Jesusan mayisitaparjam sarnaqapjjañäni

1, 2. 33 marana Pascua fiesta amtatatjja, ¿kunsa Jesusajj arkirinakap laykojj luräna?

KHÄ 33 marana, nisán phajjsin 14 urojj wali arumäjjänwa, ukhaw Jesusajj arkirinakapampi Pascua fiesta amtañ tukuyaskäna, ukajj kunjamsa israelitanakajj Egipto markat esclavöñat qhespipjjäna uk amtañatakïnwa. Ukampis Jesusan arkirinakapajj jukʼamp suma qhespiyataw uñjasipjjañapäna. Jïsa, “wiñay qhespiyasiñwa” jikjjatapjjañapäna. Qhepürojja (nisán phajjsin 14 urukïskänwa), Jesusajj enemigonakapan jiwayataw uñjasiñapäna. Ukampis ukham jiwatapaw taqe jaqenakarojj jiwañampita ukat juchampit qhespiyañapäna (Heb. 9:12-14).

² Kuntï Diosajj munasiñapat lurkäna uk jan armapjjañapatakejja, Jesusajj Pascua fiesta lanti amtasiñapatakiw jupan jiwäwip amtañatak uttʼayäna. ¿Kunjamsa uk luräna? Jan levaduran tʼantʼa aptasajj 11 arkirinakaparuw akham sas pasayäna: “Akajj janchejjawa, ukasti jumanak layku katuyatäniwa. Akjja nayat amtasisin lurapjjam” sasa. Ukat vino pasayasajj akham sarakïnwa: “Aka copajj machaq arustʼäwiwa wilajj toqe, akasti jumanakan askimatakiw wartasi” sasa (Luc. 22:19, 20).

 3. 1) Jesusan jiwatapatjja, ¿kunas pasawayi? 2) Juan 17 jaljan jikjjataski uka mayisïwi liytʼasajja, ¿kun jisktʼasiñasas wakisi?

³ Moisesajj katoqkäna uka Ley toqew Diosajj israelitanakamp mä arustʼäwir mantäna, uka arustʼäwejj tukusiñampïskänwa. Uka lantejj mä machaq arustʼäwiw utjañapäna, Jehová Diosaw alajjpachar sarañatak ajllitanakamp uka arustʼäwir mantäna. Jesusajj janiw arkirinakapan nayra israelitanakjamäñap munkänti. Uka israelitanakajj Diosar yupaychañ toqetjja may maywa amuyapjjäna ukatwa Diosan sutip jiskʼachapjjäna (Juan 7:45-49; Hech. 23:6-9). Ukhamajj Diosan sutip jachʼar aptañatakejja, arkirinakapajj mä wawak sarnaqasipjjaspa ukwa Jesusajj munäna. ¿Kunsa ukatakejj luräna? Alajjpachankir Awkiparuw oracionan maytʼasïna, uk liytʼañajj jiwasatakejj wali askipuniwa (Juan 17:1-26; aka yatichäwin utjki uka qallta foto uñjjattʼam). Uka toqet yatjjatkasajj akham jisktʼasiñasawa: “Jesusan mayisitapjja, ¿Diosajj istʼpachänti? ¿Jesusan mayisitaparjamti sarnaqasktjja?” sasa.

4, 5. 1) Jesusajj oración mayisiñ qalltkäna ukajja, ¿kunsa yatichistu? 2) ¿Jehová Diosajj Jesusar istʼasajj kuns luräna?

⁴ Jesusajj wali arumkamaw arkirinakaparojj Diosat sum yatichaskäna. Ukhaw alajjpach uñtasajj akham mayisïna: “Awki, horasajj purinjjewa [...]. Wawamajj jumaru jachʼañchañapata[ki]. Jumajj Yoqamarojj taqe jaqenakjjaru chʼamanïñwa churtajja, kawkïrinaktejj churkta ukanakar wiñay jakaña churañataki [...]. Nayaw aka oraqenjja jachʼañchsma, tukuyaraktwa kuntejj lurañ churkista uksa. Jichhajj Awki, utjäwimanjja kunjäm jachʼa kankañamankkäyättejj janïra aka oraqe utjkipana, uka pachpa jachʼa kankañay churjjeta” sasa (Juan 17:1-5).

