“Janipuniw khiti jaqes ukham parlirïkiti”

1, 2. 1) Jesusar katuntir sarapkäna uka guardianakajj ¿kunatsa chʼusa amparak kuttʼapjjäna? 2) ¿Kunatsa Jesusajj suma yatichirïna?

JESUSAJJ Awkipatwa templon jaqenakar yatichaskäna. Jupar istʼapkäna ukanakat yaqhepajj janiw kuns yatiñ munapkänti, ukampis waljaniw Jesusan arunakapar confiyapjjäna. Ukatwa fariseonakajj walpun colerasipjjäna, Jesusar katuntanipjjañapatakejj guardianakwa khitapjjarakïna. Uka guardianakajja, jilïr sacerdotenakana fariseonakan ukarojj chʼusa amparakiw kuttʼapjjäna, uk uñjasajj “¿kunats uka jaqer jan apanipkta?” sasaw guardianakar jisktʼapjjäna. Guardianakasti akham sapjjarakïnwa: “Janipuniw khiti jaqes ukham parlirïkiti” sasa. Kuna laykutejj Jesusan yatichäwinakap istʼasajj wal musparapjjäna, ukatwa katuntasajj jan apanipkänti (Juan 7:45, 46).a

² Ukampis janiw uka guardianakarukejj Jesusan yatichäwinakapajj musparaykänti, jan ukasti jupar istʼañatakejj walja jaqenakaw tantachasipjjerïna (Marcos 3:7, 9; 4:1; Lucas 5:1-3). ¿Kunatsa Jesusajj wali suma yatichirïpachäna? Kunjamtï capítulo 8 ukan yatjjataniwayktanjja, jupajj Diosan cheqa yatichäwinakaparojj wal munasïna, khitinakarutï yatichkäna ukanakarus taqe chuymaw munasirakïna. Ukhamarus kunjamatsa yatichkasajj jaqenakan chuymapar purtʼasispa uks yatirakïnwa. Jichhajj kunjam toqenakatsa Jesusajj jaqenakar yatichirïna ukwa kimsa toqet yatjjataskañäni, kunjamsa jiwasajj jupat yateqassna uks yatjjataskarakiñäniwa.

3, 4. 1) ¿Kunatsa Jesusajj fácil amuykañ arunakamp yatichirïna? 2) Jesusajj Qollun Yatichkäna ukhajja, ¿kunjamsa fácil amuykañ arunakamp yatichäna?

³ Jesusajj jan amuykañ arunakamp yatichañat sipansa, qhana ukat fácil amuykañ arunakampipuniw yatichirïna, kuna laykutejj jupar istʼirinakajj “jan yatjjatata aleq” jaqenakakïpjjänwa (Hechos 4:13). Khitinakarutï yatichkäna ukanakat cheqpachapuniw jupajj llakisirïna, qhawqsa jupanakajj yateqapjjaspa uksa yatirakïnwa, ukatwa walja yatichäwinakampejj jan qariyirïkänti (Juan 16:12). Jesusajj fácil amuykañ arunakampis parlirïkchïnjja, wali importante yatichäwinakwa qhanstayirïna.

⁴ Jesusajj Qollun Yatichkäna uka toqet amuytʼañäni, ukajj Mateo 5:3 al 7:27 textonakan qellqatawa. Ukanjja Jesusajj wali wakiskir yatichäwinakatwa parläna, ukampis janiw jan uñtʼata jan amuyañjam chʼama arunakampejj parlkänti, jan ukasti fácil amuykañ arunakampiw parläna. Kunanaktï yatichkäna uk taqeniw amuyapjjäna, ¡wawanakas wali sumwa amuyapjjarakïna! Ukatwa Jesusajj parlañ tukuyjjäna ukhajja “jaqenakajj wal musparapjjäna”. Jupar istʼapkäna uka taypinjja walja yapuchirinaka, awatirinaka ukat chawlla katurinakaw utjäna (Mateo 7:28).

 5. ¿Jesusajj yatichkäna ukanakat mä qhawqhajj kawkïrinakasa?

