Congregacionan qʼomäñapataki ukat sumankañ utjañapatak yanaptʼañäni

KUNJAMTÏ Biblian profeciapajj siskejja, sapa maraw oraqpachankir walja waranqa jaqenakajj Jehová Diosar adorirejj utapar sarapjje (Miq. 4:1, 2). Uka jaqenakarojj wali munasiñampiw “Diosan congregacionapar” katoqtanjja (Hech. 20:28). Jupanakajj jiwasamp chik Jehová Diosar serviñ wali valoranitwa uñjapjje, qʼomäki ukat sumankañajj utjkaraki uka Diosan markap taypinkañsa wali valoranitwa uñjapjjaraki. Espíritu santompi Biblian ewjjtʼanakapampiw Diosan markapan qʼomäñapatakisa ukat sumankañ utjañapatakis yanaptʼi (Sal. 119:105; Zac. 4:6).

² Kunapachatï Biblian wiñay yatichäwinakaparjam (principios bíblicos) sarnaqtan ukhajja, ‘machaq jaqëñampiw’ isthapistanjja (Col. 3:10). Mä jukʼa jan waltʼayasiñanakajj utjki ukanakjja janiw yäqktanti. Jiwasatï taqe kuns Jehová Diosjam uñjañatak chʼamachasiñäni ukhajja, akapachankir tʼaqanoqtayir amuyunakampejj janiw apayaskañäniti, antisas mayachtʼataw aka oraqpachan Diosar serviñäni (Hech. 10:34, 35).

³ Ukampis awisajja, congregacionan jan walinakaw sumankañsa mayachtʼat sarnaqañsa chhaqtayaspa. ¿Kunatsa ukajj pasaspa? Kuna laykutejj janiw maynejj Biblian wiñay yatichäwinakaparjam sarnaqjjaspati. Ukhamarus niyakejjay taqenis pantjasir jaqëstanjja, sapa mayniw mä kunar saykatañatakis chʼamachasisktanjja (1 Juan 1:10). Inas parlatasampisa jan ukajj luratasampis maynin chuymap ustʼaychiñäni, jan ukajj inas mayninakajj jiwasar chuym ustʼayapjjchistani. Yaqhep jilat kullakanakasti, mä kun jan wal lurasaw Jehová Diosan markapan mayachtʼat jakasiñsa qʼoma sarnaqasiñsa chhaqtayapjjaspa (Rom. 3:23). Taqe ukanakajj pasaspa ukhajj ¿kun lurañas wakisispa?

⁴ Ukham jan walinakajj utjani ukhajja, kun lurañas wakisispa uk Biblia toqew Diosajj munasiñat ewjjtʼistu, ancianonakas yanaptʼarakistaspawa. Jiwasatï Bibliarjam ewjjtʼapkistu ukarjam sarnaqañäni ukhajja, wasitampiw jilat kullakanakamp sum apasiñäni, Jehová Diosampis suma amigöskakiñäniwa. Ukhamajj kunapachatï mä jan wal luratasat cheqañchapjjestani ukhajj akwa amtañasa: Jehová Diosajj jiwasar wal munasitapatwa cheqañchistu (Prov. 3:11, 12; Heb. 12:6).

⁵ Awisajja jilat kullakanakajj jiskʼa problemanakatakwa jan waltʼayasipjje. Ukanakajj jankʼakiw munasiñamp askichasiñapa (Efes. 4:26; Filip. 2:2-4; Col. 3:12-14). Apóstol Pedrojj akham sasaw säna: “Taqe kunat sipansa, maynit maynikam wal munasipjjam, khititejj munasirïki ukajja walja juchanakwa perdoni” sasa. Biblian uka ewjjtʼapajja, jan waltʼayasiñanak askichañatakiw yanaptʼistu (1 Ped. 4:8). Bibliajja “taqeniw walja kuti pantjastanjja” siwa (Sant. 3:2). Kunjamtï jiwasajj uñjatäñ munktan ukhamtï mayninakar uñjarakiñäni ukhajja, jankʼakiw jiskʼa jan waltʼayasiñanakat mayninakar perdonañäni, kuna jan waltï lurapkistu uksa armjjarakiñäniwa (Mat. 6:14, 15; 7:12).

