“Jupajj jan uñachtʼäwimpejj janipuniw parlirïkänti”

1-3. 1) Jesusan discipulonakapajj ¿kunanaksa Yatichiripat yateqapjjäna? 2) Yatichäwinakapat jan armasipjjañapatakejj ¿kunjamsa Jesusajj yatichirïna? 3) ¿Kunatsa uñachtʼäwinakamp yatichat arunakajj jan armañjamäki?

JESUSAMP chik predikir sarapkäna uka discipulonakajja, Jachʼa Yatichiripat waljanakwa yateqapjjäna. Jupanakajja Jesusarojj Diosan Arupat sum qhanañchiri, cheqa yatichäwinak sum qhanstayirwa uñjapjjäna. Ukat kuntï yateqapkäna ukanakjja, pʼeqenakaparu ukat chuymanakaparuw sum imjjasipjjäna, kuna laykutejj Jesusan suma arunakapajj janïraw qellqatäkänti.a Ukatwa Jesusajj yatichäwinakapat jan armasipjjañapatakejj fácil amtkay jupanakar yatichirïna. ¿Kunjamsa uk lurirïna? Jupajj uñachtʼäwinakampiw yatichkasajj wali sum amuytʼayirïna.

² Chuymar purtʼkir uñachtʼäwinakajja, janiw fácil armañjamäkiti. Uka toqet parlkasajja, mä qellqerejj akham siwa: “Uñachtʼäwinakajja, jaqenakarojj wali sumwa yanaptʼi, mä sarnaqäw uñjapkaspas ukham amuytʼapjjañapatakiw yanaptʼaraki” sasa. Kunapachatï mä sarnaqäwi uñjksnas ukham amuytʼtan ukhajja, facilakwa mä yatichäw entiendtanjja, jan amuykañ yatichäwinaksa sumwa entiendiraktanjja. Ukhamarus uñachtʼäwinakamp parlat arunakajj chuymaruw purtʼasi, walja tiempo mä yatichäwi amtaskakiñatakis yanaptʼasirakiwa.

³ Aka oraqenjja, janiw Jesusjam suma yatichirejj utjawaykiti, jupakiw uñachtʼäwinakampejj wali sum yatichawayi. Ukatwa jichhürkamajj jupan uñachtʼäwinakap amtaskaktanjja. ¿Kunatsa Jesusajj uñachtʼäwinakampipun yatichirïna? ¿Kunatsa uñachtʼäwinakapajj jan armkañäpachäna? ¿Kunjamsa jiwasajj uñachtʼäwinakamp yaticharaksna?

4, 5. ¿Kunatsa Jesusajj uñachtʼäwinakamp yatichirïna?

⁴ Jesusajj pä wakiskir razonatwa uñachtʼäwinakamp yatichirïna sasaw Diosan Arupajj qhanañchi. Nayraqatajja, Jesusajj kuntï lurkäna ukampejj mä profecía phoqaskäna. Uka toqet Mateo 13:34, 35 textojj akham siwa: “Taqe ukanakjja, uñachtʼäwinakampiw Jesusajj jaqenakar parläna. Cheqansa jupajj jan uñachtʼäwimpejj janipuniw parlirïkänti. Ukhamatwa kuntï profetajj siskäna ukajj phoqasïna, jupasti akham sänwa: ‘Nayajj uñachtʼäwinakampiw arsü’” sasa. Uka profecía arunakjja, Salmo 78:2 qellqeriw arsüna. Jupajj janïr Jesusajj naskäna ukhaw Diosan espíritu santopamp amuytʼayatajj uka profecía qellqäna. Ukhamasti, ‘Mesiasajj uñachtʼäwinakampiw yatichani’ sasajj walja maranak nayraw Jehová Diosajj qhanañchjjäna. Cheqas Jehová Diosatakejj uñachtʼäwinakamp yatichañajj wali importantewa.

⁵ Maysa toqetjja, ‘jan kuns chuymanakapar katoqasiñ munapkäna’ ukanakat parlañatakiw Jesusajj uñachtʼäwinakamp yatichirïna (Mateo 13:10-15; Isaías 6:9, 10). Jaqenakan chuymanakapan kunanakas utjäna uk ¿kunjamsa Jesusajj qhanstayirïna? Awisajja, istʼirinakapan jisktʼanak lurapjjañapatakiw Jesusajj uñachtʼäwinakamp yatichirïna. Ukampis humilde chuymaninakakiw juparojj jisktʼapjjerïna, jachʼa jachʼa tukurinakajj janiw jisktʼañ munapjjerïkänti (Mateo 13:36; Marcos 4:34). Ukhamajj Jesusan uñachtʼäwinakapjja, humilde chuymanïpkäna ukanakakiw sum amuyapjjäna, jachʼa jachʼa tukurïpkäna ukanakajj janiw kuns amuyapkänti.

