhajja, Jeremiasajj wali uñtʼatänwa, ukatwa Jesucristor parlir istʼasajj Jeremiasäpachawa sasin yaqhepajj sapjjäna (Mat. 16:13, 14).

⁷ Jichhürunjja, Biblian parlki uka profecianakan phoqasiskatapwa uñjaskaraktanjja, ukatwa kuntï Diosajj arski ukajj phoqasipuniniw sasin Jeremiasjam atinisiñasajja (2 Ped. 3:9-14). ¿Kunjamatsa? Diosan Arupan qellqatäki uka profecianakar sapürutjam atinisisa. Uka amtampiwa aka yatichäwejj wakichasi, Jeremiasan profecianakapajj kunjamsa jupan urunakapan phoqasïna, ukat qhepat kunjamas phoqasiwayi, jichhürunakan kunjamsa phoqasiski ukat jutïrinsa kunjamsa phoqasirakini ukanakwa yatjjatañäni. Ukhamasti ukham yatjjatkasajj Jehová Diosan profecía arunakaparu ukat ‘amtäwinakap phoqapuniniwa’ sasin jukʼamp atinisiñamwa munapjjta (Lam. 2:17).

8, 9. ¿Kunatsa Biblia sapakiw cheqap parli sasin sissna?

⁸ Jutïrin kunjamänisa ukanakjja walja jaqenakaw yatjjatañ munapjje: qollqe toqet yatjjattʼatanakasa, politiconakasa, kunatï jutïrin paskani ukat tiempo toqet yatjjatirinakasa... Mä qhawqha urutsa jan ukajj semanatsa kunjamänisa ukanak cheqtʼañajj janis añcha chʼamäkchejja, ukanak arsuñajj chʼamäspawa. Ukampis ukanakatjja Bibliajj mayjawa, kunatejj profecianakapajj phoqasipuniwa (Isa. 41:26; 42:9). Jeremiasan taqe profecianakapajja, jutïrinsa jan ukajj qhepatsa phoqasiskchinejja, cheqapuniwa. Yaqhep profecianakajj jaqenakata ukat markanakatwa arsusiwayi. Uka profetan urunakapan kunanakas phoqasïna ukanak mä qhawqha jichhajj uñjañäni.

⁹ ¿Kunas mä marat jan ukajj pä marat pasani ukanak khitis jichhürunakan cheqtʼaspa? Amuytʼañataki, ¿khiti yatjjattʼatas jutïrin kunjamänisa akapach apnaqerinakan apnaqäwipajj uk cheqtʼaspa? Ukampis Babiloniajj jachʼa markaruw tukuni sasinjj Diosan amuytʼayataw Jeremiasajj qhanañchatayna. ‘Qori copjamañapänwa’ uka taypiw Jehová Diosajj Judá markaru, yaqha jachʼa ukat jiskʼa markanakar colerapampis warjjatkaspa ukham tukjañapäna, ukat jupanakasti Babilonia markan serviriparuw tukupjjañapäna (Jer. 51:7). Jeremiasasa mitanakapas uka jan waltʼäwjja uñjapjjarakïnwa (Jeremías 25:15-29; 27:3-6; 46:13 uñjjattʼarakismawa).

10. ¿Judionakan pusi reyinakapatjja kunsa Jehová Diosajj arsüna?