⁶ Arsutasampi jan ukajj luratasampi maynin chuymap ustʼayatas amuyasiñäni ukhajja, jankʼakiw perdón mayisiñasa, kuna laykutejj maynimp jan waltʼayasitasajj Jehová Diosamp sum apasitaswa aynachtʼayaspa. Jesusajj akham sasaw discipulonakapar ewjjtʼäna: “Jumatejj altarar mä ofrenda apkasina jilamajj juma conträtap amtassta ukhajja, uka ofrendam altar nayraqatar jaytasin jilamar thaqtir saram. Jupampi nayraqat sumankthapinim, kuttʼanisaw ofrendam loqtaskäta” sasa (Mat. 5:23, 24). Awisajj ina chʼusatakwa jan waltʼayasiñanakajj utjaspa, ukatwa uk askichañatakejj jankʼak uka jilatampi jan ukajj uka kullakamp parltʼañasa. Cheqas pantjasirïtasatwa jan waltʼayasiñanakajj utji, ukampis jiwasatï jan waltʼayasktan ukamp sum parltʼasiñäni ukhajj jankʼakiw kuns askichañäni, ina chʼusat jan waltʼayasiñanakas janirakiw añch utjkaniti.

⁷ Awisajja ancianonakajj mä kun jan wal luratapatwa maynir cheqañchapjje, ukampis uk lurañajj jupanakatakejj janiw faciläkiti. Apóstol Pablojj akham sasaw Galacia markankirinakar qellqäna: “Jilatanaka, maynejj jan amuyasisaw jan wali thakir saranukuspa. Ukhamäkipansa Diosar adorañan suma saytʼatäpkta ukanakajja, llampʼu chuymampi jupar cheqañchañatak chʼamachasipjjam” sasa (Gál. 6:1).

⁸ Ancianonakajj jilat kullakanakar sum cuidapjje, ukhamatwa jupanakar jan walinakat jarkʼaqapjje, jukʼamp jan walinakan jan uñjasipjjañapatakis yanaptʼapjjaraki. Kuntï Jehová Diosajj Isaías profeta toqejj siskäna ukhamäñatakiw ancianonakajj chʼamachasipjje, Isaías profetajj akham sänwa: “Jupanakat sapa maynejja thayat jarkʼaqasiñatak mä imantasiñ lugarjamäpjjaniwa, wal purintir jallut jarkʼaqasiñatak mä imantasiñ lugarjamäpjjaniwa, waña oraqen jalir umanakar uñtasitäpjjaniwa, waña oraqen mä jachʼa qarqan chʼiwipar uñtasitäpjjaniwa” sasa (Is. 32:2).

⁹ Yaqhep cristianonakajja, congregacionan janiw yateqaskay sarnaqapkaspati. Ukatwa apóstol Pablojj ukanakat amuyasipjjañapatak cristianonakar akham säna: “Kawkïr jilatatejj jan wal sarnaqki, jumanakajj nanakat katoqapkta uka costumbrenaksa jan phoqkaraki ukatjja jitheqtapjjam” sasa. Ukat akham saskakïnwa: “Maynitejj aka cartan qellqat arunakar jan istʼkanejja, jupat amuyasipjjam, janiraki jupampejj chikachasipjjamti, ukhamat phenqʼasiñapataki. Ukampis jan juparojj mä enemigorjam uñjapjjamti, jan ukajj mä jilarjam ewjjtʼasipkakim” sasa (2 Tes. 3:6, 14, 15).

¹⁰ Awisajja mä cristiano jilat kullakajj janiw congregacionat expulsatäñatakejj mä jachʼa jucha lurkapunispati, ukampis Jehová Diosan mayitanakapar jan respetatapwa uñachtʼayaspa. Inas maynejj sinti jayrächispa, Diosan markapat jan wal parlchispa, jan jareqtʼasis qʼañu sarnaqchispa, mayninakan asuntonakapar mitischispa, mayninakat engañomp qollqe apaqchispa, jan ukajj jan walinakamp kʼuchirtʼaschispa (2 Tes. 3:11). Maynin ukham sarnaqatapajj Jehová Diosan markaparuw jan walit uñjayaspa, yaqha jilat kullakanakas jupjamaw sarnaqañ munjjapjjarakispa.