 6. Jesusan uñachtʼäwinakapajj ¿kunatakis jaqenakar yanaptʼarakïna?

⁶ Ukhamarus Jesusan uñachtʼäwinakapajja, jaqenakarojj jukʼamp istʼañ munapjjañapatakiw yanaptʼäna, ukatjja kuntï istʼapkäna uk uñjapkaspas ukham amuyapjjañapatakiw yanaptʼarakïna. Ukat kunjamtï aka capítulo qalltan uñjaniwayktanjja, Jesusan uñachtʼäwinakapajj kuntï istʼapkäna uk jan armapjjañapatakiw istʼirinakapar yanaptʼäna. Kunjamtï Mateo 5:3 al 7:27 textonakan qellqatäkejja, Jesusajj Qollun Yatichkäna ukhajj walja uñachtʼäwinakatwa parläna. Yatjjattʼat mä jaqerjamajja, Jesusajj Qollun Yatichkäna ukhajj 50 jila uñachtʼäwinakwa aytäna. Jiwasajj uka arunak mä 20 minutonakanwa liytʼsna, ukhamarus mä minutonjja kimsa uñachtʼäwinakwa liytʼsna. Cheqas Jesusatakejj uñachtʼäwinakamp yatichañajj wali importantepunïnwa.

 7. ¿Kunatsa Jesusjam uñachtʼäwinakamp yatichañasa?

⁷ Jiwasajj Jesusan arkirinakapjamajja, jupat yateqasisaw uñachtʼäwinakamp yatichañasa. Kunjamtï suma ingredientenakamp phaytʼat manqʼajj wali sumäkejja, ukhamarakiw suma ajlltʼat uñachtʼäwinakajj jaqenakan chuymapar purtʼaspa, yamas Biblian wali importante yatichäwinakap fácil amuytʼañatakiw mayninakar yanaptʼaspa. Jichhajj kunatsa Jesusan uñachtʼäwinakapajj chuymar purtʼkirïna uka toqetwa yatjjataskañäni, ukjjarojja kunjamsa jiwasajj uñachtʼäwinakamp wali sum yatichsna uka toqetwa yatjjataskarakiñäni.

8, 9. ¿Kunjamsa Jesusajj uñachtʼäwinakamp yatichirïna, ukat kunatsa uka uñachtʼäwinakajj chuymar purtʼkirïna?

⁸ Kunapachatï Jesusajj yatichirïkäna ukhajja, fácil amuykañ uñachtʼäwinakampiw istʼirinakapar yatichirïna. Ukhamatwa jaqenakajj Jesusan uñachtʼäwinakap istʼasajj niyas uñjapkaspa ukham amuytʼapjjerïna, ukhamarus uka uñachtʼäwinakajj Biblian yatichäwinakap sum amuytʼañatakiw yanaptʼarakïna. Sañäni, mä kutejja Jesusajj jamachʼinakata ukat lirio panqaranakatwa discipulonakapar parläna. Jamachʼinakajj “janiw phawapkisa, ni yawipkisa” ukat lirio panqaranakajj “janiw chʼam tukusin trabajipkiti, ni qapupkarakisa” sasaw säna. Ukham sasajj discipulonakaparojj ak sañwa munaskäna: ‘Kunjamtï Diosajj jamachʼinakarusa panqaranakarus sum uñjkejja, ukhamarakiw jumanakarojj sum uñjapjjätam. Ukhamasti, Diosan Reinopsa kunatï Diosatakejj cheqapäki uks nayraqat thaqasipkakim’ sasa (Mateo 6:26, 28-33).

