‘Wasitat jakapjjarakïta’

1-3. ¿Kun istʼasas Babiloniar apat judionakajj wal llakisipjjäna? (Aka yatichäwi qalltan utjki uk dibujo uñjjattʼäta).

TAQE kunas mä akatjamatwa judionakatak mayjtʼäna. Babiloniar apatäpkäna uka judionakarojja, Ezequielajj mä phesqa maranakaw Jerusalenajj tukjatäniwa sasin yatiyjjäna. Ukjja demostracionanakampi, ejemplonakampi, ewjjtʼanakampiw yatiyäna, ukampis jupanakajj janiw istʼapkänti. Jehová Diosajj janiw Jerusalén tukjasiñap permitkaniti sasaw amuyapjjäna, kunjamsa babilonionakajj Jerusalenar qʼal muyuntapjjäna uk istʼasas jaqenakajj salvasipjjaniwa sasaw creyisipkakïna.

² Jerusalenajj pä maraw qʼala muyuntatäjjäna, ukhaw Jerusalenat escapaniri mä jaqejj Babiloniar purïna, ukatjja ‘¡markajj katuntatäjjewa!’ sasaw judionakar yatiyäna. Uk istʼasajja, jupanakajj qʼala aynachtʼatäpjjänwa. Judionakatakejja templosa, markapasa, oraqenakapasa wali munatänwa, ukatwa kunatï Jerusalenan pasaskäna uk creyiñajj jupanakatak chʼamakïna. Kunanaktï suyapkäna ukanakajj inamayakëjjänwa (Ezeq. 21:7; 33:21).

³ Judionakajj wali llakitäpkäna ukhajja, Ezequielajj wali chʼamañchtʼkir mä visión uñjäna. ¿Kunjamsa uka visionajj wali llakita judionakar chuymachtʼäna? ¿Kunjamsa jichhürunakan phoqasiraki? ¿Kunjamsa sapa maynir yanaptʼarakistaspa? Uka jisktʼanakar qhanañchañatakejja, kuntï Jehová Diosajj visionan Ezequielar uñachtʼaykäna uk nayraqat yatjjatañäni.

 4. ¿Uñjkäna uka visionan kunanakas Ezequielar wal piensayäna?

⁴ Ezequiel 37:1-10 liytʼañataki. Visionanjja Ezequielajj mä valle pampan qontʼatäskänwa, uka vallejj chʼakhanakamp phoqantatänwa. Kuntï uñjkäna ukajj chuymapar purtʼañapatakejja, Diosajj ‘chʼakhanak taypinwa’ sarnaqayäna, uka vallen sarnaqasajja qhawqha chʼakhanakas utjäna, kunjamäpjjänsa ukanakwa uñjäna. Ukanakajj wal Ezequielar piensayäna, ukatwa akham säna: ‘Valle pampan waljpun chʼakhanak uñjayäta, ukanakasti qʼala wañsutänwa’ sasa.

 5. ¿Kuna pä profecianak arsuñapsa Jehová Diosajj Ezequielar mayïna? ¿Ezequielajj uka pä profecianak arsjjäna ukhajj kunas pasäna?

⁵ Ukatsti jukʼat jukʼat phoqasiri pä profecianak arsuñapwa Jehová Diosajj Ezequielar mayïna: maya, uka chʼakhanakaruw mä profecía arsuñapäna, akham sañapänwa: ‘Wasitat jakapjjarakïta’ sasa (Ezeq. 37:4-6). Ezequielajj uk arsüna uka qhepatjja, ‘mä ruidow istʼasïna, wali chholloqeriw istʼasïna, chʼakhanakasti chʼakha puraw jikthaptañ qalltapjjäna’, ukatjja, ‘uka chʼakhanak patjjar ankunakampi jañchimpi uñstatapwa’ Ezequielajj uñjäna, ukanakajj ‘jañchi lipʼichimp imtʼatäpjjarakïnwa’ (Ezeq. 37:7, 8). Paya, thayaruw mä profecía arsuñaparakïna, akham sañapänwa: ‘Aka jiwayata jaqenak patjjar thaytʼanim’ sasa. Uka profecía arsjjäna ukhasti, ‘samanaw jupanakar phoqtʼäna, jupanakasti jakañ qalltapjjäna, saytʼasipjjarakïnwa, wali jachʼa ejercitopunïnwa’ (Ezeq. 37:9, 10).

