¿Kunapachas parlañajj wakisi?

 1. ¿Kunsa Eclesiastés 3:1, 7 textojj yatichistu?

YAQHEPAROJJA parlañajj wal gustistu, yaqheparusti jukʼak parlañaw gustarakistu. Aka yatichäwejj kuna textot apstʼatäkitï ukarjamajja, taqe luräwinakatakiw mä horasajj utji, amuktʼañ horasa, parlañ horasa (Eclesiastés 3:1, 7 liytʼañataki). Ukampis awisajj inas yaqhep jilat kullakanakasan jilpach parlapjjañapajj wakischini, yaqhepan jukʼak parlapjjañapajj wakisirakchini.

 2. ¿Kunapachas parlañasa kunjamsa parlañasa uk khitikis sistaspa?

² Parlañajj Diosan regalopawa (Éx. 4:10, 11; Apoc. 4:11). Kunjamsa sum parlsna ukjja Bibliaw yatichistu. ¿Kunsa aka yatichäwin yatjjataskañäni? Biblian utjki uka sarnaqäwinakaw kunapachas parlañasa, kunapachas amukïñasa uk yateqañatak yanaptʼistani, mayninakar kuntï sisktan uka toqet Jehová Diosajj kamsisa, taqe ukanakatwa yatjjataskañäni. Nayraqatajj kunapachas parlañasa uk yatjjatañäni.

 3. Romanos 10:14 textorjamajja, ¿Jehová Diosampita Reinopampit predicañatakejj kunjamäñasasa?

³ Jehová Diosata Reinopampita taqe horasan parlañatakejj jankʼakïñasawa (Mat. 24:14; Romanos 10:14 liytʼañataki). Ukham lurasajj Jesusatwa yateqasisktanjja. Jupajj Awkipat kunatï cheqäki uk yatiyañatakiw oraqer jutäna (Juan 18:37). Ukampis kunjamsa parltan uk amuyañajj wali wakiskiriwa. Ukhamajj jaqenakar Jehová Diosat parlkasajj “llampʼu chuymampi wali respetompi” parlañasawa, kunjamäsipkisa kunarus creyipjje ukanaksa amuytʼañasarakiwa (1 Ped. 3:15). Ukhamtï lurañänejja, yatiyatasajj janiw aleq arunakakïkaniti, jan ukasti mä jukʼsa yateqapjjaniwa, inas chuymapar purtʼarakchiñäni.

 4. Proverbios 9:9 textorjamajja, ¿kunatakis arunakasajj maynir yanaptʼaspa?

⁴ Jilïr irpirinakatï maynir yanaptʼañ wakisitap amuyapjjchi ukhajja, jupamp parltʼapjjañapapuniwa. Ukampis jan ajjsarañapatakejja, jan khitis istʼki uka lugaranwa wakiskir horasan jupamp parltʼapjjañapa. Maynir ewjjtʼkasajj respetompiw parlapjjañapa. Ukampis Biblian kawkïr ewjjtʼanakapas sum sarnaqañapatak yanaptʼaspa ukanak jan ajjsarasaw uñachtʼayapjjañapa (Proverbios 9:9 liytʼañataki). Jan ajjsarirïñasa, wakiski ukapach parlañasa ¿kunatsa wali wakiskiri? Uk amuyañatakejja, Biblian qellqata pä jaqen luratanakapat parltʼañaw yanaptʼistani. Wawanakapar jan cheqañchkäna uka chachatwa nayraqat parltʼañäni, ukatjja mä warmitwa parltʼarakiñäni, jupajj reyiñapäkäna uka chachampiw parläna.

 5. ¿Kunapachas Elí jachʼa jilïr sacerdotejj amukïna?

⁵ Elí sat jachʼa jilïr sacerdotejj pä wali munat wawanakanïnwa. Ukampis jupanakajj janiw Jehová Diosar respetapkänti. Tabernáculo utanwa sacerdotet servipjjarakïna. Sacerdotëpjjatapat jan walinakwa lurapjjäna, israelitanakajj Diosar loqtapkäna uka ofrendanak janiw respetapkänti, jan phenqʼaniw qʼañu juchanaks lurapjjäna (1 Sam. 2:12-17, 22). Moisesan Leyiparjamajj jiwapjjañapaw wakisïna, ukampis Elí chachajj janiw cheqañchkänti. Mä qhawqha arunak sasajj tabernáculo utan serviyaskakïnwa (Deut. 21:18-21). ¿Jehová Diosajj uk uñjasin kamachänsa? Jupajj akham sänwa: “¿Kunatarak nayat sipansa jukʼampi wawanakamaru muntasti?” sasa. Ukatwa uka jan wali pä jaqer jiwayäna (1 Sam. 2:29, 34).