¹¹ Ukham jan wali sarnaqerinakarojja, ancianonakajj Bibliampiw nayraqat amuytʼayapjjañapa. Ukampis maynitï ancianonakamp jan yanaptʼayasiñ munkchi, janirak Biblian wiñay yatichäwinakaparjam sarnaqañ munkchi ukhajja, mä discurso de advertencia arstʼasiñapatakiw ancianonakajj amtapjjañapa. Uka cristianon luratapajj sinti jan walipuniti janicha, ukarjamaw discursojj arstʼasiniti janicha uk sum amuytʼasin ancianonakajj amtapjjañapa. Discurso arstʼir jilatajja janiw pantjasirin sutip aytañapäkiti, jan ukasti pantjasirejj kuna jan walsa luri, uka toqet Bibliajj kamsisa ukwa sum qhanstayañapa. Khitinakatï uk istʼapkani ukanakajja, jan wali luririmpejj janiw añch chikachasjjapjjañapäkiti, ukampis Jehová Diosar serviñanjja juntösipkakiniwa, ‘mä jilarjamas ewjjtʼasipkakiniwa’.

¹² Congregacionankir jilat kullakanakajj instruccionanakar istʼapjjani ukhajja, jan wali lurirejj inas arrepentisisajj jan wali luratap apanukchini. Jan wali luririn cambiatapatï qhan amuyasini ukhajja, janiw juparojj yaqhachasjjañapäkiti.

¹³ Kunapachatï maynir jan wali luratapat perdonaski ukhajja, jan wali luratapajj walikïkaspas ukham janiw sañ munkiti. Ukampis maynejj ‘pantjasirïtaj laykuw jan walinak lurta’ sasajj janiw sañapäkiti, cheqansa jachʼa juchanakajj janiw aleq ukhamak uñjaskiti (Lev. 19:17; Sal. 141:5). Israelitanakar churat Leyirjamajja, yaqhep juchanakajj mayni juchanakat sipans jukʼamp jachʼänwa. Jichha tiemponjja cristianonakajj uka pachpwa amuyaraktanjja (1 Juan 5:16, 17).

¹⁴ Kunjamsa jachʼa problemanak jiwaskam askichsna uk Jesusaw sum qhanañchtʼäna, jupan arunakaparjamajj akanakaw lurasispa: “Jilamatï juma contra juch lurchejja, kunansa jupajj pantjasi uk qhanañchir saram, [1] panimakiw parlapjjäta. Jupatï istʼätamjja, jilamarojj cheqa thakiruw kuttʼayanjjäta. Janitejj istʼañ munkani ukhajja, [2] mayniru jan ukajj paninir irpjjarusiwayam, ukhamat paya jan ukajj kimsa testigonakan qhanañchatap istʼasajj taqe kunas cheqati janicha ukajj yatisiñapataki. Jupanakar jan istʼañ munkani ukhajja, [3] congregacionar yatiyam. Janirak congregacionarus istʼañ munkani ukhajja, akapachankir jaqëkaspasa jan ukajj impuesto cobrir jaqëkaspas ukhamak uñj-jjam” (Mat. 18:15-17).

¹⁵ Uka qhepatjja Jesusajj mä sarnaqäwitwa parlarakïna (Mat. 18:23-35). Taqe ukanak liytʼasajja, Jesusajj qollqe toqeta cosasanak toqet jan waltʼayasiñanakat parlaskatapwa amuysna, ukanakat yaqhepajj akanakäspawa: engañjasin maynit qollqe apaqaña, jan ukajj qollqe maytʼasis jan kuttʼayaña. Maynir calumniañajja, mä arun ina chʼusat maynir kʼarintasin sutip qʼañuchañajj uka jan waltʼayasiñanak taypinkarakiwa.