 6. ¿Ezequielajj uñjkäna uka visionajj khitinakatsa parlaskäna uk kunjamsa Jehová Diosajj qhanañchäna?

⁶ Ukjjarusti, uka visionajj kamsañsa muni ukwa Jehová Diosajj Ezequielar akham sasin qhanañchäna: ‘Aka chʼakhanakajj taqe israelitanakawa’ sasa. Jerusalenan tukjatäjjatap yatisajja, Babiloniankapkäna uka judionakajj jiwatäpkaspas ukham amuyasipjjäna. Ukatwa jachtʼasis akham sapjjäna: ‘Chʼakhanakajajj wañsutawa, suytʼäwinakajas tukusjjarakiwa. Nanakajj qʼala tukjatäpjjtwa’ sasa (Ezeq. 37:11; Jer. 34:20). Jupanakar chuymachtʼañatakejja, uka visión toqejj Israel markatak mä suma suytʼäwi utjatapwa Jehová Diosajj qhanañchäna.

 7. Ezequiel 37:12-14 texton arunakapajj ¿kunar confiyapjjañapatakis judionakar yanaptʼäna? ¿Kunjamsa uka arunak istʼasajj Babiloniankir judionakajj jikjjatasipjjäna?

⁷ Ezequiel 37:12-14 liytʼañataki. Uka visionampejja, ‘mayampiw jaktayapjjäma, Israel oraqeruw apjjapjjäma, ukanwa jakjjapjjarakïta’ sasaw Jehová Diosajj Babiloniankapkäna uka judionakar säna. Jupanakarojj ‘nayan markaja’ sasaw mayamp sarakïna. ¡Uka arunak istʼañajj judionakar wal chʼamañchtʼpachäna! ¿Kunatsa uka arunakajj cheqpachapuniw phoqasini sasin confiyapjjaspäna? Diosaw uka promesa arsüna, jupajj akham sänwa: ‘Naya Jehová Diosan uk arsutaja ukhamarak uk lurataja yatipjjäta’ sasa.

 8. 1) ¿Kunatsa ‘taqe israelitanakajj’ jiwatäpkaspänsa ukhamäna? 2) Ezequiel 37:9 texton arunakaparjamajja, ¿kunatsa israelitanakajj jiwatäpkaspas ukhamäna? (Qhanañchäwi uñjjattʼäta).

⁸ ¿Kunjamsa chʼakhanakat parlkäna uka visionajj Israel markjjar phoqasïna? 740 antes de Cristo (a.C.) maranjja, tunka tribunakajj tukjata, yaqha markar apata ukhamaw uñjasipjjäna, ukhaw Israel markajj jiwkaspas ukhamäna. Mä 130 maranak pasjjäna ukhasti, Judá markaw yaqha markar apat uñjasirakïna, ukhamatwa ‘taqe israelitanakajj’ yaqha markar apat uñjasipjjäna (Ezeq. 37:11). Ukhamasti Ezequielajj mä visionan chʼakhanak uñjkäna ukar uñtataw yaqha markar apatäpkäna ukanakajj jiwatäpkaspas ukhamäna.a Visionanjja, Ezequielajj janiw aleq chʼakhanakak uñjkänti, jan ukasti uka chʼakhanakajj ‘qʼala wañsutänwa’, ¿kunsa ukajj uñachtʼayäna? Yaqha markar apatanakajj walja tiempow jiwatäpkaspas ukhamäpjjañapäna. Israel markampi Judá markampejj qhawqha maranakas yaqha markar apat uñjasipjjäna uk jakthapsna ukhajja (740 a.C. marat 537 a.C. marakama), pä patakats jukʼamp maranaka yaqha markan jakapjjatapwa amuysna (Jer. 50:33).

