Qhanankapjjañäni, jan chʼamakankapjjañäniti

1, 2. 1) ¿Kunapachasa, kawkjansa ukat kunatsa Pablojj Éfeso markankir cristianonakar mä carta qellqäna? 2) ¿Kuna jisktʼanakarus qhanañchaskañäni?

APÓSTOL PABLOJJ Roma markan mä utan presot katuntatäkäna ukhajja, jilat kullakanakar chʼamañchtʼañwa munäna. Ukampis niyakejjay jupanakar jan visittʼañ puedkchïntejja, walja cartanakwa jupanakar qellqäna. Ukanakat mayjja, Éfeso markankir cristianonakaruw 60 jan ukajj 61 maranakan apayäna (Efes. 1:1; 4:1).

² Niya tunka maranak nayraw Éfeso markan Pablojj suma yatiyäwinak predicaskäna, yatichaskarakïna (Hech. 19:1, 8-10; 20:20, 21). Jupajj jilat kullakanakar wal munasïna, ukatwa Jehová Diosat jan jitheqtapjjañapatak jupanakar yanaptʼañ munäna. ¿Kunatsa Pablojj uka ajllit cristianonakarojj qhanata chʼamakat parlasin qellqpachäna? Churkäna uka ewjjtʼanakat ¿kunsa taqe cristianonakajj yateqsna? Uka pä jisktʼanakaruw aka yatichäwin qhanañchaskañäni.

CHʼAMAKAT QHANAR MISTUÑA

 3. Efesios capítulo 5 ukan ¿kunanakatsa Pablojj parläna?

³ Éfeso markankir cristianonakarojj akham sasaw Pablojj qellqäna: “Mä tiemponjja jumanakajj chʼamakar uñtatäpjjayätawa, jichhajj [...] qhanar uñtatäjjapjjtawa” sasa (Efes. 5:8). Pablojj efesionakan wali jachʼa cambionak lurapjjatapatwa qhanampit chʼamakampit parläna. Jichhajja, kunatsa “mä tiemponjja jumanakajj chʼamakar uñtatäpjjayätawa” sasin sispachäna uk yatjjatañäni.

 4. ¿Kunatsa efesionakajj falso religionankapjjatapat chʼamakankapjjäna?

⁴ Falso religionankapjjatapatwa chʼamakankapjjäna. Kunatï cheqäki uk janïr yateqkasasa janïr cristianökasas efesionakajj falso religionanakan walja creencianakapampiw apayasipjjäna, magiarus creyipjjarakïnwa. Ártemis diosan templopajj Éfeso markankänwa, uka tiemponjja uka templojj jaqenakan wali musparkañ luratanakapat maynïrïnwa. Ukarojj walja idolonakar adoririw jaqenakajj sarapjjerïna. Ártemis diosan templopar uñtasit jiskʼa templonak lurasasa, ukanak aljasas comerciantenakajj wal qollqechasipjjerïna (Hech. 19:23-27). Ukhamarus uka markankirinakajj magia luririt uñtʼatäpjjänwa (Hech. 19:19).

 5. ¿Kunatsa efesionakajj jan walinak lurapjjatapat chʼamakankapjjänwa sasin sistanjja?

⁵ Jan walinak lurapjjatapatwa chʼamakankapjjäna. Efesonkir jaqenakajj qʼañu jucha lurañar yatintatäpjjänwa, ukham lurapjjatapat janirakiw akchʼas phenqʼasipkänti. Teatronakapansa religión fiestanakapans qʼañu juchanakatak parlapjjerïna (Efes. 5:3). Jaqenakajj “kunatï walïki, kunatï jan walïki” uk janiw yatjjapjjänti, uka arunakajj janiw akchʼas chuym ustʼayasipkänti sañ muni (Efes. 4:17-19). Mä arunjja, janiw conciencianakapajj juchañchkänti, janis Jehová Diosar cuenta churapjjañapäkaspa ukham amuyapjjarakïna. Niyakejjay efesionakajj kunatï walïki, kunatï jan walïki uk jan amuyapkchïntejja, Pablojj akham sasaw jupanakar säna: ‘Jumanakajj janiw Diosar uñtʼañ munapktati, amuyunakamajj chʼamaktʼayatawa, Diosat jutki uka jakañatsa wali jayankapjjaraktawa’ sasa.

 6. ¿Kunatsa Pablojj “qhanar uñtatäjjapjjtawa” sasin efesionakar säna?