⁵ Uka nayrïr jiskʼa tʼaqanak liytʼasajja, ¿kunas Jesusatakejj wali wakiskirïna uk amuytanti? Nayraqatjja, Awkipajj jachʼañchatäspa ukwa Jesusajj munäna. Cheqansa, Nanakan Awkejja sat mayisïwi qalltasajj akham sänwa: “Awkejja, sutimajj jachʼañchatäpan” sasa (Luc. 11:2). Ukatjja, arkirinakapatakiw mayirakïna. Jupajj “wiñay jakañ[wa]” churañ munäna. Ukat kuntï jupatakejj munkäna ukwa Jesusajj akham sas mayisirakïna: “Jichhajj Awki, utjäwimanjja kunjäm jachʼa kankañamankkäyättejj janïra aka oraqe utjkipana, uka pachpa jachʼa kankañay churjjeta” sasa. ¿Jehová Diosajj uk istʼasajj kuns lurpachäna? Kuntï wawapajj maykäna ukat sipansa jukʼampwa churäna, “jukʼamp jachʼa suti” (Heb. 1:4).

 6. Wiñay jakañ katoqañatakejja, ¿kunsa Jesusan arkirinakapajj lurapjjañapäna ukat “ukhampun lurapjjäna” sasajj kunatsa sistan?

⁶ Wiñay jakañ katoqañatakejja, ¿kunsa juchar jaqenakajj lurapjjañapäna? Ukwa Jesusajj mayisïwipan qhanañcharakïna (Juan 17:3 liytʼasiñapawa). Diosaru ukat Cristor ‘uñtʼaskakiñaw’ wakisi sasaw säna. Ukampis janiw jupanakar sum uñtʼañakïkiti, jan ukasti kuntï yateqktan ukarjam sarnaqañasarakiwa. Jesusan arkirinakapajj ukhamwa lurapjjäna, ukatwa Jesusajj jupanakat akham säna: “Jupanakarojj churtwa Juman arunakama, jupanakasti katoqapjjewa” sasa (Juan 17:8). Ukampis wiñay jakañ katoqañatakejja, arkirinakapajj Diosan Arupata ukat ewjjtʼanakapatjja lupʼisipkakiñapänwa, ukat jiwañkamaw uka arunakarjam sarnaqapjjañapäna. ¿Ukhamti lurapjjpachäna? Jïsa. Ukatwa alajjpachankiri machaq Jerusalenan 12 qala cimientonakaparu sutinakapajj qellqantasïna (Apo. 21:14).

 7. Diosar uñtʼañajja, ¿kamsañsa muni, ukat kunatsa ukajj wali wakiskirejja?

⁷ Wiñay jakañ jikjjatañ munstan ukhajja, ‘Diosar uñtʼañasawa’. Ukajj ¿kamsañsa muni? Griego arurjamajja, “Diosar uñtʼaskakiñamawa” sasaw uka arunakajj jaqokipasirakispa. Ukhamajj Diosar uñtʼañajja, sapürutjama Jupar uñtʼaskakiña sañwa muni, ukajj janiw tukuskaspati. Ukampis taqe kunjjar munañani Diosar uñtʼañajja, janiw kunas amtapajja ukat Jupajj kunjam Diosasa uk yatiñakïkiti. Jan ukasti, chuymasan munasiñ utjatap laykuw Jupampi ukat jilat kullakanakasamp sum apasiñasaraki. Kunjamtï Bibliajj siskejja, “khititejj jan munasiñanïki ukajj janiw Diosar uñtʼkiti” sasa (1 Juan 4:8). Ukat Diosar uñtʼañajja, Jupar istʼaña sañwa munaraki (1 Juan 2:3-5 liytʼasiñapawa). Cheqansa, ¡Jehová Diosar uñtʼirinak taypinkañajj wali askipuniwa! Ukampis tiempompejj janiw Diosamp sum apasjjsnati. Ukwa Judas Iscariote sat chachan sarnaqäwipajj uñachtʼayistu. Ukhamajj Diosamp sum apasiñatak chʼamachasiskakiñäni, ukhamatwa horasajj purinkani ukhajj wiñay jakañ katoqañäni (Mat. 24:13).

