¿Cheqpach cristianonakajj khitinakäpjjesa uk kunjamatsa yatsna?

Walja waranqa waranq jaqenakaw cristianöpjjtwa sasin sapjje, ukampis janiw taqenejj pachpa creencianakanïpkiti, sarnaqäwinakapas mayj mayjarakiwa. Ukhamajj ¿khitinakäpjjes cheqpach cristianonakajj uk kunjamatsa yatsna?

1. ¿Khitinakas cheqpach cristianonakajja?

Cristianonakajja Jesucriston discipulonakapäpjjewa, jan ukajj arkirinakapäpjjewa (Hechos 11:26 liytʼäta). ¿Kunjamatsa Jesusan discipulopäpjjatap uñachtʼayapjje? Jesusajj akham sänwa: “Jumanakatï arunakaj imapjjapunïta ukhajja, nayan cheqpach discipulojäpjjtawa” sasa (Juan 8:31). Uka arunakarjamajja, cheqpach cristianonakajj Jesusan yatichäwinakaparjamaw sarnaqapjjañapa. Jesusajj Qellqatanakarjamaw yatichäna, ukhamasti cheqpach cristianonakajj Bibliarjamaw yatichapjjaraki (Lucas 24:27 liytʼäta).

2. ¿Kunjamsa cheqpach cristianonakajj munasirïpjjatap uñachtʼayapjje?

Jesusajj akham sasaw discipulonakapar säna: “Jumanakajj maynit maynikam munasipjjam, kunjamtï nayajj jumanakar munasipksma ukhama” sasa (Juan 15:12). Discipulonakapar munasitapjja, ¿kunjamsa Jesusajj uñachtʼayäna? Jupanakatak tiemp apstʼasisa, jupanakar chʼamañchtʼasa, yanaptʼasa ukhamarak jupanak layku vidap churasaw munasirïtap uñachtʼayäna (1 Juan 3:16). Cheqpach cristianonakajja janiw munasirïñasawa sasakejj parlapkiti, jan ukasti Jesusjamaw luratanakapampisa arsutanakapampis mayninakar munasipjjatap uñachtʼayapjje.

3. ¿Kun lurañas cheqpach cristianonakatakejj wali wakiskirejja?

Discipulonakaparojja ‘Diosan Reinopat yatiyapjjañapatakiw’ Jesusajj mä luräwi churäna (Lucas 9:2). Nayrïr cristianonakajja janiw kawkjantï Diosarojj adorapkäna uka lugaranakanak predicapkänti, jan ukasti walja jaqenakajj utjkäna uka lugaranakansa jaqenakan utanakapar sarasas predicapjjarakïnwa (Hechos 5:42; 17:17 liytʼäta). Jichhürunakanjja cheqpach cristianonakajj ukhamarakiw kawkjanakantï jaqenakajj utjki uka lugaranakan cheqa yatichäwinak predicapjje. Niyakejjay jupanakajj jaqe masipar wal munasipjjchejja, jutir urunakat parlañatakisa Bibliamp chuymachtʼañatakisa wal chʼamachasipjje tiempsa apstʼasipjjaraki (Marcos 12:31).

JUKʼAMP YATJJATAÑÄNI

4. Cheqpach cristianonakajj Biblian cheqa yatichäwinakap wali valoranitwa uñjapjje

Janiw taqe khitinakatï cristianöpjjtwa sapki ukanakajj Biblian yatichäwinakap valoranit uñjapkiti. VIDEO uñtasajja aka toqetwa parltʼapjjäta:

VIDEO: ¿Kunjamsa cristianöpjjtwa sirinakajj cheqa thakit saranukupjjäna? (5:11)

• Cristianöpjjtwa siri yaqhep religionanakajja, ¿kunjamanakatsa Jesusan yatichäwinakap jan yatipjjañapatakejj jaqenakar jarkʼapjjäna?

Jesusajj Diosan Arupan qellqat cheqa yatichäwinakwa yatichäna. Juan 18:37 liytʼasajja aka toqetwa parltʼapjjäta:

• Jesusan arunakaparjamajja, ¿“kunatï cheqäki uka toqet” saytʼasirinakajj khitinakäpjjes uk kunjamatsa yatsna?

