Jesusajj mä jachʼa thayaruw tʼakurayäna

Jesusajj jurnal yatichasajj wali qaritäpachänwa. Jaypʼuntjjäna ukhasti akham sasaw discipulonakapar säna: “Qota khurkatar makatañäni” sasa, mä arunjja Capernaúm markat khurkataruw sarañ munapjjäna (Marcos 4:35).

Galilea Qotat inti jalsu toqenjja Gerasenonakan lugarapänwa. Uka cheqajj Decápolis sasin uñtʼatarakïnwa. Decápolis cheqan utjki uka markanakan walja judionakas jakapkchïnjja, jila partejj griegonakaw uka markanakan jakapjjäna.

Jesusajj Capernaúm markat khurkatar saräna ukhajja, waljaniw uñjapjjäna. Ukatwa yaqha botenakajj Jesusar arkapjjarakïna (Marcos 4:36). Khurkatar puriñkamajj janiw añcha jayäkänti, Galilea Qotankki uka umajj janiw jayu kʼaräkänti, ukhamarus uka qotajj largorojj 21 kilometronakänwa, anchorusti 12 kilometronakaraki. Ukhamäkchïnsa uka qotajj wali manqhänwa.

Jesusajj perfectökchïnsa, jurnal yatichatapat wali qaritänwa. Ukatwa boter sarjjatasajj bote qhepäjjan mä chʼijmañjjar iktʼjjäna.

Walja apostolonakaw bote apnaqañ sum yatipjjäna, ukampis jupanakatakejj khurkatar sarañajj chʼamakïnwa. Galilea Qotajj qollunak taypinkiwa, qotankir umas mä jukʼa llaphiwa. Kunapachatï qollunakat thayajj thaytʼani ukhajja, llaphi umampi chikthapisajj jachʼa oladanakwa sartayi. Ukhamaw uka urojj mä jachʼa thayajj sartanïna, oladanakas chhaqtayirjamaw boter wal jawqʼsüna, “umajj walipuniw boter phoqaranttäna, botejj qotaruw niy chhaqaranttaskäna” (Lucas 8:23). ¡Ukañkamajj Jesusajj iktʼaskänwa!

Apostolonakajja bote apaskakiñatakejj wal chʼamachasipjjäna, uka nayrajja jupanakajj ukhaman uñjasipjjarakïnwa uksa amtasipjjpachänwa. Ukampis jichhajj jukʼamp jan walinwa uñjasipjjäna, ukatwa ajjsarañat Jesusar sartayapjjäna, akham sasa: “¡Tata, salvapjjeta, jiwarañäniwa!” sasa (Mateo 8:25). ¡Discipulonakajj umar chhaqaranttañwa ajjsarapjjäna!

Sartasasti akham sasaw Jesusajj säna: “Diosar jan taqe chuym confiyir jaqenaka, ¿kunatsa ajjsarapjjta?” sasa (Mateo 8:26). Ukatsti thayar toqenoqänwa, qotarojj sarakïnwa: “¡Amuktʼam! ¡Tʼakuram!” sasa (Marcos 4:39). Thayasa, qotasa tʼakurjjänwa. (Marcosampi Lucasampejja, kunjamsa Jesusajj uka jachʼa thayar milagro lurasa tʼakurayäna ukwa nayraqat qhanañchapjje, ukjjaruw discipulonakajj Diosar taqe chuym jan confiyapjjatapat qhanañchapjjaraki).

Kunjamsa thayajj wal thaytʼankipan tʼakurjjäna, uk uñjasajj Jesusan discipulonakapajj wal musparapjjpachäna. Ukatjja jupanakajj wal ajjsarapjjäna, akham sasaw jupanakkam sasipjjarakïna: “¿Khitipunirakïpach jupasti? Thayas qotas istʼarakisä” sasa. Qota khurkatarojj walikiw purjjapjjäna (Marcos 4:41-5:1). Jesusar arkapkäna uka mayni botenakajja, inas kuttʼawayjjapjjchïna.

Diosan Yoqapajja thayjjarusa umjjarusa wali chʼamaniwa, uk yatiñajj wal chuymachtʼistu. Jupajj aka oraqjjar apnaqanjjani ukhajja, janiw jachʼa thayanakasa, ni yaqha ukhamanakasa uñjasjjaniti, taqe jaqenakaw jan kunar ajjsaras jakapjjani.