Diosan yatiñapwa uñachtʼayi

1-3. Jesusajj Qollun Yatichañ janïr qalltkäna ukhajj ¿kunanakas pasäna, ukat kunatsa jaqenakajj wal musparapjjäna?

31 MARANJJA, Jesusajj Capernaúm marka jakʼankaskänwa, walja jaqenakani uka markajj Galilea qota thiyankänwa. Uka arumajja, Jesusajj paqaraw mä qollun sapak orasïna, qhepürusti discipulonakapar tantachthapisajj 12 apostolonakaparuw ajllïna. Ukañkamasti, jupar arkapkäna uka walja jaqenakajj qollu jakʼanwa mä suma lugaran suyasipkäna. Jupanakajj wali jayat jutasajj Jesusan arunakap wal istʼañ munapjjäna, usutanakas qollatäñwa munapjjarakïna. Jesusasti, janiw uka jaqenakarojj decepcionkänti (Lucas 6:12-19).

² Jesusajj jaqenakar jakʼachasisajj taqe usutanakaruw qolläna, qollañ tukuyasasti yatichañatakiw qontʼasirakïna.a Kunanaktï uka suma urun siskäna uk istʼasajja jaqenakajj walpun musparapjjäna, kuna laykutejj ukhakamajj janiw khitis jupjamajj yatichkänti. Jupajj janiw wali uñtʼat yatichirinakjamajj aru mayak parlkänti, jan ukasti Hebreo Arut Qellqatanakampiw yatichäna. Ukatjja fácil amuykañ arunakampiw jaqenakar parläna, ukhamat wali qhan amuyapjjañapataki. Kunapachatï Jesusajj parlañ tukuyjjäna ukhajja, jupar istʼapkäna ukanakajj walpun musparapjjäna. Cheqas ukhapuniw wali yatiñani mä jaqer parlir istʼapjjäna (Mateo 7:28, 29).

³ Kuntï Jesusajj qollun yatichkäna ukasa, kunanaktï lurkäna ukanakas Biblian qellqatawa. Jehová Diosan amuytʼayatäsajj kunanakatï Jesusat qellqasiwayki ukanak yatjjatañajj walpun yanaptʼistaspa, kuna laykutejj “taqe suma yatiñasa uñtʼañasa jupan suma imantatawa” (Colosenses 2:3). Yatiñan mä jaqejj kuntï yatki ukarjamaw sum amuytʼasin jan walinak askichi. Ukampis ¿kunjamatsa Jesusajj wali yatiñanïnjja? ¿Kunjamsa wali yatiñanïtap uñachtʼayäna, ukat kunsa jiwasajj jupat yateqassna?

 4. Nazaret markankir jaqenakajj ¿kunsa Jesusat jisktʼasipjjäna, ukat kunatsa ukham jisktʼasipjjäna?

⁴ Mä kutejja, kawkïr markantï jilskäna uka Nazaret markaruw Jesusajj predikir saräna, ukar purisajj sinagoganwa yaticharakïna. Ukankapkäna uka jaqenakat jilapartejj wal musparapjjäna, “¿kunjamats aka jaqejj wali yatiñanïpacha?” sasaw jisktʼasipjjarakïna. Kuna laykutejja jupanakajj awk taykaparusa jilanakaparus sum uñtʼapjjäna, familiapan jan walja utjirinïpjjataps yatipjjarakïnwa (Mateo 13:54-56; Marcos 6:1-3). Ukhamarus akwa yatipjjarakïna: uka yatiñani carpinterojj janiw wali uñtʼat jachʼa yateqañ utanakan yatichatäkänti, janirakiw judionakan wali aytat yatichirinakapamp yatichatäkänsa (Juan 7:15). Ukhamajj razonaniw ukham jisktʼasipjjpachäna.

 5. ¿Kunjamatsa wali yatiñanïna uka toqet Jesusajj kamsänsa?