⁹ Maysa toqetjja, Jesusajj chuymar purtʼkir uñachtʼäwinakampiw yatichirïna. Ukatakejj pä uñachtʼäwinak mayar apthapisaw amuytʼayirïna. Sañäni, mä kutejj discipulonakaparojj akham sänwa: “Jumanakaw aka mundon qhanapäpjjtajja” sasa. Ukham sasajja, jumanakajj parlatanakamampis luratanakamampis Diosan Arupan cheqätapwa qhanstayapjjasma, mayninakarus Jehová Diosar jachʼañchapjjañapatakiw yanaptʼapjjarakisma sañwa munaskäna (Mateo 5:14-16). Ukat Jesusajj akham sasaw jupanakar sarakïna: “Jumanakaw aka oraqen jayupäpjjtajja” sasa. Yaqha kutinsti “nayaw uvas alïtjja, jumanakajj ramanakäpjjtawa” sasaw sarakïna (Mateo 5:13; Juan 15:5). Cheqansa, Jesusajj kuna uñachtʼäwinakattï parlkäna ukajj chuymar purtʼkiri fácil amuykayänwa.

10. Uñachtʼäwinakampejj kunjamsa yatichsna uk qhanañchtʼam.

¹⁰ ¿Kunjamsa jiwasajj uñachtʼäwinakamp yaticharaksna? Yatichkasajj janiw jan amuyañjam chʼama uñachtʼäwinakat parlañasäkiti, jan ukasti fácil amuykañ uñachtʼäwinakampiw yatichañasa. Maynirojj jiwatat jaktañ utjatapats yatichksna ukham amuytʼañäni. Jehová Diosatakejj jiwatanakar jaktayañajj janiw chʼamäkiti sasin qhanañchañatakejja, ¿kuna uñachtʼäwimpis sum amuytʼaysna? Bibliajja jiwañajj iktʼañampi saskaspas ukhamwa qhanañchi, ukhamajj inas maynirojj akham sissna: “Kunjamtï maynirojj facilak ikit sartayksnajja, ukhamarakiw Diosajj jiwatanakar facilak jaktayaspa” sasa (Juan 11:11-14). Maysa toqetjja, wawanakan kusisit jakasipjjañapatakejj munasiñamp uñjañaw wakisi sasin qhanañchañatakejja, ¿kuna uñachtʼäwimpis sum amuytʼaysna? Bibliajj wawanakat parlkasajja, “olivo qoqat chʼojjñatatir jiskʼa alinakar” uñtasitäpjjewa sasaw qhanañchi (Salmo 128:3). Ukhamajj inas maynirojj akham sissna: “Kunjamtï plantanakajj lupimp umamp wal necesitapkejja, ukhamarakiw wawanakajj munasiñampi sum uñjatäñ necesitapjje” sasa. Jiwasatï fácil amuykañ uñachtʼäwinakamp yatichañäni ukhajja, mayninakajj kuna toqetsa parlasktan uk sumwa amuyapjjani.

11. Jesusajj kunanaktï jiskʼäkasin uñjkäna uka uñachtʼäwinakampejj ¿kunjamsa jaqenakarojj yatichirïna?

¹¹ Kunanaktï jaqenakajj sapür lurapjjerïkäna ukarjam apstʼat uñachtʼäwinakampiw Jesusajj yatichirïna. Cheqas Galilean jilskäna ukhajja, jaqenakajj kunanaktï lurapjjerïkäna ukanakat waljanakwa yateqäna. Jiskʼäkäna ukhajj kunanaksa uñjpachäna uka toqet amuytʼañäni. Jupajj walja kutiw mamaparojj grano qhonir uñjpachäna, walja kutirakiw masar levaduramp uchir uñjpachäna. Ukatjja mamapar michachuwa naktayirsa jan ukajj utap pichthapirsa uñjarakpachänwa (Mateo 13:33; 24:41; Lucas 15:8). Maysa toqetjja, chawlla katurinakajj kunjamsa qänanakap (redenakap) Galilea qotar jaqontapjjäna uk walja kutiw uñjpachäna (Mateo 13:47). Ukatjja walja kutirakiw plazan anataskir jiskʼa wawanakar uñjpachäna (Mateo 11:16). Ukampis Jesusajj janiw uñachtʼäwinakapan ukanakatak parlkänti, jan ukasti yapunak lurañatsa, casarasiñ fiestatsa, grano yapojj kunja sumas lupimpejj poqori ukanakats parlarakïnwa (Mateo 13:3-8; 25:1-12; Marcos 4:26-29).

12, 13. Jesusajj samaritano jaqet parlkäna ukhajja, ¿kunatsa Jerusalenat Jericó markar saraqer thakit parläna?

