Aka oraqpachanjja jaqenakajj alcoholani umañanakat may may amuyapjje. Yaqhepajja amigonakapampïsaw awisajj alcoholani umañanak umapjje, yaqhepasti janipun ni mä jukʼs umtʼañwa amtapjjaraki. Yaqhepajj machantasiñkamaw wal umapjjaraki. ¿Alcoholani umañanakat Bibliajj kamspachasa?

1. ¿Alcoholani umañanak umañajj walikïskiti?

Bibliajja alcoholani umañanak umañajj janiw walïkiti sasajj janiw siskiti. Antisas Diosan Arupajja ‘vinojj jaqen chuymap kusisiyiriwa’ sasaw qhanañchi, ukhamajj alcoholani umañanakajj Jehová Diosan mä regalopawa (Salmo 104:14, 15). Maysa toqetjja, Jehová Diosar taqe chuyma serviri chachanakasa warminakasa alcoholani umañanak umtʼapjjarakïnwa sasaw Bibliajj qhanañchi (1 Timoteo 5:23).

2. ¿Alcohol umañ amtapki ukanakarojj kamsasas Bibliajj ewjjtʼi?

Alcohol machjasiñkam umañasa, sapa kuti umañasa Jehová Diosatakejj janiw walïkiti (Gálatas 5:21). Bibliajja “jan jumajj vino wal umir jaqenak taypinkamti” sasaw ewjjtʼistu (Proverbios 23:20). Ukhamajj alcoholani umañanak umañ amtañäni ukhajja, sapakïkasasa yaqhanakampïkasas janipuniw machantasiñkam umañasäkiti. Ukham lursna ukhajja jan walinakwa lursna, jan walinakwa parlsna, janiw sum amuytʼasiñsa puedjjsnati. Janirakiw cuerposar jan waltʼayañkamajj alcohol wal umañasäkiti. Alcoholani umañanak umkasin qhawqsa umañäni uk jan controlasiñ puedkstan ukhajja, jan ni mä jukʼsa umañatakejj wakichtʼatäñasawa.

3. ¿Kunjamanakatsa mayninakan amtanakap respetatas uñachtʼaysna?

Sapa mayniw alcoholani umañanak umaniti janicha uk amtjjañapa. Khitinakatï wali amuyumpi jan jilañchjas umtʼapki ukanakarojj janiw juzgañasäkiti. Maynejj alcoholani umañanak jan umtʼañ munkchi ukhajja, janirakiw obligañasäkiti (Romanos 14:10). Alcohol umatasatï maynir lanktʼayaspa ukhajja, janiw umañasäkiti (Romanos 14:21 liytʼäta). Cristianonakajj janiw ‘jupan askipak thaqapkiti, jan ukasti mayninakan askipwa thaqapjje’ (1 Corintios 10:23, 24 liytʼäta).

JUKʼAMP YATJJATAÑÄNI

4. Alcoholani umañanak umätati janicha uk amuytʼam

¿Alcoholani umañanak umañ toqet Jesusajj kunsa amuyäna? Uk yatiñatakejja Jesusan nayrïr milagropat yatjjatañäni. Juan 2:1-11 liytʼasajja aka toqetwa parltʼapjjäta:

• Liytʼktan uka textorjamajja, ¿kunsa Jesusajj alcoholatsa khitinakatï alcohol umapki ukanakatsa amuyi?

• Jesusatakejj alcohol umañajj walikïskänwa, ¿ukhamajj khititï alcohol umki ukat kunsa mä cristianojj amuyañapa?

Niyakejjay cristianonakajj alcoholani umañanak umañ puedisipkchejja, taqe horasan umañajj walïkaspas ukham janiw amuyañasäkiti. Proverbios 22:3 liytʼasajja, alcohol umañajj aka toqenakan walikïskaspati janicha ukanakatwa parltʼapjjäta:

• Auto jan ukajj maquinaria apnaqkasina.

• Usur warmïkasina.

• Doctoramp alcohol umañat jarkʼatäsina.

• Alcohol qhawqsa umañäni uk jan controlasiñ puedkasina.

• Markan leyiparjamajj alcohol umañ jarkʼatäsina.

