Jesusajj kunjamsa aguantäna uka toqet yateqasipjjañäni

1-3. 1) ¿Getsemaní jardinan kunjamas Jesusajj jikjjatasïna, ukat kunatsa ukham jikjjatasïna? 2) ¿Jesusan aguantatapat kamssnasa, ukat kuna jisktʼanakas utji?

JESUSAJJ kuna jan walinakansa uñjasiñapäna uk yatisajj wali llakitapuniw jikjjatasïna, jupajj janiw mä kutis ukhaman uñjaskänti. Aka oraqen jakatapajj niyaw tukusiñampïskäna, ukatwa jupajj apostolonakapampejj Getsemaní jardinar saräna. Walja kutiw jupanakajj uka cheqan tantachasipjjerïna, ukampis jichha kutinjja Jesusajj sapakïñwa munäna. Ukatwa apostolonakapar jaytasajj jukʼamp manqha toqer saräna, ukanjja qonqortʼasisaw Diosar mayisiñ qalltäna. Wali llakitapuniw taqe chuym Jehová Diosar orasïna, jumpʼipas “wilar uñtataw” oraqer chʼaqaräna (Lucas 22:39-44).

² ¿Kunatsa Jesusajj wali llakitäpachäna? Cheqas kunja tʼaqesiyatas uñjasini uk jupajj sum yatïna, ukampis janiw uka toqet wal llakiskänti. Jan ukasti, kunjamsa Awkipan sutip jachʼañchaspa uka toqetwa llakisïna, ukhamarus jaqenakar salvañatakejj janipuniw jiwañkamajj Diosat jitheqtañapäkänti. Ukhamajj taqe ukanakatakejj aguantañapaw wakisïna, ukhamatwa Awkipan Jehová sutip jan phenqʼachkaspänti. Kunapachatï horasajj purinjjäna ukhajja, kunayman jan walinakan uñjaskasas janipuniw Jehová Diosat jitheqtkänti. Uka urojj niya jiwañampëjjäna ukhajja, “phoqasjjewa” sasaw jupajj artʼasïna (Juan 19:30). Cheqpachapuniw Jesusajj aguantañ toqet wali yateqaskañajja.

³ Bibliajja ‘kunjamsa Jesusajj aguantäna uka toqet wali amuyump lupʼiñasatakiw’ chʼamañchtʼistu (Hebreos 12:1-3). ¿Kuna yantʼanakan uñjaskasas Jesusajj aguantäna? ¿Kunas juparojj aguantañatak yanaptʼäna? ¿Kunjamsa jiwasajj jupat yateqasitas uñachtʼaysna? Uka jisktʼanakar janïr qhanañchkasajja, kunas aguantañajja uka toqet nayraqat yatjjatañäni.

4, 5. 1) ¿Kunas aguantañajja? 2) Aguantañajj janiw jan walinakan uñjaskas tʼaqesiñakïkiti sasajj ¿kunatsa sissna? Uk mä uñachtʼäwimp qhanañchtʼam.

⁴ Taqeniw awisajj “kunayman tʼaqesiñanakamp llakisiyat” uñjastanjja (1 Pedro 1:6). Ukampis maynejj yantʼanakan uñjaskasas aguantatap uñachtʼaykaspa ukham janiw amuyañasäkiti. Griego arut traducitäki uka “aguantaña” arojja, “jan walinakan [...] saytʼatäskakiña” sañwa muni. Aguantaña aru apnaqasajj ¿kamsañsa Biblia qellqerinakajj munasipkäna? Uka toqet mä yatjjattʼat jaqejj akham siwa: “Aguantañajja mä jaqerojj taqe chʼamamp jan walinakar saykatañatakiw yanaptʼi [...]. Aguantir chuymanïñajj jan walinakar jan ajjsaras saykatañawa. Ukham chuymanïñaw jan walinak aguantañatakisa, tʼaqesiñanakan uñjaskasin aguantañatakisa, aguantasajj kuna sumanaksa jutïrin katoqañäni uka toqet lupʼiñatakis yanaptʼasi” sasa.