⁵ Kuntï Jesusajj amuykäna ukajj perfectönwa, ukampis janiw uka laykukejj wali yatiñanïkänti. Kunjamatsa wali yatiñanïna ukjja, jaqenakar templon yatichkäna ukhaw qhanañchäna, jupajj akham sänwa: “Kuntï nayajj yatichkta ukajja, janiw nayankkiti, jan ukasti khititejj nayar khitankitu ukankiwa” sasa (Juan 7:16). Ukhamasti Awkipaw Jesusar yatiñ churäna, jupaw aka oraqerojj khitanirakïna (Juan 12:49). ¿Kunjamatsa Jehová Diosajj Jesusar yatiñ churpachäna?

6, 7. ¿Kunjam toqenakatsa Jesusajj Awkipat yatiñ katoqäna?

⁶ Jehová Diosan espíritu santopaw Jesusarojj taqe kunan yanaptʼäna. Mesiasat parlkasajja, Isaiasajj akham sasaw mä profecía arsüna: “Jehová Diosan espiritupaw jupjjankani, ukatwa jupajj yatiñanïni, wali suma amuytʼasirïni, suma ewjjtʼanak churani, chʼamanïni, taqe kun uñtʼani, Jehová Diosarus ajjsararakini” sasa (Isaías 11:2). Ukhamajj Jehová Diosan espiritupajj Jesusjjankänwa, uka espirituw suma amtanakar puriñatakisa sum sarnaqañatakis Jesusar yanaptʼäna. Ukatwa Jesusajj arsutapansa luratanakapans Diosan yatiñap sum uñachtʼayäna.

⁷ Jesusajj Awkipamp alajjpachan walja waranqa maranak jakasaw yatiñanïñ yateqarakïna. Kunjamtï capítulo 2 ukan yateqaniwayktanjja, Jesusajj janïr aka oraqer jutkasaw Awkipajj kunanaksa amuyi, kunjamas jikjjatasi, kunanakas kusisiyi ukanak sum yateqäna. Maysa toqetjja, Jehová Diosajj taqe kun lurkäna ukhajj “suma yatjjattʼat mä trabajirjamaw” Jesusajj Awkipatak trabajïna, ukhamajj ukhaw Awkipan yatiñapat jukʼampinak yateqarakpachäna. Ukatwa Bibliajj jupaw yatiñajja sasin Jesusat qhanañchi (Proverbios 8:22-31; Colosenses 1:15, 16). Kunapachatï Jesusajj jaqenakar Jehová Diosan arunakap yatichkäna ukhajja, kuntï Awkipat alajjpachan yateqkäna ukanakwa yaticharakïna (Juan 8:26, 28, 38).b Ukhamajj kunjamatsa Jesusajj wali yatiñanïna uk jichhaw sum amuytanjja, ukatwa kunanaktï jupajj aka oraqen arskäna lurkarakïna ukanakajj wali musparkañajja.

 8. ¿Kunjamsa cheqpach cristianonakajj Jesusjam yatiñanirakïsna?

⁸ Jesusan arkirinakapjamajja, ukhamarakiw yatiñ katoqañatakejj Jehová Diosar jakʼachasiñasa (Proverbios 2:6). Cheqas Diosan yatiñap janiw mä milagro toqejj katoqksnati. Ukampis kunapachatï yatiñap mayktan ukhajja, Jehová Diosajj wakisitarjamaw yatiñap churistu, ukhamat jan walinakan kunsa lursna uk sum amuyañasataki (Santiago 1:5). Ukhamarus kuntï mayktan uk jikjjatañatakejja, “imantat wali valorani” yänakarjamaw thaqañasa (Proverbios 2:1-6). Ukhamajj Jehová Diosan Arupat yatjjataskakiñasawa, kuntï yateqktan ukarjamarakiw sarnaqañasa, kuna laykutejj Arupanakwa cheqpach yatiñajj utji. Ukatakejj kunanaksa Jehová Diosan Yoqapajj arsüna, kunanaksa lurarakïna ukanakat yatjjatañaw yanaptʼistaspa. Jichhajj kunjamanakatsa Jesusajj yatiñanïtap uñachtʼayäna, kunjamsa jupat yateqassna ukanakatwa yatjjataskañäni.

