Juchar jan puriñatakejj Jesusat yateqasipjjañäni

Jesusajj Juanampi bautisayasïna uka qhepatjja, espíritu santojj Judea wasararuw jupar irpäna. Jupajja walja toqenakatwa lupʼiñapäna, amtañäni bautisasïna ukhajja ‘alajjpachaw jistʼartäna’ (Mateo 3:16). Ukhamasti kunanaksa alajjpachankkasajj yateqäna, kunanaksa luräna taqe ukanakwa Jesusajj amtpachäna. Ukhamajj walja toqenakatwa lupʼiñapäna.

Jesusajj 40 uruy arumaw wasarankäna. Uka tiemponjja, janiw kunsa manqʼkänti. Ukatwa manqʼat wal awtjayasïna. Ukhaw Supayajj Jesusar juchar puriyañatak jakʼachasïna, akham sasa: “Jumatï Diosan wawapästa ukhajja, aka qalanak tʼantʼanakar tukuyam” sasa (Mateo 4:3). Diosajj milagronak lurañapatakiw Jesusar chʼam churäna, ukampis jupajj janiw uka chʼamampejj jupatak milagronak lurañ munkänti, ukatwa Supayar jan istʼkänti.

Supayajj janiw ukaruk jaytkänti, jan ukasti yaqha toqetwa Jesusar pantjasiyañ munarakïna. Templo patjjar saytʼayasajja, akat jaqoqtam sasaw Jesusar säna. Ukampis Jesusajj janiw angelanakampi salvayasiñ laykojj jaqoqtañ munkänti. Qellqatanakat aytasajja, Jehová Diosar yantʼañajj janipuniw walïkiti sasaw säna.

Ukatjja Supayajj Jesusar yaqha toqetwa pantjasiyañ munarakïna. Akapachankir taqe markanaka, kunja qamirïpkitejj taqe ukanakwa uñachtʼayarakïna, akham sasa: “Jumatï killptʼasisin mä kutik adoritäta ukhajja, taqe akanakwa churäma” sasa. Jesusasti, mä kutimpiw Supayan yantʼaparu saykatäna, ukatwa akham säna: “¡Saram akat Supaya!” sasa (Mateo 4:8-10). Jesusajj yantʼatäkasas janipuniw jan walinak lurañ munkänti, jan ukasti Jehová Dios saparukiw serviñ munäna. Jesusajj janipuniw Jehová Diosat jitheqtañ munkänti.

Jesusajj kuna yantʼanakansa uñjasïna, kunjamsa ukanakar saykatäna taqe ukanakatjja wal yateqsna. Supayajj cheqpachapuniw utjaski, jan uñjkayarakiwa. Ukhamasti Jesusar taqe markanaka uñachtʼayasajja, Supayajj taqe gobiernonakjjaru munañanïtapwa uñachtʼayaskäna. Supayatejj jan munañanïkaspäna ukhajja, janiw Jesusatakejj mä tentacionäkaspänti.

‘Jumatejj mä kutiki adoritäta ukhajja, taqe aka markanakjjar munañanïyätawa’ sasaw Supayajj Jesusar säna. Jiwasarojj ukhamarakiw Supayajj akapachan wali qollqenïñampi, wali munañanïñampi, jan ukajj wali uñtʼatäñampi pantjasiyañ munistaspa. Jiwasatï ukanakar saykatañatak Jesusat yateqasiñäni, Jehová Diosatsa janipuni jitheqtkañäni ukhajja, suma amuytʼasirïtaswa uñachtʼayañäni. Amtapuniñäni, Supayajj Jesusar jan juchar puriyirjamäsajja, “wakiskir yaqha horaskamaw” Jesusan ukat sarjjäna (Lucas 4:13). Uka pachparakwa Supayajj jiwasamp luraspa, ukhamasti walpun amuyasipjjañäni.