¹⁰ Judionakan pusi reyinakaparojj kunas pasani ukjja Jeremías profeta toqew Jehová Diosajj qhanañcharakïna. Josías reyin mayni wawapajja Joacaz (Jehoacaz) Salum sutinïnwa, jupajj esclavor uñtataw jaya markar apat uñjasini ukat janipuniw Judá markaparojj kutʼjjaniti sasaw qhanañchasïna (Jer. 22:11, 12). Ukajj ukhampuniw phoqasïna (2 Rey. 23:31-34). Joacaz reyejj apnaqkäna uka qhepatjja Joacim (Jehoiaquim) reyirakiw apnaqjjärakïna, juparusti “mä asnorjamaw imantapjjani” sasaw sasirakïna (Jer. 22:18, 19; 36:30). Kunjamsa jiwäna ukat cuerpopampejj kunas kamachasïna ukjja Bibliajj janis qhanañchkchejja, jupajj jaya markar apat uñjasïna ukhajj Joaquín yoqapaw jupa lanti apnaqjjäna sasaw qhanañchi. Joaquinajj (Conías ukat Jeconías sutinakampiw jupar uñtʼasiraki) Babilonia markar apataw uñjasini ukat ukanwa jiwani sasaw Jeremías profetajj arsüna (Jer. 22:24-27; 24:1). Ukajj ukhampuniw phoqasirakïna. ¿Kunjamansa Sedequías qhepa apnaqer reyejj jikjjatasiñapäna? Jehová Diosajj enemigonakaparuw katuyani ukat jupanakajj janiw khuyaptʼayasipkaniti sasaw Jeremiasajj säna (Jer. 21:1-10). Ukhamaw phoqasïna, enemigonakapajj presorjamaw katuntapjjäna, wawanakaparus jupan uñjkataw jiwayapjjäna, juparusti nayrapwa apsupjjäna ukat Babilonia markar apataw uñjasïna, ukanwa jiwjjäna (Jer. 52:8-11). Taqe uka profecianakajja arsutarjamaw phoqasïna.

11. ¿Khitïnsa Hananiasajja, ukat kunsa jupat Diosajj säna?

¹¹ Sedequías reyejj apnaqkani ukhajj Babilonia markaw Jerusalén mark katuntasini sasin Jehová Diosajj Jeremías toqejj qhanañchkäna ukajj janiw cheqäkiti sasaw Hananías kʼari profetajj säna, ukaw Jeremías 28 jaljan qhanañchasi. Diosan arunakap jan istʼasajja, Judá markarusa ukat yaqha markanakarusa janiw esclavot Nabucodonosor reyejj apkaniti, mä arunjja, janiw phoqaskaniti sasaw säna. Jehová Diosan amuytʼayatajja, Hananías chachan kʼarisitapwa Jeremiasajj qhanstayäna, ukat yaqha markanakajj Babilonia markaruw esclavor uñtat servipjjani sasaw wasitat säna, ukatsti kʼari profetajj uka pachpa maraw jiwani sasaw yatiyarakïna. Ukajj ukhampuniw phoqasïna (Jeremías 28:10-17 liytʼasiñapawa).

12. Jeremiasan mitanakapat waljanejj ¿kunjamsa profecía arunakap katoqapjjäna?

¹² Kunjamsa Jerusalenajj tʼunjatäñapäna uka toqetpunwa Jeremiasajj yatiyirïna. Judionakajj yaqha diosanakar yupaychapjjatapatsa, jan cheqapar uñjapjjatapatsa ukat yaqhanakar tʼaqhesiyapjjatapatsa jan arrepentisipjjatap uñachtʼayapkani ukhajja, markapajj tʼunjataw uñjasini sasaw Jeremiasajj kutin kutin yatiyäna (Jer. 4:1; 16:18; 19:3-5, 15). Waljanejja, Diosajj janiw ukham lurkaspati sasaw amuyapjjäna. Jupan templopajj ukanwa jikjjatasïna. Ukhamasti, ¿kunjamarak uka qollan marka tʼunjaspänsti? Jehová Diosajj janiw kʼariskänti. Jupajj kuntï arskäna ukjja phoqapunïnwa (Jer. 52:12-14).

13. 1) ¿Jeremiasan tiempopampi ukat jichhürunakampejj kunansa niya kipkakejja? 2) ¿Kuntï Diosajj Jeremiasan mitanakapar siskäna uka arunakajj kunatsa jiwasatakejj wali aski?