 9. ¿Kunatsa Jesusan yatichäwinakapajj wali yatiñanïtap uñachtʼayäna?

⁹ Jesusan ukarojj walja jaqenakaw sarapjjerïna, ukhamat arunakap istʼañataki (Marcos 6:31-34; Lucas 5:1-3). Jupjam yatiñamp parlir jaqejj janiw utjkänti, ukatwa jaqenakajj jupar istʼasajj wal musparapjjerïna. Kunanaktï Jesusajj yatichkäna taqe ukanakanjja, Jehová Diosan Arup sum uñtʼatapa ukat jaqenakar sum uñtʼatapwa qhanstayäna. Ukhamarus yatichatapajj taqe cheqan jakirinakaru ukat taqe tiempon jakirinakaruw yanaptʼawayi. Jichhajj Jesusan yatiñani arunakapat amuytʼaskakiñäni, jupajj “Yatiñani Ewjjtʼiri” sasin uñtʼatarakiwa (Isaías 9:6).

10. ¿Jesusajj kunjam jaqëñasatakis chʼamañchtʼistu, ukat kunatsa ukham chʼamañchtʼistu?

¹⁰ Aka capítulo qalltanjja, Jesusan Qollun Yatichatapatwa parlaniwaytanjja. Kunanaktï jupajj ukan yatichkäna ukanakajja, Biblian walja versiculonakar qellqatawa, jupan arunakapakiw uka versiculonakan qellqatarakejja. Jesusajj janiw kunjamsa parlañasa kunjamsa sarnaqañasa ukak yatichkänti, jan ukasti kunjamsa yatiñamp parlsna ukat kunjamsa yatiñamp taqe kuns lursna ukanakwa yaticharakïna. Amuytʼañataki, kunanakas amuyusansa chuymasans utji ukanakajja, luratanakasana ukat arsutasanwa qhan amuyasi, ukatwa Jesusajj ‘llampʼu chuymanïpjjam, kunatï cheqapäki uk lurapjjam, khuyapayasirïpjjam, sumankañ thaqerïpjjam, jaqe masimarus munasipjjam’ sasin taqenir chʼamañchtʼistu (Mateo 5:5-9, 43-48). Chuymasantï ukanakajj utjani ukhajja, sum parlasasa sum sarnaqasas Jehová Diosaruw kusisiyañäni, yaqhanakampis wali sumaw apasirakiñäni (Mateo 5:16).

11. Jucha lurañar jan purtʼasiñasatakejja, ¿kunanakat amuyasiñasatakis Jesusajj ewjjtʼawayistu?

¹¹ Jesusajj juchanak janiw lurapjjañamäkiti sasakejj janiw siskänti, jan ukasti kunjamsa amuyusasa chuymasas jan walinak lurañar purtʼasiyistaspa ukanakatwa parlarakïna. Sañäni, kunatsa mayninakarojj jan walinak jan lurañasäki uka toqet parlkasajja, janiw chuymanakaman colerasiñ imjjasipjjañamäkiti sasaw yatichäna (Mateo 5:21, 22; 1 Juan 3:15). Kunatsa adulterio jucha jan lurañasäki uka toqet parlkasasti, kuna jan wali amtanakatï chuymasan utjkaspa ukanakat amuyasiñasataki, kuna uñchʼukiñanakatï qʼañu jucha lurañanakar apkistaspa ukanakat amuyasiñasatakiw ewjjtʼawayistu (Mateo 5:27-30). Ukhamasti, kunanakas juchanak lurañar purtʼasiyistaspa, jan wali amtanakajj kawkjatsa qallti, kunjam chuymanïñas jan wali lurañanakar apistaspa ukanakat amuyasiñasatakiw Jesusajj yatiñamp ewjjtʼawayistu (Salmo 7:14).

12. ¿Kunjamsa cheqpach cristianonakajj Jesusan ewjjtʼanakap uñjtanjja, ukat kunatsa ukham uñjtanjja?

