“¡Wali amuyumpi sarnaqapjjam, amuyasipjjarakim!”

 1. Akapachan tukuyapat parlkasinjja, ¿kamsänsa Jesusajj discipulonakaparojja, ukat kamsasas ewjjtʼarakïna?

JESUSAN jiwañapatak mä qhawqha urunak faltkipanjja, “akapachajj niya tukusiñampïskani” ukhajj kuna señalas utjañapäna ukwa pusi discipulonakapajj jisktʼapjjäna (Mat. 24:3). Judionakan tiempopajj niya tukusiñampïskatap kunjamatsa yatipjjaspäna uk yatiñatakiw ukham jisktʼapjjpachäna. Jisktʼanakapar qhanañchasajja, Jesusajj janiw judionakan tiempopan tukusiñapatak parlkänti, jan ukasti “akapachajj niya tukusiñampïskani” ukatwa parlarakïna, uka tiemponwa jiwasajj jakasktanjja. Akapachan tukuyapajj kunapachas purinini uka toqet parlkasinjja, Jesusajj akham sänwa: “Kuna urünisa jan ukajj kuna horasänisa ukjja, janiw khitis yatkiti, janiw alajjpachankir angelanakasa ni Yoqas yatkiti, jan ukasti Awki sapakiw yati” sasa. Ukjjarusti akham sasaw jupanakar ewjjtʼarakïna: “Jan ikjas uñnaqapjjam”, “amuyasipjjapunim” sasa (Mar. 13:32-37).

 2. Judionakan tiempopan jakir cristianonakajj ¿kunatsa amuyasipjjapuniñapäna?

² Nayrïr patak maranakan jakir judío cristianonakajja, amuyasipjjapuniñapänwa. Ukhamatakwa salvasipjjaspäna. Judionakan tiempopajj jakʼankatap yatiñatakejj kunanaksa amuyapjjañapäna, ukwa Jesusajj arkirinakapar qhanañchtʼarakïna. Akham sarakïnwa: “Jumanakajj Jerusalenar ejercitonakamp muyuntat uñjapjjäta ukhajja, ak yatipjjam, uka markan tukusiñapajj jakʼankjjewa” sasa. Jesusan arunakaparjamajja, uka horasanwa qollunakar escapapjjañapäna (Luc. 21:20, 21). Jesusan arunakapar istʼirinakajja, romanonakajj janïr Jerusalén marka tukjapkäna ukhaw escapjjapjjäna, salvasipjjarakïnwa.

 3. ¿Kunanakatsa aka yatichäwin yatjjataskañäni?

³ Jiwasajj aka jan wali pachan tukusiñap tiemponwa jakasktanjja. Ukatwa nayrïr cristianonakjamajj wali amuyumpi sarnaqañasa, amuyasipjjapuniñasawa. Kunanakatï aka mundon pasaski ukanak wali amuyumpi uñjañatakejj kunsa lursna ukwa aka yatichäwin yatjjataskañäni. Kunatsa jiwas pachpat amuyasiñasa, akapachan niya tukusiñampïskatap yatisajj kunjamsa tiempos jan ina chʼusar aptʼasksna ukanakwa yatjjataskarakiñäni.

 4. ¿Kunanakatï mundpachan pasaski ukanak kunatsa wal yatiñ muntanjja?

⁴ Kunanakatï mundpachan pasaski ukanak wal yatiñ muntanjja, kuna laykutejj Biblian profecianakaparjamaw ukanakajj phoqasiski. Supayan apnaqat akapachan tukuyapat yatiñatakejj kunanakas pasañapäna ukwa Jesusajj qhanañchäna (Mat. 24:3-14). Apóstol Pedrojja, kunjamsa Biblian profecianakapajj phoqasiski uk amuyañasatakiw chʼamañchtʼarakistu, ukhamat Jehová Diosar jukʼamp confiyañasataki (2 Ped. 1:19-21). Biblian qhep qhepa libropajj aka arunakampiw qalltaraki: “Aka arunakajja Jesucriston qhanañchat arunakawa, Diosaw juparojj qhanañchäna, ukhamat kunatï mä jukʼa tiempot paskani ukanakat Diosan esclavonakapar qhanañchañapataki” sasa (Apoc. 1:1). Kunanakatï mundpachan pasaski ukanak yatiñ munañasa, kunjamsa ukanakajj Biblian profecianakaparjamajj phoqasiski ukanak yatiñ munañas walikïskiwa. Inas uka toqenakat jilat kullakanakasamp parlañajj gustchistu.