⁵ Ukhamasti, aguantañajj janiw jan walinakamp tʼaqesiñakïkiti. Bibliarjamajja, jan walinakan uñjasisajj wali chʼamaniw jiwasajj saytʼasiñasa, janirakiw Jehová Diosat jitheqtañasäkiti. Ukhamarus janiw amuyusan aynachtʼañasäki, kuntï jutïrin katoqkañäni uksa taqe chuymaw suytʼaskakiñasa. Uk sum amuytʼañatakejj carcelankir pä chachanakat parltʼañäni. Jupanakat maynejj jaqe jiwayatapatwa ukanki, wali colerata ukat wali aynachtʼataw sentenciap phoqaskaraki. Maynïristi cristiano masisawa, jupajj Jehová Diosar adoratapatwa ukanki. Ukampis kusisitaw sentenciap jupajj phoqaski, janirakiw llakimpis aynachtʼkiti, kuna laykutejj ‘akankkasajj Jehová Diosar confiyatajwa uñachtʼayirista’ sasaw amuyi. Jaqe jiwayatapat carcelankki uka jaqejj ¿aguantañ toqet wali yateqaskañawa sasin sissnati? Janiwa. Antisas kawkïritï Jehová Diosat jan jitheqtasin aguantki ukaw wali yateqaskañajja (Santiago 1:2-4).

 6. ¿Kunjamsa aguantañ yateqsna?

⁶ Salvasiñatakejja aguantañajj wali importantewa (Mateo 24:13). Ukampis janiw khitis aguantir chuyman nasktanti, jan ukasti taqeniw aguantañ yateqañasa. ¿Kunjamsa uk lursna? Romanos 5:3 textojj akham siwa: “Tʼaqesiñanakajj aguantañatakiw yanaptʼistu” sasa. Ukhamajj jiwasatï aguantir chuymanïñ munstan ukhajja, Jehová Diosar serviñan yantʼanakan uñjasktan ukhajj janiw sustjasiñasäkiti, jan ukasti jan ajjsarasaw ukanakar saykatañasa. Kunapachatï jiskʼa yantʼanakana ukat jachʼa yantʼanakan uñjasktan ukhaw aguantañ yateqtanjja, ukhamarus mä yantʼar saykatasajj yaqha yantʼar chʼamamp saykatañatakiw wakichtʼastanjja. Cheqas janiw jiwas sapakejj aguantañ yateqksnati, jan ukasti ‘Diosajj churki uka chʼamwa’ necesittanjja (1 Pedro 4:11). Kunjamsa jan walinakar chʼamamp saykatsna uk jiwasar yatichañatakejja, Jehová Diosajj Yoqaparuw aka oraqer khitaniwayi. Jichhajja kunjamsa Jesusajj aguantatap uñachtʼayäna uka toqet yatjjatañäni.

7, 8. Janïr jiwkasajj ¿kuna jan walinakan uñjasisas Jesusajj wal tʼaqesïna?

⁷ Jesusajj janïr jiwayatäkäna ukhajja, kunayman toqenakat tʼaqesiyataw uñjasïna. Amuytʼañataki, jiwañapajj jakʼankjjäna uka arumajj kunayman toqetwa jupajj wal llakisïna, ukhamarus jiskʼachata ukat wali decepcionataw uñjasirakïna. Juparojj pachpa amigopaw aljantäna, mayni amigonakapasti sapak jaytasaw escapjjapjjarakïna. Ukatjja judionakan wali aytat tribunalapamp ina chʼusat juchañchataw uñjasïna. Jaqenakas wal jupat burlasipjjäna, thuskatasajj nuwjapjjarakïnwa. Ukampis Jesusajj jan ajjsarasaw taqe ukanak aguantäna, respetompiw jupanakar uñjarakïna (Mateo 26:46-49, 56, 59-68).

⁸ Jesusajj janïr jiwkasajj jañchi toqen wali tʼaqesiyatapuniw uñjasïna. Juparojj jan sinttʼasisaw nuwjapjjäna, jañchip chʼiysuñkamaw jawqʼjapjjarakïna, wilas walipuniw jañchipat saräna. Ukatjja mä lawaruw chʼakkatapjjäna, amparanakapasa kayunakapas jachʼa clavonakamp passuyatänwa. Ukhaman uñjasisajj walpun jupajj tʼaqespachäna (Juan 19:1, 16-18). Chʼakkatatäkäna uka lawa saytʼayapkäna ukhajj ¿kunjaksa tʼaqespachäna uk amuysnati? Jupan cuerpop clavonakakiw katjjasjjäna, ukhamarus qʼala usuchjat atipajj uka khankha lawar purkäna ukhajj jukʼampiw cuerpop ustʼayaspachäna. Ukham jan walinakan uñjaskasas Jesusajj aguantaskakïnwa, ukampis jupajj janiw jañchi toqenak tʼaqeskänti, jan ukasti wali llakitapuniw jikjjatasirakïna.

