Perdonañwa yateqäna

 1. ¿Kunas Pedrotakejj wali llakkañänjja?

PEDROJJ Jesusan uñkattʼatapjja janipuniw armkpachänti. ¿Jesusajj jupatakejj wali chuymas ustʼatäpachänti? Janiw yatktanti, Bibliajj akham sakiwa: ‘Jesusasti kutikipstasinwa Pedror uñkatäna’ sasa (Luc. 22:61). Ukham uñkatatakiw Pedrojj kuntï lurkäna uk janipun askïtap amuyasïna. Nayar jan uñtʼiriw tuküta sasin Jesusajj siskäna ukaw phoqhasiskäna, Pedrojj janipuniw ukham lurkäti sasaw säna, munat Yatichiriparuw jan uñtʼir tuküna. Ukürojj jan walirupuniw Pedrojj purtʼasïna.

 2. ¿Kunsa Pedrojj yateqäna, ukat kunjamsa sarnaqäwipajj yanaptʼistaspa?

² ¿Pedrojj janipunit perdonatäkasapäna? Janiw ukhamäkänti. Jupajj wali iyawsäwinïtapatwa juchapat arrepentisjjäna ukat juchanak perdonañsa Jesusat yateqarakïnwa. Taqeniw uka wakiskir yatichäw yateqasiñ muntanjja. Ukham jan walir purtʼasitapatjja kunsa Pedrojj yateqäna, ukaw jiwasarojj yanaptʼistaspa.

3, 4. 1) ¿Kunsa Pedrojj Jesusar jisktʼäna, ukat kunjamätapsa amuyasïna? 2) Jaqen amuyuparjam apayasitapjja, ¿kunjamsa Jesusajj Pedror amuytʼayäna?

³ Sojjta phajjsi nayra, Capernaum markapankkasinjja, Pedrojj akham sasaw Jesusar jisktʼäna: “Tata, kunapachatejj jilajjajj kuna jan walsa luritan ukajja, ¿qawqha kutis nayajj uka juchapatjja perdonäjja? ¿Paqallq kutkamati?” sasa. Pedrojj wali khuyaptʼayasirjamaw amuyaspachäna, judionakan yupaychäwi pʼeqtʼirinakapajj kimsa kutikiw perdonaña sasaw yatichapjjerïna. Ukampis Jesusajj akham sänwa: “Janiw paqallq kuti sisksmati, jan ukasti, paqallq tunka paqallqo kuti sismawa” sasa (Mat. 18:21, 22).

⁴ ¿Jesusajj mayninakan pantjasitap jakhuñasaw sispachänti? Janiwa; Pedrojj 7 siskäna uk 77 kutïñapaw sasajja, qawqha kutïskpasa taqe chuyma munasirejj perdonañapapuniwa sañwa Jesusajj munäna (1 Cor. 13:4, 5). Uka urunakan jan sinttʼasir jaqenakajj utjkäna ukanakjamarakiw Pedrojj amuyjjäna, ukwa Jesusajj amuytʼayaskäna. Uka jaqenakajj khitir perdonasas manunak qellqasiñ cuadernorus qellqtʼasipkaspa ukhamwa lurapjjerïna. Ukampis Diosan arunakaparjam perdonañajj janiw uk sañ munkiti (1 Juan 1:7-9 liytʼasiñapawa).

 5. Perdonasirïñajj kunja wakiskiris ukjja, ¿kunapachas sum amuytanjja?

⁵ Pedrojj kamisarak ukhamänisti sasajj janiw siskänti, ukampis ¿Yatichiripan arunakapajj chuymapar purtʼpachänti? Pantjasitanakasat wal perdonayasiñ munktan ukhakiw perdonañajj kunja wakiskirisa uk amuytanjja. Jesusan jiwañap nayrajj ukaw pasäna. Jan walin uñjaskäna ukhaw Pedrojj Jesusampi perdonatañ wal munäna.