¹² ¡Jesusan arunakapajj wali yatiñamp arsutänwa! Ukatwa “jaqenakajj wal musparapjjäna, ukham wali sum yatichatap layku” (Mateo 7:28). Arkirinakapatakejja, suma ewjjtʼanakapajj wali suma yanaptʼapuniwa. Jupajj khuyapayasirïñasataki, llampʼu chuymanïñasataki ukat munasirïñasatakiw ewjjtʼawayistu. Ukatwa ukham chuymanïñatak chʼamachastanjja, kuna laykutejj ukhamatakwa Diosarojj kusisiysna. Maysa toqetjja, colerañanak apanukuñataki ukat jan wali qʼañu amuyunak pʼeqesat apsuñatakiw ewjjtʼawayistu. Jiwasatï taqe ukanak apanukuñatak chʼamachasiñäni ukhajja, kunanaktï Jehová Diosajj uñiski ukanak janiw lurkañäniti (Santiago 1:14, 15).

13, 14. Kunsa jakañ vidapamp lurani uk amtkasajja, ¿kunjamsa Jesusajj yatiñanïtap uñachtʼayäna?

¹³ Jesusajj janiw arsutapanak wali yatiñanïtap uñachtʼaykänti, jan ukasti luratanakapans yatiñanïtapwa uñachtʼayarakïna. Kunjamsa sarnaqäna, kunanaksa amtäna, kunjamsa jupa pachpajj uñjasïna, kunjamsa yaqhanakarojj uñjäna taqe ukanakanjja, wali yatiñanïtapwa uñachtʼayäna. Cheqansa, jupajj ‘yatiñampi ukat sum amuytʼasisaw’ taqe kuns lurirïna (Proverbios 3:21). Jichhajj uka toqenakatwa mä qhawqha ejemplonak uñjaskañäni.

¹⁴ Yatiñani jaqejj amuyumpiw kuns luri. Jesusajj kunsa jakañ vidapampejj lurani uka toqet suma amtanakaruw purïna, ukhamatwa yatiñanïtap uñachtʼayäna. Jupajj wali suma utwa lurasispäna, negocionak lurasas walja qollqenïspänwa, ukhamarus wali uñtʼat jaqeruw aka mundon tukurakispäna. Ukampis janiw ukanak thaqañar uchaskänti, kuna laykutejj ukanak jikjjatañajj inamayakiwa, “thayar katthapiñampi sasirakiwa” (Eclesiastés 4:4; 5:10). Jesusatï ukanak jikjjatañatak chʼamachasispäna ukhajja, jan amuytʼasirïtapwa uñachtʼayaspäna. Ukampis jupajj kunatï jakañatakejj wakiski ukanikïnwa, janiw walja qollqsa ni walja yänaks thaqkänti (Mateo 8:20). Antisas kuntï yatichkäna ukarjamajja, Jehová Diosan voluntadap lurañatakiw chʼamachasïna (Mateo 6:22). Jupajj Diosan Reinopwa nayraqat thaqäna, ukatwa tiempopsa chʼamapsa jan ina chʼusar aptʼaskänti. Cheqansa, ukham lurañaw yänak thaqañat sipans jukʼamp importantejja, ukaw cheqpach kusisiñsa churasiraki (Mateo 6:19-21). Jesusajj wali yateqaskañapuniwa.

15. ¿Kunjamatsa cheqpach cristianonakajj Diosan Reinop nayrar uchtanjja, ukat kunatsa ukham lurañajj wali wakiskirejja?

¹⁵ Jesusan arkirinakapajj Diosan Reinop thaqañatakiw wal chʼamachastanjja, ukhamatwa yatiñanïtas uñachtʼaytanjja. Jiwasajj janiw amanut manur mantktanti, janirakiw akapachan munañap thaqasajj tiempsa chʼamsa ina chʼusar aptʼasktanti (1 Timoteo 6:9, 10). Walja jilat kullakanakajja, jukʼamp horanak predicañatakisa precursorat serviñatakis kunatï jakañatakejj wakiski ukanakampik jakasiñwa amtawayapjje. Ukham lurañajj wali wakiskiriwa, kuna laykutejj Jehová Diosan Reinop nayrar uchasakiw cheqpach kusisitäsna (Mateo 6:33).