¹³ Jichhürunakanjja, ukhamanarakwa Diosan markapajj Jeremías tiempopan jakir jaqenakjam jikjjatasipjje. Kunjamtï yatktanjja khitinakatï ewjja arunakapar jan istʼapki ukanakarojj niyaw Jehová Diosajj tʼunjani. Ukampisa, uka profecía arunakapajj jiwasarojj wal chuymachtʼistu, kunjamtï nayra judionakat mä qhawqhanejj Diosat jan jitheqtapkänjja ukhamarakiwa. Amtañäni, recabitanakajj Diosat jan jitheqtapjjatapata ukat nayra awkinakapar istʼapjjatapatjja, Jerusalenajj tʼunjatäkani ukhajj qhespipjjaniwa sasaw Diosajj satayna. Ukajj phoqasïnwa. Qhepatjja, Recab chachan Malquías yoqapatwa parlasi, jupajja Jerusalén marka wasitat lurasiñapatakiw yanaptʼäna, uka uta lurasiñapatakejj Nehemías chachaw pʼeqtʼaskäna, ukhamatwa uka arunakan cheqätap yattanjja (Neh. 3:14; Jer. 35:18, 19). Ébed-mélec chachajj Diosar atinisitapatsa ukat profetar yanaptʼatapatsa Jehová Diosajj qhespiyämawa sasaw jupar satayna (Jer. 38:11-13; 39:15-18). Ukatsti “jakayaskarakïmawa” sasinwa Baruc chacharojj sarakitayna, jupasti Jeremiasan yanapiripänwa (Jer. 45:1, 5). ¿Taqe uka profecianakan phoqasitapatjja kunsa amuysna? Jan jitheqtas yupaychañäni ukhajja, ¿kunsa Diosajj jiwasatak lurani? (2 Pedro 2:9 liytʼasiñapawa.)

14. Babilonia markjjat profeciajj qellqaskäna ukajj ¿kunatsa janiw cheqäkiti sañjamäna?

¹⁴ Nabucodonosor reyejj janiw Judá markak katuntkaniti, jan ukasti Egipto markamp katuntani sasaw Jehová Diosajj säna (Jer. 25:17-19). Ukajj janiw cheqaw sañjamäkänti, kunattejj Egipto markajj wali chʼamanïnwa, Judá markamppacharuw apnaqäna (2 Rey. 23:29-35). Jerusalenajj tʼunjatäkäna uka qhepatjja, jiltʼapkäna uka judionakajj oraqep jaytasaw Egipto markar sarjjapjjäna ukhamat jan walin jan uñjasiñataki. Ukham lurasajja janiw Diosan munañap phoqapkänti, kunattejj janiw yaqha cheqar sarapjjätati ukat Judá markar qheparapjjätajj bendicionanak churapjjäma sasaw Jehová Diosajj satayna. Jupanakatï Egiptor sarapjjasapänjja jan waltʼäwin jikjjatasipjjaspäna ukat ukanwa jiwapjjarakispäna (Jer. 42:10-16; 44:30). Babilonionakajj Egiptor katuntapkäna uk Jeremiasajj uñjänti janicha ukjja janiw qellqatapan qhanañchkiti, ukampis kuntï Diosajj siskäna uka profeciajj phoqasipunïnwa, nayrïr phesqa patak mara qalltanjja kawkïr israelitanakatï Egiptor jaltapkäna ukanakajj uka markamp chikaw babilonionakamp tʼunjat uñjasipjjäna (Jer. 43:8-13).

15, 16. ¿Diosajj markapan qhespiñapat arskatayna ukajj kunjams phoqasïna?

¹⁵ Kawkïr markatï Egipto markar katuntañapäkäna uksa Jeremiasajj qhanañchänwa, ukajj Babilonia markänwa. Ukat Babilonia markajj akatjamat katuntatäniwa sasinjja niya patak maranak nayraw arsurakitayna. ¿Kunjamsa? Uka markar umajj jarktʼkäna ukajj ‘wañtʼañapänwa’ ukat soldadonakapas janiw nuwasipjjañapäkänti (Jer. 50:38; 51:30). Kunapachatï medonakampi persanakampi Éufrates jawir um maysar irpanukupkäna, ukhaw uka profecian phoqasitapajj sum uñjasïna, umas utjaskchïnjja ukhampachaw jupanakajj mayskatar makatapjjäna ukat akatjamatwa babilonionakar katuntapjjäna. Ukatsti, uka markajj wasar chʼusa pamparuw tukuñapäna (Jer. 50:39; 51:26). Uka nayra jachʼa munañani Babilonia markatjj kunjamtï Diosan profeciapajj siskän ukhampunwa phoqasiwayi, ukwa jichhürunakan uñjtanjja.

