Lepra usupat qollasirinakatjja, llätunkanejj thak sarasipkakïnwa. Ukampis mä jaqejj Jesusan ukaruw kuttʼanïna. Jupajj samaritano jaqënwa. ¿Kunarus kuttʼanïna? Qollatäjjatap laykuw Jesusar wal yuspärañ munäna. Diosajj kunjamsa jupar qolläna uk yatisajj “arnaqtʼasisaw Diosar jachʼañchäna” (Lucas 17:15). Jesusampi jikisipjjäna ukhajja, oraqer puriñkam altʼasisaw jupar yuspäräna.

Uka lepra usuni tunka jaqenakaru qollasajja, kunjamsa Jehová Diosajj jupar yanaptʼaskäna ukwa uñachtʼayäna. Lepra usunïpkäna uka tunkanitjja, maynejj janiw Jesusan yanaptʼapamp qollatakejj uñjaskänti, jan ukasti jakañ thakiruw sarjjatjjpachäna. Jichha tiemponjja, janis Diosajj nayra tiempjam Jesusampi qollaykchejja, jiwasatï Jesusar creyiñäni ukhajja, jakañ thakiruw sarjjatañäni, wiñay jakañwa katoqarakiñäni. Jiwasajj samaritano jaqjamarakiw yuspärasirïñasa.