⁶ Efesionakajj chʼamakankapkchïnsa, yaqhepanakajj ukat mistjjapjjänwa, ukatwa Pablojj jupanakar akham säna: “Jichhajj Tatitumpi mayakëjjapjjatam laykojja qhanar uñtatäjjapjjtawa” sasa (Efes. 5:8). Jehová Diosan Aruparjamaw jupanakajj jakjjapjjäna, Arupajj jupanakar irpir mä qhanjamänwa (Sal. 119:105). Falso religionanakan luräwinakapsa qʼañu jucha lurañanaks jaytjjapjjänwa. Diosatwa yateqasipjjäna, jupar adorañatakisa kusisiyañatakis wal chʼamachasipjjäna (Efes. 5:1).

 7. ¿Kunansa Éfeso markankir cristianonakar uñtasitätanjja?

⁷ Kunatï cheqäki uk janïr yateqkasajja, ukhamarakiw jiwasajj falso religionankatasatsa jan walinak luratasats chʼamakankayätanjja. Jiwasanakat yaqhepajj inas falso religionanakan fiestanakap amtchiyätan, yaqhepajj inas qʼañu juchanakan sarnaqarakchiyätan. Ukampis Jehová Diosar uñtʼjjasajj jakäwisan cambionak lurayätanjja, kunatï Diosatak walïki jan walïkaraki uka leyinakaparjamaw sarnaqjjarakiyätanjja. Ukajj walja toqenakatwa yanaptʼawayistu (Is. 48:17). Ukhamäkchisa, chʼamakat jayankañasa “qhanan wawanakapjam” sarnaqaskakiñas awisajj chʼamakiwa. Kunas yanaptʼistaspa uk jichhajj uñjañäni.

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

CHʼAMAKAT JITHEQTAPJJAÑÄNI

 8. Efesios 5:3-5 textorjamajj ¿kunsa efesionakajj jan lurapjjañapäkäna?

⁸ (Efesios 5:3-5 liytʼäta). Éfeso markankir cristianonakajj jan walinak lurasajj chʼamakankapkchïnsa, uka chʼamakat jayankaskakiñatakejj kunanakatï Jehová Diosar jan gustki ukanak rechazasipkakiñapänwa. Janiw qʼañu juchatak jitheqtapjjañapäkänti, ajjtaskañ arunak parlañanaks apanukupjjañaparakïnwa. “Criston apnaqat Diosan Reinop” katoqañatakejj taqe ukanakat jitheqtapjjañapatakiw Pablojj efesionakar ewjjtʼäna.

 9. ¿Kunatsa qʼañu jucha lurañanakat jitheqtañasa?

⁹ Jiwasajj ukhamarakiw wal amuyasiñasa, ukhamat ‘chʼamakankir inamay luräwinak jan jukʼamp lurjjañataki’ (Efes. 5:11). Kunapachatï maynejj ajjtaskañanaka, qʼañu jucha lurañanak uñchʼukiskaki, ischʼukiskaki jan ukajj ukanakat parlaskaki ukhajja, kunjamats jucharojj purtʼasikipuniniwa (Gén. 3:6; Sant. 1:14, 15). Mä markanjja, walja Testigonakajj mensajenak qellqasiñatakiw mä grupo lurasipjjäna. Qalltanjja taqeniw Diosar serviñ toqet parlapjjäna, ukampis jukʼat jukʼatwa yaqha toqenakat parlañ qalltapjjäna, niya sapa kutejj maynimp ikintasiñ toqetakwa jil parljjapjjäna. Mä qhawqha tiempotjja, waljaniw uka jan walinakat parlapjjatapat cheqapun qʼañu juchar purtʼasipjjatap reconosipjjäna.

10. ¿Kun amuyañassa Supayajj muni? (Efesios 5:6).

¹⁰ Kunatï walïki jan walïkaraki uk jan amuyapjjañapatakiw Supayajj nayratpach jaqenakar engañjaski (Is. 5:20; 2 Cor. 4:4). Ukajj qhanaw uñjasi. Akapachankir jaqenakajja, kunanakatï Jehová Diosatakejj qʼañüki ajjtaskañäkaraki ukanakajj janis kuna jan walïkaspa ukhamwa amuyayañ munistu (2 Ped. 2:19). Ukatwa walja peliculanakansa, televisionansa, internetans Jehová Diosan leyinakap conträki uka amuyunakajj jilapartejj utji. Aka mudon utjki uka jan walinakasa qʼañu juchanakas janis kuna jan walïkaspa, aleq kusistʼañatakïkaspasa ukhamwa Supayajj amuyayañ munistu (Efesios 5:6 liytʼäta).