 5. Biblian profecianakapat parlktan ukhajj ¿kunatsa wal amuyasiñasa, ukat kunsa lurañasa? (Fotonak uñjjattʼarakïta).

⁵ Kunjamsa Biblian profecianakapajj phoqasiski uka toqet parlktan ukhajja, amuyasiñasawa. Kuna laykutejj janiw amuyusatak parlasajj congregacionar tʼaqjjtayañ munktanti. Inas oraqpachankir pʼeqtʼirinakarojj kunjamsa jan waltʼäwinak askichapjjani, kunjamsa sumankañsa jan ajjsaras jakasiñs utjayapjjani uka toqet parlir istʼstan. Kuntï uka pʼeqtʼirinakajj sapki ukajj 1 Tesalonicenses 5:3 texton parlki uka profeciaw phoqasiskpacha sasin amuyañat sipansa, Diosan markapajj jichhak apski uka yatichäwinakatwa yatjjatañasa. Jiwasatï uka yatichäwinakarjam taqe kuns parlañäni ukhajja, congregacionarojj amuyun mayachtʼatäpjjañapatakiw yanaptʼañäni (1 Cor. 1:10; 4:6).

 6. ¿Kunsa 2 Pedro 3:11-13 textot yateqtanjja?

⁶ (2 Pedro 3:11-13 liytʼäta). Biblian profecianakapat yatjjatktan ukhajja, uka profecianak amuyump uñjañasatakiw apóstol Pedrojj yanaptʼistu. “Jehová Diosan urup puriniñapjja wali amuyump suytʼasipkakim” sasaw chʼamañchtʼarakistu. ¿Kunatsa uka urun puriniñap suytanjja? Janiw ‘kuna urusa, kuna horasas’ Jehová Diosajj Armagedón apanini uk yatiñ laykojj suyktanti, antisas uka urun puriniñapkamajj ‘qʼomaw sarnaqañasa, luratanakasampis Dios chuymätaswa uñachtʼayañasa’ (Mat. 24:36; Luc. 12:40). Mä arunjja, sum sarnaqañatakiw chʼamachasiñasa, taqe kunsa Jehová Diosar wal munasitasatwa lurañasa. Ukhamäñapatakejj jiwas pachpat wal amuyasiñasawa.

 7. ¿Jiwas pachpat amuyasiñasatakejj kunsa lurañasa? (Lucas 21:34).

⁷ Jesusajj janiw discipulonakaparojj kunanakatï aka mundon pasaski ukanakatak amuyasipjjam sasajj siskänti, jan ukasti jumanak pachpat amuyasipjjam sasaw sarakïna. Ukham ewjjtʼatapajj Lucas 21:34 (liytʼäta) textonwa qhan amuyasi. Jesusajj akham sänwa: “Jumanakajj wal amuyasipjjam” sasa. ¿Jiwas pachpat amuyasiñajj kun sañs muni? Kunanakatï Jehová Diosamp sum apasitas aptʼasiykistaspa ukanakat amuyasiña, ukanakamp jan apayasiña sañ muni. Ukhamatakwa Diosan munasiñapankaskakiñäni (Prov. 22:3; Jud. 20, 21).

 8. ¿Kamsasas apóstol Pablojj cristianonakar ewjjtʼäna?

⁸ Apóstol Pablojj jumanak pachpat amuyasipjjam sasaw cristianonakar säna. Éfeso markankir cristianonakarojj akham sasaw qellqäna: “Kunjamsa sarnaqasipkta uk sum amuyasipjjam, jan jumanakajj jan amuytʼasir jaqenakjam sarnaqapjjamti, antisas yatiñan jaqenakjam sarnaqapjjam” sasa (Efes. 5:15, 16). Jehová Diosamp sum apasitasjja, Supayajj kunayman toqetwa aptʼasiyañ munistu. Ukatwa ‘kun lurapjjañassa Jehová Diosajj muni uk amuyaskakiñatak’ Bibliajj ewjjtʼistu, ukhamatwa Supayajj jan waltʼayañ munkistu taqe ukanakar saykatsna (Efes. 5:17).