 9. ¿Nayra Israel markampi ‘Diosan Israelapampejj’ kuna pachpa jan walinsa uñjasipjjäna?

⁹ Dios saparuki Israelan adorasiñapataki parlki uka profecianakasa Ezequielan profecianakapasa, qhepatwa jukʼamp phoqasirakïna (Hech. 3:21). Israel markajj walja tiempow ‘jiwayatäkaspas’ ukham uñjasïna. ‘Diosan Israelapajja’, mä arun ajllit cristianonakajja ukhamarakiw walja tiempo jiwayatäpkaspas ukhamäna (Gál. 6:16). Ajllit cristianonakajja, walja tiempow Jachʼa Babiloniampi apnaqat uñjasipjjäna, ukatwa ‘qʼala wañsuta’ chʼakhanakäpkaspas ukhamäpjjäna (Ezeq. 37:2). Kunjamtï pasïr yatichäwin yatjjataniwayktanjja, ajllit cristianonakajj 100 después de Cristo maranakat qalltasaw Jachʼa Babiloniampi apnaqat uñjasipjjäna. Jesusajj trigompit jan wali qorampit parlkäna uka uñachtʼäwiparjamajja, walja patak maranakaw falso religionamp apnaqat uñjasipjjañapäna (Mat. 13:24-30).

10. 1) Ezequiel 37:7, 8 textonjja ¿kuna profecía arunakas Diosan markapat qellqatajja? 2) Kuntï Diosajj arskäna ukar mayamp confiyjjapjjañapatakejj ¿kunanakas Babiloniar apatäpkäna uka judionakarojj yanaptʼäna?

¹⁰ Nayra tiemponjja, markajajj jukʼat jukʼatwa jaktani sasaw Jehová Diosajj säna (Ezeq. 37:7, 8). Diosajj kuntï Israel markapar kuttʼapjjañapat arskäna uka promesar mayamp confiyapjjañapatakejja, walja razonaw Babiloniankir judionakatak utjäna. ¿Ukanakajj kawkïrinakänsa? Kunanaktï nayra profetanakajj arsupkäna ukanakaw jupanakar yanaptʼpachäna. Sañäni, Isaiasajj ‘mä santo jathaw’ Israel markar kuttʼani sasaw mä profecian arsüna (Is. 6:13; Job 14:7-9). Maysa toqetjja, kuntï Ezequielajj markapar kuttʼañat walja profecianak qellqkäna ukaw jupanakar yanaptʼpachäna, Babiloniankir Daniel profetasa Diosar taqe chuyma servir chachanakasa, jupanakar wal yanaptʼarakpachäna. Kunjamsa 539 a.C. maran Babiloniajj tukjata uñjasïna uk uñjañas yanaptʼarakpachänwa.

11, 12. 1) ¿Kunjamatsa ‘Diosan Israelapajj’ jukʼat jukʼat jachʼa Babiloniat mistjjäna? (“Diosarukiw jukʼat jukʼat mayamp adorasjje” sat recuadro uñjjattʼäta). 2) ¿Ezequiel 37:10 texto liytʼasajj kunsa jisktʼassna?