¹⁶ Mä jilatatï jan ukajj mä kullakatï ukanak jiwas contra luratap yatstan ukat pruebanirakïstan ukhajja, janiw ancianonakan ukar jankʼak sarañasäkiti. Jan ukasti Jesusan arunakaparjamajj akwa lurañasa: nayraqatajj uka jilatampi jan ukajj uka kullakampiw parlañasa. Purapat jan waltʼayasiñ askichañwa amtañasa, janiw khitirus uka jan waltʼäwit parlañasäkiti. Ukampis Jesusan arunakaparjamajja, janiw may kutikejj jupan ukar sarañasäkiti. Jiwas contra jan wali luriritejj juchap jan reconoskani ukat janirak perdón mayiskani ukhajja, mayampiw jupamp parlirejj sarañasa. Ukham lurasatï uka jan walejj askichasjjani ukhajja, yaqhanakar jan yatiyatasat jilatasa jan ukajj kullakas wal yuspäristani, sutip jan qʼañuchatasatsa yuspärarakistaniwa. Ukhamatwa cristiano masisarojj cheqa thakir kuttʼanjjañapatak yanaptʼañäni.

¹⁷ Mä jilatas jan ukajj mä kullakas juchap reconocini, perdón mayisini, juchap askichañatak chʼamachasirakini ukhajja, janiw kunamp lurañas wakisjjaniti. Ukham jan waltʼayasiñanakjja, jachʼäkchini ukhas jan waltʼayasipki ukanakakiw askichapjjañapa.

¹⁸ Awisajj jilatasa jan ukajj kullakas janiw juchap reconociñ munkaspati, ukhaman uñjassna ukhajja Jesusan arunakaparjamajj akwa lursna: jupamp mayamp parlir sarañatakejja, mayniru jan ukajj paniniruw testigot irpassna. Jupanakajj jilataru jan ukajj kullakar yanaptʼañ amtampiw jiwasamp chik sarapjjañapa. Jupanakajja jilatana jan ukajj kullakan jan wali luratap uñjapki ukanakäpjjañapawa, ukampis janitï mä testigos utjkchi ukhajja, juchachasirimp parlkañäni ukhajj mayniru jan ukajj paniniruw ukankapjjañapatak maysna. Jupanakajj kuna jan waltʼäwtï askichañ munktan uka toqet experiencianïpjjañapawa, ukhamat jilatasa jan ukajj kullakas juch luraskapuniti janicha uk amuyañataki. Compañapkistani ukanakatï ancianöpjjani ukhajja, janiw congregacionarus jupanakajj representapkaspa ukham amuyañasäkiti, kuna laykutejj jupanakajj janiw congregacionankir cuerpo de ancianos uka taypit khitatäpkiti.

¹⁹ Kutin kutin jilatampi jan ukajj kullakamp parlatpachasa, testigonakamp istʼatpachas jan waltʼäwejj janipun askichañjamäkani, janirak ukhamak jaytañjamäkani ukhajja, ancianonakaruw yatiyañasa. Cheqansa jupanakajj congregacionan sumankañ utjañapataki, Jehová Diosar serviñ toqens jan kuna jan walis utjañapatakiw encargasipjje. Ukhamajj kunatï paski uk ancianonakar yatiyasajja, jupanakan amparaparuw jaytjjañasa, Jehová Diosarus taqe chuymaw confiyañasaraki. Janipun mayninakan pantjasitanakapajj jiwasar lanktʼasiyistpanti, janirak Diosar kusisit serviñ toqensa jan waltʼayistpanti (Sal. 119:165).

²⁰ Ancianonakajj kunapunis pasawayi ukwa sum yatjjatapjjani. Mä jilatatï jan ukajj mä kullakatï sinti jan wal jiwas contra lurawaychi, janirak uka juchapat arrepentiskchi, janirak askichañ munkchi ukhajja, inas ancianonakajj mä comité toqejj uka jucha luririrojj congregacionat expulsañ amtapjjchini. Ukhamat jilat kullakanakar jarkʼaqañataki, ukat congregacionan qʼomäñapataki (Mat. 18:17).

