Diosax munasiñapwa uñachtʼayistu

“Diosan khuyapayasiñapax chiqa kankañ tuqiw apnaqani wiñay jakañ churañataki.” (ROM. 5:21, NM.)

1, 2. ¿Kuna pä churäwinaksa jaqinakax katuqawayapxi, ukampis kawknïris jukʼampi suma regaloxa?

“ROMANONAKAX walja leyinakwa jaytawayapxi, ukhamat taqi jaqinakan uka leyinakarjam sarnaqapxañapataki, ukax jutïr tiempon jakir jaqinakan yatiqasipxañapatakiwa” sasaw David J. Williams sat chachax säna, jupasti Australia markankir Melbourne sat Jachʼa Yatiqañ Utan yatichiri ukat Biblia yaqha arur jaqukipiriwa. Janiw uka arunakat jiskhisiñ munktanti. Ukampis jukʼamp suma churäwiw utji. Kuntï Jehová Diosax wiñay jakañ katuqañasatakisa, qhispiyasiñasatakis ukat Jupamp sum uñjatäñatakis lurawayki ukaw taqi kunat sipans mä suma regaloxa.

² Jehová Diosax kuntï leyinakaparjam uka regalo churkistu ukaw wali askixa. Pablox uka tuqitwa Romanos 5 jalajan qhanañchi, ukampis janiw leyinakatsa qhanañchañ munkaspa ukham parlkänti, jan ukasti, munasiñampi ukat chuymar purtʼkiriw akham qhanañchäna: “Dios nayraqatan askit uñtʼatäxatasatwa Diosampi sumankañax utjistu Jesucristo Tatitusana” sasa. ¿Uka regalo katuqasirinakax kunjamsa uñjapxi? Jehová Diosax munasiñapatwa uk churistu sapxiwa, ukatwa uka pachpa munasiñ Diosar uñachtʼayañ munapxaraki. Pablox ukhamwa amuyarakïna, ukatwa akham säna: “Diosasti jiwasan chuymanakasarux munasiñapwa phuqhantistu Qullan Ajayu churkistu uka tuqi” sasa (Rom. 5:1, 5).

 3. ¿Kunanak jisktʼasiñasasa?

³ ¿Diosax khuyapayasiñapat churkistu uka regalox kunatsa wakiskirixa? ¿Kunatsa Diosax chiqakankañaparjama ukat taqin askipatak churäna? ¿Uka regalo katuqañatakix kunsa maynix lurañapa? Uka jisktʼanakarux kunjamsa Bibliax chuymar purtʼkir qhanañchi uk uñjañäni, ukat kunjamsa Diosax wali munasirïtap qhanañchi uk amuyarakiñäni.

Diosan munasiñapax jucha contrawa

4, 5. 1) ¿Jehová Diosax kunjamsa wali munasirïtap uñachtʼayistu? 2) ¿Kuna tuqinakatsa Romanos 5:12 qillqatax qhanañchistu?

⁴ Jehová Diosax jachʼa munasiñapatwa jaqinakar yanaptʼañapatak sapa Yuqapar khitanïna. Pablox sänwa: “Diosax munasiñapwa uñachtʼayistu, kunapachatix jiwasanakax juchanïskäyätan ukapachaw Cristox jiwasanak layku jiwawayi” sasa (Rom. 5:8). Kunjamtï qhanañchaskixa, “juchanïskäyätan” ukhaw Jesusax jiwas layku jiwäna. Ukatpï kunjamatsa jucharar jaqir tukuwaytan uk amuytʼasiñasaxa.

⁵ Uka tuqitxa, Pablox akham qhanañchi: “Kunjämatix mä sapa jaqi tuqi juchax aka uraqir mantankixa, ukat jiwax uka jucha laykurak utjixa, ukhamarakiw jiwax taqi jaqirux katuntawayi juchachasitap layku” sasa (Rom. 5:12). Uka arunakax kamsañsa muni ukwa Bibliax amuytʼayarakistu. Kunjamtï yatktanxa, Diosaw nayrïr chacha warmirux Jupjama jan juchani luräna. Ukat Diosax churkäna uka ley phuqañax janiw chʼamäkänti. Jan istʼapkätax jiwapxätawa sasaw Diosax sarakïna (Gén. 2:17). Ukampis nayrïr awk taykasax Diosan kamachi pʼakintasax jan walpun lurapxäna, ukhamatwa Diosax janis taqi kunxar Munañanïkaspa ukat janis leyinak churañax waktʼkaspa ukham uñachtʼayapxäna (Deu. 32:4, 5).