¹⁶ Judionakajj paqallqo tunka maranakaw babilonionakar servipjjani sasaw Jehová Diosajj Jeremías toqejj satayna, qhepatsti markaparuw kuttʼjjapjjani sasinwa sarakitayna (Jeremías 25:8-11 ukat 29:10 liytʼasiñapawa). Uka profeciarojj Daniel chachajj atinisïnwa ukat uka toqerakiw qhawqha tiempos ‘Jerusalén markajj tʼunjatäni’ uk jaksutayna (Dan. 9:2). Esdras chachajj akham sänwa: “Ukhamarak Tatitun arupajj Jeremías profeta toqe parlatäkäna uka phoqhasiñapataki, ukkhawa Tatitojj Ciro sat reyiru chʼamañchäna” sasa. Jupaw Babilonia marka katuntañapäna, ukhamat Judionakajj markapar kuttʼapjjañapataki (Esd. 1:1-4). Ukatsti Jeremiasan arsutaparjamaw markapar kuttʼir judionakajj sumankañat kusisit arnaqasipjjäna ukat Diosarus sumarakwa yupaychjjapjjäna (Jer. 30:8-10; 31:3, 11, 12; 32:37).

17. Ramá cheqan ‘jachañanakaw’ utjani sasin Jeremiasajj qhanañchkatayna ukajj kunjamsa pä kuti phoqasiwayi uk qhanañchtʼma.

¹⁷ Walja maranak qhepat phoqasiñapäkäna uksa Jeremiasajj qellqarakitaynawa. Akham sänwa: “Tatitojj siwa: ‘Ramá cheqan mä aruw istʼasi, mayniw jan chuyma uttʼayasisa [jan ukajj wali chuyma ustʼata] jachaski. Raquelaw wawanakapat jachaski, janirakiw chuymachatäñ munkiti wawanakapajj jiwaratäjjatap layku[’]” sasa (Jer. 31:15). Amuyatajja, 607 maran Jerusalén markajj tʼunjatäkäna uka qhepatjja, Judionakajj Ramá oraqer apataw uñjasipjjäna, ukajj Jerusalenat alayar niya kimsaqallqo kilometronak sarañankänwa. Inas ukan jiwayat yaqhepajj uñjasipjjchïna. Ukhaw uka profeciajj phoqasiñ qalltpachäna, Raquelas ‘wawanakap’ chhaqayasis jachkaspa ukhama. Niya sojjta patak maranak qhepatsti, Herodes reyejj Belén markankir taqe wawanakar jiwarayañatakiw mä kamach apsüna. Kuntï Jeremiasajj ukham jiwayapjjatapat wali jachañanakat arskatayna, uka arunakwa Mateo libro qellqerejj qhanañchatayna (Mat. 2:16-18).

18. ¿Kunjamsa Edom markat profeciajj phoqasiwayi?

¹⁸ Kawkïr markanaktï Babiloniajj katuntkani uka markanak taypinkarakiniw Edom markajja sasaw Jeremiasajj nayra patak maranakan qhanañchatayna, uka profeciajj ukhamaw phoqasïna (Jer. 25:15-17, 21; 27:1-7). Ukat Diosajj janiw ukak arskänti. Edom markajj Sodoma ukat Gomorra markanakjamaw tukuñapäna. Uka markajj wiñay chʼusa wasar oraqeruw tukuñapäna, sutipas chhaqtañapänwa (Jer. 49:7-10, 17, 18). Ukarjamaw phoqasïna. Jichhürunakanjja, ¿Edom sutejj aytatati? ¿Mapanakan uka suti jikjjattanti? Janiwa. Edom ukat edomitanaka siski uka sutinakjja, nayra sarnaqäwinakat parlir libronakana, Bibliat apstʼat sarnaqäwinakana jan ukajj uka tiempot parlir mapanakanwa uka sutejj uñsti. Edomitanakajj 190 nayrïr pacha maranakanwa judionakan yupaychäwipar mantapjjañapatak wiytat uñjasipjjäna; ukat 70 jichha pacha maran Jerusalenajj tʼunjatäkäna ukhajja, janiw markjamajj utjjänti sasaw Flavio Josefo sat chachajj qhanañcharaki.