 6. Jesusajj altʼat chuymanïñ yatichkän ukhajja, ¿Pedrojj kamsänsa, ukat kunjamsa Jesusajj jupar uñjäna?

⁶ Jan armkañ arumapunïnwa. Jesusan aka Oraqen jaqjam jakäwipajj tukusjjañapänwa. Ukampis apostolonakaparojj waliw yatichañapäskäna. Amuytʼañataki, altʼat chuymanïpjjañapatakiw sum yatichäna. ¿Kunjamsa? Arkirinakapan kayunakapwa jareqäna, ukjja uywatanakakiw lurapjjerïna. Nayraqatjja, Pedrojj akham sasaw Jesusar säna: “¿Kayunakajjti jareqetäta?” sasa. Janiw jareqayasiñ munkänti ukat Jesusan qhanañchtʼataparojja, amparajamp pʼeqejamppachay jareqeta sasaw sisjjarakïna. Uk istʼasajj Jesusajj janiw coleraskänti, antisas pacienciampiw apostolonakaparojj kunatsa ukham lurañajj wakisïna ukat ukham lurasajj kuns yatichañ munäna uk qhanañchtʼäna (Juan 13:1-17).

7, 8. 1) ¿Kunjamsa Pedrojj jan amuyasis pantjasiskakïna? 2) ¿Kunjamsa Jesusajj Pedror sum uñjaskakïna?

⁷ Uka qhepatjja, khitis jupanakat jilïrinjja ukjjatwa apostolonakajj chʼajjwasipkäna. Pedrojj jupanakamp chikaw chʼajjwarakpachäna. Ukampis Jesusajj suma chuymampiw jupanakar cheqañchtʼäna ukat jupat jan jitheqtapjjatapatsa chʼamañchtʼarakïnwa. Ukampis mä jukʼampirojj jaytjapjjetätaw sasaw sarakïna. Ukat jankʼakiw Pedrojj jumamp chik jiwañajas wakischini ukhas janipuniw jaytanukkämati sänwa. Ukampis Jesusajja, jichha arumpachaw janïr wallpajj pä kuti artʼkipan nayar kimsa kuti jan uñtʼir tuküta sänwa. Ukampis Pedrojj jachʼa jachʼa tukusaw taqenis jumarojj jaytanukupkätam ukhasa, nayajj janipuniw jaytanukkämati sasaw arsuskakïna (Mat. 26:31-35; Mar. 14:27-31; Luc. 22:24-28; Juan 13:36-38).

⁸ Jesusajj wali pacienciampiw Pedror uñjäna, ukaw wali muspharkañajja. Wali llakitas jikjjataskchïnjja, pantjasir apostolonakapan aski luratanakapwa uñjaskakïna. Pedron jaytanukuñap yatkchïnsa, juparojj akham sänwa: “Nayaw jumatakejj mayta jan iyawsañamajj pistʼañapataki. Jumasti nayaru kuttanjjät ukkhajj chʼamañchtʼam jilanakamaru” sasa (Luc. 22:32). Ukham uñjatapajj wali askipuniwa. Pedrojj pantjaskchinisa, wasitatwa kuttʼanisajj taqe chuyma serviskakini sasaw Jesusajj atinisïna.

9, 10. 1) ¿Kunatsa Getsemaní cheqan Pedrojj cheqañchat uñjasïna? 2) ¿Kunsa Pedron sarnaqäwipajj uñachtʼayistu?

⁹ Mä jukʼampjjarojja, Getsemaní sat cheqanwa, Pedrojj walja kuti cheqañchatäna. Jesusajj wali llakitapuniw jikjjatasïna ukat amigonakapan yanaptʼap munäna. Ukatwa Pedroru, Jacoboru ukat Juanampirojj Diosat mayisiriw sarä, janiw ikipjjätati sasin säna, ukampis walja kutiw ikimpi atipayasipjjäna. Ukhamäkipansa, Jesusajj jupanakarojj perdonänwa. “Cheqpachansa ajayojj lurañatakejj jankʼakiwa, ukampis janchejj tʼukhawa”, sasaw jupanakat sinttʼasisajj säna (Mar. 14:32-41).