8, 9. Jesusajj aka Oraqenkäna ukhajja, ¿kun lurañas jupatakejj jukʼamp wakiskirïna, ukat judionakan kuna yatichäwipas jupatakejj jan walïkänjja?

⁸ Jesusan mayisïwipa, Juan 17 jaljan liytʼasajja, qawqsa Jesusajj arkirinakapar munasïna uk sum amuytanjja, ukampis jiwasar munasirakistuwa (Juan 17:20). Ukhamarusa, Jesusatakejj jiwasar qhespiyañajj janiw taqe kunat sipansa jukʼamp wakiskirïkänti, uk janiw armañasäkiti. Aka Oraqen jiwañapkamajja, jupatakejj Diosan sutip qʼomachaña ukat jachʼañchañaw jukʼamp wakiskirïna. Sañäni, kuna amtampis aka Oraqer jutäna uk Nazaret markankiri sinagogan qhanañchasajja, Isaías profetan aka qellqatapwa liytʼäna: “[Jehová] Tatitun ajayupaw nayjjanki, suma yatiyäwinak pobrenakar churañatakiw ajllisitu” sasa. Uka qellqatat liytʼasajja, Jesusajj Diosan sutipjja qhanwa arspachäna (Luc. 4:16-21).

⁹ Jesusajj aka Oraqer janïr jutkäna, ukhatpachaw kʼari yupaychäwin pʼeqtʼirinakajj judionakan sarnaqäwiparjamajja, Diosan sutip jan aytapjjañapatakejj jaqenakar amtayapjjäna. Ukampis uka yatichäwejj Jesusatak janipuniw walïkpachänti. Ukatwa uñisirinakapar akham säna: “Nayajj Awkijan sutiparuwa jutta, jumanakasti janiw katoqapkistati; maynitejj kikpa sutiparu jutaspajja, ukaruwa katoqapjjasmajja” sasa (Juan 5:43, MT). Ukat jiwañapatak mä qawqha urunak faltkipanwa, kunas jupatakejj jukʼamp wakiskirïna uk akham qhanañchäna: “Awkiy, sutimajj jachʼañchatäpan” sasa (Juan 12:28). Cheqansa, Jesusatakejj Awkipan sutip jachʼañchañaw taqe kunat sipansa jukʼamp wakiskirïna, ukwa jupan mayisïwipat yatjjatasajj qhan amuytanjja.

10, 11. 1) ¿Kunjamsa Jesusajj arkirinakapar Awkipan sutip yatiyäna? 2) ¿Kuna amtampis jichhürunakan wal irnaqañasa?

¹⁰ Jesusajj akham sasaw mayisïna: “Kawkïrinaktejj akapach taypit ajlliskta nayaru churañataki, ukanakarojj yatiytwa jumajj khitïktatejj uka. Jumankirinakänwa, jumarakiw churista, juman arunakamsti phoqhapjjarakiwa” sasa. Ukat akham saskakïnwa: “Nayajj janiw akapachankjjäti, ukampis jupanakajj akapacharuw qheparapjje, nayasti jutjjtwa jumampïñataki. Qollan Awkejja, kawkïrinaktejj churkista ukanakarojj chʼamamampiy [‘Juman sutim laykojj’, NM] imam jupanakajj mayakïpjjañapataki, kunjamatejj Jumampi nayampejj mayakïktanjja ukhama” sasa (Juan 17:6, 11).