 6. 1) Adanan wawanakapax kunatsa jiwañar katuyatäpxäna ukat Diosax leyinak churkäna ukax yanaptʼänti, uk qhanañchtʼma 2) ¿Yaqhipax wawanakapar usup katuyapki ukax kunsa amuytʼayistaspa?

⁶ Adanampi Evampix Edén jardinan juchachasipkäna uka qhipatwa wawanakanïsipkänxa. Ukatwa wawanakapan wawanakapas uka jucha katuqasax jan waltʼäwinakan uñjasipxaraki. Ukampisa Jehová Diosax janiw awk taykapan juchapatxa jupanakar juchañchkänti, kunattix janiw jupanakapunix leyip pʼakintapkänti, janirakiw uka tiempon leyinakas utjkänti (Gén. 2:17). Ukhampachas awk taykapatwa juchxa katuqawayapxi. Ukhamatwa juchasa, jiwañasa Uraqpachan jaqinakar katuntäna, Diosax israelitanakar Leyinak churkäna ukhakama, uka Leyinakaw juchararäpxatapxa uñachtʼayänxa (Romanos 5:13, 14 liytʼasiñapawa). Adanax jucha katuyawaykistu ukaxa, mä usumpi sasiwa. Säñäni, kunjamtï maynix wawanakapar usup katuykixa ukhamawa. Ukham usuni familianxa janiw taqi wawanakax uka usu katupkiti, ukhampachas allchhiw uka usunïxarakispa. Ukampisa, Adanan juchapxa taqi wawanakapaw katuqawaytanxa, ukatwa wawanakasarus katuyaraktanxa, ukhamatwa taqinix jan waltʼäwinakan tʼaqhistanxa. ¿Kunjamatsa ukax askichasispa?

¿Diosax kunsa Jesucristo tuqix churistu?

7, 8. ¿Adanat sipansa kunsa Jesusax jikxatawayäna?

⁷ Katuqawayktan uka juch apaqañatakiw munasir Diosax yanaptʼistu. Pablox ‘qhipa Adán’ tuqikiw juchat qhispiyassna sasaw qhanañchäna, mä arunxa, Adanjam jan juchani jaqikiw juchat qhispiyistaspäna (1 Cor. 15:45). Ukampis kunjamtï uñjkañänixa, jupanakax janiw kipka lurawayapkiti, ukat janirakiw luratanakapampix mä kipkaki jikxatawayapkiti (Romanos 5:15, 16 liytʼasiñapawa).

⁸ “Adanan juchapxa janiw kuntix Diosax churkistu ukampix mayachksnati” sasaw Pablox säna. Ukampis ¿“Adanan juchap[atxa]” kunas pasawayäna? Adanax juchapatwa jiwañar purtʼasïna. Ukampis kunjamtï Pablox siskixa janiw jupa sapakix jiwkänti, jan ukasti, “mä jaqin juchar puritap laykuxa walja jaqinakaw jiwa[pxi]”. Diosan chiqakankañaparjamaxa, Adanasa ukat wawanakapas taqiniw jiwapxañapäna, jiwasas uka taypinkaraktanwa. Ukampis Adán kipka jan juchani Jesusaxa, janiw Adanjamax jan walir aptʼawaykistuti. Ukhamasti ¿kunsa Jesusax jikxatawayäna? Apóstol Pablow akham sasin qhanañchistu: “Diosan askipax juti taqi jaqinakaru qʼumaru [mä arunx jan juchani] mistuyañataki jakañatakiraki” sasa (Rom. 5:18, MT).

 9. Romanos 5:16, 18, (MT) qillqatarjamax ¿Diosax kunsa jaqinakar ‘askit katuqañatakix’ luri?

⁹ ¿Griego arurjamax “qʼumaru [jan ukax jan juchaniru]” mistuñax kamsañsa muni? Williams sat chachax akham saskakiwa: “Amuytʼañasatakix taqi uka luräwinakax leyinakarjams phuqaskaspa ukhamawa. Ukampis janiw kunjamtï mä jaqix juchanakat chuymap qʼumachaskaspa ukham sañ munkiti, jan ukasti Dios nayraqatan kunjam uñjatasa uk sañ muni [...]. Sañäni, Diosaw juchanir arxatañatakix juesjam saytʼasi, mä arunxa, Diosan jawsataw juchan mä jaqix Diosan tribunalapar sari, ukampis Dios pachparakiw uka juchapatxa pampachxaraki” sasa.

