Jesusat yatiqasiñäni ukat kunjamtï Diosax yupaychayasiñ munki ukham yupaychapxañäni
Diosax wali munasiñampiw “taqi markanakata, kunayman janchini ukhamarak taqi casta parlani” jaqinakar Jupar yupaychapxañapatakix jawstʼi (Apo. 7:9, 10; 15:3, 4). Khitinakatï uka jawstʼataparu iyawsapki ukanakax ‘[Jehová] Tatitun munasiñap’ uñjapxaraki (Sal. 27:4; 90:17). Salmo qillqtʼirjamarakiwa Diosar akham yupaychapxi: “[Jehová Diosar yupaychapxañäni], uraqkam qunqurtʼasipxañäni; Tatitun nayraqatapar killtʼasipxañäni. Jupaw jiwasanakarux irnuqistu” sasa (Sal. 95:6).
Kumjam yupaychäwisa Jehová Diosar kusisiyäna
Jesusax Diosan mä sapa jilïr Yuqapjamaxa, kunjamsa Awkipax lupʼïna ukxa sum yatïna ukhamaraki kamachinakapatsa, mayitanakapatsa yatirakïnwa. Kunjamsa Diosax yupaychayasiñ muni ukwa Jesusax sum yatïna. Ukatwa akham säna: “Nayätwa thakixa, chiqasa, jakañasa. Naya tuqikiw Awkin ukar puriñax utji” sasa (Juan 1:14; 14:6).
Altʼat chuymanïña ukhamaraki Diosar istʼasiñ tuqitsa mä suma uñachtʼäwi Jesusax churistu, Jupa pachpaw akham säna: “Jan[iw] kuns nayan munañaxat lur[kti]. Nayax arstwa kuntix Awkix yatichkitu uka. [...] Nayax jupar kusisiykirpun kuns luratax layku” sasa (Juan 8:28, 29). ¿Diosar kusisiyañatakix kuns luräna?
Nayraqataxa, Jesusax Jehová Diosaruw taqi chuyma luqtäna, uka kikparakiw Jehová Diosan chiqpach yupaychirinakapatxa mayisi. Awkipar wal munasitapatwa, Jesusax istʼasirïna ukat Awkipan munañap lurirïna, ukatakix taqi kunwa apanukuñapäna (Fili. 2:7, 8). Jesusaxa jan jaytasawa arkinak tuyañatakix yatiyirïna ukaw Diosar luqtäwipanxa wali wakiskirinxa. Ukham wal yatiyatapatxa jupar jan istʼañ munirinakasa Yatichiri sasaw sapxänxa (Mat. 22:23, 24; Juan 3:2). Ukampisa, munasiñapaw mayninakar jan qarjasa yanaptʼañatakix wiytana. Janis jupatak tiempo apsuskchïnxa, taqi chuymaw luräna (Mat. 14:13, 14; 20:28). Walja lurañanakanïkchïnsa, alaxpachankiri Awkipar mayisiñatakix tiempo apsusipunirïnwa (Luc. 6:12). Jesusan yupaychäwipaxa Jehová Diosatakix wali askïnwa uka tuqit janiw payachasksnati.
Diosar kusisiyañatakix chʼamachasiñasawa
Jehová Diosaxa, Yuqapan taqi chuyma Jupar luqtatapwa uñjäna ukatwa wal kusisiyitu sasin säna (Mat. 17:5). Supay Satanasax kunjamsa Jesusax taqi chuyma Jehová Diosar luqtäna uk uñjarakïnwa, ukatwa yantʼänxa. ¿Kunsa Satanasax munäna? Kunjamtï Jehová Diosax yupaychayasiñ munkäna ukham istʼasiri jan pantjasiri yupaychir jaqix janiw utjkänti. Jesusaw ukham istʼasiri jan pantjasiri yupaychirïsapänxa, Supayax janiw uk munkänti (Apo. 4:11).
Jesusan pantjasiñapatakixa, Satanasax munkañanäkwa uñachtʼayäna. Supayasti “Jesusarux irparakïna mä jachʼa qullu patxaru, ukatsti uñachtʼayarakïnwa taqi markanaka, kunja sumäkäntix ukanaka. Ukatsti sänwa: ‘Taqi akanak nayax churäma, jumatix killtʼasisin nayar yupaychitäta ukaxa’ sasa. Ukapachasti Jesusax sänwa: ‘Saraqit nayat, supaya, Diosan arupansti qillqatawa: “[Jehová] Tatitu Diosamarukiw yupaychäta, jupa saparukirakiw servïta”’” sasa (Mat. 4:8-10). Uka churäwix sumjamäkchinsa, Supayan nayraqatapan killtʼasiñax idolonakar yupaychañ kikpänwa, ukwa Jesusax yatïna. Jehová Dios saparukiw taqi chuyma luqtañ munäna.