 6. ¿Kunsa Elí chachan luratapat yateqsna?

⁶ ¿Kunsa Elí chachan luratapajj yatichistu? Mä amigosana jan ukajj mä familiarasana Diosan leyip pʼakintatap yatsna ukhajja, Biblian yatichäwinakapwa jupar amtayañasa. Ukatjja jilïr irpirinakan yanaptʼap katoqañapatakiw yanaptʼañasa (Sant. 5:14). Janiw Jehová Diosat sipans familiarasaru jan ukajj amigosaru Elí sacerdotjam jachʼañchañ munktanti. Maynin cheqañchatäñapajj wakiski ukhajja, jupamp parltʼañ janiw ajjsarañasäkiti, ukham lurasajj jupar wal yanaptʼsna. Elí sacerdotet sipansa kunsa Abigail warmejj luräna uk jichhajj uñjañäni.

 7. ¿Kunatsa Abigail warmejj Davidamp parläna?

⁷ Abigailajj Nabal chachan esposapänwa, uka chachajj walja oraqeni qollqeni jaqënwa. Davidajj jaqenakapampi Saúl reyit escapkäna ukhajja, mä qhawqha tiempow Nabal chachan awatirinakapamp chika jakapjjäna, uywanakapsa lunthatanakat jarkʼaqapjjarakïna. ¿Ukham lurapjjatapat Nabal chachajj Davidar yuspäränti? Janiwa. Davidan jaqenakapajj mä jukʼa umampi manqʼampi Nabalar mayipkäna ukhajja, jupajj wali colerataw toqenoqäna (1 Sam. 25:5-8, 10-12, 14). Davidajj uk yatisajja, Nabalan taqe jaqenakapar jiwayañwa amtäna (1 Sam. 25:13, 22). ¿Kunjamatsa Davidajj jaqenak jiwayañar jan purtʼaskäna? Abigailajj parlañ horasätapwa amuyäna, ukatwa Davidampi 400 jaqenakapampi parlirejj jan ajjsartʼas saräna. Jupanakajj armanakas aptʼata, manqʼat awtjata, colerata ukhamaw jutasipkäna.

 8. ¿Kunsa Abigailat yateqassna?

⁸ Abigailajj jan ajjsartʼasa wali respetompi iyawsayir arunakampiw Davidar parläna. Janis juchanïkchïnjja, disculptʼita sasaw Davidar säna. Suma chuyman jaqëtawa sasaw sarakïna. Abigailajj Jehová Diosar wal confiyäna (1 Sam. 25:24, 26, 28, 33, 34). Maynitejj jachʼa juchar purtʼasirjamäskchi ukhajja, Abigailat yateqasisajj jan ajjsartʼasaw jupamp parltʼañasa (Sal. 141:5). Respetompipuniw parlañasa, ukampis janiw ajjsarañasäkiti. Ewjjtʼatäñapajj wakiski ukar munasiñamp ewjjtʼasajja, suma amigötaswa uñachtʼayañäni (Prov. 27:17).

9, 10. Mayninakar ewjjtʼkasajj ¿kunanaksa jilïr irpirinakajj amuytʼapjjañapa?

⁹ Maynin jan wali thakir saranukuskatap jilïr irpirinakajj amuyapjjchi ukhajja, jan ajjsartʼasaw jupamp parltʼapjjañapa (Gál. 6:1). Jilïr irpirinakajj humilde chuymanïpjjewa, pantjasirïpjjatapsa yatisipjjewa, jupanakan ewjjtʼatäpjjañapajj inas mä urojj wakischini, uksa yatisipjjarakiwa. Ukhamäkchisa, khitinakatï ewjjtʼatäñ necesitapki ukanakarojj ewjjtʼapjjapuniwa (2 Tim. 4:2; Tito 1:9). Maynir ewjjtʼkasajja, wali amuyumpi pacienciampi yatichañatakiw chʼamachasipjje. Jilat kullakanakarojj wal munasipjje, ukatwa yanaptʼañ munapjje (Prov. 13:24). Jupanakatakejj Jehová Diosar jachʼañchañaw nayranki, ukjja Diosan mayitanakap phoqayasa congregacionar jan walinakat jarkʼaqasaw lurapjje (Hech. 20:28).

¹⁰ Kunapachas parlañajj wakisi ukwa akakam yateqawaytanjja. Ukampis awisajj amukïñaw wakisi. ¿Kunatsa amukïñajj chʼamakïspa?

11. ¿Kuna uñachtʼäwitsa Santiagojj parläna, kunatsa uka toqet parlatapajj wali wakiskirejja?

