17 YATICHÄWI

¿Jesusajj kunjam chuymanisa?

Kunjamtï imprimitäki ukham uñjañataki

Jesusajj aka oraqenkkäna ukhajj kunanaksa luräna arsurakïna ukanak yatiñajja, jupasa Jehová Diosas kunjam chuymanïpjjesa uk yatiñatakiw yanaptʼistu, ukanak yatisaw jupanakarojj jukʼamp jakʼachastanjja. ¿Jesusajj kunjam chuymanïnsa? ¿Jesusat yateqasiñatakejj kunanaksa lursna?

1. ¿Kunatsa Jesusajj Awkipjamawa sasin sissna?

Jesusajj walja millón maranakaw alajjpachankäna, jupajj wali munasiri Awkipatjja waljanakwa yateqarakïna. Ukatwa jupajj Awkipjam amuyi, taqe kunsa Awkipjam luraraki (Juan 5:19 liytʼäta). Awkipajj kunjam chuymanisa ukjja Jesusaw sum uñachtʼayi, ukatwa jupajj akham säna: “Khititejj nayar uñjkitu ukajj Awkirojj uñjarakiwa” sasa (Juan 14:9). Ukhamajj jumatï Jesusarojj sum uñtʼätajja, Jehová Diosarojj sumwa uñtʼarakïta. Amuytʼañataki, Jesusajj jaqenakat wal khuyaptʼayasïna, ukaw Jehová Diosajj jumat wal llakisitap uñachtʼayi.

2. ¿Kunjamsa Jesusajj Awkipar munasitap uñachtʼayäna?

Jesusajj akham sänwa: “Kunjamtejj alajjpachankir Awkejj nayar siskitu ukhampun nayajj luraskta, ukhamat aka mundojj Awkir munasitaj yatiñapataki” sasa (Juan 14:31). Jesusajj aka oraqenkkäna ukhajja, jan walinakan uñjaskasas Awkipar istʼasaw Jupar munasitap uñachtʼayäna. Niyakejjay Jesusajj Awkipar wal munaschïnjja, jaqenakarojj Awkipat parlapunïnwa, amigopäpjjañapatakis jupanakar yanaptʼarakïnwa (Juan 14:23).

3. ¿Kunjamsa Jesusajj jaqenakar munasitap uñachtʼayäna?

Bibliajja Jesusajj ‘jaqenakar wal munasi’ sasaw qhanañchi (Proverbios 8:31). Jaqenakar wal munasitapjja, jan kun suyas jupanakar yanaptʼasa chʼamañchtʼasaw uñachtʼayäna. Jesusan milagronak luratapajja janiw chʼamanïtapak uñachtʼaykänti, jan ukasti khuyaptʼayasirïtapwa uñachtʼayarakïna (Marcos 1:40-42). Jupajj munasiñampi jan yaqhachasaw taqenir uñjäna. Khitinakatï suma chuymanïpkäna ukanakarojja Jesusan arunakapajj wal chuymachtʼäna, jutïr urunak suytʼañatakis yanaptʼarakïnwa. Jaqenakar munasitap laykojj tʼaqesiñsa jiwañsa janiw ajjsarkänti. Ukhamarusa khitinakatï yatichäwinakaparjam sarnaqapki ukanakaruw jupajj jukʼamp munasi (Juan 15:13, 14 liytʼäta).

JUKʼAMP YATJJATAÑÄNI

Jesusajj kunjam chuymanisa, jupat yateqasisajj kunjamsa munasirïtassa wajjtʼasirïtassa uñachtʼaysna ukanakatwa jichhajj yatjjatañäni.

4. Jesusajj Awkipar wal munasi

Diosar munasitas kunjamanakatsa uñachtʼaysna ukjja, Jesusajj luratanakapampiw yatichawayistu. Lucas 6:12 ukat Juan 15:10; 17:26 liytʼapjjäta. Sapa texto liytʼasajj aka toqetwa parltʼapjjäta:

Jesusat yateqasisajja, ¿kunjamsa Jehová Diosar munasitas uñachtʼaysna?

Jesusaw orasiski. — Jesusajj alajjpachankir Jehová Dios Awkipar wal munasïna, sapa kutirakiw Jupar orasïna.

5. Jesusajj jaqenakat wal llakisi

Jesusajja jupa pachpat llakisiñat sipansa yaqhanakatwa jukʼamp llakisirïna. Qaritäkäna ukhas tiempo apstʼasisa chʼamapampis yaqhanakaruw yanaptʼirïna. Marcos 6:30-44 liytʼasajja aka toqetwa parltʼapjjäta:

Uka textorjamajja, ¿Jesusajj kun lurasas yaqhanakat llakisitap uñachtʼayäna? (Marcos 6:31, 34, 41, 42 uñjjattʼapjjäta).
¿Kunatsa Jesusajj uka jaqenakar yanaptʼäna? (Marcos 6:34 uñjjattʼapjjäta).
Niyakejjay Jesusajj Awkipjam chuymanïtap uñachtʼaychejja, ¿kuntï Jesusajj lurkäna ukajj kunsa Jehová Diosat yatichistu?
Jesusjam mayninakat llakisitasjja, ¿kunanak lurasas uñachtʼaysna?

Jesusajja phesqa tʼantʼanaka pä chawllanak waljar tukuyasajj walja waranqa chachanakampiru, warminakampiru, wawanakampiruw manqʼayaski.

6. Jesusajj wajjtʼasir chuymaniwa

Jesusajj janis walja utjirinïkchïnjja, kunanakatï jupan utjkäna uk yaqhanakaruw churirïna, ukham luratapajj jupat yateqasiñasatakiw chʼamañchtʼistu. Hechos 20:35 liytʼasajja aka toqetwa parltʼapjjäta:

Jesusan arunakaparjamajja, ¿kunas jukʼamp kusisiyistu?

VIDEO uñtasajja aka toqetwa parltʼapjjäta:

VIDEO: “Katoqañat sipansa churañanwa jukʼamp kusisiñajj utji” (fragmento) (4:00)

Janis walja utjirinïkstanjja, ¿kunjamanakatsa kunatï utjkistu ukanak yaqhanakar chursna?

¿Yatiyätati?

Jehová Diosarojja Jesusan sutipjjaruw orasiñasa sasaw Bibliajj yatichi (Juan 16:23, 24 liytʼapjjäta). Ukhamatwa kuntï Jesusajj Jehová Diosan amigopäñasatak jiwasanak layku lurawayki uk wali valoranit uñjatas uñachtʼaysna.

YAQHEPANAKAJJ AKHAM SAPJJEWA: “Diosaw jaqenakar yantʼasajj tʼaqesiyi” sasa.

Niyakejjay Jesusajj Awkipjam chuymanïchejja, ¿kunjamsa sarnaqäwipajj Jehová Diosajj jiwasat llakisitap uñachtʼayi?

¿KUNSA YATEQAWAYTAN?

Jesusajj Jehová Diosarusa jaqenakarus wal munasi. Niyakejjay jupajj Awkipjamächejja, jukʼat jukʼat Jesusar uñtʼasajj jukʼampwa Jehová Diosar uñtʼarakïta.