16, 17. 1) ¿Kunjamanakatsa Jesusajj altʼat chuymanïtap uñachtʼayäna? 2) ¿Kunjamsa jiwasajj jupjam chuymanïtas uñachtʼayaraksna?

¹⁶ Bibliarjamajja, yatiñan mä jaqejj taqe kun lurañajj jupatak facilakïkaspas ukham janiw amuyaskiti (Proverbios 11:2). Jesusajj altʼat chuymanïnwa (modestia), yaqhep luräwinak jan phoqañ pueditaps amuyasirakïnwa. Cheqas khitinakatï arup istʼapkäna ukanakarojj janiw taqenirupunejj arkiripar tukuyañ puedkänti (Mateo 10:32-39). Janirakiw taqe cheqar purisajj Diosan arunakap yatiyañ puedkänti, ukatwa arkirinakaparojj jaqenakar discipulonakapar tukuyapjjañapatak encargawayäna (Mateo 28:18-20). Jupajj llampʼu chuymampiw arkirinakajajj ‘jukʼamp jachʼa luräwinak’ lurapjjani sasin säna, kuna laykutejj jupanakaw jaya lugaranakar purisajj jukʼamp jaqenakar yatichapjjañapäna, walja tiempow uka luräwimp phoqapjjañaparakïna (Juan 14:12). Maysa toqetjja, Jesusajj yaqhanakan yanaptʼap taqe chuymaw katoqasïna. Wasaransa Getsemaní cheqansa taqe chuymaw angelanakan yanaptʼap katoqasirakïna. Ukat kunapachatï sinti jan walin uñjaskäna ukhajja, Jesusajj Jehová Dios Awkiparuw yanaptʼa mayisin artʼasïna (Mateo 4:11; Lucas 22:43; Hebreos 5:7).

¹⁷ Jiwasajj Jesusjam altʼat chuymanïñasarakiwa, kuna laykutejj janiw taqe kun lurañatakejj chʼamanïktanti. Predicañatakisa jaqenakar Jesusan arkiripar tukuyañatakis qhawqtï puedktan ukarjamaw wal chʼamachastanjja (Lucas 13:24; Colosenses 3:23). Ukampis akwa amtañasa: qhawqsa lurasktan uk yatiñatakejj janiw Jehová Diosajj mayninakamp igualaykistuti, ni jiwasas mayninakamp igualasiñasäkiti (Gálatas 6:4). Ukhamajj qhawqha chʼamay utjchistu ukat kunanakjjay lurirjamästan ukarjamaw amuytʼasiñasa, yatiñampiw kun lurañs ajlliñasaraki. Maysa toqetjja, congregacionan lurañanakamp phoqapki uka jilatanakajj mayninakan yanaptʼap katoqasisaw yatiñanïpjjatap uñachtʼayapjjaraki. Jupanakatï altʼat chuymanïpjjani ukhajja, Jehová Diosajj kunjamsa servirinakap toqejj jupanakar yanaptʼaski ukwa uñjapjjani (Colosenses 4:11).

18, 19. 1) ¿Kunjamsa Jesusajj amuytʼirïtapsa khuyaptʼayasirïtaps uñachtʼayäna? 2) ¿Kunatsa mayninakar sum uñjañatakejj Jesusat yateqasiñasa, ukat kunjamsa uk lursna?