¹⁰ Ukhaw walja jaqenakajj antorchanaka, espadanaka ukat lawanakas aptʼata purintanipjjäna. Ukhajj taqe kunsa wali amuyumpiw lurapjjañapäna. Ukampis Pedrojj janiw ukham lurkänti. Jankʼakiw espadap apsusisajj Malco sat jilïr sacerdoten esclavopar jiñchup thoqoqayäna. Jesusajj janirakikiw colertʼaskänti, Pedror cheqañchasaw uka jaqer qolläna. Ukat janiw jaqemp nuwasipjjañamäkiti sasaw arkirinakapar ewjjtʼäna, uka ewjjtʼapajj jiwasatakis askikïskiwa (Mat. 26:47-55; Luc. 22:47-51; Juan 18:10, 11). Pedrojj walja kutiw pantjasïna, ukampis Jesusajj wali pacienciampiw uñjäna. Pedron sarnaqäwipajj ‘taqenis wal pantjasirïtas’ amuytʼayistu (Santiago 3:2 liytʼasiñapawa). Taqeniw Diosamp perdonatañ wal muntanjja. Ukampis uka arumajj Pedrojj jukʼamp jan walinakanwa uñjasiñapäna.

11, 12. 1) Jesusar katuntapkäna ukhajj Pedrojj jan ajjsarirïtapwa uñachtʼayäna, ¿kunatsa ukham sistanjja? 2) Arsutaparojj janiw phoqkänti sasajja, ¿kunatsa sistanjja?

¹¹ Nayar thaqhapjjchista ukhajja, apostolonakajar jan katuntapjjamti sasaw Jesusajj uka jaqenakar säna. Pedrojj Yatichiripar jan yanaptʼirjamäsajja, mayninakamp chikaw tʼijtawayjjäna.

¹² Mä jukʼampirojj Pedrompi Juanampejj janiw tʼij-jjapjjänti. Anás jilïr sacerdotëkäna ukan utap jakʼankapjjpachänwa, ukaruw nayraqat Jesusar irpapjjäna. Ukat yaqhäwjaru irpapjjäna ukhajja, Pedrompi Juanampejj “jayatakwa” arkapjjäna (Mat. 26:58; Juan 18:12, 13). Pedrojj ajjsarirïnwa sasajj janiw sisksnati. Nuwasiñatakjam wakichrantat jaqenakar arkañatakejj jan ajjsarirïñapänwa. Ukhamarus uka jaqenakat mayniruw jiñchup thoqoqayäna. ¡Ukampis janipuniw jaytanukkämati sasarakis sänjja! ¿Jiwañajas wakischini ukhas janiw jaytanukkämati siskäna uk phoqhaskänti? (Mar. 14:31.)

13. ¿Kunjamsa Cristor sum arksna?

¹³ Jichhürunakanjja, waljaniw Pedrjam Cristor ‘jayatak’ arkapjje; janiw jaqenakan uñjatäñ munapkiti. Ukampis kunjamtï Pedrojj qhepat qellqkänjja, Cristot yateqasisa ukat taqe chuyma jan ajjsaras arkasakipuniw Cristor sum arksnajja (1 Pedro 2:21 liytʼasiñapawa).

14. Jesusar taripasipkäna uka arumajja, ¿Pedrojj kawkinkänsa?

¹⁴ Pä apostolonakajj kʼachatwa Caifás sat qamiri munañan jilïr sacerdoten suma utapar puripjjäna, Jerusalén markanjja yaqha ukham suma utanakajj utjarakïnwa. Uka utanakan cuartonakapajj patior muytatäpjjänwa ukat nayräjjar punkunïpjjänwa. Punku uñjir warmejja, jilïr sacerdoter uñtʼatap laykuw Juanaruk mantayäna, ukatwa Juanajj Pedror mantayaniñapatakejj uka warmimpi parlir kuttʼäna. Niyak mantjjasajja, Pedrojj janjamakiw Juanampi chiktʼatäkänti ni Jesusarus jakʼachaskänti. Pationakwa qheparäna, ukanwa esclavonakasa uywatanakas uka thaya aruman nina jakʼan juntʼuchasisipkäna, ukäñkamaw kʼari testigonakajj Jesús contra arsuñatak mist mantasipkäna (Mar. 14:54-57; Juan 18:15, 16, 18).

15, 16. Kuntï Jesusajj Pedror siskän ukajja, ¿kunjamsa phoqhasïna?