 9. ¿Kunjamatsa Jehová Diosajj kun lurañassa muni uk amuysna?

⁹ Kunanakatï Jehová Diosamp sum apasitas aptʼasiykistaspa taqe ukanakat janiw mä listajj Biblian utjkiti. Jilapartejj kunanakatï Biblian jan qhanañchaski uka toqenakatwa mä amtar puriñasa. Mä suma amtar puriñatakejj ‘kun lurapjjañassa Jehová Diosajj muni’ ukwa amuytʼañasa. ¿Kunjamsa uk lursna? Diosan Arupatwa yatjjatañasa, kuntï liyktan uka toqet sapa kutiw lupʼiñasaraki. Jiwasatï kun lurañassa Jehová Diosajj muni uk amuyañäni, ‘kunjamtï Cristojj amuyki uka pachpa amuyunïñatak’ chʼamachasiñäni ukhajja, “yatiñan jaqenakjam” sarnaqañajj janiw chʼamäkaniti, kuns lurañasa uka toqet janis mä leyejj utjkchejja, yatiñan jaqjamaw sarnaqañäni (1 Cor. 2:14-16). Kunanakatï Diosat apaqkistaspa ukanakat yaqhepajj fácil amuyañjamäspawa, yaqhepasti janiw amuyañjamäkarakispati.

10. ¿Kunanakatsa amuyasiñasa?

¹⁰ Jehová Diosamp sum apasitas aptʼasiykistaspa ukanakat yaqhepajj akanakawa: coqueteaña, jiljas umaña jan ukajj jiljas manqʼaña, chuyma ustʼayir arunak parlaña, televisionana jan ukajj yaqha ukhamanakan nuwasirinak uñchʼukiña jan ukajj pornografía uñchʼukiña (Sal. 101:3). Jiwasar uñisir Diablojja, Jehová Diosamp sum apasktan uk kunjamats aptʼasiyañ munapunistuwa (1 Ped. 5:8). Jiwasatï jan amuyaskañänejja, envidiasiñsa, jan honradöñsa, jiwas pachpatak taqe kun munañsa, uñisiñsa, jachʼa jachʼa tukuñsa, chuyma ustʼatäñsa, jathar uñtasitwa pʼeqesarus amuyusarus Diablojj satantaspa (Gál. 5:19-21). Qalltan inas ukanakamp jan apayaskchiñäniti. Ukampis janitï ukanak jankʼak apanukkañäni ukhajja, venenoni ukhamarak jan waltʼayiri mä plantar tukuñkamaw jilaskakini (Sant. 1:14, 15).

11. ¿Kunanakatï Jehová Diosamp sum apasitas aptʼasiykistaspa ukanakat mayajj kawkïrisa, ukat kunatsa jitheqtañasa?

¹¹ Kunanakatï Jehová Diosamp sum apasitas jan amuykañak aptʼasiykistaspa ukanakat may amuytʼañäni: ukajj jan wali amigonakamp chikachasiñawa. Trabajosankir mä compañerosajj janis Testigökaspa ukham amuytʼañäni. Niyakejjay compañerosajj Jehová Diosan Testigonakapat wali sum parlañap munstanjja, munasiñampiw jupar uñjtanjja, yanaptʼaraktanwa. Inas awisanakajj uka compañerosamp manqtʼasir sarstan, tiempompejj sapa kutiw jupamp manqtʼasir sarjjtanjja. Awisanakajja compañerosajj qʼañu jucha lurañanakatwa parli. Ukham parlatapat qalltan mayjtʼastanwa, janirakiw jupjamas parlktanti. Ukampis tiempompejj parlatanakapar yatinoqtjjtanwa, janiw mayjtʼasjjtanti. Mä urojja, trabaj tukuyatarojj mä kun umtʼasiñatakiw invittʼistu, jiwasajj iyaw saraktanwa. Qheparusti jupjamaw amuyjjaraktanjja. Mä qhawqha tiempotjja, jupjamaw lurañ qalltjjaraktanjja. Cristianonakajj taqeniruw munasiñampi respetompi uñjtanjja. Ukampis jan ak armañäniti, khitinakampitï chikachasktan jupanakjamarakiw taqe kuns lurañ munjjañäni (1 Cor. 15:33). Jiwasatï Jesusan arunakaparjam lurañäni, jiwas pachpats amuyasirakiñäni ukhajja, Jehová Diosan leyinakap jan respetapki ukanakampejj janiw walja tiempo chikachaskañäniti (2 Cor. 6:15). Kuna jan waltʼäwis utjaspa uk amuyañäniwa, ukat jitheqtarakiñäniwa.