¹¹ Amukïñajj janiw facilapunïkiti. Biblia qellqeri Santiago chachajja, amuyump parlañajj kunatsa jan faciläki uk amuytʼayañatakejj mä uñachtʼäwitwa parläna. Akham sänwa: “Maynitejj arsutapan jan pantjaskchejja, perfecto jaqewa, taqpach cuerpopsa sumwa apnaqarakispa” sasa (Sant. 3:2, 3). Ukham sasinjja, caballonakan pʼeqepar jakima uchapjjerïkäna, lakapar freno uchapjjerïkäna uka toqetwa parlaskäna. Caballot sarirejj freno jiytʼki ukhajja, animalarojj munañaparuw apnaqaspa jan ukajj saytʼayaspa. Ukampis freno antutaspa ukhajja, caballojj munañaparuw saraspa, usuchjasispawa jan ukajj jaqeparuw usuchjaspa. Jan amuytʼasis parlsna ukhajja, ukhamarakiw mayninakar jan waltʼaysna. Kunapachas wal amuytʼasis parlañajj wakisi ukhamarak amukïñajj wakisi ukwa jichhajj mä qhawqha uñjañäni.

12. ¿Kunapachas wal amuytʼasis parlañasa, amukïñasaraki?

¹² Mayninakar jan arsuñäki uka toqet mä jilatajj yatini ukhajja, ¿kun lurañasasa? Sañäni, kawkjantï predicañajj jarkʼatäki uka cheqan jakir mä jilatar uñtʼstan ukhajja, ¿kunjamsa uka cheqan predicasi uk yatiñatakejj jisktʼañäniti? Jilat kullakanakasar wal munastanjja, kunjamäsipkisa uk yatiñsa wal munaraktanjja. Janiw ukakïkiti, kunansa jupanakajj yanaptʼa munapjje ukarjamaw oracionanakasan mayirapiñ munaraktanjja. Suma amtampis jisktʼañ munkstanjja, janiw jupanakar jisktʼañajj walïkaspati. Wali amuyumpiw parlañasäspa, amuktʼañaw wakisirakispa. Jan arsuñäki uk maynir arsuyañ munañajj janiw walïkiti, ukham lurasajj juparusa, jupar confiyapki uka jilat kullakanakarus jan munasitaswa uñachtʼaysna. Kawkïr markanakantï predicañajj jarkʼatäki ukan jakasir jilat kullakanakarojja, janiw jukʼamp llakinakampi apjjatañ munktanti. Uka markanakan jakasir jilat kullakanakajja, janirakiw kunjamsa predicapjje, tantachasipjje, yaqha ukhamanaks lurapjje ukanak khitirus yatiyapkaspati.

13. Proverbios 11:13 textorjamajja, ¿kunsa jilïr irpirinakajj jan lurapjjañapäki, kunatsa?

¹³ Jilïr irpirinakajja kuntï Proverbios 11:13 (liytʼañataki) textojj siski ukarjamaw lurapjjañapa. Jan arsuñäki uk janiw khitirus yatiyapjjañapäkiti. Casaratanakatakejj ukham lurañajj jukʼamp chʼamäspawa. Jupanakajj jukʼamp sum apasiñatakejja, kunjamäsipkisa kunanakas llakisiyi kunsa piensasipki taqe ukanakatwa parltʼasipjje. Ukampis mä jilïr irpirejja, kuntï jilat kullakanakajj juparuk cuenttʼapki ukanak janiw esposapar yatiyañapäkiti. Arsuspa ukhajja, janiw jilat kullakanakajj jupar confiyjjapjjaspati, jan walit uñjatäjjarakispawa. Congregación irpañatak uttʼayatäpki uka jilatanakajj “janiw may may parlirïpjjañapäkiti”, janirakiw “kʼarimp kʼarimpi parlirïpjjañapäki[sa]” (1 Tim. 3:8, nota). Mä arunjja, janiw mayninakar engañjapjjañapäkiti ni aru apnaqerïpjjañapäkisa. Mä jilïr irpiritï esposapar munaschi ukhajja, janiw kunanaktï jan yatiñapäki ukanak yatiyañapäkiti.

14. Mä jilïr irpirejj suma irpirit uñjatäñapatakejj ¿kunjamsa esposapajj yanaptʼaspa?

¹⁴ Mä jilïr irpirin esposapajja, chachapan suma irpirit uñjatäñapatakiw yanaptʼañapa. ¿Kunjamsa uk luraspa? Kuntï jilat kullakanakajj chachapar cuenttʼapki ukanakat janiw jiskhiñapäkiti. Ukhamatwa chachapar yanaptʼani, khitinakatï chachapar confiyapki ukanakarus respetani. Ukat sipansa Jehová Diosaruw jukʼamp kusisiyani, kunattejj congregacionan sumankañ utjañapataki mayachtʼatäpjjañapatakiw yanaptʼani (Rom. 14:19).