5. Cheqpach cristianonakajj Biblian cheqa yatichäwinakapwa predicapjje

Jesusajj janïr alajjpachar makatkasajja, Diosan arunakap yatiyapjjañapwa discipulonakapar mayïna, ukajj jichhürkamaw lurasiski. Mateo 28:19, 20; Hechos 1:8 liytʼasajja aka toqetwa parltʼapjjäta:

• ¿Kunapachkamasa, kawkjakamasa predicasiñapäna?

6. Cheqpach cristianonakajj kuntï predicapki ukarjamaw sarnaqapjje

¿Kunatsa Tom chachajj cheqa religión jikjjatatapat jan pächaskäna? VIDEO uñtasajja aka toqetwa parltʼapjjäta:

VIDEO: Kunanaktï religionanakajj lurapkäna ukajj janiw nayatakejj walïkänti (5:20)

• Videorjamajja, ¿kunatsa kunanaktï religionanakajj lurapkäna ukajj Tom chachatakejj jan walïkäna?

• ¿Kunatsa cheqpach religión jikjjatatapat Tom chachajj jan pächaskäna?

Kuntï maynejj arski ukarjamaw sarnaqañapa. Mateo 7:21 liytʼasajja aka toqetwa parltʼapjjäta:

• Jesusatakejja, ¿kuntï creyktan uk sañat importantejja, jan ukajj kuntï lurktan ukacha?

7. Cheqpach cristianonakajj maynit maynikamaw munasipjje

Cheqpach cristianonakajja jilat kullakanakap layku vidap aptʼasiñatakejj jankʼakïpjjewa. VIDEO uñtasajja aka toqetwa parltʼapjjäta:

VIDEO: Jakañ vidap aptʼasirjamaw yanaptʼäna (2:55)

• ¿Kunatsa Lloyd jilatajj Johansson jilatarojj vidaps aptʼasirjam yanaptʼäna?

• ¿Ukham lurasajj cheqpach cristianötapti uñachtʼayäna?

• Yaqha markat jutirinakarusa yaqha kasta jañchini jaqenakarusa, ¿kunjamsa cheqpach cristianonakajj uñjapjjañapa?

• ¿Guerra tiemponakan kunjamsa uk uñachtʼayapjjaspa?

¿KUNSA YATEQAWAYTAN?

Cheqpach cristianonakajj Biblian yatichäwinakaparjamaw sarnaqapjje, mayninakar munasipjjatap laykus walja sacrificionakwa lurapjje, ukatjja Biblian cheqa yatichäwinakapwa predicapjjaraki.

Amtañataki

• ¿Cheqpach cristianonakajj kunanaktï creyipki ukajj kunarjamasa?

• ¿Cheqpach cristianonakarojj kunjam jaqëpjjatapatsa uñtʼasi?

• ¿Cheqpach cristianonakatakejj kun lurañas nayranki?

JUKʼAMP YATJJATAÑAMATAKI

Jesusat yateqasiñataki, yatichäwinakaparjam sarnaqañatak chʼamachasipki uka jaqenakar uñtʼañatak chʼamachasim.

¿Jehová Diosan Testigonakapajj kunjam jaqenakäpjjesa? (1:13)

Nayrajj monjäkäna uka warmirojja, kunjamsa Diosan markap jikjjatañajj yanaptʼäna uk yatjjatam.

“Bibliampiw taqe jisktʼanakajarojj qhanañchapjjetäna” (Yatiyañataki abril 1, 2014)

Jilat kullakanakajj yanaptʼatäñ munapki ukhajja, kunjamsa cheqpach cristianonakajj munasiñat yanaptʼapjje uk videon uñtam.

Mä jan waltʼäwejj utjki ukhajj jilat kullakanakarojj yanaptʼapjjtwa (fragmento) (3:57)

Jesusajja jupan arkirinakapajj kunjamäpjjañapänsa ukwa qhanañchäna. Ukarjamajj nayrïr cristianonakajj kunjamäpjjänsa jichha tiempon jakir cheqpach cristianonakajj kunjamäpjjarakisa uk yatjjatam.

“¿Qué identifica a los cristianos verdaderos?” (La Atalaya, 1 de marzo de 2012)