10. ¿Jehová Diosan juchanakas pampachañapatakix kunsa Jesusax lurawayi?

¹⁰ ¿Kunjamaraki taqi kun chiqapar uñjir “jachʼa juesa[sti]”, jucharar mä jaqir janis kuna juchanïkaspa ukham uñjaspasti? (Gén. 18:25.) Taqi jaqinakan juchanakap qʼumachañatakixa, Dios pachpaw khuyapayasiñapat sapa Yuqapar aka Uraqir khitanïnxa. Jesusasti, yantʼatasa, jiskʼachatasa, jan wal uñjatasa, Awkipan munañapxa sum phuqawayäna. Ukat mä lawar chʼakkatat jiwañkamaw Diosarux taqi chuym istʼawayäna (Heb. 2:10). Chiqas Jesusax jan juchani jakäwip mä sacrificiot Diosar luqtawayi, ukhamat Adanan wawanakapar juchampita, jiwañampita qhispiyañataki (Mat. 20:28; Rom. 5:6-8).

11. ¿Khiti tuqikis qhispiyasiñax utjaspa?

¹¹ Kuntï Jesusax lurawayki ukax mä ‘qhispiyäwiwa’ sasaw Pablox mayni libropan qhanañcharaki (1 Tim. 2:6). Griego arut Qullan Qillqatarjamaxa, qhispiyäwi siski uka arux kuntix aptʼaskän uk kutsuyañatakix ukhat ukha churaña sañ muni. ¿Kunas aptʼasïnxa? Adanax juchachasisaw taqi wawanakapar juchampir jiwañampir aptʼawayistu. Maysa tuqitxa, Jesusax jan juchani millón millón wawanakanïspänwa.a Ukatwa, Jesusampi jan juchani wawanakapampix Adanan juchap lanti, jucharar wawanakap lantiw saytʼapxasapäna, ukhamat kuntï Adanax aptʼkän uk kutsuyañataki sasin amuyasïnxa. Ukampis ¿Jesucristo ukat jan juchani wawanakap tuqiw qhispiyäwix utjani sasati Biblian yatichi? Janiwa. Antisas Romanos 5:15-19 qillqatanxa “mayni sapa jaqin” jiwatapampikiw qhispiyasiñax utji sasaw qhanañchi. Kunjamtï amuyktanxa, Adanax qalltan jan juchanïnwa ukhamarakiw Jesusax jan juchanïnxa. Ukhamasti “Jesucristo tuqi[kiw] qhispiyasiñax” utji, mä arunxa Diosar taqi chuyma istʼatapa, ukat jiwañkam yupaychatap laykuw wiñay jakañ katuqsna (2 Cor. 5:14, 15; 1 Ped. 3:18). Ukhamarus ¿kunjamsa Diosax Jesusan jiwatapxarux juchanakas pampachistu?

Jesusan jiwatap laykuw perdonatätanxa

12, 13. ¿Jucharar mä jaqir askit uñjatapax kunatsa Diosax munasirïtapa ukat khuyaptʼayasirïtap uñachtʼayi?

¹² Jesusax juchanakas layku mä sacrificiot luqtaskäna ukxa, Jehová Diosax katuqänwa (Heb. 9:24; 10:10, 12). Ukampis ¿Jesusan arkirinakapax kunjamansa aka Uraqinkkasax jikxatasipxäna? Taqiniw juchararäsipkakïnxa, apostolanakapas ukhamaraki. Taqi kun sum lurañatakis chʼamachasipkchïnxa, awisax pantjasipxänwa. ¿Kunatsa? Adán awkipat juch katuqapxatap laykuw ukhaman uñjasipxäna (Rom. 7:18-20). Ukampis Jehová Diosaw uka jan waltʼäwi askichaspäna. Jesusax jaqinakar qhispiyañatak luqtaskäna ukxa Diosax katuqasïnwa, ukatwa yupaychirinakaparux askit uñjasapäna, chiqas ukwa Diosax luräna.