• Nayrajj umirïpjjatap layku jan umtʼañ amtawayapki ukanakampïkasina.

¿Mä casarasïwina jan ukajj yaqha ukhamanakan alcoholani umañanak utjañapajj walikïskaspati? Maynejj kuna toqenakatsa amuytʼañapa uk yatiñatakejja, VIDEO uñtapjjäta.

VIDEO: ¿Alcoholani umañanak utjañapajj walikïskaspati? (2:41)

Romanos 13:13; 1 Corintios 10:31, 32 liytʼapjjäta, ukatjja sapa texto liytʼasajja aka toqetwa parltʼapjjäta:

• Uka textonakajja, ¿kunjamsa Jehová Diosar kusisiykir suma amtanakar puriñatakejj yanaptʼiristam?

5. Qhawqsa umtʼäta ukwa amtañama

Jumatï alcoholani umañanak umañ amtäta ukhajja, akwa amtañama: ‘alcohol umañajj janiw walïkiti’ sasajj janiw Jehová Diosajj siskistuti, ukampis machantasiñkam umjasiñaw jupatakejj jan walïkiti. ¿Kunatsa ukham sistanjja? Oseas 4:11, 18 liytʼasajja aka toqetwa parltʼapjjäta:

• ¿Maynejj machantasiñkam umjaski ukhajj kunas pasaspa?

Jan umjasiñatakejj humilde chuymanïñaw yanaptʼistaspa, mä arunjja qhawqsa umañ puedtan uk sum yatiñasawa. Proverbios 11:2 liytʼasajja aka toqetwa parltʼapjjäta:

• ¿Qhawqha alcoholsa jumajj umasma uk janïräkipan amtañajj kunatsa wali wakiskirejja?

6. Alcoholani umañanakat jitheqtam

VIDEO: Janiw nayrjam jakañ munjjayätti (6:32)

• Dimitri chacharojja, ¿kunjam jaqerus alcohol umañajj tukuyirïna?

• ¿Alcohol umañ jaytañ amtasajj janit mayampis umjjäna?

• ¿Kunjamsa alcohol umañ jaytäna?

1 Corintios 6:10, 11 liytʼasajja aka toqetwa parltʼapjjäta:

• ¿Machjasiñajj sinti jan walipuniti? ¿Kunatsa ukham amuyta?

• ¿Machiri mä jaqejj cambiaspawa sasajj kunatsa sissna?

Mateo 5:30 liytʼasajja aka toqetwa parltʼapjjäta:

• Jesusajj ampar khuchoqasiñat parläna ukhajja, Diosamp katoqatäñatakejj sacrificionakwa lurañasa sañ munaskäna. Jumatï alcohol umañ jaytañatak chʼamachasisksta ukhajja, ¿kunanaksa lurasma?a

1 Corintios 15:33 liytʼasajja aka toqetwa parltʼapjjäta:

• ¿Machiri jaqenakampi chikachasiñajj kunarus purtʼasiyiristamjja?

¿KUNSA YATEQAWAYTAN?

Alcoholani umañanakajja jiwasan kusistʼañasatak Diosan mä regalopawa, ukampis machjasiñasa alcohol sapa kuti umañasa janiw jupatakejj walïkiti.

Amtañataki

• ¿Alcoholani umañanak toqet Bibliajj kamsisa?

• ¿Alcohol sinti umañajj kuna jan walinakansa uñjasiyistaspa?

• ¿Mayninakajj alcoholani umañanak umañ toqet kunanaktï amtapki ukar respetatas kunjamsa uñachtʼaysna?

JUKʼAMP YATJJATAÑAMATAKI

Alcohol umapjjaniti janicha uk amtañatakejja, ¿wayn tawaqonakajj kunanakatsa amuytʼasipjjañapa?

Alcoholani umañanakat amuyasipunim (2:31)

Alcohol umañ jaytañatakejj kunanaksa maynejj luraspa uk yatjjatam.

“¿Machjayir umañanak jan jilañchjas umañatakejj kunas lurañäspa?” (Yatiyañataki julio-septiembre, 2010)

¿Cristianonakajj brindasipkaspati?