¹¹ Kunapachatï Jesusajj arkirinakaparu Diosan sutip yatiyäna ukhajja, janiw uka sutjja ukhamak aytkänti. Jan ukasti, uka sutejj kamsañs muni ukwa qhanañcharakïna. Sañäni, Jehová Diosajj kunjam Diosasa ukat kunjamsa jaqenakar sum uñji ukwa yatichäna (Éxo. 34:5-7). Ukat jichhürunakansa, alajjpachatwa Jesusajj Diosan sutipa aka oraqpachan yatiyañasatak yanaptʼasinkistu. ¿Kuna amtampis uk luraski? Aka ñanqhapachajj janïr tukuskipan walja jaqenakan Jehová Diosar uñtʼapjjañapatakiw ukham luraski. Ukat horasajj purinkani ukhaw Diosajj taqe chuyma servirinakapar qhespiyani, ukhamatwa taqe jaqenakajj Jehová Diosan jachʼa sutip uñtʼapjjani (Eze. 36:23).

12. Diosan Arup yatiyañatakejja, ¿kunanak lurañas wakisi?

¹² Kuna luräwtï Jesusajj qalltkäna uk tukuyapjjañapatakiw arkirinakapar sum wakichäna. Mayisïwipan akham sänwa: “Kunjämtejj nayarojj akapachankirinak taypiru khitanistajja, uka pachparakiw jupanakarojj akapachankirinak taypiru khitta” sasa. Diosan arunakap sum yatiyapjjañapatakejja, kun lurapjjañapas wakisi ukwa Jesusajj kimsa toqet qhanañchäna. Maya, arkirinakapajj Supayan ñanqhapachapat jitheqtapjjañapatakiw Jesusajj Awkipar mayïna. Paya, arkirinakapajj Diosan Arupa istʼapjjañapataki ukat sarnaqäwinakapan qʼomäpjjañapatakiw Jesusajj mayirakïna. Kimsa, kunjamtï jupampi ukat Awkipampejj mayakïpkejja, arkirinakapajj ukham mayachtʼatäpjjañapatakiw jupajj walja kuti mayisirakïna. Ukhamajj ukanak yatisajj akham jisktʼasiñasaw wakisi: “¿Jesusan mayisitaparjamat sarnaqasktjja?” sasa. Arkirinakapatï ukhamarjam sarnaqañatak chʼamachasipjjasapäna ukhajja, walja jaqenakaw jupanakar istʼapjjasapäna, ukwa Jesusajj sum yatïna (Juan 17:15-21 liytʼasiñapawa).

13. ¿Kunjamsa Diosajj Jesusan mayisïwip nayrïr patak maranakan istʼäna?

¹³ ¿Jehová Diosajj Jesusan mayisïwip istʼpachänti? Jïsa, ukwa Hechos libro liytʼasajj amuytanjja. Cheqansa, nayrïr patak maranakan utjkäna uka tamankir jilat kullakanakajj tʼaqa tʼaqaw sarnaqapjjasapäna. ¿Kunatsa? Judionaka, jan judionaka, qamirinaka, pisinkirinaka, esclavonaka ukat esclavonakan patronanakapaw ukankapjjäna. Ukampis taqeniw mä wawak sarnaqapjjäna, ukatwa Jesusan pʼeqtʼatajj mä cuerpokïpkaspas ukham irnaqapjje sasin Pablojj säna (Efe. 4:15, 16). Supayan ñanqhapachapanjja, jaqenakajj tʼaqa tʼaqaw sarnaqapjje. Ukhamajj Jehová Diosan yanaptʼapampikiw Jupar mayachtʼat yupaychsna, Diosaw qollan ajayupampi yanaptʼistu (1 Cor. 3:5-7).

14. ¿Kunjamsa Diosajj Jesusan mayisïwip jichha tiempon istʼawayi?