¹⁵ Pedror mantaykäna uka tawaqojj nina qhanampejj Pedror uñtʼjjänwa, ukat akham sänwa: “Jumajj Galileankir Jesusampïskarakïyätasä” sasa. Uk istʼasajj sustjasïnwa. Jesusar jan uñtʼiriw tuküna ukat kuna toqetjjay parlsta sasaw uka tawaqor säna. Jan uñtʼayasiñatakejj punkuwjaruw saräna. Ukanjj yaqha tawaqow uñjasajj akham sarakïna: “Aka jaqejj uka Nazaretankir Jesusampirakiw sarnaqaskirïna” sasa. Pedrojj juramentompiwa: “Janiw uñtʼkti uka jaqerojja” sasin säna (Mat. 26:69-72; Mar. 14:66-68). Ukhakamajja, Pedrojj pä kutiw Jesusar jan uñtʼir tuküna, ukhaw mä wallpajj artʼpachäna; ukampis ajjsarayasiñatjja, Pedrojj janiw kuntï Jesusajj uka nayrak siskäna uk amtaskänti.

¹⁶ Pedrojj jan khitimp uñtʼayasiñatakejj chʼamachasiskakïnwa, ukampis mä qawqha jaqenakaw jupar jakʼachasipjjäna. Ukat Malco sat esclavor jiñchup thoqokaykän ukan familiapaw akham sarakïna: “¿Janit jumarojj huertonjj jupamp chik uñjksma?” sasa. Pedrojj wasitampiw juramentompi, pantjasipjjtawa, janipuniw uñtʼkti saskakïna. Parlañs janiw sum tukuykänti ukspachaw wallpajj mayamp artʼjjäna. Uka arumajj pay kutiw Pedrojj wallpar artʼir istʼjjäna (Juan 18:26, 27; Mar. 14:71, 72).

17, 18. 1) Pedrojj pantjasitap amuyasïna ukhajja, ¿kunjamsa jikjjatasïna? 2) ¿Kunsa Pedrojj amuypachäna?

¹⁷ Ukhaw Jesusajj balconar mistunïna ukat amigopar cheqakwa uñtanïna. Kunjamtï qalltan yateqktanjja, Pedrojj ukhakiw pantjasitap amuyasïna. Yatichiriparuw jan uñtʼir tuküna. Uk amuyasisaw wali llakit sarawayjjäna. Jalantirjam phajjsin qhantʼat callenakanjamaw sarjjäna. Nayras jacha mayakïtapatjja, janiw jankʼak sartirjamäkänti. Ukhaw jan kamachtʼirjamäjjasajj walpun jachäna (Mar. 14:72; Luc. 22:61, 62).

¹⁸ Ukham pantjasirejj janipuniw perdonatäkaspati sasaw maynejj amuyaspa. Pedrojj ukhamwa amuyarakpachäna. ¿Yatichiripajj perdonpachänti?

19. Yatichiripar chuyma ustʼayatapatjja, ¿kunjamsa Pedrojj jikjjatasïna, ukat kunjamatsa jan aynachtʼatap yattanjja?

¹⁹ Uka willjta alwasa, jornälpachasa kunja llakitak Pedrojj jikjjataskäna uk janiw sum amuyksnati. Jesusar walja horanak tʼaqhesis jiwir uñjasajj jachʼa juchanjamapuniw amuyaspachäna. Aka Oraqen qhep qhepa uru jakäwipan Yatichiripar llakisiyatap amuyasisajj walpun chuym ustʼayaspachäna. Ukampis janiw llakimp apayaskänti. Jankʼakiw mayni arkirinakampejj tantachtʼasïna, sasaw Bibliajj qhanañchi (Luc. 24:33). “Kamisarak ajjsarayasisin jaytanukjjañänisti” sasaw jupanakkam sasipjjpachäna, ukampis tantachtʼasisaw chuymachtʼasipjjäna.