⁵ Jesusajj yatichkäna ukhajja, amuykañ jukʼa arunakampiw jaqenakarojj yatichirïna. Kuntï jupajj yatichkäna ukajj janïraw qellqatäkänti, ukampis jaqenakan chuymanakaparuw yatichäwinakapajj purtʼäna, janirakiw jupanakajj uka yatichäwinakat armasipkänti. Kunanaktï Jesusajj yatichkäna ukanakat mä qhawqhajj akanakawa: “Jan khitirus juzgapjjamti, ukhamat jan juzgatäñataki”. “Jan usuta jaqenakatakejj janiw doctorajj munaskiti, usutäpki ukanakatakikiw munasi”. “Chuymajj qhawqsa lurañ munaskiwa, ukampis jañchejj janiw chʼamanïkiti”. “Cesarankkis ukjja Cesarar churapjjam, Diosankkis ukjja Diosar churapjjarakim”. “Katoqañat sipansa churañanwa jukʼamp kusisiñajj utji” (Mateo 7:1; 9:12; 26:41; Marcos 12:17; Hechos 20:35).b Jesusajj uka arunak arsuwaykäna ukhat jichhakamajja, niya 2.000 maranakaw pasawayjje, ukampis uka arunakajj jichhürunakan wali uñtʼatakïskiwa.

6, 7. 1) ¿Kunatsa jiwasajj fácil amuykañ qhana arunakamp yatichañasa? 2) ¿Walja yatichäwinakamp yateqerisar jan qarjayañatakejj kunsa lursna?

⁶ ¿Kunjamsa jiwasajj fácil amuykañ qhana arunakamp yaticharaksna? Jaqenakajj kuna arunaksa facilak amuyapjjaspa ukarjamaw parlañasa. Ak amtapuniñäni: Diosan Arupan utjki uka wakiskir yatichäwinakajj janiw jan amuyañjamäkiti. Jehová Diosajj khitinakatï humilde chuymanïpki ukanakaruw jupar uñtʼapjjañapatak yanaptʼi, amtanakaps yatiyaraki (1 Corintios 1:26-28). Ukhamasti, fácil amuykañ qhana arunakampi yatichapjjañäni, ukhamatwa jaqenakajj Diosan Arupan utjki uka cheqa yatichäwinak wali sum amuyapjjani.

⁷ Maysa toqetjja, Bibliat yateqerisarojj janiw walja yatichäwinakamp qarjayañasäkiti, amuyumpipuniw sum yatichañasa. Kunapachatï Bibliat maynir yatichktan ukhajja, janiw kunanaktï yatktan uk taqpach qhanañchañasäkiti, janirakiw ratuk tukuyañ amtampejj wali apurat yatichañasäkiti. Jan ukasti yateqerisajj qhawqsa yateqañ puedispa, kunanak yateqañapas wakisi ukarjamaw yatichañasa. Cheqas yateqerisan Jesusan arkiripar tukuñapa ukat Jehová Diosar adorañapwa muntanjja, ukatwa yateqerisan sum amuyañapatakejj wakiski ukarjamak yatichañasa. Ukhamatakwa Biblian cheqa yatichäwinakapajj chuymapar purtʼani, ukatjja kuntï yateqki ukarjamaw sarnaqañ amtarakini (Romanos 12:2).

8, 9. 1) ¿Kuna amtampis Jesusajj jisktʼirïna? 2) Templot impuesto pagañajj wakisïnti janicha uk sum amuyañapatakejja, ¿kunjamsa Jesusajj jisktʼanakamp Pedror amuytʼayäna?

⁸ Jesusajj jisktʼanakampipuniw jaqenakar yatichirïna. Jupatï mä kun jan jisktʼas cheqak qhanañchaspäna ukhajja, janiw walja tiempo necesitkaspänti. Ukhamajj ¿kunatsa jisktʼanakampipun yatichirïna? Awisajja, enemigonakapan chuymanakapan kunanakas utjäna uk qhanstayañatakiw jisktʼirïna, ukhamat jan aruni jupanakar jaytañataki (Mateo 21:23-27; 22:41-46). Maysa toqetjja, discipulonakapajj kunsa amuyapjjäna uk yatiñataki, jan ukajj jukʼamp amuytʼasiñ yateqapjjañapatakiw akham sasin jisktʼirïna: “¿Jumanakajj kamsapjjasmasa?”, “¿jumajj uk creytati?” sasa (Mateo 18:12; Juan 11:26). Ukham jisktʼanakampiw Jesusajj discipulonakapan chuymanakapar purtʼirïna. Jichhajj ukanakat mä ejemplo uñjañäni.