 9. ¿‘Tʼaqesiñ lawa apjjarusin’ Jesusar arkañajj kamsañs muni?

⁹ Jesusan arkirinakapjamajj ¿kuna jan walinakansa uñjasirakiñäni? Jesusajj akham sänwa: “Maynitejj nayar arkañ munchitojja, [...] tʼaqesiñ lawap apjjarusin jan qheparas arkitpan” sasa (Mateo 16:24). ‘Tʼaqesiñ lawa’ siski uka arojj jan walinakan tʼaqesiña, phenqʼachat uñjasiña, jiwayat uñjasiña sañwa muni. Ukhamajj Jesusar arkañajj janiw faciläkiti. Biblian yatichäwinakaparjam sarnaqasajja, jiwasajj janiw mayni jaqenakjamäktanti, ukatwa aka mundonkirinakajj wal uñisipjjestu (Juan 15:18-20; 1 Pedro 4:4). Ukampis tʼaqesiñ lawa apjjarusin Jesusar arkañ janiw ajjsarayasktanti. Ukham luratasat tʼaqesiyata, arknaqata, jan ukajj jiwayatas uñjaskchiñänejja, jupat yateqasisajj jan walinak aguantaskakiñäniwa (2 Timoteo 3:12).

10-12. 1) ¿Jesusatakejj jucharar jaqenak taypin jakañajj kunjamakïpachänsa? 2) ¿Kunjamanakan uñjasisas Jesusajj aguantatap uñachtʼayäna?

¹⁰ Jesusajj aka oraqenkkäna ukhajja, jucharar jaqenak taypinwa jakäna, ukajj jupatak mä yantʼarakïnwa. Ak amtañäni, kunapachatï Jehová Diosajj aka oraqsa ukat aka oraqen taqe jakirinaks lurkäna ukhajja, Jesusajj “suma yatjjattʼat mä trabajirjamaw” jupatak trabajïna (Proverbios 8:22-31). Ukhamajj kuna amtampis Jehová Diosajj jaqenakar luräna uk Jesusajj sum yatïna. Cheqansa, jaqenakajj Awkipjam chuymanïpjjatapwa uñachtʼayapjjañapäna, ukatjja jan usuntasa wali kusisitaw jakasipjjañaparakïna (Génesis 1:26-28). Ukampis Jesusajj aka oraqenkjjäna ukhajja, jaqenakajj jucha utjatap laykojj kunjamäjjapjjänsa uk pachpa nayranakapampiw uñjäna, jaqenakan chuymapan kunas utjäna kunjamas jikjjatasipjjäna uks amuyarakïnwa. Ukhamasti, jaqenakajj kunja imperfectöjjapjjänsa uk uñjasajj walpun Jesusajj chuym ustʼayaspachäna, aguantepas yantʼataw uñjasirakpachäna. Ukampis ¿imperfecto jaqenakar uñjasajj aynachtʼpachänti, janit jupanakarus confiyjjpachäna? Kunsa Jesusajj lurpachäna uk jichhajj yatjjatañäni.

¹¹ Walja judionakajj janiw Jesusan arunakap istʼañ munapkänti, uk uñjasasti Jesusajj wal chuym ustʼayasïna, mayninakan uñjkataw jachaqtʼasirakïna. Ukampis ukham jan istʼañ munir jaqenak taypin jakkasas jan aynachtʼasaw predicaskakïna, “sapüruw templon yaticharakïna” (Lucas 19:41-44, 47). Maysa toqetjja, Jesusajj fariseonakan “qala chuymanïpjjatap yatisajj walpun llaktʼasirakïna”, kuna laykutejj uka fariseonakajj janiw mayninakat sinttʼasipkänti, ni khuyaptʼayasipkänsa. Antisakiw Jesusajj sábado urun mä usut jaqer qollaniti janicha uk jupanakajj uñchʼukipjjäna. Ukampis Jesusajj janiw uka fariseonakar ajjsarkänti, ukatwa ¡uka pachpa sinagogan uka usut jaqer qolläna! (Marcos 3:1-5).