“Preguntas de los lectores” (La Atalaya, 15 de febrero de 2007)

Kunjamsa mä chachajj alcoholani umañanak jaytäna uk yatiñatakejja, “Era un barril sin fondo” sat cheqanwa liytʼasma.

“La Biblia les cambió la vida” (La Atalaya, 1 de mayo de 2012)

Taqeniw kunjamtï munktan ukham isistanjja kʼachachtʼasiraktansa. Biblian mä qhawqha wiñay yatichäwinakaparjam (principios bíblicos) isthapisisajja, kunjamtï gustkistu ukarjamaw isissna, Jehová Diosarus kusisiyaraksnawa. Jichhajja Biblian wiñay yatichäwinakapat mä qhawqhanak yatjjatañäni.

1. Sum isthaptʼasiñatakejja, ¿Biblian kawkïr wiñay yatichäwinakapas yanaptʼistaspa?

Cristianonakajja, ‘sum isthaptʼasis kʼachachtʼasipjjañapawa, humilde chuymampi, wali amuyumpiw’ isisipjjañapa. Ukatjja qʼoma jaqëpjjatapwa uñachtʼayapjjañapa, ukhamat mayninakajj ‘Dios chuymäpjjatap’ amuyapjjañapataki (1 Timoteo 2:9, 10). Jichhajj aka pusi yatichäwinakat amuytʼañäni: 1) ‘Sum isthaptʼasiñasawa’. Kunjamtï congregacionan uñjktajja, Jehová Diosan servirinakapajj janiw mä igualak isisipkiti. Isisitapasa ñikʼutap sum peintʼasipjjatapasa, Diosar respetapjjatapwa uñachtʼayi. 2) ‘Humilde chuymampiw’ isthapisiñasa, mä arunjja janiw jan walinak amuyayiri isinak uchasiñasäkiti, janirakiw taqenin jiwasar uñchʼukipjjañaps munksna ukham isisiñasäkiti. 3) ‘Wali amuyumpiw’ isisiñasa. Janiw kawkïr isinakatï modat uñstki uka isinakampejj jan amuytʼasis isisiñasäkiti. 4) Isisitasampejj ‘Dios chuymätaswa’ uñachtʼayañasa, ukhamatwa mayninakajj cheqpach Diosar adoratas amuyapjjani (1 Corintios 10:31).

2. Kunjamsa isisiñäni uk janïr amtkasajja, ¿kunatsa jilat kullakanakasat pienstʼañasa?

Kunjamsa isisiñäni uk sapa maynis amtañasäkchejja, isisitasajj mayninakarojj lanktʼayaspati janicha ukwa amuytʼañasa. Janiw mayninakarojj jan waltʼayañ munktanti, ukatwa sum isisiñatakejj wal chʼamachastanjja. Jiwasajj Biblian aka ewjjtʼaparjamaw sarnaqtanjja: “Sapa maynis kunatï jaqe masipar kusisiyki, yanaptʼkaraki ukanak thaqañapawa, ukhamat jupar chʼamañchtʼañataki” (Romanos 15:1, 2 liytʼäta).

3. Jehová Diosar uñtʼapjjañapatakejja, ¿kunjamsa isisitasajj mayninakar yanaptʼaspa?

Kawkirus sarañäni kunsa lurañäni ukatakjamaw isistanjja. Ukampis tantachäwir sarañatakisa predikir sarañatakisa, jukʼamp sum isthaptʼasiñatakiw chʼamachastanjja. Isisitasampejj janiw kuntï prediktan ukarojj jan walit uñjayañ munktanti, antisas Bibliat yateqapjjañapatak jaqenakar yanaptʼañapwa muntanjja. Ukhamatwa “jiwasar Salviri Diosan yatichäwiparojj kunayman toqet wali sum” kʼachachtʼapjjañäni (Tito 2:10).

JUKʼAMP YATJJATAÑÄNI

4. Sum isthaptʼasitasajj Jehová Diosar respetataswa uñachtʼayi

¿Kuna razonatsa yäpar isthaptʼasiñatak chʼamachastanjja? Salmo 47:2 liytʼasajja aka toqetwa parltʼapjjäta:

• Isisitasajj Jehová Diosaruw walitsa jan walitsa uñjayaspa, ¿kunjamsa uk amtañajj sum isisiñatak yanaptʼistaspa?

