Pusïri: Trinidad

¿Kunjamatsa uka kʼari yatichäwix uñstäna? “Amuyatatxa Trinidad sat yatichäwixa, kimsa patak maranak tukuyaruw uñstpachäna. Chiqpachans ukhamäskapuniwa [...]. ‘Kimsa Diosax mayar tukuta’ sat yatichäwix kimsa patak maranak tukuyarux janïraw uñtʼatäkänti. Uka maranak nayraxa cristianonakax janiw uka yatichäwirjam sarnaqapxirïkänti ni ukarus iyawsapxirïkänti.” (New Catholic Encyclopedia, 1967.)

“Concilio de Nicea satäkis uka tantachäwinwa 325 marana, mayo phaxsit 20 urunak saraqatarux Constantino sat emperador pachpaw kuna tuqinakatti uka tantachäwin parlasipkäna uk sarayäna ukat uñjarakïna. Jupaw [...] Yuqax ‘Dios kikparakiwa’ sasin amuyañ qalltäna ukat ukarjam yatichañwa uka tantachäwin amtawayapxäna. [...] Constantinor axsarasinxa, obisponakatxa waljaniw uka yatichäwir jan iyawskasasa, kuna yatichäwinakatti yatichañ amtawayapkäna uk firmtʼapxäna. Paninikiw uka amtäwi jan firmtʼapkänti” (Encyclopædia Britannica, 1970.)

¿Bibliax kamsisa? “Estebanax Qullan Ajayumpi phuqtʼatäsinwa alaxpachar uñtasina, Diosan jachʼa kankañap uñjäna. Jesusarusti Diosan kupïxapan saytʼataskiri uñjarakïna. Ukatsti sarakïnwa: ‘¡Uñtapxam! Nayax alaxpachanak jistʼarat uñjta. Jaqin Yuqaparusti Diosan kupïxapankaskiri uñjarakta’.” sasa (Hechos 7:55, 56.)

Kunjamtï uka qillqatan siskixa, Estebanax Diosan qullan ajayupampi —Diosan chʼamapampi— phuqtʼatäsax Jesusaruw “Diosan kupïxapankaskiri uñj[äna]”. ¿Kunsa ukax yatichistu? Jesusax jiwatat jaktasin alaxpachar makhatxasax janiw Diosar tukkänti; chiqpachansa jupax janiw Dios kikpäkiti. Ukat uka qillqatanxa janiw qullan ajayurux aytaskiti. Biblian kawkïr jiskʼa tʼaqanakapas Trinidadax utjaskapuniw sañatakix askïspa uk jikxatañatakiw wal chʼamachasiwayapxi, ukampis mä tatakurax akham siwa: “Janipuniw Nuevo Testamento sat qillqatanxa, kimsa Diosax mayar tukutaw sasin yatichaskiti” sasa (À lʼaube du christianisme: la naissance des dogmes [Los albores del cristianismo: el nacimiento de los dogmas], de Marie-Émile Boismard).

Kimsa patak maranakanxa, kuna chʼaxwañanakatï Iglesian utjkäna ukanak tukjañatakiw Constantinox uka yatichäwi yatichasiñapatakix chʼamañchtʼäna. Ukampisa, uka kʼari yatichäwi uñstayapxatapatxa yaqha jisktʼar qhanañchañarakiw wakisxäna: María, Jesusan taykapaxa, ¿“Diosan Taykapänti”?

Aka qillqatanakat yatxattʼam: Mateo 26:39; Juan 14:28; 1 Corintios 15:27, 28; Colosenses 1:15, 16.

CHIQA YATICHÄWI:

Trinidad sat yatichäwixa kimsa patak maranak tukuyaru uñstayat yatichäwiwa.

[7 janan fotopax khitin apsutasa]

Museo Bardini (Florencia)