²¹ Yaqhep sinti jachʼa juchanakajj akanakäspawa: adulterio jucha luraña, chachapura jan ukajj warmipura ikintasiña, apostasía, ukat yaqha ukhamanaka. Ukanak luririnakajj janiw chuym ustʼayki ukan perdonatäñapakejj wakiskiti (1 Cor. 6:9, 10; Gál. 5:19-21). Uka jachʼa juchanakajj congregacionampiru Diosampiruw jan walit uñjayi, ukanakajj pasani ukhajja ancianonakaruw yatiyasiñapa (1 Cor. 5:6; Sant. 5:14, 15). Awisajj juchar purtʼaski ukajj mä ancianoruw jan wali luratap yatiyaspa. Awisasti mä jilata jan ukajj mä kullakaw kuna juchtï maynejj lurawayki uk yatiyarakispa (Lev. 5:1; Sant. 5:16). Bautisat mä Testigon jucha luratapat ancianonakajj yatipjjani ukhajja, jupanakat pä ancianonakaw uka toqet investigañ qalltapjjani. Yatjjatatarjamajj jan walin utjatap amuyapjjani, jachʼa juchapunïskatap uñachtʼayañatakis pruebanakajj utjarakini ukhajja, ancianonakajj mä comité judicial uttʼayapjjani, ukanjja kimsa ancianonakas utjañapapuniwa.

²² Ancianonakajj wal jilat kullakanakat llakisipjje, Diosar serviñan jan kuna jan walis utjañapatakiw chʼamachasipjjaraki. Ukatwa pantjasipki ukanakarojj Diosan Arupampi cheqañchapjje, Diosamp wasitat sum apasipjjañapatakis yanaptʼapjjaraki (Jud. 21-23). Ukham lurasajja, apóstol Pablojj Timoteor instruccionanak churkäna ukarjamaw ancianonakajj lurasipki, Pablojj akham sänwa: “Jakirinakarus jiwatanakarus juz[gkani], uka Cristo Jesús nayraqatana ukhamarak Dios nayraqatanwa nayajj ordensma: [...] mä suma yatichirjam cheqañcham, amuytʼayam, ewjjtʼarakim” sasa (2 Tim. 4:1, 2). Ukanak lurañatakejj ancianonakajj walja tiempo apstʼasipjje, ukampis ukanak lurapjjañapatakiw jupanakar encargasi. Uka lurañanakan chʼamachasipjjatap uñjasajj jilat kullakanakajj wal yuspärapjje, ‘wali respetompiw jupanakar uñjapjjaraki’ (1 Tim. 5:17).

²³ Mä jilatana jan ukajj mä kullakan juchapajj qhanstani ukhajja, ancianonakajj Jehová Diosamp wasitat sum apasiñapatakiw jupar yanaptʼapjjañapa. Jucha luriritï arrepentischi, ancianonakan yanaptʼaps katoqasirakchi ukhajja, censuratakïniwa. Censuratätapjja juparukiw ancianonakajj yatiyapjjaspa, jan ukajj khitinakatï jucha luratap yatipki ukanak nayraqatanwa yatiyapjjaspa. Jucha luririr censurasitapajja, jupar cheqañchañatakiwa ukat jilat kullakanakan amuyasipjjañapatakiwa (2 Sam. 12:13; 1 Tim. 5:20). Maynir censuraski ukhajja, congregacionan kuna luräwinaktï katoqkäna ukanakajj apaqasjjewa, ukhamat jakañ vidapan cheqaparjam kuns lurañapataki (Heb. 12:13). Diosar serviñan wasitat suma saytʼatäjjani ukhajja, jukʼat jukʼatwa congregacionan luräwinak mayamp katoqjjani.

²⁴ Comité judicial taypinkir ancianonakatakejja, jucha luririn arrepentisitapajj qhanaw amuyasiskaspa, ukampis congregacionankirinakar jarkʼaqañatakisa jan yaqhanak toqe jilat kullakanakan yatipjjañapatakisa, Cristianjam Jakañataki ukat Yatiyañataki tantachäwin akham sasin yatiyasiñapatakiw amtapjjaspa: “Jilata jan ukajj kullaka [suti] censuratawa” sasa.