¹¹ ‘Diosan Israelapajja’, mä arun ajllit cristianonakajja ukhamarakiw jukʼat jukʼat Jachʼa Babiloniat mistusipkäna. ¿Kunjamas ukajj pasäna? Jachʼa Babiloniampi katuntatäpkäna ukhat walja patak maranak qhepatjja, ‘mä ruidow istʼasïna, wali chholloqeriw istʼasirakïna’, Diosar taqe chuyma servirinakaw Dios toqet saytʼasisipkäna. Sañäni, 1500 maranakanjja William Tyndale chachaw inglés arur Biblia tradusïna. Iglesia católica pʼeqtʼirinakajja, jaqenakan uka Biblia liyipjjañap janiw munapkänti, Tyndale chacharus jiwayapjjarakïnwa. Ukhamäkchïnsa, jan ajjsartʼiri yaqha chachanakajj yaqha arunakar Biblia tradusisipkakïnwa, ukhamatwa walja jaqenakajj pachpa arupat Diosan Arup liytʼapjjäna.

¹² Ukatjja Charles Russell jilatampi yanapirinakapampiw Biblian cheqa yatichäwinakap qhanstayañatak chʼamachasipjjäna, ukajj chʼakhanakjjarojj ‘ankunakampi jañchimpis’ uñstkaspa ukhamänwa. Zionʼs Watch Tower (La Torre del Vigía de Sion) revistasa yaqha qellqatanakasa, Diosan cheqa yatichäwinakap yatjjatañatakiw waljanir yanaptʼäna, ukham yatjjatapjjatapaw Diosan ajllit cristianonakar mayachtʼasipjjañapatak yanaptʼawayi. “Foto-Drama de la Creación” sat película utjatapatsa, The Finished Mystery (El misterio terminado) sat libro utjatapatsa, ajllit cristianonakajj 1900 mara qalltanakan jukʼamp mayachtʼatäpjjänwa. Mä qhawqha tiempotjja, Diosajj markapar jaktayas ‘saytʼayañ’ amtkäna uka horasaw purinïna (Ezeq. 37:10). ¿Kunapachasa ukat kunjamsa ukajj pasäna? Kunanakatï Babilonia markan paskäna ukaw uka jisktʼar qhanañchañatak yanaptʼistani.

13. 1) Khä 537 a.C. marat qalltasajja, ¿kunjamsa Ezequiel 37:10, 14 textojj phoqasiñ qalltawayi? 2) Israel markar kuttʼapkäna uka taypinjja tunka tribunkir jaqenakaw utjäna, ¿kawkïr textonakas ukhamätap uñachtʼayi?

¹³ Khä 537 a.C. mara qalltanakanjja, Babiloniar apat judionakajj Ezequielan visionap phoqasirwa uñjapjjäna. ¿Kunatsa ukham sistanjja? Jehová Diosaw Babiloniat salvasajj judionakar jaktayäna, saytʼayarakïna, ukhamatwa jupanakajj Israel oraqepar kuttʼjjapjjäna. 42.360 israelitanakampi 7.000 jan israelitäpkäna ukanakampiw Babiloniat mistjjapjjäna, ukhamat Jerusalén markampi templompi askichañataki, Israel oraqensa mayamp jakjjañataki (Esd. 1:1-4; 2:64, 65; Ezeq. 37:14). Ukatsti 70 maranak qhepatjja, mä 1.750 yaqha markar apatanakaw Esdrasamp chik Jerusalenar kuttʼapjjarakïna (Esd. 8:1-20). Taqpachanejj 44.000 jila judionakaw kuttʼapjjäna. ¡‘Wali jachʼa ejercitöpjjänwa’! (Ezeq. 37:10). Ukatjja Diosan Aruparjamajj Israel markar kuttʼapkäna uka judionak taypinjja tunka tribunkir jaqenakaw utjarakïna. Jupanakan nayra awkinakaparojj asirionakaw 740 a.C. maran markapar apasjjapjjäna, ukampis jichha kutinjja templo askichañan yanaptʼañatakiw kuttʼapjjäna (1 Crón. 9:3; Esd. 6:17; Jer. 33:7; Ezeq. 36:10).