• Tantachäwinakatakisa predikir sarañatakisa, ¿kunjamsa isthaptʼastan uk amuytʼasiñasajj wakisiti? ¿Kunatsa ukham amuyta?

5. Sum isisiñatakisa sum kʼachachtʼasiñatakisa, ¿kunas yanaptʼistaspa?

VIDEO uñtapjjäta.

VIDEO: “Taqe kunsa Diosar jachʼañchañatak lurapjjam” (10:18)

Qhawqha qollqempis isinakas alastan ukajj janiw importantëkiti, jan ukasti isisitasajj kawkirus sarañäni kunsa lurañäni ukatakjamäñapawa, qʼomäñaparakiwa. 1 Corintios 10:24 ukat 1 Timoteo 2:9, 10 liytʼasajja aka toqetwa parltʼapjjäta:

• ¿Kunatsa isisajj kawkirutï sarkañäni ukatakjamäñapa, qʼomäñaparaki?

• ¿Kunatsa isisajj jan tʼeqëñapäki, yaqhanakarus jan walinak jan amuyayañapäki?

Cristianonakajj janiw Moisesan Leyiparjamajj sarnaqjjtanti, ukampis kunsa Jehová Diosajj isisiñ toqet amuyi uk yatiñatakiw yanaptʼistaspa. Deuteronomio 22:5 liytʼasajja aka toqetwa parltʼapjjäta:

• ¿Kunatsa mä warmejj mä chachar uñtasit jan isisiñapäki? ¿Kunatsa mä chachajj mä warmir uñtasit jan isisiñapäkaraki?

1 Corintios 10:32, 33 ukat 1 Juan 2:15, 16 liytʼasajja aka toqetwa parltʼapjjäta:

• Isisitasatï jakasktan uka cheqankir jaqenakarusa jan ukajj jilat kullakanakarus jan waltʼaychi ukhajja, ¿uka toqet llakisiñasäspati? ¿Kunatsa ukham amuyta?

• ¿Jakaskta uka cheqan jaqenakajj kunjam isinaksa uchasipjje?

• ¿Kunjamtï uka jaqenakajj isisipki ukanakat kawkïris mä cristianotakejj jan walïkaspa? ¿Kunatsa ukham amuyta?

¿KUNSA YATEQAWAYTAN?

Kunapachatï yäpar isthaptʼastan sum kʼachachtʼastan ukhajja, Jehová Diosampiru mayninakampir respetataswa uñachtʼaytanjja.

Amtañataki

• ¿Kunatsa Jehová Diosatakejj kunjamtï isthaptʼasktan ukajj wali importantejja?

• ¿Biblian kawkïr wiñay yatichäwinakapas sum isthaptʼasiñatakejj yanaptʼistaspa?

• ¿Kunjamsa isisitasajj Jehová Diosar jachʼañchañatakejj mayninakar yanaptʼaspa?

JUKʼAMP YATJJATAÑAMATAKI

Kunjamtï jumajj isiskta uk uñjasajj kunsa mayninakajj amuyapjjaspa uka toqet yatjjatam.

“¿Qué imagen doy?” (Artículo de jw.org)

Janïr mä tatuaje lurayaskasajja, kunatsa uka toqet sum amuytʼasiñasa uk yatjjatam.

“¿Hay algo de malo en hacerse tatuajes?” (Artículo de jw.org)

Suma amtanakar puriñatakejja, Biblian kawkïr yaqha wiñay yatichäwinakapas yanaptʼiristam uka toqet yatjjatam.

“¿Isisitasajj Diosar jachʼañchiti?” (Yatiyañataki septiembre 2016)

Kunjamsa isisini uk sapa mayniw amtañapa sasin amuyañatakejja, ¿kunas Diosar serviñ muniri mä warmirojj yanaptʼäna?

“El arreglo personal era mi piedra de tropiezo” (¡Despertad!, 22 de diciembre de 2003)