15. ¿Job chachar uñjir sarapkäna uka kimsa chachanakat Jehová Diosajj kamsänsa, kunatsa ukham säna?

¹⁵ Kunapachasa ukat kunjamsa parlañasa ukanakwa Job librojj yatichistu. Job chachar kunayman jan walinakajj paskäna uka qhepatjja, pusi chachanakaw chuymachtʼiri ewjjtʼiri sarapjjäna. Qalltanjja jupanakajj jayaw amukïpjjäna, ukampis Elifazampi, Bildadampi, Zofar chachampejj kunjamsa Job chachar yanaptʼapjjaspa uk janiw uka tiempon amuytʼapkpachänti. Antisas kunjamsa Job chachan juchanïtap uñachtʼayapjjaspa ukakwa lupʼisipkpachäna. Kuntï Job chachatsa Jehová Diosatsa sapkäna ukajj cheqäkchïnsa jilapartejj kʼarïnwa, janirakiw munasiñamp parlapkänti. Jan sinttʼasisaw Job chachar juchañchapjjäna (Job 32:1-3). ¿Jehová Diosajj uk uñjasajj kamachänsa? Uka kimsanitakejj wal colertʼasïna. ‘Jan amuytʼasirïpjjtawa, jumanak layku orañapataki Job chachar mayipjjam’ sasaw säna (Job 42:7-9).

16. ¿Elifazampina, Bildadampina, Zofar chachampin jan wal lurapjjatapat kunanaksa yateqsna?

¹⁶ ¿Elifazampina, Bildadampina, Zofar chachampin jan wal lurapjjatapajj kunanaksa yatichistu? Maya, janiw jilat kullakanakasar juzgañasäkiti (Mat. 7:1-5). Antisas janïr kun arskasajj sum istʼañasawa, ukhamatwa kunas jupanakar pasaski uk sum amuyañäni (1 Ped. 3:8). Paya, kunatï cheqäki ukakwa parlañasa, munasiñampiw parlañasaraki (Efes. 4:25). Kimsa, kuntï maynit maynikam parlktan ukanak Jehová Diosajj sum yatiski.

17. ¿Kuntï Eliú chachajj lurkäna ukat kunsa yateqsna?

¹⁷ Job chachar visitir sarapkäna uka pusi chachanakat maynejj Eliú satänwa, jupajj Abrahanan parientepänwa. Kimsa chachanakajj parlapkäna ukhajja, jupajj istʼaskänwa. Amuyatajja, kuntï sapkäna uk wali amuyumpiw istʼaskäna, ukatwa sum amuytʼasiñapatak Job chachar munasiñampi qhana arunakampi ewjjtʼäna (Job 33:1, 6, 17). Eliú chachatakejja, jupar jachʼañchasiñat sipansa jan ukajj mayninakar jachʼañchañat sipansa, Jehová Diosar jachʼañchañaw nayrankäna (Job 32:21, 22; 37:23, 24). ¿Kunsa Eliú chachan luratapajj yatichistu? Amuktʼañ horasa istʼañ horasa utjatapwa yatichistu (Sant. 1:19). Maynir ewjjtʼkasajja, jiwasat sipans Jehová Diosar jachʼañchañaw nayrankañapa, ukwa Eliú chachat yateqaraksna.

18. ¿Kunjamsa parlir lurkistu ukat Jehová Diosar yuspäratas uñachtʼaysna?

¹⁸ Bibliaw kunapachas amuktʼañasa, kunapachas parlañasa ukanak yatichistu. Ukarjam lurtan ukhajja, Jehová Diosar yuspärataswa uñachtʼayasktanjja, jupaw parliri lurawayistu. Yatiñani Salomón reyejj akham sasaw Diosan amuytʼayatajj qellqäna: ‘Kunjamtï qori manzananakajj mä qollqe adornor uchatajj wali sumäkejja, ukhamarakiw tiempopar arsut arojja’ sasa (Prov. 25:11, TNM). Mayninakar istʼañäni, janïr arskasin sum pienstʼarakiñäni ukhajja, arunakasajj qori manzananakar uñtatäniwa: wali suma, wali valorani ukhamäniwa. Ukhamajja, jukʼaksa jan ukajj waljsa parlkchiñänejja, arunakasampejj mayninakar chʼamañchtʼañäniwa, Jehová Diosarus kusisiyañäniwa (Prov. 23:15; Efes. 4:29). Ukham lurasajja, parlir lurkistu ukat yuspärataswa Jehová Diosar uñachtʼayañäni.