Jesusajj lanktʼayañampita juchampita parläna

Arkirinakapajj kunjam chuymanïpjjañapänsa ukwa Jesusajj yatichäna. Jupanakajj wawanakjamäpjjañapänwa. Wawanakajja humilde chuymanïpjjewa, janirakiw mayninakat sipansa jilïrïñ munapkiti. Ukhamajj discipulonakajj wawanakjam chuymanïsawa Jesusat yateqasitapjja uñachtʼayapjjaspäna (Mateo 18:5).

Apostolonakajj khitis jilïrejja sasinwa jupanakkam jiskhisipjjäna. Ukhamasti Jesusan arunakap istʼasajj yateqapjjañapänwa. Apóstol Juanajja kunarakis pasaskäna uka toqetwa parlañ qalltarakïna, akham sasa: “Mä jaqeruw uñjapjjta, jupajj sutim aytasisaw demonionak alissuskäna. Jiwasamp chik jan sarnaqatap laykojja, janiw uk lurañamäkiti sasaw jarkʼapjjta” sasa (Lucas 9:49).

Apostolonakakiw usutanak qollapjjañapa, demonionaksa alissupjjañapa sasin inas Juanajj amuychïna. Ukhamächïna ukhajja, ¿kunjamsa uka judiojj demonionakar alissuskäna? Uka jaqejj janiw Jesusampisa ni apostolonakapampis sarnaqkänti, ukhamajj janiw milagronak lurañapäkiti sasaw Juanajj amuypachäna.

Jesusasti Juanarojj sänwa: “Jan jarkʼapjjamti, khititejj nayan sutij-jjar mä milagro lurki ukajja, janiw jankʼakejj nayjjat jan walinak parlkaspati. Khititejj jan jiwas conträki ukajj jiwasampiwa. Cheqpachapuniw sapjjsma, kawkïr jaqetï Cristor arkapjjatam laykojj umtʼañatak mä vasor um wajjtʼapjjätam ukajja, janiw kunjamatsa bendicionap aptʼaskaniti” sasa (Marcos 9:39-41).

Ukhamasti, Jesús toqet saytʼasiñatakejja janiw Jesusampi chikapun sarnaqañajj wakiskänti. Janïraw uka tiempon cristiano congregacionajj uttʼayatäkänti. Uka jaqejj janis Jesusamp sarnaqkchïnjja, janiw jupa conträkänti, janirakiw kʼari religionarus yanapkänti. Antisas Jesusaruw confiyäna, ukatwa Jesusajj “janiw kunjamatsa bendicionap aptʼaskaniti” sasin säna.

Apostolonakatï luratanakampi jan ukajj arunakapampi uka jaqer lanktʼasiyapjjaspäna ukhajja janipuniw walïkaspänti. Jesusajj sänwa: “Nayar confiyir jiskʼanakat mayniru lanktʼayki uka jaqetakejja, jukʼamp walïspawa asnojj muyuyki uka molino qalampi kunkat chinuntasin qotar jaqontatäñapajja” sasa (Marcos 9:42). Ukatjja kunatï maynir lanktʼasiykaspa uk apanukupjjañapatakiw ewjjarakïna, mä ampararu, mä kayuru, jan ukajj mä nayraru uñtasitäskpasa uk apanukupjjañamaw sasaw säna. Ukatsti ‘walïspaw jan amparani, jan ukajj jan kayuni, jan nayrani Diosan Reinopar mantañajja, Gehenar phoqatpach sarañat sipansa’ sasaw Jesusajj säna. Jerusalén jakʼankki uka Hinón Vallew “Gehena” sasin uñtʼatäna. Ukanwa basuranak phichantapjjerïna, apostolonakajj uk uñjapjjerïpachänwa. Ukhamasti Gehena sasinjja wiñayatak tʼunjatäña sañ munatap amuyapjjpachänwa.

Jesusajj akham sasaw apostolonakar ewjjtʼarakïna: “Jumanakajj janipun aka jiskʼanakat maynirus jiskʼachapjjamti. Nayajj sapjjsmawa, alajjpachankir angelanakapajj alajjpachankir Awkijan ajanup uñjasipkapuniwa” sasa. ¿Qhawqsa Awkipajj ‘uka jiskʼanakar’ munasïna? Jesusajj mä ovej chhaqayir jaqetwa parläna, uka jaqejj 100 ovejanakanïnwa. 99 ovejanakap jaytawayasajj chhaqat mä ovejap thaqeriw saräna, uka ovejap jikjjatasajj walpun kusisïna. Jesusasti saskakïnwa: “Alajjpachankir Awkijatakejj ukhamarakiwa, jupajj janiw aka jiskʼanakat maynin chhaqañapsa munkiti” sasa (Mateo 18:10, 14).

Ukatjja discipulonakajj khitis jilïrejja sasin jiskhisipkäna uk amtasaw Jesusajj akham sasin ewjjtʼpachäna: “Jumanakajj jayunïpjjam, maynit maynikamas sumankapjjarakim” sasa (Marcos 9:50). Jayojja manqʼar sumachiwa. Ukhamajja arunakapajj jayunïkaspas ukhamäñapänwa, ukhamatwa chʼajjwañ utjayañat sipansa sumankañ utjayapjjaspäna (Colosenses 4:6).

Jan waltʼayasiñanak utjipan kunsa lurapjjañapäna uka toqetwa Jesusajj akham sasin ewjjtʼäna: “Jilatamatejj juchar purini ukhajja, kunansa jupajj pantjasi uk qhanañchir saram, panimakiw parlapjjäta. Jupatejj istʼätam ukhajja, cheqa thakir kuttʼaniñapatakiw jilatamar yanaptʼäta. Janitejj istʼañ munkani ukhajja, mayniru jan ukajj paninir irpjjarusiwayam, ukhamata paya jan ukajj kimsa testigonakan qhanañchatap istʼasin taqe kunas qhanstañapataki. Jupanakar jan istʼañ munkani ukhajja, congregacionar yatiyam” sasa. Mä arunjja jilïr irpirinakaruw yatiyapjjañapäna, jupanakaw juzgañataki uttʼayatäpjjäna. Ukhampachas jan istʼañ munkaspäna ukhajja, ¿kunas pasaspäna? Jesusajj saskakïnwa: “Akapachankir jaqëkaspasa jan ukajj impuesto cobrir jaqëkaspas ukhamak uñj-jjam” sasa. Judionakajj janiw uka jaqenakampejj chikachasipkänti (Mateo 18:15-17).

Congregación uñjirinakajja Diosan Aruparjamaw kunsa lurapjjañapäna. Mä juchanirutï juchañchaña cheqañchaña wakisitap amuyapjjchïna ukhajja, ‘alajjpachanjja chinuntatäjjañapänwa’. Ukampis maynirutï jan juchanïtap amuyapjjchïna ukhajja, ‘alajjpachan jararatäjjañapänwa’. Uka ewjjanakajja cristian congregacionajj uttʼayasiñapäkäna ukhaw yanaptʼañapäna. Uka tantachäwinakat parlkasajj Jesusajj sänwa: “Kawkintï paninis jan ukajj kimsanis nayan sutij-jjar tantachasipkejja, nayajj uka taypinkaraktwa” sasa (Mateo 18:18-20).