⁹ Mä kutejja, impuesto cobrir jaqenakaw Pedror jakʼachasipjjäna, ‘¿yatichirimajj templot impuesto paguiti?’ sasaw jisktʼapjjarakïna.c Pedrosti jan payachasisaw “jïsa, paguiwa” sasin säna. Uka qhepatjja, Jesusajj akham sasaw Pedror jisktʼäna: “Simón, ¿jumajj kamsasmasa? ¿Khitinakarus reyinakajj impuestonak cobrapjje, wawanakaparutï jan ukajj yaqhanakarucha?” sasa. Pedrosti “yaqhanakaruw cobrapjje” sasaw säna. Uk satasti Jesusajj sarakïnwa: “Ukhamajj reyin wawanakapajj janiw impuestonak pagapjjañapäkiti” sasa (Mateo 17:24-27). Cheqansa, Pedrojj uka jisktʼan respuestap sum yatïna, reyinakan wawanakapajj impuestonak pagapjjerïnti janicha uks yatirakïnwa. Ukatwa Jesusajj taqe kunjjar apnaqer Reyin sapa Yoqapjamajj impuesto jan pagañapäkänti, kuna laykutejj Awkiparojj templonwa adorasïna. ¿Amuytanti? Jesusajj Pedror cheqak qhanañchañat sipansa wali amuyumpiw jisktʼäna, ukhamat jupa pachpa sum amuytʼasiñapataki, mayansa janïr kun arskasajj amuyump parlañapataki.

10. Utat ut yatiyir sarkasajj ¿kunjamsa jisktʼanakamp prediksna?

¹⁰ ¿Kunjamsa predikir sarasajj jisktʼanakamp sum yatichsna? Utat uta yatiyir sarkasajja, jaqenakan jukʼamp yatiñ munapjjañapatakejj jisktʼanakampiw parlañ qalltsna, ukhamat suma yatiyäwinakat parlañataki. Sañäni, chuymankipstat mä jaqetï utapat mistunispa ukhajja, akham sasaw respetomp jisktʼsna: “Wawäkayäta ukhat jichhakamajj ¿kunanakas mayjtʼawayi?” sasa. Uka jisktʼarojj kunjamsa qhanañchani uk istʼasajj akham saraksnawa: “Akapachan sum jakasiñ utjañapatakejja, ¿kuna cambionak lurañas wakisispa?” sasa (Mateo 6:9, 10). Jiskʼa wawanakani mä warmitï mistunispa ukhajja, inas akham sasin jisktʼsna: “Wawanakamajj jachʼäjjapjjani ukhajja, ¿aka mundojj kunjamäjjpachänisa?” sasa (Salmo 37:10, 11). Maysa toqetjja, mä uta jakʼanakan kunanakas utji uk sum uñjañatakiw chʼamachasiñasa, ukhamatwa utanin jukʼamp yatiñ munañapatakejj ukarjam parltʼañäni.

11. Bibliat yatichktan ukhajja, ¿kunjamsa yateqerinakasan chuymapar purtʼañatakejj jisktʼsna?

¹¹ Bibliat yatichktan ukhajja, yateqerinakasarojj sum amuyapjjañapatakejj jisktʼañasapuniwa, ukhamatakwa kunas chuymanakapan utji uk yatiñäni (Proverbios 20:5). Bibliat yateqerisampejja, Wiñayatakiw kusisit jakasismad sat libron 43 yatichäwipatsa yatjjatksna ukham amuytʼañäni. 43 yatichäwejj “¿Bibliajj alcoholani umañanakat kamsisa?” sat pʼeqeñchäwiniwa, kunjamsa Jehová Diosajj machjasiñarusa alcohol sapa kuti umañarus uñji uka toqetwa parlaraki. Yatjjatkasajja, kuntï Bibliajj alcoholani umañanakat yatichki uk yateqerejj sumwa amuyaskaspa ukat puntoparuw qhanañcharakistaspa. Ukampis ¿kuntï yateqki ukampejj acuerdoti? Uk yatiñatakejj akham jisktʼañaw wakisispa: “¿Kuntï Diosajj alcoholani umañanakat amuyki ukajj jumatak walikiti?” sasa. Jan ukajj “yatjjatawayktan ukarjamajj ¿kunjamsa jumajj sarnaqasma?” sasaw jisktʼaraksna. Cheqas wali amuyumpiw yateqerisar jisktʼañasa, ukatjja munasiñampi respetompiw parlañasaraki. Janipuniw kunäkipans jisktʼanakasampejj phenqʼachañasäkiti (Proverbios 12:18).    