²⁵ Yaqhep horasanakajja jucha lurirejj colerasjjakiwa, janiw yanaptʼayasiñsa munkiti, jan walsa luraskakiwa. Ukhamätapsa cheqpachapun jan arrepentisitapsa audiencia judicialajj apaski ukhaw ancianonakajj sum amuyapjjaspa (Hech. 26:20). Taqe ukanak sum amuyasajj jucha luririr expulsañaw wakisispa, ukhamat Jehová Diosar sum servipki ukanakamp jan chikachasjjañapataki. Jan wali luririnakar Diosan markapat jaqsuski ukhajja, congregacionaruw kunatï qʼañüki ukat jarkʼaqasi, janirakiw Diosan sutipas qʼañuchaskiti (Deut. 21:20, 21; 22:23, 24). Corinto markankir congregacionanjja mä cristianojj kunatï jan walïki ukwa luräna, ukatwa uk yatisajj Pablojj ancianonakar akham säna: “Uka jan wali lurir jaqerojj Supayar katuyapjjam, ukhamat kuna juchtï jupajj congregacionar apantanki uk chhaqtayañataki, ukhamarak Tatitun urupanjja suma chuymanïñajj congregación taypin utjaskakiñapataki” sasa (1 Cor. 5:5, 11-13). Ukatjja Biblian yatichäwinakap contra saytʼapkäna uka cristianonakatwa Pablojj parlarakïna, jupanakajj expulsataw uñjasipjjäna (1 Tim. 1:20).

²⁶ Kunapachatï comité judicial taypinkir ancianonakajj maynin jan arrepentisitapat expulsañ amtapjjani ukhajja, kunatsa uka amtar puriwayapjje ukwa jucha luririrojj Bibliamp sum qhanañchtʼapjjañapa. Ukatjja ancianonakajj juparojj akham sapjjañaparakiwa: ‘Jumatï ina chʼusat juchañchat amuyassta, apelañs munaraksta ukhajja, kunatsa ukham amuyta uk mä cartanwa qhan qellqtʼanipjjetasma’ sasa. Expulsatäyätawa sasin sapkani ukhat qalltasinjja, jucha lurirejj carta qellqañatakejj paqallqo urunakanikiwa. Comité judicialankirinakajj carta katoqapjjani ukhajja, superintendente de circuito jilataruw uk yatiyapjjani. Jupaw comité de apelación uka taypinkapjjañapatakejj experienciani ancianonakar ajllini, ukhamat uka ancianonakajj yaqha audiencia apapjjañapataki. Comité de apelación taypinkirinakajja, jankʼakiw yaqha audiencia apapjjañapa, carta katoqaski ukhat janiw paqallqo urunakat sipan jukʼamp urunak pasayapjjañapäkiti. Taqe ukanak askichasiñapkamajj janïraw jucha luririn expulsatätapajj yatiyasiñapäkiti. Ukañkamajja juch lurir jilatasa jan ukajj kullakas janiw tantachäwinakan comentarionak arstʼañapäkiti ni orañapäkisa, janirakiw congregacionan kuna luräwinaktï lurirïkäna ukanaksa lurjjañapäkiti.

²⁷ Apelación utjatapajja jilataru jan ukajj kullakaru respetompi uñjasitapwa uñachtʼayi, kuntï amuyki uk sañapatakis mä oportunidadaw churasiraki. Ukampis juchachasiritï comité taypinkirinakan walja kuti jawsatpachas jan audienciar uñstkani ukhajja, expulsatätapakiw yatiyasjjani.

²⁸ Juchachasiritï jan apelañ munkani ukhajja, comité judicial taypinkir ancianonakajj arrepentisiñapajj qhawqha wakiskirisa ukwa jucha luririrojj sapjjañapa, wasitat Diosan markapar kuttʼaniñapatakejj kunanaksa lurañapa uksa qhanañchapjjañaparakiwa. Ukham yanaptʼasajja qhawqsa jupar munasipjje ukwa uñachtʼayapjje, ukatjja cambiañapataki Diosan markapar kuttʼaniñapatakiw ukham lurapjje (2 Cor. 2:6, 7).