20. Kuntï Pedrojj amtkäna ukatjja, ¿kunsa yateqassna?

²⁰ Pedron ukham tantachtʼasiñ amtatapajj wali askipunïnwa. Diosan mä yupaychiripajj kuna juchar purtʼasisas janiw llakimpik aynachtʼañapäkiti, jan ukasti wasitamp Diosar kuttʼañatakisa ukat pantjasitap askichañatakis qawqsa chʼamachtʼasi ukaw jukʼamp askejja (Proverbios 24:16 liytʼasiñapawa). Llakitäkchïnsa, Pedrojj jilat kullakanakamp tantachtʼasisaw cheqpach iyawsäwinïtap uñachtʼayäna. Llakita ukat chuymas aynachtʼatäsajja, saparstʼañak munjjsna, ukampis ukajj jukʼamp jan waliruw purtʼayistaspa (Pro. 18:1). Diosar yupaychañ toqet chʼamañchtʼasiñatakejja, jilat kullakanakasat janiw saparstʼañasäkiti (Heb. 10:24, 25).

21. Pedrojj jilat kullakanakampïtap laykojja, ¿kuna yatiyäwsa katoqäna?

²¹ Pedrojj jilat kullakanakampïtap laykuw Jesusan cuerpop chhaqhatäjjatap yatïna. Pedromp Juanampejj kawkintï Jesusajj imantatäkäna ukaruw ratuk tʼijupjjäna ukat sepultur punkojj qalamp atintatänwa. Juanajj inas waynäskatap laykojj nayr purchïna, ukampis sepultur punku jistʼarat uñjasajj janiw mantkänti. Ukat Pedrojj qaritäkchïnsa jan pächasisaw mantäna. Sepulturajj chʼusakëjjänwa (Juan 20:3-9).

22. Pedron pächasiñanakapasa chuymapan llakinakapasa, ¿kunjamsa chhaqtawayjjäna?

²² Pedrojj janiw Jesusajj jaktpachaw siskänti. Diosat jan jitheqtir warminakajj angelanakaw Jesusan jaktjjatap yatiyapjjetu sapkän ukarus janiw istʼkänti (Luc. 23:55–24:11). Ukampis uka uru tukuyarojja, pächasiñanakapasa chuymapan llakinakapasa taqpachaw chhaqtawayjjäna. ¡Jesusajj jaktjjänwa! Ukat wali chʼaman ajayöjjänwa, uk amuyapjjañapatakejj apostolonakaparuw uñstäna. Ukampis janïr jupanakar uñstkasajj mayniruw uñstäna. Apostolonak kikpaw akham sapjjäna: “Cheqapuniw Tatitojj jakatatjjatayna, Simonaruw uñstatayna” sasa (Luc. 24:34). Qhepatjja, Jesusajj ‘Cefasaruw uñstäna, ukjjarusti tunka payaniru’ sasaw Pablojj qellqarakïna (1 Cor. 15:5, MT). Cefas ukat Simón sutinakajj Pedron yaqha sutinakapänwa. Ukhamajj uka urojj sapakiskäna ukaruw Jesusajj Pedror uñstäna.

23. Juchar purtʼasipki uka jilat kullakanakajja, ¿kunatsa Pedrot amtasipjjañapa?

²³ Pedrompi Jesusampi jikisipjjatapatjja Bibliajj janiw qhanañchkiti. Munat Yatichiripar uñjasajj walpun kusispachäna, ukhamarus kunja llakitänsa ukat arrepentiskän uksa yatiypachänwa. Taqe kunat sipans Jesusamp perdonatäñwa munpachäna. Jesusajj taqe chuymaw Pedror perdonpachäna. Jichhürunakanjja, kawkïr jilat kullakanakatï juchar purtʼasipki ukanakajj Pedrot amtasipjjañapa ukat Diosajj janipuniw perdonkitaspati sasajj janiw amuyapjjañapäkiti. Jehová Diosajj “perdonañatakejj jankʼakiwa”, Jesusajj awkipjamarakïnwa (Isa. 55:7).

24, 25. 1) Galilea lamar qotankkasajja, ¿Pedrojj chawllanak katpachänti? 2) Jesusan milagrop uñjasajja, ¿kunsa Pedrojj luräna?