¹² Jaqenakajj kuntï sum uñtʼapkäna uka uñachtʼäwinakampipuniw Jesusajj sum yatichirïna. Sañäni, suma chuyman samaritano jaqet parlkasajj akham sänwa: “Mä jaqew Jerusalén markat Jericó markar saraqaskäna. Lunthatanakaw jupar jaljjatasin qʼal lluchʼsupjjäna, nuwjapjjarakïnwa, niya jiwirjam jaytjasaw sarjjapjjäna” sasa (Lucas 10:30). Jesusajj kuntï yatichañ munkäna uk qhanstayañatakejja, jaqenakajj kawkïr thaktï sum uñtʼapkäna uka toqetwa parläna, ukatwa “mä jaqew Jerusalén markat Jericó markar saraqaskäna” sasin säna. Uka toqet parlkäna ukhajja, jupajj Judea markankaskänwa, Jerusalén markas janirakiw jayankkänti. Ukhamajj sumwa istʼirinakapajj uka thak uñtʼapjjäna, sapak sarir jaqenakas kuna jan walinakansa uñjasipjjerïna uks yatipjjarakïnwa, kuna laykutejj lunthatanakajj jamas lugaranakan imantasisaw akatjamat atacapjjerïna.

¹³ Jesusajj uka thakin kunanakas pasäna uka toqet parlkasajja, akham sarakïnwa: “Mä sacerdotew uka thak saraqaskarakïna, uka jaqer uñjasajj maysa toqe jupajj muytʼjjäna. Ukhamarakiw mä levitajj uka cheq jutäna. Uka jaqer uñjasajja, maysa toqe jupas muytʼarakïna” sasa (Lucas 10:31, 32). Sacerdotenakajj Jerusalenankir templonwa trabajipjjäna, levitanakasti jupanakaruw yanapapjjarakïna. Ukampis templon jan trabajipkäna ukhajja, jupanakat waljanejj Jericó markaruw uka thaknam saraqapjjerïna, kuna laykutejj Jericó markajj janiw Jerusalenat jayankkänti, jan ukasti 23 kilometronak sarañankakïnwa. Ukhamasti, sacerdotenakasa levitanakas uka thak pasapjjapunirïnwa. Ukatjja Jesusajj kawkïr jaqettï parlkäna uka jaqejj Jerusalenatwa “saraqaskäna” sasaw säna, ukham satapajja istʼirinakapatakejj wali qhanänwa. Kuna laykutejj Jerusalén markajj Jericó markat sipans wali altonkänwa, ukhamajj taqe jaqenakaw ‘Jerusalenat saraqapjjerïna’.b Jesusan ukham parlatapajja, kunjamsa istʼirinakapan chuymapar purtʼañ munäna uka toqet llakisitapwa uñachtʼayistu.

14. Mä uñachtʼäwit parlañatakejja, ¿kunjamsa jiwasajj istʼirinakasat llakisitas uñachtʼaysna?

¹⁴ Kunapachatï mä uñachtʼäwit parlañ munkañäni ukhajja, istʼirinakasajj kunanaksa sum uñtʼapjje uka toqetwa amuytʼañasa. ¿Kunjamsa uk lursna? Nayraqatajja istʼirisajj qhawqha maranisa, kuna markat jutirisa, kuna familiat jutirisa, kunansa trabaji, wawanakaniti janicha, kunanakas utapan uñjasi, kunanakampis kusistʼi jan ukajj kuna manqʼañanakanisa uka toqenakatwa amuytʼañasa. Sañäni, yapuchañata jan ukajj yapu apthapiñat parlañajj janiw mä jachʼa markan sum amuyaskaspati. Ukatwa istʼirinakasajj kunanaksa sapürojj lurapjje, kunanaksa sum uñtʼapjje uka toqenakat amuytʼañasa, ukhamatwa suma uñachtʼäwinakampejj chuymar purtʼkir yatichañäni.

15. ¿Kunjamatsa Jesusajj Jehová Diosan luratanakap sum uñtʼäna?

¹⁵ Jesusajj uñachtʼäwinakapan plantanakata, animalanakata, juntʼu tiempota, thaya tiempota ukat yaqha ukhamanakatwa parläna, kuna laykutejj ukanak jupajj sum uñtʼäna (Mateo 16:2, 3; Lucas 12:24, 27). ¿Kawkjansa Jesusajj taqe ukanak yateqäna? Galilean jilskäna ukhaw Diosan luratanakapat waljanak yateqäna, kuna laykutejj mä kun uñjasajj wal jupajj lupʼirïna. Ukatjja akwa amtañasaraki: Diosan ‘taqpach luratanakapatjja jupaw nayrïrejja’, ukhamarus “suma yatjjattʼat mä trabajirjamaw” Diosarojj taqe kun lurañan yanaptʼäna (Colosenses 1:15, 16; Proverbios 8:30, 31). Ukatwa Jesusajj Jehová Diosan luratanakap wali sum uñtʼäna. Kuntï yatkäna ukanakampejj kunjamsa jupajj wali sum yatichäna uk jichhajj uñjañäni.