²⁹ Jan arrepentisir jucha luririr expulsañatakejja, akham sasaw yatiyasi: “[Suti] janiw Jehová Diosan Testigopäjjeti” sasa. Uka yatiyäwi istʼasajja, congregacionankirinakajj janiw expulsatampejj chikachasjjapjjañapäkiti (1 Cor. 5:11).

³⁰ Kawkïr Testigonakatï cristianöñ jan munjjapjje ukanakaruw desasociatarjam uñjasi. ‘Janiw Jehová Diosan Testigopäñ munjjti’ sasaw jupanakajj sapjjaspa, jan ukajj maynejj luratanakapampiw jan Testigöñ munjjatap uñachtʼayaspa. Sañäni, Biblia conträki uka organizacionaruw mantaspa, cheqansa ukham luratapajj Diosatakejj janipuniw akchʼas walïkiti (Is. 2:4; Apoc. 19:17-21).

³¹ Jan cristianöñ munjjapjjäna ukanakatjja, apóstol Juanajj akham sasaw qellqäna: “Jupanakajj jiwasanak taypitwa mistupjje, ukampis jupanakajj janiw jiwas kastäpkänti. Jupanakatejj jiwas kastäpjjaspäna ukhajja, jiwasamp chikäsipkaspänwa” sasa (1 Juan 2:19).

³² Jan cristianöjjañatak renunciañampi inactivor tukuñampejj janiw pachpäkiti. Inactivöpki ukanakajj janiw predikjjapjjeti. Problemanakan uñjasitapata, arknaqat uñjasitapata, jan ukajj Bibliat jan yatjjatjjatapatwa Diosar jan serviñ munjjaspati, ukhamatwa inactivor tukjjaspa. Inactivor tukupki uka jilat kullakanakarojja, ancianonakampi congregacionankir jilat kullakanakampiw Diosar serviñan yanaptʼasipkakiñapa (Rom. 15:1; 1 Tes. 5:14; Heb. 12:12).

³³ Kunapachatï maynejj jan cristianöñ munjje ukhajja, akham sasaw congregacionan yatiyasiñapa: “[Suti] janiw Jehová Diosan Testigopäjjeti” sasa. Uka qhepatjja juparojj mä expulsatarjamaw uñjasiñapa.

³⁴ Expulsatäki jan ukajj desasociatäki ukarojj readmitisispawa, ukatakejj qhawqsa arrepentisi ukajj qhanaw amuyasiñapa, jan wali luratapsa jucha luratap apanukjjatapsa qhanwa uñachtʼayañapa, Diosan amigopäñ munatapsa uñachtʼayañaparakiwa. Juchachasirin cheqpachapun arrepentisitap yatiñatakejja, ancianonakajj walja phajjsinaka, mä mara, jan ukajj jukʼamp maranakwa pasayapjjani. Ancianonakajj solicitud de readmisión carta juchachasirit katoqapjjani ukhajja, comité de readmisión ukankirinakaw jupamp parlapjjañapa. Uka comité taypinkirinakajja, cheqapunit juchachasirejj arrepentisi janicha uk uñachtʼayir pruebanakwa uñakipapjjañapa, ukjjarusti readmitipjjaniti janicha ukwa amtapjjañapa (Hech. 26:20).

³⁵ Readmisión mayki ukatï yaqha congregacionan expulsat uñjaschïna ukhajja, kawkïr congregacionarutï sarki ukan yaqha comité de readmisionaw uttʼayasiñapa, ukhamat jupamp tantachasisin kuntï mayki uk sum uñakipañataki. Uka comité taypinkir ancianonakatï expulsatäki ukar readmitiñ amtapjjchi ukhajja, kawkïr congregacionantï casopajj uñjaskäna ukankir ancianonakaruw carta de recomendación apayapjjañapa. Ukatjja paypach comité taypinkirinakaw purapat yanaptʼasis casop sum uñakipapjjañapa, ukhamat mä suma amtar puriñataki. Ukampis expulsatäki ukarojj mayampit Diosan markapar katoqasjjani janicha ukjja, juchachasirin casop nayraqat uñjapkäna uka comité de readmisión taypinkirinakaw amtapjjañapa.