¹² Discipulonakapan pantjasitanakapajja, Jesusatakejj mä yantʼarakïpachänwa. Kunjamtï capítulo 3 ukan yatjjataniwayktanjja, jupanakat khitis jilïrïna uka toqet kutin kutiniw wal jiskhisipjjäna (Mateo 20:20-24; Lucas 9:46). Ukatwa Jesusajj humilde chuymanïñ toqet walja kut parläna (Mateo 18:1-6; 20:25-28). Ukampis jupanakajj janiw jankʼak cambiapkänti. Jesusajj qhep qhepa aruman jupanakampïskäna ukhajja, “khitis jiwas taypit jilïrejja sasaw jupanakkam wal chʼajjwarapjjäna” (Lucas 22:24). Uk uñjasajj ¿janipuniw akanakajj cambiapkaniti sasat Jesusajj sispachäna? Janiwa. Jupanakarojj pacienciampiw uñjaskakïna, ukhamarus pantjasitanakap uñchʼukiñat sipansa, kunja suma chuymanïpjjänsa uk uñjañatakiw chʼamachasïna. Qhawqsa Jehová Diosar munasipjjäna, qhawqsa munañap lurañ munapjjäna uks Jesusajj yatirakïnwa (Lucas 22:25-27).

13. ¿Kuna yantʼanakantï Jesusajj uñjaskäna ukhamanakan uñjasiraksnati?

¹³ Inas jiwasajj kuna yantʼanakantï Jesusajj uñjaskäna ukhamanakan uñjasirakchiñäni. Sañäni, inas yatiykasajj Diosan arunakap jan istʼañ munirinakamp jikischiñäni, jan ukajj inas jupanakajj predicañ jarkʼapjjchistani. Ukhamanakan uñjasisajj janiw aynachtʼañasäkiti, yatiyirejj saraskakiñasawa (Tito 2:14). Ukatjja jilat kullakanakasan pantjasitanakapaw jiwasatakejj mä yantʼarakïspa. “Jan amuytʼasis arsut” arunakapasa, jiwasar chuym ustʼayañ amtamp luratanakapas wal aynachtʼayistaspa (Proverbios 12:18). Ukham pantjasitanakapatjja, ‘jupanakajj janipuniw cambiapkaniti’ sasajj janiw amuyañasäkiti, jan ukasti suma chuymampiw jupanakar uñjaskakiñasa, kuna sumanaksa lurañ yatipjje uka toqets lupʼiñasarakiwa (Colosenses 3:13).

14. ¿Kunanakas Jesusarojj Jehová Diosat jan jitheqtañatak yanaptʼäna?

¹⁴ Jesusajj tʼaqesiñanakan uñjaskasasa, jiskʼachat uñjaskasasa ukat chuyma ustʼayatpachas janipuniw Jehová Diosat jitheqtkänti, ukatakejj akanakaw yanaptʼäna: maya, jupajj alajjpacharuw uñtäna, mä arunjja ‘aguantañatak chʼam churir’ Jehová Diosaruw yanaptʼa mayisïna (Romanos 15:5). Paya, aguantasajj kunsa jutïrin katoqani uka toqetwa lupʼïna. Jichhajj ukanak mayat may amuytʼañäni.

15, 16. 1) ¿Aguantañatakejj jupa pachparukit Jesusajj confiyaspachäna? 2) ¿Jesusajj kuna toqensa Awkiparojj taqe chuyma confiyäna, ukat kunatsa?

¹⁵ Jesusajj Diosan perfecto Yoqapäkchïnsa, aguantañatakejj janiw jupa pachparuk confiyaskänti, jan ukasti Awkiparuw yanaptʼayasiñatakejj jakʼachasïna. Uka toqet apóstol Pablojj akham sänwa: “Cristojj [...] khititejj jiwañat salvkaspäna uka Diosaruw jachʼat artʼasisa jachtʼasis ruwtʼasïna, mayisirakïna” sasa (Hebreos 5:7). Jesusajj janiw Diosarojj yanaptʼita sasakejj siskänti, jan ukasti wal ruwtʼasïna. Ruwtʼasiña arojja, chuymatpach yanaptʼa mayiña sañwa muni. Ukhamarus Jesusajj janiw mä kutik Jehová Diosar ruwtʼaskänti, jan ukasti walja kutiw jachʼat artʼasis wal ruwtʼasïna. Cheqas Getsemaní jardinan kutin kutiniw Jehová Diosarojj taqe chuyma orasïna (Mateo 26:36-44).