16, 17. 1) Jesusajj ovejanakar sum uñtʼäna sasajj ¿kunatsa sissna? 2) ¿Cheqpachapunit ovejanakajj awatiripan arup uñtʼapjje? Uk mä uñachtʼäwimp qhanañchtʼam.

¹⁶ Amuytʼañataki, Jesusajj “suma awatirejj nayätwa” ukat ‘ovejanakajj’ arkirinakajäpjjewa sasaw säna. ¿Kunatsa ukham säna? Ovejanakajj kunjamäpjjesa uk jupajj sum yatïna, kunjamsa awatirimpi ovejanakampejj apasipjje uks yatirakïnwa. Kuna laykutejj uka tiempon utjkäna uka ovejanakajja, awatiriparojj wal confiyapjjäna, kawksarus anakiyasipjjakirïnwa, jan jitheqtasaw awatiripar arkapjjarakïna. ¿Kunatsa ovejanakajj awatiripar arkapjjerïna? Jesusan arunakaparjamajja, ovejanakajj “awatirin arup uñtʼapjjatap” laykuw arkapjjerïna (Juan 10:2-4, 11). Ovejanakajj ¿cheqpachapunit awatirin arup uñtʼapjje?

¹⁷ Geografía histórica de la Tierra Santa sat libropanjja, George Adam Smith sat chachajj akham sasaw uka toqet qellqäna: “Awisajja nanakajj Judea markankir mä phuju jakʼanwa chika urojj samartʼapjjerïta, ukatjja kimsa jan ukajj pusi awatirinakaruw ovejanakapamp chik jutaskir uñjapjjerïta. Uka ovejanakajja, mayni tamankir ovejanakampejj qʼalapuniw juntthapisipjjeri, uk uñjasajj ‘¿kunjamsa awatirinakajj ovejanakap jaljapjjpachäni?’ sasaw jisktʼasipjjerïta. Ukampis kunapachatï ovejanakajj umtʼañ tukuyjjapjjeri, jiskʼa ovejanakas mayninakamp anatañ tukuyjjapjjeri ukhajja, awatirinakajj sapa mayniw yaqha cheqanakar sarjjapjjeri. Ukatsti jupanakajj ovejanakaparuw jawsapjjeri, uk istʼasajj awatiripan ukaruw ovejanakajj sarjjapjjeri, ukatjja kunjamtï umtʼirejj purinipjjerïki ukhamarakiw uka ovejanakajj kuttʼjjapjjeri” sasa. Ukhamasti, Jesusajj kuntï yatichañ munkistäna ukatakejj mä suma uñachtʼäwi ajllïna. Jiwasatï ‘suma awatirisar’ taqe kunan istʼañäni ukhajja, jupajj wali sumwa cuidarakistani.

18. Jehová Diosan luratanakapat parlir informacionanaksa jan ukajj yaqha ukhamanaks ¿kawkinsa jikjjatsna?

¹⁸ Diosan luratanakapat apstʼat uñachtʼäwinakamp yatichañatakisa, chuymar purtʼkir fácil amuykañ uñachtʼäwinakamp amuytʼayañatakisa, animalanakajj kunanak lurañs yatipjje uka toqet parlañaw yanaptʼistaspa. ¿Kawkinsa Jehová Diosan luratanakapat parlir informacionanak jikjjatsna? Bibliajj kunayman animalanakatwa parli, uka animalanakajj kunjamäpjjesa ukarjamaw awisajj yaticharakistu. Amuytʼañataki, yaqhep jaqenakajj gacela animalanakjama, leopardo animalanakjam ratuk tʼijurïpjjewa sasaw Bibliajj qhanañchi, ukatjja “asirunakjam chʼikïpjjam, palomanakjam suma chuymanïpjjarakim” sasaw ewjjtʼarakistu (1 Crónicas 12:8; Habacuc 1:8; Mateo 10:16).c Yatiyañataki ukat ¡Sartapjjañäni! sat revistanakansa, Internetan jw.org cheqan “¿Khitin luratäpachasa?” sat lugaran utjki uka qellqatanakansa ukat videonakansa, Diosan luratanakapat parlir walja informacionaw utjaraki. Jiwasatï ukanak liytʼasin amuykiptʼañäni ukhajja, Jehová Diosan luratanakapat waljanakwa yateqañäni, facilakwa suma uñachtʼäwinaks ajllirakiñäni.