³⁶ Mä expulsatatï jan ukajj mä desasociatatï cheqpachapun arrepentisitap uñachtʼaychi ukhajja, comité de readmisión taypinkirinakaw uk sum uñakipasajj readmitiñ amtapjjañapa, ukatjja readmititäjjatapajj kawkïr congregacionantï expulsat uñjaskäna ukanwa nayraqat yatiyasiñapa. Readmititäki ukatï yaqha congregacionankjjchi ukhajja, ukansa yatiyasiñaparakiwa. Akham sasaw yatiyasiñapa: “[Suti] mayampiw Jehová Diosan Testigopäjje” sasa.

³⁷ Bautisat mä qʼajjo waynasa jan ukajj qʼajjo tawaqos mä jachʼa juchar purtʼasini ukhajja, ancianonakaruw yatiyasiñapa. Ukampis kunapachatï ancianonakajj jupamp tantachasipkani ukhajja, Testigo awk taykanakapajj ukankapjjañaparakiwa. Jupanakajj janiw cheqañchatäñat wawapar jarkʼapjjañapäkiti, jan ukasti comité judicial taypinkapki uka anciano jilatanakarojj yanaptʼapjjañapawa. Uka comité taypinkir ancianonakajj juchachasirirojj jan wali luratapat cheqañchaña ukat Jehová Diosar serviñan yanaptʼañwa munapjje, cheqas jupanakajj taqe cristiano jilat kullakanakaruw ukham yanaptʼapjje. Juchachasiritï jan arrepentiskani ukhajja, expulsataw uñjasini.

³⁸ Jan bautisat mä publicadorarojja, janiw congregacionat expulsatäkaspati. Ukampis uka publicadoratï mä jachʼa jucha lurani ukhajja, nayraqatajj ancianonakaw munasiñamp ewjjtʼapjjañapa, ukhamat ‘kayunakapatak cheqa thakinak lurañapataki’. Kuna laykutejj inas jucha lurirejj Biblian mayitanakap jan sum amuykchiti (Heb. 12:13).

³⁹ Jan bautisat publicadoratï pä ancianonakan yanaptʼañ munatpachas jan arrepentiskchi ukhajja, congregacionaruw yatiyasiñapa. Akham sasaw yatiyasiñapa: “[Suti] janiw publicadoräjjeti” sasa. Ukatjja congregacionankirinakajj akapachankir mä jaqerjamaw uñj-jjapjjañapa. Niyakejjay jupar jan expulsaskchitejja, cristianonakajj wali amuyumpiw jupamp parlapjjañapa, kuns lurapjjañaparaki (1 Cor. 15:33). Predicatapat informenakapas janiw katoqasjjañapäkiti.

⁴⁰ Inas tiempompejj jucha lurirejj wasitat jan bautisat publicadoräjjañ munjjchini. Ukhamäni ukhajj pä ancianonakaw jupamp tantachasipjjani, Diosar serviñan kunjamäskisa uksa uñakipapjjarakiniwa. Mayitanakamp phoqani ukhajja, akham sasaw congregacionan yatiyasini: “[Suti] wasitatwa jan bautisat publicadoräjje” sasa.

⁴¹ Diosan markapankirinakajj wali kusisitätanwa, kuna laykutejj Diosar serviñ toqen mä paraisonksnas ukhamawa. Ukanjja Diosar serviñatakejj walja yanaptʼanakwa katoqtanjja, Biblian cheqa yatichäwinakapas wal yanaptʼarakistu. Ukhamarus Cristojj pʼeqtʼki uka organización toqew Diosajj wali sum cuidarakistu (Sal. 23; Is. 32:1, 2). Aka jan wali tiemponjja, Diosan markapankasajj wali kusisitaw jikjjatastanjja.

⁴² Jehová Diosan markapan sumankañasa, qʼom sarnaqasiñas utjaskakini ukhajja, Reinon suma yatiyäwinakapajj qhantʼaskakiniwa (Mat. 5:16; Sant. 3:18). Ukhamatwa Jehová Diosan yanaptʼapampejj walja jaqenakajj jupar uñtʼapjjani, Diosan markapamp chikaw servipjjarakini.