19. Diosajj profecianak phoqañatak chʼamanïtapjja, ¿kunsa Jeremías librojj qhanañchi?

¹⁹ Kunjamtï uñjaniwaytanjja, Jeremías librojj jaljat jaljaruw kunjamsa profecianakajj mä jaqeta jan ukajj mä markat parlasin phoqasiwayi uk qhanañchi. Ukanakat waljaw phoqasiwayi. Uk yatiñajj jiwaspach yatjjatañasataki ukat ukarjam sarnaqañatakiw yanaptʼistu, kunattejj alajjpacha Awkisat ak yatichistu: kuntï Jehová Diosajj amtkäna ukjja phoqänwa ukat kuntï jutïritak amtki uks phoqarakiniwa (Isaías 46:9-11 liytʼasiñapawa). Kuntï yatjjataniwayktan ukajja, Biblian profecía arunakapar jukʼamp atinisiñatakiw yanaptʼistu. Cheqansa Jeremiasan yaqhep profecianakapajj jiwasan urunakasanwa phoqasi ukat jutïrins phoqasirakiniwa. Aka tukuyanwa ukanakat mä qhawqha uñjañäni.

20-22. ¿Kunatsa Biblian parlki uka profecianakasa ukhamarak Jeremiasan arsutanakapas walja phoqasïwiniwa sasin sistanjja? Uk mä uñachtʼäwimpi qhanañchtʼma.

²⁰ Diosan Arupan utjki uka profecianakajja janiw may kutik phoqaskiti. Sañäni, ‘kuttʼankäta ukat akapachan tukusiñap’ yatiñatakejj kawkïrïnisa señalajja sasin arkirinakapajj Jesusar jisktʼapkäna ukhajj jupajj kamsänsa uka toqet amuytʼañäni (Mat. 24:3). Uka profeciajj 66 ukat 70 maranakansa phoqaskchïnjja, uka arunakajj ‘jachʼa tʼaqhesïwi’ urunakans phoqasirakiniwa, ukajj aka jan wali tiemponkirinakatakïniwa, uka urunakjamjja “janiw jichhürkamajj khitis uñjkiti aka oraqe luraski ukürutpacha, ni uka pasatats utjkarakiniti” (Mat. 24:21). Jeremiasan profecianakapajja kipka phoqasïwiniwa. Yaqhepajja 607 maranwa phoqasiñ qalltäna ukat yaqhepasti walja tiempo qhepatwa phoqasïna, kunjamtï ‘Raquelajj wawanakapat jachañapäkäna’ uka profeciyjama (Jer. 31:15). Cheqansa, kawkïr profecianakatï utjki ukanakat waljajja, jichha tiempotakiwa ukat sapa maynitakiw wali wakiskirïnejja.

²¹ Ukaw Apocalipsis libron amuyasi. Apóstol Juanajj Diosan amuytʼayataw kuntï Jeremiasajj 539 maran Babiloniajj tʼunjatäñapäkäna uka toqet parlarakitayna. Ukajj Apocalipsis libronwa jikjjatasi, kunjamsa nayrajj phoqasïna ukat kunjamas jutïrin phoqasirakini ukwa amuytʼayistu. Jeremiasan profecianakapat phoqaski ukanakat mayajj Babilonia markänwa, ukhamarakiw “Jachʼa Babilonia”, mä arunjja, oraqpachankir kʼari yupaychäwinakajj tʼunjatäni (Apo. 14:8; 17:1, 2, 5; Jer. 50:2; 51:8). Diosan markapasti jupanak taypit ‘mistjjapjjañapawa’ ukhamat jupanakamp chik jan tʼunjatäñataki (Apo. 18:2, 4; Jer. 51:6). Uka markan umapajj ‘wañtʼjjañapänwa’, mä arunjja, yanapirinakapajj chhaqtjjañapänwa (Jer. 51:36; Apo. 16:12).

²² Kʼari yupaychäwirojja Diosajj phoqsusiniwa markapar tʼaqhesiyatapata, ukajj jichhürunakan niyaw phoqasiñampïski, ukhaw ‘¡kunjama lurañatejj jupanakaru wakiski, ukhamarjamaw lurarakini!’ (Jer. 50:29; 51:9; Apo. 18:6.) Ukat kawkhantï kʼari yupaychäwejj utjki uka cheqanakanjja chʼusa pamparus tukkaspa ukhama, janiw khiti yupaychiris utjjjaniti (Jer. 50:39, 40).