19, 20. 1) Jesusajj kunatï ukhak paskäna uka toqet parlasajj ¿kunjamsa mä kʼari yatichäwi qhanstayäna? 2) Jichhürunakan kunatï paski ukanakampisa experiencianakampis ¿kunjamsa jaqenakan chuymapar purtʼsna?

¹⁹ Kunanaksa uñtʼtan jan ukajj kunanakas jakäwisan pasi ukarjamaw suma uñachtʼäwinakamp mayninakar parltʼsna. Mä kutejja, Jesusajj kunatï ukhak paskäna uka toqetwa parläna, ukhamat jan wali jaqenakajj cheqapunit castigat uñjasipjje janicha uk amuytʼayañataki. Jupajj akham sänwa: “Siloam cheqankir mä torrejj 18 jaqenakar tinkjjatasin jiwaraykäna uka toqet ¿kuns amuyapjjta? ¿Jupanakajj Jerusalén markan jakir taqe jaqenakat sipans jukʼamp juchanïpkaspas ukhamti amuyapjjta?” sasa (Lucas 13:4). Cheqas Siloam cheqan jiwapkäna uka jaqenakajja, janiw jan wali lurapjjatap laykojj Jehová Diosamp castigatäsin jiwapkänti. Jan ukasti, jupanakajj “jan waltʼäwi tiempon” uñjasisaw “akatjamat” jiwapjjäna (Eclesiastés 9:11). Ukhamasti, kunatï ukhak paskäna uka uñachtʼäwimpiw Jesusajj jaqenakan chuymapar purtʼäna, kuna kʼari yatichäwirutï creyipkäna ukan jan cheqätapsa qhanstayarakïnwa.

²⁰ Jichhürunakan kunatï paski ukanakampisa experiencianakampis ¿kunjamsa jaqenakan chuymapar purtʼsna? Jesusajj kuttʼaniñapäkäna ukhajj kunanakas pasañapäna uka toqetsa parlksna ukham amuytʼañäni (Mateo 24:3-14). Ukatakejja kunanakatï noticianakan guerranakatsa, manqʼat pistʼañanakatsa, terremotonakats parlaski uka toqetwa jiwasajj parlaraksna, ukhamat kunjamsa Jesusan arsut profeciajj phoqasiski uk wali sum uñachtʼayañataki. Kunjamsa machaq jaqëñamp isthapissna uka toqets parlksna ukham amuytʼarakiñäni (Efesios 4:20-24). Ukatakejj ¿kawkinsa experiencianak jikjjatsna? Chuymar purtʼañatakejja, mä jilatana jan ukajj mä kullakan experienciapatwa parltʼsna, jan ukajj Bibliat apstʼat qellqatanakan uñstki uka experienciatwa parltʼaraksna. Ukat Internetan jw.org cheqan utjki uka experiencianakampis yanaptʼayasiraksnawa, ukatakejj “Bibliaw jupanakar yanaptʼawayi” sat cheqaruw mantsna.

21. Suma yatichirïñatak chʼamachastan ukhajja, ¿kuna bendicionanaksa katoqtanjja?

²¹ Jesusajj cheqpachapuniw taqe yatichirinakat sipans jukʼamp Jachʼa Yatichirïna. Kunjamtï aka seccionan yatjjatawayktanjja, Jesusatakejj suma yatiyäwinak mayninakar predicaña ukat yatichañaw jakäwipan nayrankäna (Mateo 4:23). Jiwasatakejj ukhamarakiw ukanak lurañajj jakäwisan nayrankañapa. Kunapachatï suma yatichirïñatak chʼamachastan ukhajja, walja bendicionanakwa katoqtanjja. Mayninakar kunatï cheqäki uk yatichasas wali kusisitätanwa (Hechos 20:35). Kuna laykutejj Jehová Diosat kunatï cheqäki uk yatipjjañapatakiw jupanakar yanaptʼtanjja, ukhamatwa jutïrin walja bendicionanak wiñayatak katoqapjjarakini. Ukat Jesusan kayup arkatasat wali kusisitarakïtanwa. Cheqansa, ¡Jesusjam Yatichirejj janipuniw aka oraqen yaqhajj utjawaykiti!