¹³ Ukampis Diosax janiw apostolanakansa ni mayni jaqinakan aski luratanakap laykukix Yuqapan jiwatapxarux qhispiyañapapunïkänti. Jan ukasti, munasiñapata ukat khuyapayasiñapatwa ukham luräna. Ukat chuymapatwa jiwañar katuyat jaqinakarus perdonäna, ukat Adanax katuykäna uka juchanakatsa perdonxarakïna. Pablox sumwa uka tuqit qhanañchi: “Diosan munasiñapatwa jumanakax qhispiyatäpxtaxa iyawsañ layku. Akasti janiw jumanakan luräwinakamäkiti, jan ukasti Diosaw jumanakar churapxtam” sasa (Efe. 2:8).

14, 15. ¿Diosamp aski jaqit uñjatäpki ukanakax kuna regalsa katuqapxaspäna, ukampis kunsa lurasipkakiñapa?

¹⁴ Katuqktan uka juchanaksa, pantjasitanakassa Diosax pampachistuwa, ukax ¡mä suma regalopuniwa! Sañäni, Diosar janïr uñtʼkasin kuna jan walinaktï taqpach cristianonakax lurkayätan ukanak jakthapsnaxa, sinti waljäspawa. Ukampis Diosax Jesusan jiwatapxaruw taqi uka juchanakasat perdonxistaspa. Kunjamtï Pablox qillqkänxa, “qhispiyasiñxa Diosax ina chʼusatakwa jaqinakarux churi, uka jaqinakax walja juchanïskpasaya” (Rom. 5:16). Ukampis apostolanakasa ukat mayni jaqinakas aski jaqit uñjatäpkchïnsa, Jehová Diosarux iyawsañampiw yupaychasipkakiñapäna. Ukham lurasax ¿kunsa jutïrin qatuqapxasapäna? “Machaq jakañanxa munañanïpxani, khitinakarutix Diosax ina chʼusataki [‘aski jaqinakat’, NM] katuqki Jesucristo layku ukanakaxa.” Adanax jiwañaruw aptʼawayistu, ukampis Diosan suma regalopax wiñay jakañ churistu (Rom. 5:17; Lucas 22:28-30 liytʼasiñapawa).

¹⁵ Diosan khuyapayasiñapat aski jaqit uñjatäpki ukanakaruxa, alaxpachankir wawanakaparjamaw Jehová Diosax uñji. Ukat Jesucristomp chika apnaqañataki ajllitäpxarakiwa, ukatwa Jesusamp chika alaxpachat apnaqañatakix ajayjam jaktañatak suytʼäwinïpxi (Romanos 8:15-17, 23 liytʼasiñapawa).

Yaqhanakarus munasiñap uñachtʼayiwa

16. ¿Jesucristomp chika alaxpachan jan apnaqapkani ukanakax kuna suytʼäwinïpxisa?

¹⁶ Ukampis Diosar taqi chuyma yupaychirinakatxa janiw taqinix Jesucristomp chika apnaqapkaniti. Kunjamtï Jesusat nayrax aka Uraqin wiñay jakañ suytʼäwinïpkänxa, ukhamarakiw cristianonakax uka suytʼäwinïpxi. ¿Jupanakarux aski jaqitti Diosax uñjxi, ukhamat wiñay jakañ katuqapxañapataki? Pablon romanonakar qillqataparjamaxa, ukhamäskapuniwa sisnawa.

17, 18. 1) ¿Diosax kunjam jaqirus Abrahamarux iyawsäwip laykux uñjäna? 2) ¿Abrahamax pantjasirïkchïnsa kunatsa Diosax askit katuqäna?

¹⁷ Pablox Abraham chachatwa parli, jupasti Diosax Israel markar Leyinakap janïr churkäna uka tiemponwa jakäna, uka tiempotakix alaxpachan jakaña suytʼäwis janïraw utjkänti, kunattix Jesusas janïraw jakäwip Diosar luqtkänti (Heb. 10:19, 20). Pablox akham siwa: “Diosax Abrahamarux mä arustʼäwi arsuwayäna jupan wawanakaparu akapacha herenciata churañataki, ukampis uka arustʼäwxa janiw arskänti jupan leyiru phuqhatap layku, jan ukasti Diosar iyawsañapaw utjäna, ukatwa Diosax juparux askit katuqäna” sasa (Rom. 4:13; Sant. 2:23, 24). Kunjamtï amuyktanxa, Diosax aski jaqitwa Abrahamarux katuqäna (Romanos 4:20-22 liytʼasiñapawa).