12-14. 1) Jaqenakarojj ¿kunjamsa Jesusajj jupanak pachpa sum amuytʼapjjañapatakejj yanaptʼäna? 2) Supayan chʼamapampiw demonionakar alissuski sasin fariseonakajj sapkäna ukhajja, ¿kuna arunakampis Jesusajj jupanakar amuktʼayäna?

¹² Jesusajj perfecto memorianïnwa, ukatwa jaqenakarojj chuymar purtʼasin cambiapjjañapataki ukat jupanak pachpa suma amtanakar puripjjañapatak yanaptʼäna. Amuytʼañataki, enemigonakaparojj kunjamsa pantjasipjjäna uk jupanak pachpa amuyasipjjañapatakiw yanaptʼäna. Maysa toqetjja, discipulonakaparojj wali importante yatichäwinak jupanak pachpa wali sum amuytʼapjjañapatakiw yanaptʼarakïna. Jichhajj ukanakat mä qhawqha ejemplonak uñjañäni.

¹³ Mä kutejja, Jesusajj demonion mantat mä jaqeruw qolläna, jupajj juykhünwa ukat amut jaqerakïnwa. Ukampis uk uñjasajja, fariseonakajj akham sasaw Jesusar kʼarintapjjäna: “Aka jaqejj demonionakan Belcebú sat apnaqeripan chʼamapampiw demonionakar alissuski” sasa. Ukham sasajja, ‘usut jaqet demonio alissuñatakejj Supayatwa Jesusajj chʼam katoqe’ sañwa munasipkäna. Ukham parlapjjatapajj janiw cheqäkänti, jan amuytʼasisaw parlapjjarakïna. Ukatwa Jesusajj jupanakar akham säna: “Mä gobiernojj tʼaqjtasin jupanakpura chʼajjwapjje ukhajja, tukusiwa. Mä markasa jan ukajj mä familiasa tʼaqjtasin jupanakpura chʼajjwapjjani ukhajja, tukusipjjarakiniwa. Ukhamarakiw pasaspa, Supayatejj Supayar alissuspajja, jupa pachpaw tʼaqjti, ukhamajj ¿kunjamarak gobiernopajj saytʼatäspasti?” sasa (Mateo 12:22-26). Mä arun Jesusajj akham saskänwa: “Nayatï Supayan khitanitäsin luratanakap tukjirista ukhajja, Supayajj pachpa amtanakap contras saytʼkaspa ukhamäspawa, janirakiw gobiernopajj saytʼatäjjaspati” sasa. Kuntï siskäna ukajj wali qhanänwa.    

¹⁴ Janiw ukakïkänti, fariseonakan discipulonakapajj kunjamsa demonionak alissupjjäna uk yatisajja, Jesusajj akham sasaw jupanakar jisktʼarakïna: “Nayatejj Belcebú satäki ukan chʼamapampi demonionakar alissta ukhajja, ¿khitin chʼamapampis wawanakamajj alissupjje?” sasa (Mateo 12:27). Jesusajj uka arunakampejj ak sañwa munaskäna: “Nayatï Supayan chʼamapamp demonionak alissta ukhajja, jumanakan discipulonakamajj Supayan chʼamapampirakiw demonionak alissusipki” sasa. Uk istʼasajja fariseonakajj janiw kamsirjamäpkänsa, janirakiw arkirinakajajj Supayan chʼamapampipuniw uk lurasipki sasins sapkänti. Ukhamasti, Jesusajj jisktʼanakampiw fariseonakan jan wal parlapjjatapsa pantjasipjjataps qhanstayäna. Cheqansa, kunjamsa jupajj kunayman toqet jaqenakar sum amuytʼayäna, kunatsa jaqenakajj jupar uñjañsa jupar parlir istʼañs wal munapjjäna uk yatiñajj jiwasatak wali musparkañapuniwa.