11. Efesios 5:7 textonkki uka ewjjtʼar istʼañajj wali importantëtap ¿kunjamsa Angela kullakan experienciapajj uñachtʼayi? (Fotonak uñjjattʼarakïta).

¹¹ Jehová Diosan leyinakapar istʼañ chʼamtaykistaspa uka jaqenakamp chikachasiñaswa Supayajj muni. Ukatwa Pablojj jan walinak lurir jaqenakat jitheqtapjjañapatakejj efesionakar akham sasin ewjjtʼäna: “Jan jupanakjam lurapjjamti” sasa (Efes. 5:7). ¿Kunatsa jiwasajj efesionakat sipans jukʼamp amuyasiñasa? Kuna laykutejj janiw jichhürunakan jaqenakamp jikisisakejj parlktanti, jan ukasti redes sociales ukanak toqes parlaraktanwa. Asia toqenkir Angelaa kullakat parltʼañäni. Jupajj redes sociales ukanakajj kuna jan walirus purtʼasiyistaspa ukwa uñjäna. Jupajj akham siwa: “Jukʼat jukʼatwa amuyus mayjtʼayistaspa. Biblian wiñay yatichäwinakapar jan respetir ‘amigonakanïñajj’ nayatak walikjamakëjjänwa. Qheparojja, Jehová Dios nayraqatan jan wal sarnaqañajj janis sinti jan walïkaspa ukhamwa amuyjjayäta” sasa. Ukampis ancianonakaw uka kullakarojj cambionak lurañapatakejj wali munasiñamp yanaptʼapjjäna. Kullakajj akham saskakiwa: “Jichhajj janiw redes sociales ukar chuym uchjjti, Jehová Diosar serviñaw nayatakejj nayrankjje” sasa.

12. ¿Kunsa Jehová Diosan leyinakap istʼañatakejj lurañasa?

¹² Aka mundonkirinakatakejj qʼañu juchan sarnaqañajj walikïskchisa, janiw ukamp engañayasktanti, ukajj jiwasatakejj janiw walïkiti (Efes. 4:19, 20). Akham jisktʼasiñasawa: “Niyakejjay escuelankir compañeronakajasa, trabajonkir compañeronakajasa jan ukajj yaqha jaqenakas Jehová Diosan leyinakapar jan respetapkchejja, ¿jupanakat jitheqtañatakejj chʼamachasipuntti? Jaqenakajj jan amuytʼañ munirits uñjapkchitojja, ¿jan ajjsartʼasat Biblian wiñay yatichäwinakap arjjattjja?” sasa. Maysa toqet kunjamtï 2 Timoteo 2:20-22 textojj siskejja, wali amuyumpiw congregacionan amigonakas ajlliñasa. Amtapuniñäni, janiw taqenis Jehová Diosat jan jitheqtañasatakejj yanaptʼapkistaniti.

“QHANAN WAWANAKAPJAM” SARNAQASIPKAKIÑÄNI

13. “Qhanan wawanakapjam sarnaqasipkakim” siski ukajj ¿kamsañsa muni? (Efesios 5:7-9).

¹³ Éfeso markankir cristianonakar chʼamakat jitheqtasipkakiñapatak ewjjtʼkäna ukhajja, Pablojj jupanakar akham sarakïnwa: “Qhanan wawanakapjam sarnaqasipkakim” sasa (Efesios 5:7-9 liytʼäta). ¿Uka arunakajj kamsañsa muni? Taqe horasan cheqpach cristianjam sarnaqaña sañwa muni. Ukhamäñatakejj waljanakwa lurañasa. Ukanakat mayajj Bibliampit qellqatanakasampit sapa kut liyiñampi yatjjatañampiwa. Uk lurañäni ukhajja, jukʼampis Jesucristompit yatichäwinakapampit sum amuytʼañatakiw chʼamachasiñasa, jupajj ‘aka mundon qhanapawa’ (Juan 8:12; Prov. 6:23).

14. ¿Kunjamsa espíritu santojj yanaptʼistaspa?

¹⁴ “Qhanan wawanakapjam” sarnaqaskakiñatakejj Diosan espíritu santopan yanaptʼapaw wakisiraki. Kuna laykutejj aka jan wali pachan qʼom sarnaqañajj janiw faciläkiti (1 Tes. 4:3-5, 7, 8). Espíritu santojj aka mundonkir jaqenakan amuyunakapamp jan apayasiñatakiw yanaptʼistaspa, jupanakajj janiw Diosjam amuyapkiti. Espíritu santojj “suma chuymanïñataki, kunatejj cheqapäki uk lurañataki ukhamarak cheqapar sarnaqañatakiw” yanaptʼarakistaspa (Efes. 5:9).