¹⁸ Ukampis janiw ukax janipunis kuna juchsa lurkaspa ukham sañ munkiti. Pantjasirïkchïnsa aski jaqit uñtʼatänwa (Rom. 3:10, 23). Yatiñan Jehová Diosaxa, Abrahamax kunja iwsäwinisa ukat ukarjamax kunanaksa luräna ukanakxa sum yatïna. Jutaniw sat Wawax familiapatwa mistuñapäna, ukaruw Abrahamax iyawsäna. Uka Wawasti Jesucristowa (Gén. 15:6; 22:15-18). Jachʼa Juez Diosax Jesusan luqtasiñap yatisaw Abrahamarusa ukat uka tiempon jakir yupaychirinakaparus perdonäna, ukhamat jutïrin jaktanipxañapataki (Romanos 3:24, 25 liytʼasiñapawa; Sal. 32:1, 2).

Diosax aski jaqitwa katuqarakistu

19. ¿Diosax Abrahamar askit katuqatapax kunjamsa jichha tiempon jakir cristianonakarux chʼamañchtʼi?

¹⁹ Munasir Jehová Diosax Abrahamar aski jaqit katuqatapax wal chʼamachtʼistu. Diosax janiw ‘herencia Cristomp chika katuqirinakarjamax’ aski jaqit katuqkänti. Uka jiskʼa tamax “qullänat” uñtʼatäpxiwa, ukat “Diosan wawanakapa[t]” katuqatäpxarakiwa (Rom. 1:7; 8:14, 17, 33). Ukampis, Jesusan jakäwip janïr luqtaskipanwa, Abrahamarux “Diosan amigo[pat]” uñtʼasxäna (Sant. 2:23; Isa. 41:8). ¿Paraisor tukuyat Uraqin wiñay jakañ suyirinakat kamsasispasa?

20. Abraham chachjam aski jaqit katuqatäñatakix ¿kunsa jichha tiempon jakir jaqinakax lurapxañapa?

²⁰ Uka cristianonakaxa, Jehová Diosax ‘Jesucristo tuqi qhispiyasin’ alaxpachan jakañ suytʼäwi “ina chʼusataki” churki ukxa janiw katuqapkiti (Rom. 3:24; 5:15, 17). Ukampis taqi chuymaw Jehová Diosar iyawsapxi ukat aruparus atinisipxaraki. Uksti suma luräwinakampiw uñachtʼayapxi, jaqinakarus “Diosan reinopatxa yaticha[pxi], ukhamarak Tatit Jesucristxatsa” yatichapxarakiwa (Hech. 28:31). Ukatwa Diosax Abrahamarjam aski jaqit katuqaraki. Janis alaxpachar sarañatak ajllitanakjam “ina chʼusataki” suytʼäwi katuqapkchixa, Abraham chachjam Diosan amigopat uñtʼatäñaw jupanakatakix mä suma regaloxa.

21. ¿Diosan munasiñapasa ukat chiqakankañapas kunjamsa yanaptʼistu?

²¹ Aka Uraqin wiñay jakañ suytʼäwixa phuqasipuniniwa, janiw politiconakan arsutanakapjamax jan phuqaskaniti. Uka suytʼäwxa, taqi kunxar Munañani Diosaw yatiñkankañaparjam amtawayi. Ukat Jupaw amtap phuqasiñapatakix kunatï wakiski ukanak luraski. Ukanaksti chiqakankañaparjamaw amtawayi. Jehová Diosax kunja munasirisa ukwa qhan uñachtʼayarakistu. Ukatwa Pablox akham qillqpachäna: “Diosax munasiñapwa uñachtʼayistu, kunapachatix jiwasanakax juchanïskäyätan ukapachaw Cristox jiwasanak layku jiwawayi” sasa (Rom. 5:8).

[Qhanañchäwi]

¿Amtasktati?

• ¿Adanan wawanakapjamax kunsa katuqawaytanxa, ukat kunarus ukax aptʼawayistu?

• ¿Kunjamsa ‘qhispiyäwix’ kutsuyawayistu, ukat khitis uk phuqawayi? Ukanak qhanañchtʼma.

• ¿Aski jaqit Diosamp katuqatäsax kuna suytʼäwis utjistu?

[13 janan fotopa]

Jan juchanïkasaw Adanax jan walir aptʼawayistu. Ukat jan juchani Jesusaw juchat qhispiyistu

[15 janan fotopa]

Jesucristo tuqiw Diosampix aski jaqit uñtʼatässna sasaw suma yatiyäwinak yatiytanxa