¹⁴ Apostolonakajj jiwjjapjjäna ukhajja, janiw taqenis Diosar mayachtʼat yupaychjjapjjänti. Kunjamtï profecianakajj siskänjja, Diosan markap contra saytʼir jaqenakaw uñstäna, jupanakaw kʼarinak yatichasajj kunayman yupaychäwinak uñstayapjjäna (Hech. 20:29, 30). Ukhamäkchïnsa, 1919 maranwa Jesusajj alajjpachar sarañataki ajllitanakarojj kʼari yupaychäwit apsüna, ukhamatwa jupanakarojj mayaruk tantachthapïna, ‘munasiñana mayaruk tukupjjañapataki’ (Col. 3:14). Uka ajllitanakajj Diosan arunakap yatiyasaw paqallqo millón jila ‘yaqha ovejanakar’ tantachthapisipki, jupanakajj “taqe markanakata, kunayman janchini, ukhamarak taqe casta parlani” jaqenakäpjjewa (Juan 10:16; Apo. 7:9). Cheqansa, Jesusan aka arunakaparuw Diosajj istʼawayi: “Akapachajj yatiñapataki jumajj nayaru khitanista, ukhamarak kunjämtï nayaru munasista, jupanakarus munasirakta” sasa (Juan 17:23).

15. ¿Kunsa Jesusajj alajjpachar sarañatak ajllitäpki ukanakatak mayïna?

¹⁵ Janïr oracionan mayiskasajja, Jesusajj apostolonakaparuw jachʼar aptäna. ¿Kunjamatsa? Jupamp chika Reinopan apnaqapjjañapatakiw jupanakamp mä arustʼäwir mantäna (Luc. 22:28-30; Juan 17:22). Ukatjja, alajjpachar sarañataki qhepat ajllitäpkäni ukanak laykuw Diosat akham mayisirakïna: “Awkiy, jumaw jupanak churista. Jichhajj muntwa nayajj kawkinkkätejja, jupanakajj ukankapjjañaparaki, jumajj jachʼa kankañwa churista uk uñjapjjañapataki, jumasti janïra akapachajj utjkipanwa munasista” sasa (Juan 17:24). Yaqha ovejanakajj kuna suytʼäwinïpkitï ajllitanakajj ukjjat kusisipjjewa, janiw envidiasipkiti. Ukhamatwa cheqa cristianonakjamajj taqe chuym munasirïpjjatap uñachtʼayapjje.

16, 17. 1) Mayisïwip tukuyasajja, ¿kun luraskakiñsa Jesusajj arsuwayi? 2) ¿Kun lurañatakis chʼamachasiñasa?

¹⁶ Jehová Diosan markapajj mayachtʼataw Jupar yupaychapjje ukat kunatï cheqäki uksa yatipjjarakiwa, ukampis kunayman religionanak utjatap laykuw jaqenakajj uk jan creyiñ munapkiti. Nayrïr patak maranakanjja ukhamarakiw pasäna, ukatwa Jesusajj chuymar purtʼkiri aka arunakampi mayisïwip tukuyäna: “Suma Awkiy, akapachajj janiw uñtʼktamti, ukampis nayajj uñtʼsmawa, akanakasti yatjjapjjewa juman nayaru khitanitama. Jupanakarojj uñtʼaysmawa, ukampis uñtʼayaskakïmawa, kunjämtejj nayaru munasista uka munasiñajj jupanakampïñapataki, nayasti jupanakampïñajjatakiraki” sasa (Juan 17:25, 26).

¹⁷ “Jesusajj janiw mayisitaparjam lurkänti” sasajj janiw khitis siskaspati. Jupaw jichhürunakan tam pʼeqtʼaski ukat juparakiw Diosan sutipa ukat amtanakap yatiyañasatak yanaptʼaskistu. Ukhamajj Jesusamp yanaptʼayasipjjañäni ukat ‘yatiyir sarapjjam, yatichapjjarakim’ sasin sawaykistu uk taqe chuym phoqhaskakiñäni (Mat. 28:19, 20; Hech. 10:42). Ukat Diosar mayachtʼata yupaychañatakis chʼamachasipjjañäni. Ukhamatwa Jesusan mayisitaparjam sarnaqañäni, Jehová Diosan sutipsa jachʼañchañäni ukat wiñayatakiw kusisit jakasirakiñäni.