¹⁶ Jehová Diosajj ruwtʼasitanakaj istʼitaniwa sasajj taqe chuymaw Jesusajj confiyäna, kuna laykutejj Awkipan ‘oracionanak istʼirïtap’ sum yatïna (Salmo 65:2). Janïr aka oraqer jutkäna ukhajja, Awkipajj kunjamsa jupat jan jitheqtir servirinakapan oracionanakap jaysäna uk Jesusajj sum uñjäna. Amuytʼañataki, Daniel profetajj chuymatpach orasiskäna ukhajja, Jehová Diosajj jupar chʼamañchtʼañatakejj mä angelapwa khitäna, Daniel profetajj janïr orasiñ tukuykäna ukhaw uka angelajj ukankjjäna (Daniel 9:20, 21). Ukatwa Jesusajj taqe ruwtʼasitanakajaruw Awkijajj istʼitani sasin confiyäna, jan ajjsarasarakiw “jachʼat artʼasisa jachtʼasis ruwtʼasïna”. Jehová Diosasti Yoqapan ruwtʼasitaparojj istʼänwa, ukatwa jupar chʼamañchtʼañapatakejj mä angelar khitanïna, ukhamat yantʼanakar jan ajjsaras saykatañapataki (Lucas 22:43).

17. Aguantaskakiñatakejj ¿kunatsa alajjpach uñtañasa, ukat kunjamsa uk lursna?

¹⁷ Jan waltʼäwinakan aguantañatakejja, jiwasajj alajjpacharuw uñtañasaraki, mä arunjja ‘chʼam churkistu’ uka Jehová Diosaruw oración toqe jakʼachasiñasa (Filipenses 4:13). Jehová Diosan perfecto Yoqapajj Awkipan yanaptʼap thaqapunirïnwa, ukhamajj pantjasiri jaqenakjamajj jukʼampwa jiwasajj Diosan yanaptʼap thaqañasa. Jesusjamarakiw Jehová Diosamp yanaptʼayasiñatakejj kutin kutini wal ruwtʼasiñasa (Mateo 7:7). Jiwasajj janiw mä ángel toqe yanaptʼa katoqañ suyktanti, ukampis oracionanakaj Jehová Diosajj istʼaniwa sasajj taqe chuymaw confiytanjja, ukatwa ‘uruy arum Diosar wal orastanjja’, chuymatpachwa ruwtʼasiraktanjja’ (1 Timoteo 5:5). Kuna jan walinakansay uñjaskchiñänejja, Jehová Diosajj taqe chuyma ruwtʼasitanakasarojj jaysanipuniniwa. Jupaw aguantaskakiñatakejj yatiñsa, jan ajjsarañsa, chʼams churistani (2 Corintios 4:7-11; Santiago 1:5).

18. ¿Kunas Jesusarojj tʼaqesiñanakan aguantañatakejj yanaptʼäna?

¹⁸ Jesusarojj tʼaqesiñat sipansa, kuntï jutïrin katoqañapäkäna uk taqe chuyma suytʼañaw aguantañatakejj yanaptʼarakïna. Bibliajj uka toqet akham siwa: “Jupajj nayraqatapan uskutäkäna uka kusisiñatwa mä tʼaqesiñ lawan jiwañkam aguantäna” sasa (Hebreos 12:2). Uka arunakarjamajja, kun katoqañtï suytʼasktan ukat katjjarusiñasa, kusisit chuymanïñas aguantañatakejj wali importantewa. Amuytʼañataki, suytʼäwisajj kusisitäñatakiw yanaptʼistu, kusisitäñasti jan qarjtas aguantañatakiw yanaptʼarakistu (Romanos 15:13; Colosenses 1:11). Jesusajj walja suma suytʼäwinakanïnwa. Jiwañkam Diosat jan jitheqtasajj kunjamsa Awkipan sutip qʼomachani, kunjamsa Jehová Diosajj juchampit jiwañampit jaqenakar salvani uk jupajj sum yatïna. Ukhamarus Diosan Reinopan Reyit apnaqañsa, Jachʼa Jilïr Sacerdotet serviñsa taqe chuymaw suytʼäna, cheqas ukhamatakwa Diosat jan jitheqtir jaqenakatakejj walja bendicionanak apanispäna (Mateo 20:28; Hebreos 7:23-26). Jutïrin kuna sumanakatï utjañapäkäna uka suytʼäwit katjjarusisajja, Jesusajj chuymapan wali kusisitänwa, ukaw aguantañatakejj yanaptʼarakïna.

