Bautisir Juanaw thaki wakichäna

Jesusajj 12 maranïkasina templon yatichirinakar jisktʼkäna uka tiempotjja, 17 maranakaw pasjjäna. 29 maran qallta phajjsinakäjjänwa. Waljaniw Juan chachat parlapjjäna, jupajj Jesusan familiarapänwa. Juanajj Jordán Jawirat inti jalsu toqenkir markanakanwa Diosan arunakap yatiyaskäna.

Juanan arunakapasa isisitapasa musparkañänwa. Isipajj camello tʼawrat luratänwa, wakʼantatäkäna uka cinturonapasti lipʼichit luratarakïnwa. Jupajj tʼiju tʼijunaka, wasaran utjki uka miskʼinakwa manqʼäna. Ukatjja akham sasaw yatiyäna: “Arrepentisipjjam, alajjpachankir Reinojj jakʼankjjewa” sasa (Mateo 3:2).

Kuntï Juanajj yatiykäna ukajj jaqenakar wal kusisiyäna, waljaniw arrepentisiñ wakisitap amuyasipjjäna, mä arunjja jan wali luräwinakap apanukupjjañapänwa, amuyunakapsa jakäwinakapsa mayjtʼayapjjañapänwa. Juanan ukarojj ‘Jerusalén markata, taqe Judeata, Jordán Jawir jakʼankir taqe markanakatwa sarapjjäna’ (Mateo 3:5). Juanan ukar saririnakajj waljaniw arrepentisipjjäna, jupanakarojj Jordán Jawiranwa bautisarakïna, ¿kunatsa?

Juanan bautisatapajj jaqenakan taqe chuyma arrepentisipjjatapwa uñachtʼayäna, jupanakajj Leyinak phoqañataki Diosampi pacto lurapkäna uka contraw juchachasipjjäna, ukatwa arrepentisipjjañapäna (Hechos 19:4). Ukhamarus janiw taqenejj bautisasiñatak suma chuymanïpkänti. Kunapachatï religión pʼeqtʼirinakasa, fariseonakasa, saduceonakasa Juanan ukaru sarapjjäna ukhajja, Juanajj “asirun wawanakapa” sasaw jupanakar säna. Ukatjja sarakïnwa: “Jumanakatï arrepentisipjjstajja, luratanakampi uñachtʼayapjjam. Janiraki jumanakajj ‘Abrahanan wawanakapäpjjtwa’ sasajj chuymanakaman sapjjamti. Nayajj sapjjsmawa, Diosajj aka qalanakatsa Abrahanatakejj wawanak sartayaspawa. Hachajj arbolanakan saphip jakʼan aynoqatäjjewa. Jan suma achunak achoqer taqe arbolanakajj apsutäniwa, ninar jaqontatarakïniwa” sasa (Mateo 3:7-10).

Juanan arunakapajj wali chʼamanïnwa, jaqenakajj jupar wal istʼapjjäna, jupajj waljanirurakiw bautisäna. Ukatwa sacerdotenakampiru levitanakampiru, “¿jumajj khitïtasa?” sasin Juanar jisktʼapjjañapatak khitapjjäna.

Juanajj “janiw nayajj Cristökti” sasaw säna.

“¿Ukhamajj khitïtasa? ¿Eliasätati?” sasaw jupar jisktʼapjjarakïna.

Juanajj sarakïnwa: “Janiw jupäkti” sasa.

Sacerdotenakampi levitanakampejj “¿Profetätati?” sasaw jisktʼapjjarakïna. Ukham sasinjja, mä jachʼa Profetaw jutani sasin Moisesajj siskäna uka toqetwa parlasipkäna (Deuteronomio 18:15, 18).

Juanajj “¡janiwa!” sasaw säna.

Mayamp jisktʼasipkakïnwa: “¿Khitïtasa? Sapjjetaya, ukhamat khitanipkitu ukanakar yatiyapjjañajataki. ¿Juma pachpat kamstasa?” sasa. Juanasti sarakïnwa: “Khititejj wasaran ‘Jehová Diosan thakip cheqaptayapjjam’ sasin arnaqaski ukajj nayätwa, kunjamtï Isaías profetajj siskäna ukhama” sasa (Juan 1:19-23).

“Ukhamajj jan Cristökasasa, ni Eliasäkasasa, ni Profetäkasasa, ¿kunatarak bautistasti?” sasaw jisktʼapjjäna. Uk satasti Juanajj sarakïnwa: “Nayajj umampiw bautista. Jan uñtʼapkta ukajj jumanak taypin saytʼatäskiwa. Jupajj nayan qhepaj jutaski” sasa (Juan 1:25-27).

Ukanak sasinjja, ‘suma chuymani jaqenakan Mesiasar iyawsapjjañapatakiw mä thaki wakichaskta’ sañwa munäna. Uka Mesiasaw jutïrinjja Reyit uttʼayatäñapäna. Juanajj Mesiasat akham sänwa: “Nayjjar jutki ukajja, nayat sipansa jukʼamp chʼamaniwa, janiw jupan wiskhup jararañas nayar waktʼkituti” sasa (Mateo 3:11). Juanajj saskakïnwa: “Khititejj nayan qhepaj jutki ukajja, nayat sipans nayrankjjewa, jukʼamp nayraw jupajj nayat sipans utj-jjäna” sasa (Juan 1:15).

Ukhamasti Juanajj “arrepentisipjjam, alajjpachankir Reinojj jakʼankjjewa” sasin yatiykäna uka arunakajj cheqäskapunïnwa (Mateo 3:2). Jehová Diosan ajllit Reyipajja, mä arunjja Jesucristojj niyaw Diosan arunakap yatiyañ qalltañampïskäna, ukwa Juanajj taqenir yatiyaskäna.