15. ¿Kunsa espíritu santo katoqañatakejj lurañasa? (Efesios 5:19, 20).

¹⁵ Jehová Diosajj “mayipki ukanakarojj espíritu santo chu[rani]” sasaw Jesusajj säna (Luc. 11:13). Ukhamajj mä toqetjja, oracionan mayisisaw Jehová Diosan espíritu santop katoqsna. Maysa toqetjja, tantachäwinakan jilat kullakanakamp Jehová Diosar jachʼañchasaw espíritu santo katoqaraksna (Efesios 5:19, 20 liytʼäta). Jehová Diosan espíritu santopamp irpayasiñajja, kusisit sarnaqañatakiw yanaptʼistani.

16. ¿Kunas suma amtanakar puriñatak yanaptʼistani? (Efesios 5:10, 17).

¹⁶ Wali wakiskir amtanakar puriñatakejja, ‘kun lurapjjañassa Jehová Diosajj muni’ ukwa amuytʼañasa, ukarjamaw lurañasaraki (Efesios 5:10, 17 liytʼäta). Jiwasar mä toqet yanaptʼañapatak Biblian wiñay yatichäwinakap thaqktan ukhajja, kunsa Jehová Diosajj uka toqet amuyi uk thaqataswa uñachtʼaytanjja. Biblian wiñay yatichäwinakaparjam lurasajja, suma amtanakaruw puriñäni.

17. ¿Kunjamsa tiempos jan ina chʼusar aptʼasksna? (Efesios 5:15, 16; dibujo uñjjattʼarakïta).

¹⁷ Pablojj tiempo jan ina chʼusar aptʼasipjjañapatakiw efesionakar ewjjtʼäna (Efesios 5:15, 16 liytʼäta). Supayajj aka mundon lurañanakapamp wali ocupatäsna, Diosar serviñatak jan tiemponïksna ukwa muni (1 Juan 5:19). Diosar kunaymanit serviñat sipansa, qollqeru, estudiañaru jan ukajj trabajor chuym uchañajj facilakïspawa. Jiwasatï ukanakak lurjjsna ukhajja, aka mundon amuyunakapamp apayasiskataswa uñachtʼayaspa. Cheqas ukanak lurañajj janiw kuna jan walïkisa, ukampis janiw ukanakakejj jakäwisan nayrankañapäkiti. “Qhanan wawanakapjam” sarnaqaskakiñatakejj ‘janiw tiempos ina chʼusar aptʼasiñasäkiti’, mä arunjja kunatï wali wakiskirïki ukanakwa lurañasa.

18. ¿Kunsa Donald jilatajj tiempop jan ina chʼusar aptʼasiñatakejj luräna?

¹⁸ Jehová Diosar jukʼamp serviñatak chʼamachasipjjañäni. Ukwa Sudáfrica toqen jakasir Donald jilatajj luräna. Jupajj akham siwa: “Kunsa luraskayäta uk sum amuykiptʼasisajja, Jehová Diosaruw jupar jukʼamp serviñatak yanaptʼa mayisiyäta. Jukʼamp predicañatak mä trabajo jikjjatañatak yanaptʼita sasaw mayisirakiyäta. Jupan yanaptʼapampejj jikjjatayätwa. Ukatjja esposajampejj Diosar sapürunjam serviñwa qalltapjjayäta” sasa.

19. ¿Kunsa “qhanan wawanakapjam” sarnaqaskakiñatakejj lurañasa?

¹⁹ Pablojj Diosan amuytʼayat qellqkäna uka cartajja, efesionakarojj Diosat jan jitheqtañatakiw wal yanaptʼpachäna, jiwasarojj yanaptʼarakistaspawa. Kunjamtï yatjjataniwayktanjja, kunanakampis kusistʼañäni, khitinakampis chikachasiñäni uk sum ajlliñatakiw Pablon cartapajj yanaptʼistu. Bibliat sum yatjjatañatakis chʼamañchtʼarakistuwa, ukhamat kunatï cheqäki ukan qhanapamp irpayasiñasataki. Espíritu santojj kunja wakiskirisa uks amtayarakistuwa, ukaw suma chuymanïñatakejj yanaptʼistu. Jiwasatï Pablon ewjjtʼanakaparjam sarnaqañäni ukhajja, Jehová Diosar kusisiykir amtanakaruw puriñäni. Ukham lurasajj aka chʼamak mundot jitheqtañäniwa, qhanankarakiñäniwa.