²⁴ Galilear sarapjjam ukanwa wasitamp jikisiñäni sasaw Jesusajj apostolonakaparojj säna. Puripjjän ukhasti, Pedrojj chawlla katuriw lamar qotar saräna, mayni apostolonakajj sarapjjarakïnwa. Pedrojj kawkhantï chawlla katusajj irnaqtʼirïkänjja, ukanwa wasitamp jikjjatasirakïna. Boten kʼirjtatapsa, oladanakan sartatap uñjasasa ukat qänanak katjjarusas kusispachänwa. Ukampis paqar arumajj janiw ni mä chawllsa katupkänti (Mat. 26:32; Juan 21:1-3).

²⁵ Willjtarojja, qota lakat mä jaqew qänanakam maysar jaqontapjjam sasin säna. Ukham lurasajj ¡153 chawllanak katsupjjäna! Khititejj jupanakar parljjayankäna ukan arupjja Pedrojj ratukiw uñtʼäna, ukatwa botet thoqoqasin qota lakakam mistunïna. Qota lakanjja, Jesusaw mä qawqha chawllanak nina sankʼar phayaskäna, ukat jupat jan jitheqtir amigonakaparuw churarakïna. Ukatjja Pedrompiw parltʼarakïna (Juan 21:4-14).

26, 27. 1) ¿Kunsa Jesusajj Pedror kimsa kut jisktʼäna? 2) ¿Kunjamsa Jesusajj taqe chuyma perdonatap Pedror uñachtʼayäna?

²⁶ Walja chawllanak katsupkäna uk uñachtʼayasajja, Jesusajj akhamwa Pedror jisktʼäna: “¿Akanakat sipansa jukʼampit munista?” sasa. Jesusar munasiñat sipansa, ¿Pedrojj chawlla katuñti jukʼamp munpachäna? Uka urunakakiw Pedrojj kimsa kuti Jesusar jan uñtʼir tuküna. Jichhasti Jesusajj kimsa kutiw Pedrorojj “¿nayaru munasistati?” sasin mayni apostolonak jakʼat jisktʼäna, Pedrosti jïsa munasmawa sasaw säna. Yatichiripajj uk uñachtʼayañapwa mayïna. ¿Kunjamatsa? Diosan luräwinakap nayrar uchasa, Criston uwijitanakaparu, mä arunjja, arkirinakapar sum uñjasa (Luc. 22:32; Juan 21:15-17).

²⁷ Awkijatakisa nayatakis juman luräwinakamajj askipuniwa sasaw Jesusajj Pedror amuytʼayäna. Jesusan pʼeqtʼat tama taypinjja, wal irnaqtʼañapäna. ¡Taqe chuymaw Jesusajj Pedror perdonäna! Jesusan khuyaptʼayasitapajj Pedron chuymapsa chʼalljjtaypachänwa.

28. ¿Kunjamsa Pedrojj kuntï sutipajj sañ munkäna ukamp phoqhäna?

²⁸ Walja maranakaw Pedrojj luräwip taqe chuyma phoqhawayäna. “Arkirinakajaruw chʼamañchtʼäta” sasin Jesusajj janïr jiwkasin säna uksa phoqhawayänwa. Pacienciampi ukat munasiñampiw Criston uwijanakap uñjäna. Jesusasti Simonarojj Pedro sasaw sutiyäna (ukajj “qarqa” sañ muni), uka sutiparjamaw taqe jilat kullakanakarojj yanaptʼäna, chʼollqhe, atiniskaña ukhamänwa. Ukaw jupan qellqat pä cartapan amuyasi, uka qellqatapajj Bibliankiwa. Uka qellqatanakaw kuntï Jesusajj Pedror yatichkäna uk jan armtʼasitap uñachtʼayi. Pedrojj perdonañwa yateqäna (1 Pedro 3:8, 9; 4:8 liytʼasiñapawa).

29. ¿Kunjamsa Pedron iyawsäwipata ukat Yatichiripan khuyaptʼayasiñapat yateqassna?

²⁹ Jiwasajj perdonañ yateqasiñasarakiwa. ¿Diosarojj sapürut pantjasitanakasat perdón mayistanjja? ¿Diosajj pantjasitanakaj janiw amtasjjaniti sasinti Jupar taqe chuyma atinistan? ¿Mayninakarojj perdontanti? Ukhamtï lurañänejja, Pedron iyawsäwipata ukat Yatichiripan khuyaptʼayasiñapatwa yateqasisktanjja.