23. Jeremiasan profeciaparjamajja, ¿kunas Diosar yupaychañ toqet 1900 maranakan phoqasiwayi?

²³ Jeremiasan profecianakapajj kusiskañ arunakanirakiwa, ukwa akhakam amuytanjja. Uka profetajja, cheqpach yupaychäwejj wasitatwa uttʼayasini sasaw jichhüru urunakatakejj qhanañchäna. Nayra tiempojja Babilonia markatwa judionakarojj Diosajj qhespiyäna ukhamarakwa jichhürunakan markaparojj alajjpachan Apnaqäwip uttʼayasajj Jachʼa Babiloniat qhespiyi. Diosar yupaychañ toqet parlkasajja, markapajj Jupamp sum apasipjjañapatakiw Jehová Diosajj qʼoma yupaychäwi uttʼayi, ukatwa jupanakajj wali yuspärata ukat kusisita jikjjatasipjje. Ukhat aksarojja, Diosar yupaychapjjañapataki yaqha jaqenakar yanaptʼañatak chʼamachasipjjatapatsa ukat Bibliat sum yatjjatapjjañapatakisa Diosaw yanaptʼawayaraki (Jeremías 30:18, 19 liytʼasiñapawa). Kunjamtï uñjktanjja, markapar uñjañapatak tama uñjirinaka uttʼayañ arskäna uksa jichhürunakan Jehová Diosajj phoqaskakiwa, jupanakajj yatjjattʼatäpjjewa ukhamatwa markapar sum uñjapjje ukat jan walinakatsa jarkʼaqapjjaraki (Jer. 3:15; 23:3, 4).

24. ¿Jeremiasan kuna arunakapasa phoqasiñapäski?

²⁴ Diosatakjam sarnaqapki ukanakatakejj suma suytʼäw arunakwa churäna ukat jan istʼasipki ukanakatakisti tʼunjäwi arunakwa Jeremiasajj Diosan nayra markapatak qhanañchäna. Jichhürunakanjja ukhamarakiwa. Aka arunakar istʼañajj jiwasatak wali askirakiwa: “Khitinakarutejj [Jehová] Tatitojj uka urojj jiwaraykani ukanakasti aka oraqenjja mä thiyat mä thiyakamaw liwirtapjjani. Janirakiw khitis jupanakatjja jachkaniti, janirakiw uka jiwatanakjja khitis apthapkaniti imañatakejja; wanjama waranukutaw oraqenkasipkani” (Jer. 25:33).

25. ¿Kunsa Diosan markapajj jichhürunakan lurañapa?

²⁵ Jichhürunakajj Jeremiasan urunakapanjam jan wali urunakanwa jaktanjja. Ukhamarakiw Diosan arunakapar istʼaniti janicha ukarjamaw jakapjjanis jan ukajj jiwapjjanisa. Diosan yupaychirinakapjamajja, janiw profetäktanti, ni Biblian qellqatäki uka arunakar mä qhawqha arunakamp yapjjatañatakis Diosan amuytʼayatäktänti. Ukampisa, Apnaqäwijat suma yatiyäwinak sapüru yatiyir sarapjjam sasaw Diosajj sistu, ukajj akapachan tukusiñapkamaw lurasiñapa (Mat. 28:19, 20). Janipuniw kunjamatsa Diosan ‘arunakap lunthatañ’ munktanti, mä arunjja jan imtʼasaw kunatï jutïrin paskani uk yatiyañasa (Jeremías 23:30 liytʼasiñapawa). Biblian chʼamañchtʼkir suma arunakapjja kunjamäkiti ukhamwa qhanañchañasa. Jeremías toqe Diosajj profecianak churkäna ukanakatjja waljaw phoqasiwayjje, ukatwa janïr phoqaski uka profecianakar atinisiñasajj wali aski. Jehová Diosajj kuntï ‘amtki ukat nayratpach arski’ ukjja, arsutaparjamapuniw phoqani sasaw jaqenakar yatiyañasa (Lam. 2:17).

26. ¿Kuna profeciampitsa yatjjataskañäni?

²⁶ Jeremías libron jikjjataski uka profecía arunaka ukat luräwinakapat yatjjatkasasa, kuntï Jehová Diosajj “machaqa arustʼäwi” markapatak arsuwayki uka toqet jan yatjjatksna ukhajja janiw phoqatäkaspati, uka leyinakjja chuymanakaparuw qellqantañapäna (Jer. 31:31-33). Uka profeciata ukat phoqasitapatsa jutïr yatichäwinwa yatjjataskañäni, uka toqet yatjjatañajja jiwasatakejj wali askiwa.