19. Yantʼanakan uñjasktan ukhajja, ¿kunjamsa suytʼäwisasa ukat kusisit chuymanïñas aguantañatak yanaptʼistaspa?

¹⁹ Jesusjam aguantañatakejja, kun katoqañtï suytʼasktan ukat wal katjjarusiñasa kusisit chuymanïñas jiwasatakejj wali importanterakiwa. Apóstol Pablojj “kuntï jutïrin katoqapkäta ukat wal kusisipjjam. Jan waltʼäwinakan uñjasisajj aguantapjjam” sasaw säna (Romanos 12:12). Inas jumajj mä jan waltʼäwin uñjassta. Ukhamächi ukhajj kunanaktï jutïrin katoqkäta uk jan armasimti, kunjamsa aguantasajj Jehová Diosan sutip jachʼañchäta uks janipun armamti, ukatjja kunjamsa Diosan Reinopamp apnaqatajj aka oraqen jakasjjäta uka toqets lupʼirakim. Uka urunakanjja, aka oraqejj mä suma paraisor tukuyatäjjaniwa, bendicionanakas walipuniw utjani. Cheqas kunjamsa Jehová Diosan amtanakapajj aka oraqen phoqasini, kunjamsa sutipajj qʼomachat uñjasini, kunjamsa tʼaqesiykistu ukanakas aka oraqet chhaqtayatäni ukanak amtañasapuniwa. Ukhamatwa kusisit chuymanïñäni, ukatsti uka kusisiñaw yantʼanak aguantañatakejj yanaptʼarakistani. Ukhamajj kunjamsa jutïrin wiñayatak jakjjañäni uk amtapuniñäni, akapachan utjki uka tʼaqesiñanakajj “mä qhawqha tiempotakikiwa, janirakiw kunäkisa” (2 Corintios 4:17).

20, 21. 1) ¿Kun lurañassa Jehová Diosajj suyi? 2) ¿Kun lurañsa jiwasajj taqe chuym amtañasa?

²⁰ Jesusan arkiripäñajj janiw faciläkiti, jan walinakar saykatañatakis aguantirïñaw wakisi (Juan 15:20). Jesusajj jan walinakan aguantañatakejj listokïnwa, kunjamsa ejemplopajj yaqhanakar yanaptʼañapäna uks yatirakïnwa (Juan 16:33). Cheqas Jesusajj perfecto jaqjamaw jan walinak aguantäna, ukampis jiwasanakajj pantjasir jaqenakätanwa. Ukhamajj ¿kunsa Jehová Diosajj jiwasanakat suypacha? Apóstol Pedrojj uka toqet akham siwa: “Cristow jumanakarojj mä ejemplo churapjjtamjja, ukhamat jumanakajj wali amuyumpi kayup arkapjjañamataki” sasa (1 Pedro 2:21). Jesusajj kunjamsa jan walinakar saykatäna ukajj jiwasatak ‘mä ejemplowa’, mä arunjja jupajj wali yateqaskañawa.a Ukhamarus jupan aguantatapajj chellqtatanakaru jan ukajj taktʼasitanakar uñtasitawa. Jiwasajj janiw kunapachas “kayup” cheqaparjam arkañ puedkañäniti, ukampis jan jitheqtasaw jupar ‘wali amuyump arksna’.

²¹ Ukhamajj Jesusan ejemplopat yateqasipjjañäni. Ak janipun armapjjañäniti: jiwasatï wali amuyump Jesusan taktʼatanakap arkañäni ukhajja, “tukuykam” aguantañatakejj wakichtʼatäñäniwa. Cheqas kunapachkamas jakañäni uk janiw jiwasajj yatktanti, janirakiw aka mundon tukusiñapatakejj qhawqha tiempos faltaski uks yatktanti. Akakwa sum yattanjja: Jehová Diosajj tukuykam aguantatasat walja bendicionanakwa jutïrin churistani (Mateo 24:13).