Jichhürunxa, Supayax janiw nayar yupaychitäta ukhax taqi markanaka churäma sasax siskistuti. Ukampisa, kunayman tuqinakatwa, Jehová Diosar yupaychäwisat apaqañ munistu (2 Cor. 4:4).
Jesucristox jiwañapkamawa Jehová Diosat jan jithiqtkänti. Taqi chuyma luqtasaxa Jehová Diosarux jachʼañchänwa, janipuniw khiti jaqis ukham lurkänti. Jesusatakix taqi chuyma Awkipar luqtañaw nayraqatankäna, uka kikparakiw chiqpach cristianonakax taqi kunat sipansa Luririsar yupaychañatakix chʼamachasiraktanxa. Jiwasatakixa, taqi kunat sipansa Jehová Diosampi sum apasiñaw nayraqatankixa.
Diosar sum luqtasaxa bendicionanakaw utji
Jakäwisana kunatï “qʼumäki chiqapäkaraki Dios Awki nayraqatan” uk lurasaxa, walja bendicionanakwa katuqañäni (Sant. 1:27). Amuytʼañataki, akapach jaqinakaxa, ‘michʼaw tukupxi, qullqi chuymaraki, jachʼa jachʼaw tukupxi, aski luräwinak uñisirinakapxiwa’ (2 Tim. 3:1-5). Ukampisa, Diosan utapar sartan ukhaxa, Diosan kamachinakaparu istʼañataki chʼamachasirinakampi ukat suma jaqinakampiw chikachastanxa. ¿Janit ukax chuymachkistu?
Akapachan jan wali luräwinakapata jithiqtañäni ukhaxa, yaqha bendicionwa katuqarakiñäni: qʼuma chuymanïña. Qʼuma chuymanïskakiñatakixa, Diosan mayitanakapar istʼañasawa, ukat Cesaran leyinakaparuxa, Diosan kamachinakap jan pʼakintki ukhax istʼañasarakiwa (Mar. 12:17; Hech. 5:27-29).
Ukampis janiw ukakïkiti. Kunapachatï taqi chuyma Jehová Diosar luqtktan, ukat munañasat sipansa munañap lurtan ukhaxa, jakäwisanxa wali kusisitaw jikxatastanxa. “Manqʼasiñäni, umtʼasiñäni, qharurux jiwxchiñänixaya” ukham sañat sipansa, aka Uraqix paraisoptkäni ukan wiñay jakañataki suma suytʼäwinïtanwa (1 Cor. 15:32).
Jutïrinxa, Jehová Diosat jan jithiqtapki ukanakax “wali jachʼa llakinakwa pasanipx[ani]” sasaw Apocalipsis librox qhanañchi. Ukat sarakiwa: “Tronon quntʼatäki ukasti taqi jupanakarux imarakiniwa” sasa (Apo. 7:13-15). Tronon quntʼatäki ukax Jehová Diosawa, Jupakipuniw wali jachʼa Diosaxa. Kunjamtï Jehová Diosax utapan katuqtʼistani, ukat taqi jan waltʼäwinakat jarkʼaqistani, ukxa uñjksnas ukham amuytʼañasawa. Jichha tiemponsa Jehová Diosax mä jukʼsa yanaptʼistu ukat jarkʼaqarakistuwa.
Apocalipsis librox saskakiwa, khitinakakatï Jehová Diosar taqi chuyma luqtapki ukanakax “jakkir uma jalsunakaruw anakirakini” sasa. Uka uma jalsunakaxa Jehová Diosan taqi suma churäwinakapawa ukhamat wiñay jakañ jikxatapxañasataki. Jesucriston jiwatap laykuxa, “Diosasti taqi jachanakap nayranakapat phiskurxani” (Apo. 7:17). Jaqinakax janiw juchanïxaniti, ukaw khitinakatï aka Uraqin wiñayatak jakañ munapki ukanakarux wal kusisiyani. Jichhürunsa, Diosan luqtirinakapax wali kusisitaw yuspärapxi, angelanakamp chikaw Jehová Diosar jachʼañchapxi, ukat akham sasaw qʼuchupxi: “Jachʼätawa, muspharkañarakïtawa. Jumarakïtaw taqi kun luriri jachʼa Diosaxa. Sarnaqäwinakamas chiqaparakiwa, markanakan [wiñayatak] Reyipa. [Jehová Dios] Tata, ¿khitiraki jan axsariristamsti? ¿Khitiraki jan yupaychiristamsti? Juma sapakïtaw qullanaxa. Taqi markanakaw jutasina jumarux yupaychapxarakïtam, chiqa aski luratanakam uñjapxatap layku” sasa (Apo. 15:3, 4).
[27 janan fotopa]
¿Supayax yupaychayasiñ laykux kuns churañ munistu?