15-17. Istʼirinakapan chuymapar purtʼañatakejja, ¿kunjamsa Jesusajj amuytʼayirïna? Uk mä uñachtʼäwimp qhanañchtʼam.

¹⁵ Jesusajj jaqenakar yatichkäna ukhajja, kunatsa Awkipar jakʼachasipjjañapa ukat confiyapjjañaparaki ukwa qhan amuytʼayäna. Ukatakejja kuntï istʼirinakapajj sum uñtʼapkäna uka toqetwa awisajj parlirïna, ukjjarojj uñachtʼäwinakampiw wali sum amuytʼayirïna, ukhamatwa jupar istʼapkäna ukanakajj yatichäwinakapar creyipjjäna.e Kunjamtï Jesusajj yatichirïkäna ukajj jaqenakan chuymaparuw purtʼirïna. Kunjamsa uk lurirïna uka toqetwa jichhajj pä ejemplonak uñjaskañäni.

¹⁶ Mä kutejja, discipulonakapajj Diosar orasiñ yatichapjjeta sasaw Jesusar sapjjäna. Kuntï discipulonakapajj mayipkäna ukar qhanañchkasajja, kunjamsa imperfecto awk taykanakajj wawanakapar “suma regalonak” churapjje uka toqetwa Jesusajj parläna. Ukatjja akham sasaw jupanakar amuytʼayäna: “Jumanakajj jan wali jaqëkasinsa, wawanakamar suma regalonak churañ yatipjjtawa. Ukhamajj ¿janit alajjpachankir Awkejj mayipki ukanakarojj espíritu santo churkarakini?” sasa (Lucas 11:1-13). Jesusan ukham amuytʼayatapajj wali qhanänwa. Cheqansa, pantjasir awk taykanakajj kunanaktï wawanakapajj necesitapki ukanakwa churapjje. Alajjpachankir Awkisajj ukhamarakwa kunanaktï necesitktan ukanak churistani, espíritu santop humilde chuymamp maykañäni ukhas uk churistaniwa, kuna laykutejj jupajj perfecto ukat taqe kuns cheqaparjam lurir Diosawa.

¹⁷ Kunjamsa jaqenakajj llakinakar saykatapjjaspa uk amuytʼayañatakejja, Jesusajj yaqha uñachtʼäwitwa parläna. Jupajj akham sänwa: “Cuervo sat jamachʼinakat amuytʼapjjam, jupanakajj janiw phawapkisa ni yawipkisa, janirakiw jupanakan grano imañanakapasa ni manqʼa imañ utanakapas utjkiti, ukampis jupanakarojj Diosaw manqʼayi. ¿Janit jumanakajj uka jamachʼinakat sipansa jukʼamp valoranïpkta?” sasa. Ukat akham saskakïnwa: “Kunjamsa lirio panqaranakajj jilasipki uk amuytʼapjjam, uka panqaranakajj janiw chʼam tukusin trabajipkiti, ni qapupkarakisa [...]. Uka alinakarojj Diosaw ukha sum isthapiyi, jichhürojj sumaw alisipki, qharürusti hornor jaqontatäpjjaniwa. Diosar jan taqe chuym confiyir jaqenaka, ¿janit jumanakarojj ukham isthapiyapkarakïtamjja?” sasa (Lucas 12:24, 27, 28). Jehová Diosajj kunjamtï jamachʼinakarus panqaranakarus sum uñjkejja, ukhamarakwa jupar taqe chuym munasipki ukat confiyapkaraki ukanakarojj sum uñjani. Ukham toqenakat amuytʼayasaw Jesusajj istʼirinakapan chuymanakapar purtʼirïna.

18, 19. Maynitï Diosarojj janiw nayajj creykti sasin sistaspa ukhajja, ¿kunjamsa juparojj amuytʼaysna?