12. Akapachan tukusiñap puriniñapkamajj ¿kunsa Jesusan discipulonakapajj lurapjjañapäna?

¹² Akapachan tukusiñap puriniñapkamajj ¿jan kun lurasakit Jesusan discipulonakapajj quedasipjjañapäna? Janiwa. Jesusajj mä luräwi jupanakar jaytawayäna. Suma yatiyäwinak ‘Jerusalén markana, taqe Judeana, Samariana ukhamarak taqe aka oraqpachanwa’ yatiyapjjäta sasaw säna (Hech. 1:6-8). Ukat uksarojj walja lurañanakanïpjjänwa. Jupanakajj yaqhanakar predicañatakiw wal chʼamachasipjjañapäna, ukhamat jan ina chʼusar tiempo aptʼasiñataki.

13. ¿Kunatsa tiempos jan ina chʼusar aptʼasiñasäki? (Colosenses 4:5).

¹³ (Colosenses 4:5 liytʼäta). Jiwas pachpat amuyasiñasatakejja, kunjamsa tiempos apnaqasktan uk amuykiptʼañasawa. Kunjamtï Eclesiastés 9:11 textojj siskejja, “taqenirakiw akatjamat jan waltʼäwinakan uñjas[tanjja]”. Mä akatjamatwa jiwaraksna.

14, 15. ¿Kunanak lurasas tiempos jan ina chʼusar aptʼasksna? (Hebreos 6:11, 12; foto uñjjattʼarakïta).

¹⁴ Jehová Diosan munañap lurasa, jupamp jukʼamp sum apasiñatak chʼamachasisaw tiempos jan ina chʼusar aptʼaskaraksnati (Juan 14:21). Bibliajj akham sasaw ewjjtʼistu: “Suma thurtʼatäsipkakim, suma saytʼatäsipkakim, Tatitur serviñansa walja lurañanakampi ocupatäpjjam” sasa (1 Cor. 15:58). Jiwasajj jiwjjchiñänisa jan ukajj Supayan apnaqat akapachajj tukusjjchinisa, “¿kunatsa Jehová Diosar jan jukʼamp sirvkpachäyäta?” sasajj janiw chuym leqʼeskañäniti (Mat. 24:13; Rom. 14:8).

¹⁵ Jichhürunakanjja, Jesusajj arsutaparjamaw Reinon yatiyäwinakap oraqpachan yatiyapjjañapatak discipulonakapar pʼeqtʼaski. Jesusajj Jehová Diosan markap toqew suma yatiyäwinak yatiyañatak yatichistu, yatiyañatak munaski uka herramientanaks churistu (Mat. 28:18-20). ¿Kun lurañas jiwasar waktʼistu? Jehová Diosajj akapachar tukjkani uka urun puriniñapkamajja, sum predicañataki sum yatichañatak chʼamachasiñasawa, wali amuyumpiw sarnaqañasaraki. Jiwasatï Hebreos 6:11, 12 (liytʼäta) textonkki uka ewjjtʼarjam lurañäni ukhajja, ‘kuntï suytʼasktan uk tukuykamaw suytʼaskakiñäni’.

16. ¿Kun lurañsa amtañasa?

¹⁶ Kunapachas Supayan apnaqat akapacharojj tukjani uk Jehová Diosajj amtjjewa. Uka urojj purinkani ukhajja, Biblian utjki uka profecianak phoqapuniniwa. Akapachan tukusiñapajj janis jankʼak purinkaspa ukhamwa awisajj amuysna, ukampis Jehová Diosan urupajj “¡janiw qheptʼankaniti!” (Hab. 2:3). Ukhamajj kuntï Miqueas 7:7 textojj siski uk lurañ amtapjjañäni, ukan akham siwa: “Nayajj taqe chuymaw Jehová Diosarojj suytʼäjja. Nayar salvir Diosarojj wali pacienciampiw suytʼäjja” sasa.