14. 1) Kunjamtï Ezequiel 37:24 texton qhanañchaskejja, ¿kunapachas uka profeciajj jukʼamp phoqasiñapäna? 2) ¿Kunas 1919 maran pasäna? (“‘Qʼala wañsuta chʼakhanakampi’ ‘pä testigonakampi’: ¿kunansa niya pachpakïpjje?” sat recuadro uñjjattʼäta).

¹⁴ Ezequielajj arskäna uka profeciajja ¿kunjamsa jukʼamp phoqasirakïna? Uka toqet parlkasajja Jehová Diosajj Ezequiel taypiw yaqha profecía arsurakïna, ukarjamajja Davidjamäki uka Jesucristojj reyit apnaqañ qalltañapäkäna uka qhepatwa phoqasiñapäna (Ezeq. 37:24).b Ukajj ukhamapuniw pasäna, ¿kunatsa ukham sistanjja? Jehová Diosajj 1919 maranwa markaparojj espíritu santop churäna. Ukhamatwa jupanakajj ‘wasitat jakapjjäna’, Jachʼa Babiloniatsa mistjjapjjarakïna (Is. 66:8). Qhepatsti, Jehová Diosajj ‘oraqepanwa’ markapar jakayjjäna, mä arunjja paraisor uñtat mä oraqenwa Diosarojj sirvjjapjjäna. ¿Kunjamatsa jichhürunakan Jehová Diosan markapajj mä ‘ejercitor’ tukuwayaraki?

15, 16. 1) ¿Kunjamatsa Diosan markapajj ‘wali jachʼa ejercitor’ tukuwayi? 2) ¿Jan walinakar saykatañatakejj kunjamsa Ezequielan profeciapajj yanaptʼistaspa? (“Jehová Diosaw yanaptʼistu” sat recuadro uñjjattʼäta).

¹⁵ Cristojj 1919 maran suma phoqeri amuyasir esclavor uttʼaykäna uka qhepatjja, kuntï Zacariasajj profecian arskäna uk phoqasirwa Diosan servirinakapajj uñjapjjäna. Zacarías profetajj judionakamp chikaw Israelar kuttʼäna. Jupajj akham sänwa: ‘Ejercitonakan Jehová Diosapar thaqerejja, walja markanakampi wali chʼamani markanakampiw jutapjjani’ sasa. Jehová Diosar thaqapjjañapäkäna ukanakajja, ‘markanakankir kunayman arunak parliri 10 chachanakawa’ sasaw Zacariasajj qhanañchäna. Uka chachanakajj ‘mä judío jaqen isipata’, mä arunjja Diosan Israelapatwa katuntasipjjañapäna, akham sapjjañaparakïnwa: ‘Jumanakampiw nanakajj sarañ munapjjta, kuna laykutejj Diosajj jumanakampïskatapwa nanakajj istʼapjjta’ sasa (Zac. 8:20-23).

¹⁶ Jichhürunakanjja, Diosan Israelapampi (aka oraqenkasipki uka ajllit cristianonakampi) ‘10 chachanakampejja’ (yaqha ovejanakampejja), ‘wali jachʼa ejercitor’ uñtatäpjjewa, uka taypinjja walja millón jaqenakaw utji (Ezeq. 37:10). Uka ejercitojj jiljjattaskakiwa. Criston soldadopjamajj Jesús Reyisar istʼasapuniw sarnaqtanjja, ukhamat jutïrin bendicionanak katoqañataki (Sal. 37:29; Ezeq. 37:24; Filip. 2:25; 1 Tes. 4:16, 17).

17. ¿Kunsa jutïr yatichäwin yatjjataskañäni?

¹⁷ Dios saparuk mayamp sum adorasiñapatakejja, walja lurañanakaw utji. ¿Kunanak lurañas wakisi? Uka jisktʼar qhanañchañatakejja, Jerusalenajj janïr tukjatäkäna ukhajj kun lurañapsa Jehová Diosajj Ezequielar mayïna ukwa yatjjatañasa. Jutïr yatichäwinwa uka toqet yatjjataskañäni.