¹⁸ Jaqenakar suma yatiyäwinak predikir sarktan ukhajja, ukhamarakiw jupanak pachpa amuytʼapjjañapatak yanaptʼañ muntanjja. Ukatjja yaqhep creencianakan falsötap amuyapjjañapatakisa, Jehová Diosajj kunja munasirisa ukat kunjamsa jupanakat llakisi uk amuyapjjañapatakis yanaptʼañwa munaraktanjja (Hechos 19:8; 28:23, 24). Ukampis maynir jupa pachpa amuytʼasiñapatak yanaptʼkasajja, ¿jan amuyañjam walja arunak arsuñat wakispacha? Janiwa. Kunjamtï Jesusajj lurirïkäna ukarjamajja, uñtʼat qhana arunakampi yatichañaw chuymar purtʼkirejja.

¹⁹ Aka toqet amuytʼañäni, maynitï Diosarojj janiw nayajj creykti sasin sistaspa ukhajj ¿kamssnasa? Nayraqatajja, kunanaksa sapürojj uñji uka toqetwa amuytʼaysna, ukjjarojj kuntï uñjki ukajj kunjamatsa utjawayi ukwa amuytʼayaraksna. Inas juparojj akham sissna: “Jumatï mä chʼusa lugarankkasajj manqʼañanakamp phoqantat mä suma uta uñjasma ukhajja, ¿uka utasa manqʼañanakas aleq ukhamatak uñsti sasmati? Jan ukajj ¿mayniw taqe ukanak lurpacha sasmacha? Uka toqet Bibliajj akham sasaw qhanañchi: ‘Taqe utajj maynin luratawa, ukampis taqe kunas Diosan luratawa’” sasa (Hebreos 3:4). Ukampis akwa amtañasapuni, kuntï qhanañchkañäni ukajj janiw taqenin chuymapar purtʼkapuniniti (2 Tesalonicenses 3:2).

20, 21. 1) Jehová Diosajj kunjam Diosasa ukat kunanaksa luri uk sum amuytʼayañatakejja, ¿kunjamsa jaqenakar yatichsna? 2) ¿Kunsa jutïr capitulon yatjjataskañäni?

²⁰ Jaqenakar yatiyir sarkañäni ukhasa jan ukajj congregacionan yatichkañäni ukhasa, Jehová Diosajj kunjam Diosasa ukat kunanaksa jupajj luri uk sum amuytʼayañatakejj uñachtʼäwinakampiw parlaraksna. Sañäni, kunjamsa infiernot yatichasitapajj Jehová Diosar jan walit uñjayi uk qhanañchañatakejja, akham sasaw sissna: “¿Mä munasir awkejj wawapar castigañatakejj amparap ninar ayjjatayakispati? Cheqas mä munasir awkejj janipuniw uk lurkaspati. Jehová Diosampejj ukaw pasaraki, jupajj wali munasir Awkïtap laykojj janipuniw jaqenakarojj nina aqkir infiernon tʼaqesiyañ amtkaspati” sasa (Jeremías 7:31). Ukatjja llakitäpki ukanakarojj kunjamsa Diosajj munasiñamp uñjaskaki uk amuytʼayañatakejja, akham sasaw saraksna: “Jehová Diosatakejj ¿gorrión sat jiskʼa jamachʼinakajj janit valoranïkpacha? Cheqas jupatakejj uka jiskʼa jamachʼinakajj wali valoranïpjjewa. Ukhamajj khitinakatï jupar aka oraqen servipki ukanakajj jukʼamp valoranïpjjewa, jumarus wali valoranitwa uñjaraktamjja” sasa (Mateo 10:29-31). Ukhamtï amuytʼayañänejja, mayninakan chuymaparuw purtʼañäni.

²¹ Aka capitulonjja, kunjam toqenakatsa Jesusajj jaqenakar yatichirïna ukwa kimsa toqet yatjjatawaytanjja. Ukatjja Jesusar katuntir sarapkäna uka guardianakajj kuntï arsupkäna uka arunakan cheqätapwa amuyawayaraktanjja, jupanakajj akham sapjjänwa: “Janipuniw khiti jaqes ukham parlirïkiti” sasa. Jutïr capitulonjja, Jesusajj kunjamsa uñachtʼäwinakampisa wali uñtʼat ejemplonakampis yatichirïna uka toqetwa yatjjataskañäni.