¹⁸ “Alajjpachat jutki uka yatiña katoqer jaqejja [...] amuytʼiriwa” sasaw Santiago 3:17 textojj qhanañchi. Jesusajj wali amuytʼirïtapwa uñachtʼayäna, khuyapayasiñampiw discipulonakaparojj uñjarakïna. Jupajj kunanaktï discipulonakapajj jan wal lurapkäna uk thaqañat sipansa, kunja suma chuymanïpjjänsa uk uñjañatakiw chʼamachasïna (Juan 1:47). Amuytʼañataki, kunapachatï katuntat uñjaskäna ukhajja, apostolonakapajj sapakwa Jesusar jaytapjjäna, ukampis jupajj janiw jupanakat payachaskänti (Mateo 26:31-35; Lucas 22:28-30). Ukhamarus kunapachatï Pedrojj kimsa kuti jupar jan uñtʼir tuküna ukhajja, Jesusajj jupar confiyatap uñachtʼayaskakïnwa, “nayajj walpun Diosar jumatak ruwtʼarapsma” sasaw sarakïna (Lucas 22:31-34). Ukat aka oraqenkkasajj qhep qhepa arumajj Awkipar oraskäna ukhajja, janiw discipulonakapan pantjasitanakapat parlkänti. Jan ukasti, kuna sumanaksa ukhakamajj lurapjjäna uka toqetwa parläna, “jupanakasti arunakam phoqapjjewa” sasaw Diosar säna (Juan 17:6). Ukatjja Diosan Reinopat yatiyapjjañapataki, jaqenakar discipulor tukuyapjjañapatakiw apostolonakapar encargawayäna (Mateo 28:19, 20). Jesusajj taqe chuymaw discipulonakapar confiyäna, ukatwa jupanakajj mayitanakap jankʼak phoqapjjäna.

¹⁹ Jesusan arkirinakapjamajja, jupat yateqasisajj sumwa mayninakarojj uñjañasa. Aka toqet amuytʼañäni: Jesusajj Diosan Yoqapjamajj perfectökchïnsa, pantjasiri discipulonakaparojj wali pacienciampiw uñjäna. Ukampis jiwasajj janiw perfectöctanti, sapa kutiw pantjastanjja, ukhamajj ¿janit mayninakar pacienciamp uñjañasäkarakispa? (Filipenses 4:5). Jilat kullakanakasan pantjasitanakap thaqañat sipansa, kunanaks sum lurañ yatipjje kunja suma chuymanïpjjesa uk thaqañatakiw chʼamachasiñasa. Kuna laykutejj Jehová Diosaw jupanakarojj markapankapjjañapatak ajlliwayi (Juan 6:44). Cheqansa, Jehová Diosajj kunjamtï jupanakar uñjki ukham uñjañatakiw chʼamachasiñasa. Jiwasatï kuna sumanaksa mayninakajj lurapjje uk thaqañäni ukhajja, taqe chuymaw pantjasitanakap perdonañäni, jupanakar felicittʼañatakis walja razonanakaw utjarakistani (Proverbios 19:11). Ukat jilat kullakanakasar confiyatas uñachtʼaytan ukhajja, Jehová Diosar kusisit servipjjañapatakiw jupanakar chʼamañchtʼtanjja (1 Tesalonicenses 5:11).      

20. ¿Kunsa Evangelionakan utjki uka suma yatichäwinakampejj lurañasa, ukat kunatsa?

²⁰ Jesusan sarnaqäwipata ukat kunjamsa jupajj aka oraqen Diosan arunakap yatiyäna uka toqet parlir Evangelionakanjja, wali yatiñamp arsut suma yatichäwinakaw utji. ¿Kunsa taqe ukanakampejj lurañasa? Jesusajj Qollun Yatichkäna ukhajja, arunakaj istʼapjjañamawa sasakejj janiw siskänti, jan ukasti ukarjamaw sarnaqapjjañama sasaw ukankirinakar chʼamañchtʼäna (Mateo 7:24-27). Jesusajj aka oraqenkkäna ukhajja, wali yatiñampiw kuns arsüna ukat kuns lurarakïna. Ukhamajj jiwasatï jupat yateqasiñatak chʼamachasiñäni, kuntï yatichkäna ukarjam sarnaqarakiñäni ukhajj wali sumaw jakasiñäni, wiñay jakañar apir thakits janirakiw mistkañäniti (Mateo 7:13, 14). Cheqas ¡uk lurañaw taqe kunat sipans jukʼamp sumajja!